Тархъанлъи 9
9
Щуабилеб жаза: боцӀи хвей
1БЕТӀЕРГЬАНАС Мусада абуна: «ПиргӀавнасухъе а, ва гьесда абе: „Гьадин абулеб буго жугьутӀазул БЕТӀЕРГЬАН Аллагьас: Дир халкъ Дие тӀагӀат-гӀибадат гьабизе биччай.
2– Дуца инкар гьабуни ва хадубккунги халкъ ккун чӀезабуни, 3БЕТӀЕРГЬАНАС кутакаб хвалил унти биччазе буго мегъ-ракьалда бугеб дур тӀолабго рухӀчӀаголъиялде: чуязде, хӀамузде, варанабазде, чӀегӀербоцӀуде ва гӀи-цӀаназде. 4Амма БЕТӀЕРГЬАНАС батӀалъи гьабизе буго ГӀизраилалъул боцӀудаги Мисриялъул боцӀудаги гьоркьоб – гӀизраилазул цониги хӀайван хвезе гьечӀо.
5БЕТӀЕРГЬАНАС гьелъие заман цӀана: Метер тӀолабго улкаялда гьедин гьабизе буго БЕТӀЕРГЬАНАС“».
6Нахъисеб къоялъ БЕТӀЕРГЬАНАС гьедин гьабизеги гьабуна. Мисриязул кинабго боцӀи хвана, амма гӀизраилазул цониги хӀайван тӀаса камичӀо. 7Гьелъул хал гьабизе чагӀи ритӀана пиргӀавнас, ва гьесда лъана унго-унголъунги гӀизраилазул цониги хӀайван хун гьечӀеблъи. Амма гьев додинго тӀирун чӀана ва гьес халкъги биччачӀо.
Анлъабилеб жаза: черхалда тӀихьал
8БЕТӀЕРГЬАНАС Мусадаги Гьарунидаги абуна: «Дангъура цӀун рахъу босе корониса ва биччанте Мусаца гьеб пиргӀавнасда цебесан гьаваялде рехизе.
9ХӀур гӀадин тӀибитӀизе буго гьеб тӀолабго Мисриялда тӀад, ва улкаялдаго ругел гӀадамаздаги хӀайваназдаги лъугьине руго рецӀцӀ чвахулел тӀихьал».
10Корода жаниса рахъуги босун, гьел пиргӀавнасда цере чӀана. Мусаца рахъу гьаваялде рехана ва гьебсагӀаталдаго гӀадамаздаги боцӀудаги рецӀцӀ чвахулел тӀихьал рахъана. 11СихӀручагӀазда тӀокӀалъ Мусада данде рахъун бажаричӀо, щайгурелъул цогидал мисриязулго гӀадин гьезулги черх тӀихьазул цӀуна. 12Амма БЕТӀЕРГЬАНАС пиргӀавнасул рекӀелъе согӀлъи биччана, ва, БЕТӀЕРГЬАНАС Мусада абун букӀахъе, гьев гӀенеккичӀо гьезухъ.
Анкьабилеб жаза: горо-цӀер бай
13БЕТӀЕРГЬАНАС Мусада абуна: «Метер радакье вахъун пиргӀавнасухъе а, ва гьесда абе: „ЖугьутӀазул БЕТӀЕРГЬАН Аллагьас гьадин абулеб буго: Дир халкъ биччай Дие тӀагӀат-гӀибадат гьабизе ине!
14Гьаб нухалда Дица дуеги, дур цересел чагӀазеги ва дур халкъалъеги кутакаб балагьалдалъун жаза гьабизе буго, Дун гӀадав гьаб ракьалда гьечӀевлъи дуда лъан букӀине! 15Цо борхараб Дир килищалъ дудеги дур халкъалдеги хвалил унти биччазе кӀолаан Дида; гьебмехалъ дунялалдасаго тӀагӀинаан нуж. 16Амма Дица чӀаго тана мун, дуда Дирго къуват бихьизабизелъун ва Дир цӀар тӀолабго дунялалда тӀибитӀизелъун. 17Мун жеги Дир халкъалда данде чӀун вуго, ва дуца гьеб биччан толеб гьечӀо. 18Гьанже гӀенекке: метер гьабго заманалда Дица Мисриялда тӀаде биччазе буго киданиги гьениб бихьа-рагӀичӀебгӀан кутакаб горо-цӀер. 19Гьединлъидал буюрухъ кье боцӀиги, цогидаб дурго буголъиги хӀинкъи гьечӀеб бакӀалде щвезабизе. Рокъобе бакӀаричӀого мегъ-ракьалда хутӀарабщинаб боцӀи ва къватӀир хутӀарал гӀадамал горо-цӀералъ чӀвазе руго“».
20БЕТӀЕРГЬАНАСУЛ рагӀукьа хӀинкъарал пиргӀавнасул цересел чагӀаз хехго лагъзалги боцӀиги рокъоре ракӀарана. 21Амма БЕТӀЕРГЬАНАСУЛ рагӀуде кӀвар буссинабичӀез жидерго лагъзалги боцӀиги къватӀир тана.
22БЕТӀЕРГЬАНАС Мусада абуна: «Квер зодобе борхе – тӀолабго Мисриялъул ракьалде тӀаде горо-цӀер базе буго: гӀадамазде, хӀайваназде ва Мисриялъул ракьалда бижарабщиналде тӀаде».
23Мусаца гӀанса зодобе борхана, гьебмехалъ БЕТӀЕРГЬАНАС зоб гъугъадизабуна, цӀа пирхана ва цӀадлъун горо-цӀер чвахана зобалаздаса гӀодобе Мисриялъул ракьалде. 24Пирхулеб цӀагун цадахъ балеб букӀана кутакаб горо-цӀер. Мисри бижаралдаса нахъе гьединаб жо киданиги бихьун, я рагӀун букӀинчӀо мисриязда. 25Горо-цӀералъ щущазабуна Мисриялъул ракьалда тӀолабго къватӀиб хутӀарабщинаб жо: гӀадамал, хӀайванал, хур-хер ва гъутӀбигицин. 26ГӀизраилаз гӀумру гьабулеб Гошеналъул ракьалдайин абуни, горо-цӀер бачӀо.
27ПиргӀавнас Мусаги Гьарунги ахӀун, гьезда абуна: «Гьаб нухалда дица мунагь гьабуна. БЕТӀЕРГЬАН витӀарав вуго, дидаги дир халкъалдагийин абуни, гӀайиб ккана. 28БЕТӀЕРГЬАНАСДА гьаре! Гьаб гӀасияб гъугъадиги горо-цӀерги гӀураб буго нижее! Дица риччала нуж, тӀокӀалъ нуж гьанир чӀезариларо», – ян.
29Мусаца жаваб кьуна: «Шагьаралдаса къватӀиве лъугьиндал, квералги зодоре рорхун, БЕТӀЕРГЬАНАСДА цебе дугӀа гьабизе буго дица ва гъугъадиги горо-цӀерги къотӀизе буго. Гьебмехалъ дуда бихьила гьаб дунялалъул хважаинлъун БЕТӀЕРГЬАН вукӀин.
30Амма дида бихьулеб буго мунги дур цересел гӀадамалги БЕТӀЕРГЬАН Аллагьасукьа жеги хӀинкъулел гьечӀолъи».
31(Лъелъги пурчӀинаги хвана, гьеб заманаялъ пурчӀина тӀирщулеб букӀун, лъелъин абуни, тӀегьан букӀун. 32Ролъги полбаги хвечӀо: гьел кватӀун гурони щолароан).
33Муса пиргӀавнасул бакӀалдаса нахъе ана, шагьаралдаса къватӀиве вилълъана ва, квералги рорхун, гьес БЕТӀЕРГЬАНАСДЕ дугӀа гьабуна. ГьебсагӀаталдаго гъугъадиги горо-цӀерги къотӀана, хадуб цӀадги чӀана. 34ЦӀадги, гъугъадиги, горо-цӀерги къотӀараблъи бихьидал, пиргӀавн нахъеги жиндирго гӀамалалде вуссана: гьесулги гьесул цересел чагӀазулги додинго ракӀал согӀлъана. 35ПиргӀавн нахъеги тӀирун чӀана, ва гьес гӀизраилал риччачӀо, БЕТӀЕРГЬАНАС Мусада цебеккунго абун букӀахъе.
നിലവിൽ തിരഞ്ഞെടുത്തിരിക്കുന്നു:
Тархъанлъи 9: АварАК
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
© Институт перевода Библии, 2005-2023
