Roma 8
8
1Mumu hino kwa waka kupisika uwifu kwa wala wayii mwa Kristo Yesu. 2Pakuya torah ya Roho wa kulama mwa Kristo Yesu yikanikitiki ukamba pa torah ya sambi ni ya kifwa. 3Pakuya kila torah nukuhotoleka kukikita, ndawa ya ulegelefu wake nyama, Mulungu, pa akantumiti Mwana mundu mwene pa kihwanakiso kya nyama yene sambi ni pa mihalo ya sambi, akayipisiti sambi uwifu: 4nausi kilondo kyake torah kimalakasike pa tenga, wakugenda lepa kwa ndingo wa nyama, koma kwa ndingo wa roho. 5Pakuya wala kwa ndingo wa nyama waholalela findu fya nyama: koma wala kwa ndingo wa roho findu fya roho. 6Pakuya maholo ga nyama gayii kifwa; koma maholo ga roho gayii wumi ni kindamba; 7ndawa maholo ga nyama gayii mitumba nu Mulungu; pakuya nukuwikika lepa pasi pa torah ya Mulungu, haka kuhotola nakuhotoleka lepa: 8leka wala wa pa nyama wahotola lepa kunganisa Mulungu. 9Koma mwenga nukuya pa nyama, leka pa roho, wona Roho wa Mulungu ahwela pa mwenga. Koma wona mundu ayilepe nu Roho wa Kristo, uyu nukuya wake. 10Leka wona Kristo ayii mugati mwa mwenga, mbili ufwili ndawa ya sambi; koma roho uyii wakulama ndawa ya ugolofu. 11Koma wona Roho wa yula akansyusiti Yesu pa wakufwa ahwela pa mwenga, uyu akansyusiti Kristo Yesu pa wakufwa yalamise kawili miwili yinu ya kufwilika pa Roho wake uyu ahwela pa mwenga.
12Mumu, walongo, tiyii ni misigilo, nukuya kwa nyama, kulama kwa ndingo wa nyama: 13pakuya wona mulama kwa ndingo wa nyama, mulonda kufwa; koma wona pa roho mugafwisa makitiko ga mbili, yamulame. 14Pakuya woha awa walongoseka nu Roho wa Mulungu, wayii wana wa Mulungu. 15Ndawa mukayupiti lepa roho ya uwanda kukilawukila woga; koma mukayupiti roho ya kukitika wana, pa yila tikuwa, Abba, Dadi. 16Roho mwene alasa ulungamakiso pamonga na roho witu, kukita tiyii wana wa Mulungu: 17ni wona wana, wakuyingila lipwela kawili; wakuyingila lipwela lyake Mulungu, ni wakuyingila lipwela pamonga ni Kristo; wona tiyfuwana mahumbuso pamonga nuyombe, nausi tikwisike pamonga nuyombe.
18Pakuya niwalanga kukita mahumbuso ga lukumbi ulu nukuhotoleka kuhwanasika ni kukwisika kula yakufunukulike pa tenga. 19Pakuya kwilindakisa kwa mapangiko kugalindalila mafunukuliko ga wana wa Mulungu. 20Pakuya mapangiko gakawikiki pasi pa mfuki wa waka, nukuya kwa kilondo kyake gene, 21koma pa luhala lwa yula akagawikiti pasi, kuhuwalila kukita mapangiko gene kawili yagakomboleke kuwuka pa uwanda wa kuwola kuyingila mu ukamba wa kukwisika kwa wana wa Mulungu. 22Ndawa timanya kukita mapangiko goha gawuwula ni kwinionganionga pamonga mpaka hino. 23Leka nukuya iki kyakape, koma tenga kawili, wakuya ni fyakulosa fya Roho, tiwuwula mugati mwitu, kukulindalila kukitika wana, kukombolela ngani kwa mbili witu. 24Pakuya ni kihuwalilo tikayokwiki: koma kihuwalilo kyakuloleka nukuya kihuwalilo: ndawa nani akihuwalila kila akiwona? 25Koma wona tihuwalila kila tikiwona lepa, kwa luyumalakilo tikilindalila.
26Leka wiwila Roho kawili atwikila ulegelefu witu: pakuya timanya lepa kusali umu ngatilinganili; koma Roho mwene apembesa pa mihalo ya tenga ni mawuwulo gangalongaleka; 27leka yula ayifumbula mioyo amanya maholo ga Roho, ndawa apembesa pa mihalo ya wawalafu kwa ndingo wa Mulungu. 28Leka timanya kukita kwa wala wakungana Mulungu fyoha fihengelana pamonga kwa kinofu, kwa wala wakukemeleka kwa ndingo wa malango gake. 29Pakuya wala akawamanyi palongolo, wawa akawapatwili palongolo kuya wa ntundu kimonga‐monga ni kihwanakiso kya Mwana mundu, aye wa kiwele pagati pa walongo wa mahele: na wala akawapatwili palongolo, 30wawa kawili akawakemili: na wala akawakemili, wawa kawili akawagolwisi: na wala akawagolwisi, wawa kawili akawakwisiti.
31Kiki mumu yatijowe pa findu ifi? Wona Mulungu atiyimalila, nani atipindika? 32Uyu nuyombe akannotiti lepa Mwana mundu mwene, koma akamfumbukisi pa mihalo ya tenga tawoha, wuli nukutipela fya neema fyoha pamonga nako? 33Nani yawapele wakuhagulika wake Mulungu mhalo? 34Mulungu ayii wakogoloseka; nani yaapise uwifu? Kristo Yesu ayii uyu akafwili, ena mbanga uyu akasyusiki pa wakufwa, uyu atama pasi pa kiwoko kya kulila kya Mulungu, nuyombe kawili apembesa pa mihalo ya tenga. 35Nani yatipatule pa kiganano kyake Kristo? ati lihumbuso, pangi lifinyikiso, pangi kuhyunga, pangi njala, pangi utupu, pangi ulugu, pangi upanga? 36Umu yilembekili,
Kwa ndawa yako tiyii mu kukomeka musi woha;
Tikawalangiki ngati mambelele ga kudumulika.
37Koma pa ifi fyoha tihotwili kulutalila, pa yula akatiganiti. 38Pakuya nimanyila ngani, kukita haka kifwa, haka kulama, haka wamalaika, haka wene chengo, haka findu fya apa, haka findu fiyii mu kuyicha, 39haka makakala, haka pakukweseka munani, haka kina kyakugenda kusi, haka kyakupangika kiyi kyoha, yakihotole lepe kutipatula pa kiganano kyake Mulungu, kila kiyii pa Kristo Yesu Bambo witu.
നിലവിൽ തിരഞ്ഞെടുത്തിരിക്കുന്നു:
Roma 8: MGS1937
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
First published by the British and Foreign Bible Society in 1937.
