Тархъанлъи 8
8
КӀиабилеб жаза: къуркъби
1БЕТӀЕРГЬАНАС Мусада абуна: «ПиргӀавнасухъе а, ва гьесда абе: „БЕТӀЕРГЬАНАС гьадин абулеб буго: Дир халкъ Дие тӀагӀат-гӀибадат гьабизе ине биччай.
2Дуца инкар гьабуни, Дица дур улкаялда тӀаде къуркъби тӀамизе руго. 3ТӀолабго Нил къуркъбуз цӀезабизе буго. ГӀурулъа къватӀиреги рачӀун, гьел кӀанцӀизе руго дур кӀалгӀаялъуре, мун кьижулеб рокъоре, дур бусаде, дур цересел чагӀазул ва дур халкъалъул минабазухъе, дур печалъуре ва гӀатӀ буцулеб хӀерчалда жанире. 4Къуркъби лъугьине руго дуда тӀаде ва дур халкъалдаги дур цересел чагӀаздаги тӀаде“».
5БЕТӀЕРГЬАНАС Мусада абуна: «Гьарунида абе: „ГӀанса борхе ва гӀораздеги, лъадал рахъаздеги, хӀораздеги тӀаде балагьизабе, ва Мисриялъул ракьалде къуркъби рещтӀинаре“».
6Гьаруница гӀансагун квер Мисриялъул лъиназде тӀаде балагьун борхана, ва гьениса къватӀире къуркъби рачӀана – къуркъбуз цӀезабуна тӀолабго Мисриялъул ракь. 7Амма жидерго сихӀруялдалъун сихӀручагӀазги гьабуна гьебго жо. Гьезги къуркъби риччана Мисриялда тӀаде. 8Цинги пиргӀавнас Мусаги Гьарунги ахӀана ва гьезда абуна: «Дидаги дир халкъалдаги тӀаса къуркъби нахъе рачеян БЕТӀЕРГЬАНАСДА гьаре, гьебмехалъ дицаги халкъ биччала БЕТӀЕРГЬАНАСЕ къурбанал тӀоритӀизе».
9Мусаца пиргӀавнасда абуна: «Дица гьарила дуца чӀезабураб заманалда, дурги, дур цересел чагӀазулги, дур халкъалъулги рахъалъ; гьебмехалъ къуркъби нахъе ине руго дуда тӀасаги нужер минабазухъаги; гьел гӀицӀго Нил гӀурулъ хутӀизе руго».
10ПиргӀавнас абуна: «Метерго гьел нахъе ине гьаре», – ян.
Мусаца жаваб гьабуна: «Нижер БЕТӀЕРГЬАН Аллагьасда релълъарав щивго гьечӀолъи дуда лъазе букӀине, дуца абухъе гьабила. 11Къуркъби нахъе ине руго дудаса, дур хъулбуздаса, дур цересел чагӀаздаса ва дур халкъалдаса. Гьел хутӀизе руго гӀицӀго Нил гӀурулъ», – ин.
12Мусаги Гьарунги пиргӀавнасда аскӀоса нахъе ана, ва Мусаца БЕТӀЕРГЬАНАСДА гьарана пиргӀавнасде тӀаде риччарал къуркъби нахъе рачеян. 13БЕТӀЕРГЬАНАС Мусал гьари къабул гьабуна. Рукъзабахъ, азбаразда ва авлахъазда рукӀарал къуркъби хвана. 14Гьел данде ракӀарулел рукӀана гохӀа-гохӀал гьарун ва байбихьана улкаялдаго гьезул квешаб махӀ тӀибитӀизе. 15Амма бигьалъи лъугьунеб букӀин бихьидал, пиргӀавнасул ракӀ согӀлъана, ва гьев гьанжесалаги гӀенеккичӀо Мусахъги Гьарунихъги, БЕТӀЕРГЬАНАС цебеккунго абун букӀараб къагӀидаялда.
Лъабабилеб жаза: кӀкӀара
16БЕТӀЕРГЬАНАС Мусада абуна:
«Гьарунида абе: „Эхедеги борхун, дурго гӀанса ракьул хӀурулъ кьабе: киса-кибего Мисриялда хӀур кӀкӀараялде сверизе буго“, – ян».
17Гьез гьедин гьабуна. Гьаруница гӀанса эхедеги хьвагӀун хӀурулъ кьабуна, ва гӀадамаздаги боцӀудаги тӀаде роржун рачӀана кӀкӀурби. Киса-кибего Мисриялъулго хӀур кӀкӀараялде сверана. 18СихӀручагӀиги къеркьана жидерго сихӀруялъул кумекалдалъун кӀкӀара бачӀинабизе, амма гьезухъа гьеб бажаричӀо. КӀкӀараялъ бацинабун букӀана гӀадамазулги боцӀулги сипат. 19Гьебмехалъ сихӀручагӀаз пиргӀавнасда абуна:
«Гьаб буго Аллагьасул хӀалкӀолъиялъ гьабураб иш», – ин.
Амма пиргӀавн тӀирун чӀана. Гьев гьезухъ гӀенеккичӀо, БЕТӀЕРГЬАНАС абухъего.
Ункъабилеб жаза: тӀутӀал
20БЕТӀЕРГЬАНАС Мусада абуна: «Метер радакье пиргӀавн гӀурухъе унеб мехалда, нахъеги гьесда данде а, ва гьесда абе: „БЕТӀЕРГЬАНАС гьадин абулеб буго: Дир халкъ Дие тӀагӀат-гӀибадат гьабизе ине биччай.
21БиччачӀони, Дица дудеги, дур цересел чагӀаздеги, дур халкъалдеги тӀаде ва дур кӀалгӀабазухъеги тӀутӀазул накӀкӀал риччазе руго. Мисриязул рукъзал тӀутӀазул цӀезе руго, тӀолабго ракьги бахчизабизе буго гьез. 22Амма Дир халкъалъ чӀей гьабураб Гошен ракьалда тӀутӀал рукӀине гьечӀо, Дун БЕТӀЕРГЬАН вугеблъи ва гьаб ракьалда Дица кверщел гьабулеб букӀин дуда лъан букӀине. 23Дица Дир халкъалдаги дур халкъалдаги гьоркьоб гьабулеб батӀалъи бихьила дуда. Метер букӀина гьеб гӀаламат“».
24БЕТӀЕРГЬАНАС гьедин гьабизеги гьабуна. ТӀутӀазул чӀегӀерал накӀкӀал роржун рачӀана пиргӀавнасул хъалаялъуре ва гьесул цересел чагӀазул рукъзабазухъе. ТӀутӀаз чӀвалеб букӀана тӀолабго Мисриялъул ракь.
25ПиргӀавнас Мусаги Гьарунги тӀаде ахӀана ва гьезда абуна: «Нужерго Аллагьасе къурбанал тӀоритӀе гьанир, нижер ракьалда».
26Амма Мусаца абуна: «Гьедин гьабизе бегьуларо. Нижеца нижер БЕТӀЕРГЬАН Аллагьасе къурбан тӀобитӀи мисрияз сурараб ишлъун рикӀкӀуна. Гьезда цебе нижеца гьезда сурун бихьулеб къурбан гьабуни, гьез ниж ганчӀица чӀвазе руго.
27Нижер БЕТӀЕРГЬАН Аллагьасе Гьес тӀалаб гьабулеб къагӀидаялда къурбан хъвезе ккани, ниж лъабго къойил нух тун авлахъалде рикӀкӀалъизе ккола».
28ПиргӀавнас абуна:
«Дица риччала нуж авлахъалде БЕТӀЕРГЬАН Аллагьасе къурбан хъвезе, амма нуж гӀемер рикӀкӀадегӀан унге. Диеги дугӀа гьабе».
29Мусаца жаваб гьабуна:
«Дун гьаниса нахъе аравго БЕТӀЕРГЬАНАСЕ дугӀа гьабизе буго дица ва метерго мунги, дур цересел чагӀиги, тӀолабго Мисриялъул халкъги тӀутӀаздаса хвасарлъизе руго. Амма дуцаги ниж тӀокӀалъ гуккуге ва БЕТӀЕРГЬАНАСЕ къурбан хъвезе ине нижер халкъалъе квалквал гьабуге».
30Муса гьениса тӀадвуссана ва БЕТӀЕРГЬАНАСЕ дугӀа гьабуна. 31БЕТӀЕРГЬАНАС тӀубазабуна Мусал гьари: пиргӀавнги, гьесул цересел чагӀиги, тӀолабго Мисриялъул халкъги тӀутӀаздаса эркен гьаруна. Цониги тӀутӀ нахъе хутӀичӀо. 32Амма гьабнухалъги пиргӀавнасул ракӀ согӀлъана, ва гьес халкъ къватӀибе биччачӀо.
നിലവിൽ തിരഞ്ഞെടുത്തിരിക്കുന്നു:
Тархъанлъи 8: АварАК
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
© Институт перевода Библии, 2005-2023
