Байбихьи 44
44
Юсупица вацазул хӀалбихьи
1Юсупица жиндирго хъулухъчиясе буюрухъ кьуна:
«Гьал чагӀазул къандалъаби ругӀун цӀезаре, баччизе кӀолебгӀан тӀорщелги бан. Щивасул къандалъоялъуб лъе гьес кьураб гӀарацги. 2Бищун гьитӀинасул къандалъоялъуб гӀарцуда цадахъ дир гӀарцул щурунги лъе».
Юсупица абухъе гьабуна хъулухъчияс. 3ХъахӀлъи барабго, хӀамулги рачун, гьалбал нухда лъуна. 4Амма вацал шагьаралдаса рикӀкӀалъилелдего, Юсупица хъулухъчиясда абуна:
«Хехго дозда хадув а! Ва дозда абе: „ЛъикӀлъиялъухъ квешлъи щай нужеца гьабураб? 5Дир бетӀергьанас чагъир гьекъолеб, гьединго балъголъи тӀатинабулеб ва букӀинесеб лъазабулеб щурун гурищ гьеб? КӀудияб квешлъи гьабун буго нужеца!“ – ян».
6Гьезда хадув гӀунтӀидал, хъулухъчияс жинда тӀадкъараб гьабун, гьезда гьел рагӀаби абуна.
7Вацаз жаваб кьуна:
«Щай, нижер бетӀергьан, дуца гьедин абулеб? Аллагьас цӀунаги дур лагъзал гьединаб жо гьабиялдаса! 8Цебесеб нухалъ нижер къандалъабазухъ батараб гӀарацгицин нижеца Ханааналдаса тӀад буссинабураб мехалъ, дур бетӀергьанасул рокъоса гӀарац яги месед кин нижеца бикъулеб? 9Нижер цонигиясухъ бикъараб жо батани, биччанте гьевги чӀвазе ва ниж киналгоги нижер бетӀергьанасул лагъзаллъун хутӀизе».
10«Нужеца абухъе букӀине биччанте, – ян абуна хъулухъчияс, – амма лагълъун хутӀила бикъараб жиндихъ батарав чи, цогидал риччан тела».
11Вацаз хехлъи гьабун хӀамуздаса гьирал рахъана ва къандалъабазул кӀалал ричана. 12Хъулухъчияс киназдаго иргадал чӀухь бана, – кӀудиясдаса бахъараб гьитӀинасде щвезегӀан. Щурун Буняминихъ батана. 13Цинги чара бухӀарал вацаз жидеда тӀад букӀараб ретӀел бихъ-бихъун бана ва, цӀидасан хӀамузда гьиралги къан, гьел шагьаралде тӀад руссана.
14Ягьудаги вацалги тӀаде щвараб мехалъ, Юсуп жеги рокъов вукӀана, ва гьал гьесда цере накабазда чӀана. 15Юсупица гьезда абуна:
«КингӀаги кӀвараб нужеда гьеб иш гьабизе? Унго, нужеда лъаларебищ дун гӀадинал чагӀазул балъголъи тӀатинабизе гьунар букӀунеблъи?»
16«Дуда, нижер бетӀергьанасда, абизе жо щибха нижер букӀинеб? – абун кӀалъана Ягьуда. – Щиб бицун нижго ритӀухъ гьарилел? Аллагьас тӀатинабуна нижер гӀайиб-хатӀа. Гьанжеялдаса нахъе ниж рукӀине руго нижер бетӀергьанасул лагъзаллъун: щурун кодоб батаравги ва цогидал киналгоги».
17Юсупица абуна: «Аллагьас цӀунаги дун гьединаб иш гьабиялдаса! Щурун бикъарав чи вукӀина дир лагълъун, цогидал сах-саламатго инсуда аскӀоре ине бегьула».
18Юсупида аскӀовегӀанги къан, Ягьудаца абуна:
«Я дир бетӀергьан! Дие, дурго лагъасе, изну кье дудехун кӀалъазе. Дурго лагъасда ццин бахъунге, дир бетӀергьан. Мун пиргӀавнасда ващадав чи вугелъул!
19Дир бетӀергьан, дуца гьикъана нижеда, дурго лагъзадерида, нижер эмен вугищилан ва нижер цоги вацал ругищилан. 20Нижеца дуе, нижер бетӀергьанасе, жаваб кьуна нижер херав эмен вугин ва цоги бищунго гьитӀинав вацги вугин. Инсуе харадуниб гьабураб лъимер ккола гьев. Гьезул эбелалъ гьаруразул цохӀо гьев хутӀана чӀаго, гьесул вац хвана. Инсуе гьев цӀакъ хирияв вуго. 21Цинги дуца нижее, дур лагъзадерие, амру гьабуна гьев гьаниве вихьизе вачейилан. 22Нижеца дуда, нижер бетӀергьанасда, абуна гьес эмен рехун тезе бегьуларилан, гьесдаса ватӀалъи инсуда хӀехьезе кӀоларилан. 23Амма дуца нижеда, дур лагъзадерида, абуна гьитӀинав вацги цадахъ вачун гурони, ниж тӀокӀалъ мун вихьулеб бакӀалде раккугеян.
24Ниж нижерго инсухъе, дур лагъасухъе, тӀадруссараб мехалда, нижеца гьесда бицана дуца, нижер бетӀергьанас, абурабщинаб. 25Цинги цодагьабги тӀорщел босизе айилан инсуца амру гьабураб мехалда, 26нижеца абуна гьитӀинав вац цадахъ гьечӀого инарилан; гьев цадахъ гьечӀого мун вихьулеб бакӀалде раккизе нижее изну гьечӀилан. 27Гьебмехалда нижер инсуца, дур лагъас, нижеда гьадин абуна: „Нужеда лъала дир лъадуца дие кӀиго вас гьавуравлъи. 28Цояв тӀагӀана. Жанаваралъ чӀван, тӀу-тӀун ван ватилаха – тӀокӀав дида вихьичӀо гьев. 29Гьанже нужеца кӀиабилевги вачун унев вуго. Гьесиеги къварилъи ккани щиб гьабилеб? Гьаб дир хъахӀаб бетӀералде балагьги рещтӀинабун, барзахалде тӀовитӀила нужеца дун!“ – ин.
30Гьединлъидал, дида кӀвелищ инсухъе, дур лагъасухъе, гьедигӀан досие хирияв васги вачинчӀого тӀадвуссине? 31Вас нижеда цадахъ гьечӀевлъи бихьараб лахӀзаталъго эмен хвела. Ва дур лагъзал ниж сабаблъун кӀудияб рухӀалилъ барзахалде ина гьев. 32Дица, дур лагъас, инсуе щулияб рагӀи кьуна вац тӀадвуссун вачинилан, нагагь вачинчӀони, хвезегӀан инсуда цебе гӀайибги дида тӀад букӀинилан. 33Гьанже дур лагъ дун чӀезаве гьанив гьесул бакӀалда! Гьевин абуни, вацазда цадахъ тӀадвуссине виччанте. 34Кинха дун гьевги вачинчӀого инсухъе тӀадвуссинев ва гьединаб балагьалъ эмен чӀвани, гьеб кин хӀехьелеб?!»
നിലവിൽ തിരഞ്ഞെടുത്തിരിക്കുന്നു:
Байбихьи 44: АварАК
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
© Институт перевода Библии, 2005-2023
