Roma 7
7
1Pangi, walongo, mumanya lepa (pakuya niwalongela na wala wayimanya torah), kukita torah yiyii bambo kwa mundu lukumbi lwoha ayii mu kulama? 2Pakuya ndala uyu ayii ni ngwanamundu akungiki ni torah kwa ngwanamundu pa kulama kwake; koma wona ngwanamundu afwili, awusiki pa torah ya ngwanamundu. 3Mumu wona awunganiki nu ngosi yungi, pala ngwanamundu ayii kilamile, yakemeleke ndala wa ukeme: leka wona ngwanamundu afwili, ayii nkamba pa torah, nukuya wiwi ndala wa ukeme, haka awunganiki nu ngosi yungi. 4Mumu, walongo wangu, mwenga kawili mukakitiki wakufwa kwa torah pa mbili wa Kristo; nausi muwunganike kwa yungi, kwa yula asyukiki pa wakufwa, kukita tipambakile Mulungu fipambiko. 5Pakuya pala tikayili pa nyama, manyonyelo ga sambi gala gayii pa torah, gahengili pa fipingili fitu kupambakila kifwa fipambiko. 6Koma hino tiwusiki pa torah, ndawa tikafwilili kila tikayili mu kukamulika nakyo; kwa iki titumakila pa roho ya hino, nukuya palilembo lya mwandi.
7Yatijowe kiki mumu? Torah yiyii sambi? Kisiya wiwi. Koma ngatipatiti lepa kumanya sambi, lema pa torah: pakuya nganimanyi lepa linyonyelo, lema torah yikajowiti Usinyonyela: 8koma sambi, yiyupiti lukumbi, yikahengili pa nenga linyonyelo lya misafi‐misafi: pakuya pangali torah sambi yifwili. 9Nu nenga nikalamiti pangali torah mwandi: koma pala luwimbi lukahichili, sambi yikalamiti kawili, ni nafwili; 10nu luwimbi, lula lukayili kwa kulama, nilukolili kwa kifwa: 11pakuya sambi, pala yakiyupiti lukumbi, pa luwimbi yikanikongiti, ni pa lula yikanikomiti. 12Mumu torah yiwalafu nu luwimbi luwalafu, ni lwakugoloka, ni lunofu. 13Wila kila kikayili kinofu kikapatiti kuniyila kifwa? Kisiya wiwi. Koma sambi, nausi yiwoniki kuya sambi, pa kunihengela kifwa pa kila kinofu; — nausi pa luwimbi sambi yikitike sambi kulutila. 14Pakuya timanya kukita torah yiyii ya kiroho: koma nenga ya nyama, nihemaliki pasi pa sambi. 15Pakuya kila nikikita nikimanya lepa: nikiteye lepa kila nilonda; koma kila nikiwipila, iki nikikita. 16Koma wona kila nikilonda lepa, iki nikikita, niyitikisana ni torah kukita yiyii yinofu. 17Na hino nukuya nenga nikitilingani, koma sambi yila yihwela mugati mwa nenga. 18Pakuya nimanya kukita mwa nenga, kuku mwa nyama yangu, kihwela lepa haka kimonga kinofu: ndawa kulonda kuyii pa nenga, koma kukita iki kiyii kinofu kuyilepe. 19Pakuya kinofu nikilonda, nikita lepa: leka kiwifu nikilonda lepa, nikiteye. 20Leka wona kila nikilonda lepa, iki nikikita, nukuya kawili nenga nikiteye, koma sambi yila yihwela mugati mwa nenga. 21Nikolela mumu torah, kukita kwa nenga wakulonda kukita kinofu, kiwifu kiyii baha. 22Pakuya niyiganisa torah kwa ndingo wa umundu wa mgati: 23koma nilola torah yingi pa fipingili fyangu, yila yikomana ni torah ya mwoyo wangu, ni kunitola mateka pasi pa torah ya sambi yila yiyii pa fipingili fyangu. 24Mundu wa kuhumbusika nenga! nani yanifuwule kupita pa mbili wa kifwa iki? 25Ninsengusa Mulungu pa Yesu Kristo Bambo witu. Mumu nenga nani nu mwoyo nihengela torah ya Mulungu; koma ni nyama torah ya sambi.
നിലവിൽ തിരഞ്ഞെടുത്തിരിക്കുന്നു:
Roma 7: MGS1937
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
First published by the British and Foreign Bible Society in 1937.
