Байбихьи 42
42
Юсупил вацал Мисриялде рачӀин
1Мисриялда тӀорщел бугеблъи лъана Якъубида, ва гьес васазда абуна:
«КидаллъизегӀан нуж цоцахъ ралагьун чӀезе ругел? 2Мисриялда тӀорщел бугилан абулеб буго. Нилъго ракъуца хвелалде, гьениреги ун, тӀорщелги босун рачӀа».
3Юсупил анцӀавго вацас Мисриялде сапар бухьана, гьениса тӀорщел босизе. 4Юсупил тӀул бикьарав вац Буняминин абуни, Якъубица гьезда цадахъ виччачӀо, гьесие щибгӀаги ккезе гурилан хӀинкъун.
5ТӀорщел гьарун Мисриялде рачӀарал гӀадамазул руккалилъе ккана ГӀизраилил васалги – тӀолабго Ханааналдаго ракъул гӀазаб рещтӀун букӀиндалха. 6Гьел рачӀараб улкаялъул кверщелчилъун Юсуп вукӀана ва гьенире рачӀаралщинал гӀадамазе тӀорщелги гьес бичулеб букӀана. Вацал рачӀана Юсупихъе ва, гӀодоб гьумерги цун, гьесда цере накабазда чӀана. 7Бер кӀутӀарабго лъана гьесда гьел, амма гьев чияр чи гӀадин чӀана ва хъачӀго гьикъана:
«Киса рачӀарал чагӀи нуж?» – ин.
«Ханааналдаса рачӀун руго тӀорщел босизе», – ян жаваб кьуна гьез. 8(Юсупида вацал лъаниги, гьезда гьев лъачӀо.)
9Гьезул рахъалъ жиндаго цере рихьун рукӀарал макьабиги ракӀалде щун, Юсупица абуна:
«Нуж руго балъгоял жасусал! Нижер улкаялъул загӀипал бакӀал ралагьизе рачӀарал чагӀи ратула нуж».
10«Гуро, нижер бетӀергьан! – абун жаваб кьуна гьез. – Ниж руго тӀорщел бичун босизе рачӀарал дур лагъзал. 11Ниж киналго вацал руго – цо инсул васал, ракӀ бацӀцӀадал гӀадамал руго ниж. Ниж руго дур лагъзал ва жасусаллъунги киданиги рукӀинчӀо».
12«Гьереси буго, – ян абуна Юсупица. – Нижер улкаялъул загӀипал бакӀал ралагьизе рачӀун руго нуж!»
13Амма гьез абуна:
«Нижер, дур лагъзадерил, анцӀила кӀиго вац вукӀана. Ханааналдаса цо инсул лъимал руго ниж. ГьитӀинав вац инсуда аскӀов тана. Нижер цо вацги цевего тӀагӀана».
14«Гьелеха, – ян абуна Юсупица. – Дица абичӀищ нуж жасусал ругилан. 15Дица хӀалбихьила нужер. ПиргӀавнасул гӀумруялхӀа, гьитӀинав вац гьаниве вачӀинчӀого, нуж гьаниса нахъе ине гьечӀо. 16Нужер цояв витӀе гьесда хадув, хутӀарал гьанир туснахъалда рукӀина. Цинги балагьила нужер гьел харбал ритӀарал ругищали. БитӀараб бицунеб батичӀони, пиргӀавнасул гӀумруялхӀа, нуж жасусал ккола!»
17Цинги Юсупица гьел лъабго къоялъ туснахъалъур тӀамуна.
18Лъабабилеб къоялъ гьес гьезда абуна:
«Дица абураб гьабуни, нуж чӀаго хутӀила – дун Аллагьасукьа хӀинкъулелъулха! 19Нуж ракӀбацӀцӀадал гӀадамал ратани, нужер цояв гьанив туснахъалъув чӀа, хутӀарал нахъе а, нужер ракъун ругел хъизамазе тӀорщелги босун. 20Цинги, гьитӀинав вацги вачун, тӀад русса. Нужер гьел рагӀаби ритӀухълъани, нуж чӀаго хутӀила».
Гьел гьедин гьабизе мукӀурлъана.
21«Вацасул хӀакъ бецӀулеб буго нилъеда. Нилъеда бихьана досда чӀун букӀараб къо, амма кигӀан дов гьарданиги, нилъ гурхӀичӀо. Гьединлъидалин нилъеда тӀаде гьаб балагь бачӀараб!» – ин абун, кӀалъана гьел цоцазда.
22Рувимица тӀаде жубана:
«Дица абичӀищ нужеда гьев васасе квешлъи гьабугеян! Нуж дихъ гӀенеккичӀо. Гьанже нилъеда бецӀулеб буго гьесул бидул хӀакъ!»
23Вацазда лъалеб букӀинчӀо жидер хабар Юсупида бичӀчӀулеб букӀин. Юсуп гьелгун кӀалъалев вукӀиндалха таржамачиясул кумекалдалъун. 24ДовегӀанги ун, гӀодана Юсуп. Хадув, аскӀове вачӀун, гьелгун кӀалъана. Ва, вацазда гьоркьоса Шимеонги тӀаса вищун, гьезул берда цебе амру гьабуна гьев вухьейилан. 25Хадуб, Юсупил буюрухъалдалъун, гьезул къандалъаби тӀорщалил цӀезаруна, щивасул къандалъоялъуб гьесухъа тӀорщалихъ босараб гӀарацги бахчана, нухда хӀажалъулеб квен-тӀехги кьуна. 26Гьиралги хӀамузда къан, вацаз рокъоре тӀадруссине сапар бухьана.
27Сордо базе чӀараб бакӀалда гьезул цояс, хӀамие кӀалцӀи базе, жиндирго къандалъоялъул кӀал бичана ва къандалъоялъул кӀалалдаго батана жиндирго гӀарац.
28«Дир гӀарац лъун буго гьаниб! Гьале гьаниб, дир къандалъоялъуб!» – ин ахӀана гьес.
«Гьаб щиб Аллагьас нилъее гьабулеб бугеб жо?!» – янги абун, ракӀ тӀун араб гӀадин лъугьана гьел гьебмехалъ ва гӀемер хӀинкъиялъ сородана.
29Гьеб хӀалалда Ханааналде инсухъе тӀад руссана вацал, ва кинабго жидеего лъугьараб-таралъул хӀакъалъулъ гьесда бицана.
30«Доб ракьалъул кверщелчи нижедехун хъачӀго кӀалъана – ниж жасусал ругилан ккана досда. 31Нижеца абуна ниж жасусал гурин, ракӀбацӀцӀадал гӀадамал ругин, 32нижер анцӀила кӀиго вац вугин – цо инсуе гьарурал. Цо вац тӀагӀанин, цогидав, бищунго гьитӀинав, Ханааналда инсуда аскӀов танин. 33Амма доб ракьалъул кверщелчияс абуна: „Гьале гьадин хал гьабила дица нужеца битӀараб бицунеб бугищали. Нужер цо вац гьанив те, хутӀаралин абуни, ракъун ругел хъизамазе тӀорщелги босун, нужерго нухда а. 34Цинги бищунго гьитӀинав вацги вачун рачӀа. Гьебмехалда лъала дида нуж жасусал гурел, ракӀбацӀцӀадал гӀадамал рукӀин. Нужер вацги нахъе виччала, дир тӀолабго ракьалда даран-базар гьабизе нужее изнуги кьела“, – ян».
35Жидерго къандалъаби чӀехьезе гьел лъугьиндал, щивасул къандалъоялъуб батана гӀарац лъураб киса. Гьеб бихьидал, эменги васалги кутакалда хӀинкъана.
36«Цоцада хадур дихъа лъимал рахъулел руго нужеца, – ян абуна гьезул эмен Якъубица. – Юсуп тӀокӀав гьечӀо, гьанже Шимеонги гьечӀо. Буняминги вачинехъин вуго. Кинабго дида данде багъана гьанже!»
37Гьебмехалъ Рувимица инсуда абуна:
«Буняминги вачун дун тӀадвуссун вачӀинчӀони, дир кӀиго вас чӀвазе кьела дица. Дида божилъи гьабун витӀе – дица гьев духъе тӀадвуссун вачина».
38Амма Якъубица абуна:
«Дир вас нужеда цадахъ виччаларо дица. Гьесул тӀул бикьарав вац хвана. Бунямин цохӀо хутӀун вуго дие. Нухда гьесие къварилъи ккани щиб гьабилеб? Нужер гӀайибалдалъун дун, бетӀер хъахӀлъарав херав, гьесда хадуб бухӀараб ракӀалъ барзахалде ккеларищ!»
നിലവിൽ തിരഞ്ഞെടുത്തിരിക്കുന്നു:
Байбихьи 42: АварАК
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
© Институт перевода Библии, 2005-2023
