Тархъанлъи 7

1БЕТӀЕРГЬАНАС Мусада абуна: «Дихъ гӀенекке, Дица мун пиргӀавнасда тӀад Аллагьлъун, дур вац Гьарун дур авараглъун толев вуго.

2Дица дуе амру гьабунщинаб Дуца дур вац Гьарунида абе, хадуб гьес пиргӀавнасда абизе биччай, гьес гӀизраилал жиндирго улкаялдаса къватӀире риччазе рукӀине. 3Амма пиргӀавнасул рекӀелъе Дица согӀлъи биччала ва, кигӀан гӀемер гӀаламаталги мугӀжизаталги Мисриялда Дица рихьизаруниги, 4гьев нужехъ гӀенеккиларо. Гьеб мехалда Дица Дирго квер Мисриялда тӀаде буссинабила ва гьезие цӀоб тун жаза гьабила. Дица къватӀибе бачина Дирго халкъ – ГӀизраилил наслу – Мисриялъул ракьалдаса. 5Дир квералъул бакӀлъи лъайдал ва гьениса гӀизраилал къватӀире рачиндал лъазе буго мисриязда Дун БЕТӀЕРГЬАН вукӀин».

6Мусацаги Гьаруницаги БЕТӀЕРГЬАНАСУЛ амруялда рекъон гьабуна кинабго. 7ПиргӀавнасда кӀалъазе байбихьараб мехалда Мусаца бан букӀана ункъого сон, Гьаруница – ункъоялда лъабго сон.

Гьарунил гӀанса борхьиде свери

8Мусадаги Гьарунидаги кӀалъалеб мехалъ, БЕТӀЕРГЬАНАС Мусада абуна:

9«ПиргӀавнас мугӀжизат бихьизабеян абураб мехалда дуца Гьарунида абе: „Дурго гӀанса пиргӀавнасда цебе рехе“, – ян. Цинги гьеб гӀанса борхьиде сверизе буго».

10Мусаги Гьарунги рачӀана пиргӀавнасухъе, ва гьез кинабго гьабуна БЕТӀЕРГЬАНАСУЛ амруялда рекъон. Гьаруница жиндирго гӀанса рехана пиргӀавнасдаги гьесул цересел чагӀаздаги цебе ва гьеб борхьиде сверана. 11Гьебмехалда пиргӀавнас жиндирго гӀакъилзабиги сихӀручагӀиги ахӀана ва Мисриялъул сихӀручагӀазги гьебго жо гьабуна жидерго сихӀруялдалъун. 12Щивас гӀодобе рехана жиндирго гӀанса ва гьезул щибаб борхьиде сверана, амма Гьарунил гӀансаялъ гьезулал къулчӀана. 13ПиргӀавнин абуни тӀирун чӀана – БЕТӀЕРГЬАНАС абухъе, гьев гьезухъ гӀенеккичӀо.

ТӀоцебесеб жаза: лъим биялде свери

14БЕТӀЕРГЬАНАС Мусада абуна: «ПиргӀавн тӀирун чӀун вуго – халкъ нахъе биччазе гьес инкар гьабулеб буго.

15Метер радал пиргӀавн гӀурул рагӀалде унеб мехалда, мун досда данде а. Борхьиде сверулеб гӀансаги кодоб ккун, досда цеве Нилалъул рагӀалда вахъун чӀа. 16Дуца досда абе:

„ЖугьутӀазул БЕТӀЕРГЬАН Аллагьас дун витӀана дуда гьадин абизе: ‘Дир халкъ Дие тӀагӀат-гӀибадат гьабизе авлахъалде биччай дуца’, – ян. – Амма гьанжелъизегӀан дуца гьелъухъ гӀин тӀамичӀо. 17Гьанже БЕТӀЕРГЬАНАС гьадин абулеб буго: ‘Дуда бихьила Дун БЕТӀЕРГЬАН вукӀин’. – Дир хъатикь бугеб гӀанса дица кьабизе буго Нилалъул лъадалъ ва лъим сверизе буго биялде. 18Нилалъул лъадалъ бугеб ччугӀа хвезе буго, гӀоралда квешаб махӀ бахъине буго ва мисриязда гьелъул лъим гьекъезе кӀвезе гьечӀо“».

19БЕТӀЕРГЬАНАС Мусада абуна: «Гьарунида абе: „Дурго гӀансаги босун, гьеб хьвагӀе Мисриялъул лъиназда тӀаде – гӀоразде ва лъадал рахъазде, хӀоразде ва киналгӀаги лъадал хӀавузазде тӀаде. Гьеб кинабго лъим биялде сверизе буго. Мисриялда би букӀине буго киса-кибего, цӀулал ва ганчӀил хъабазда жанибгицин“».

20Мусацаги Гьаруницаги кинабго БЕТӀЕРГЬАНАСУЛ амруялда рекъон гьабуна. Гьаруница гӀанса эхеде борхана ва, пиргӀавнасулги гьесул цересел чагӀазулги берда цебесан, Нилалъул лъадада кьабуна ва гьеб биялде сверана. 21Нилалъул лъадалъ букӀараб ччугӀа хвана, ва гӀоралда бахъараб квешаб махӀалъ мисриязда тӀокӀалъ гьелъул лъим гьекъезе кӀолеб букӀинчӀо. Мисриялда киса-кибего букӀана би. 22Амма Мисриялъул сихӀручагӀазги жидерго сихӀруялдалъун гьебго жо гьабуна. ПиргӀавнин абуни тӀирун чӀана; гьев гӀенеккичӀо Мусахъги Гьарунихъги, БЕТӀЕРГЬАНАС цебеккунго абун букӀараб къагӀидаялда. 23Гьелъул кӀварцин гьабичӀо Мисриялъул пачаяс; кьурун вуссун жиндирго кӀалгӀаялъуве ана гьев. 24ТӀолабго Мисриялъул халкъ лъугьана гьекъезе бегьулеб лъим балагьизе ва Нилалъул рагӀаллъабазда гъуял рухъизе. ГӀурухъа лъим гьекъезе бегьулеб букӀинчӀелъул.

25БЕТӀЕРГЬАНАС Нилалъул лъадада кьабуралдаса нахъе анкь ана.

നിലവിൽ തിരഞ്ഞെടുത്തിരിക്കുന്നു:

Тархъанлъи 7: АварАК

ഹൈലൈറ്റ് ചെയ്യുക

പങ്ക് വെക്കു

പകർത്തുക

നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക

Аллагьасул Калима നെക്കുറിച്ച് കൂടുതലറിയുക