Makitiko Ga Maapostolo 25
25
1Mumu Festo, paakachilili ngani pa wilaya yake, panyuma pa magono gadatu akakweliti ku Yerusalem kuhumila Kaisariya. 2Ni makasisi makulungu ni wakutumbula waYehudi wakandasiti ndumi sya Paolo: ni wakampembisi, kunduwa awaganise, 3nausi ankemelele yombe mpaka ku Yerusalem; kunjuwila pa ndila kunkoma. Mumu Festo akahigiti kukita Paolo agohikeye pa Kaisariya, 4ni kukita yombe mwene yapitile mwanja kuku nyata. 5Mumu, akajowiti, awa wene mbafu wa mwenga, waselele pamonga nu nenga, ni kundungamakila wona kitama kindu kihoko pa mundu uyu.
6Leka pa akahweliti kwawe magono nukuya gakulutila nane pangi kumi, akaselili pa Kaisariya; nu lukela lwake akatemi pasi pa kitihu kya kupawula, na akatawukili atoleke Paolo. 7Leka apa akachiti, waYehudi awa wakaselili pa Yerusalem wakayimiti baho kunsyungutila, kutola mihalo mingi ya kutopa, iyi nukuyihotola lepa kwiwonesa wicho; nu Paolo akawalingi kukita, 8Nenga nukuhokela lepa kandu, haka kwa torah ya waYehudi, haka kwa hekalu, haka kwa Kaisar. 9Leka Festo, kwa kulonda kuwaganisa waYehudi, akamhigiti Paolo nakajowiti, Uyitakila kukwela ku Yerusalem, nu kuku kupawulika pa findu ifi pa chengo kyangu? 10Leka Paolo akajowiti, Niyii mu kuyima pa kitihu kya kupawula kya Kaisar, apa nilinganila kupawukila: nakuwakitila lepa waYehudi kandu kiwifu, umu umanyila wa mwene kulutila. 11Mumu wona niyii wakukita kiwifu, ni wona nakiti kyakulinganila kya kifwa, nenga nukukana kufwa: leka wona kayilepe kandu ka ifi awa wanilungamakila nafyo, nukuya mundu ahotola kunipelekela kwa wombe. Nikemelela Kaisar. 12Bahalapala Festo, apa akalongili na wa nkokano, akahigiti, Ukakemalili Kaisar: yaubite kwa Kaisar.
13Leka apa magono gangi gakalutiti, Agrippa mutwa ni Bernike wakachiti ku Kaisariya, nu kundamusa Festo. 14Leka apa wakalutakisi magono mingi kukulakula, Festo akankokosili mhalo wa Paolo, kujowa, Ayii mundu nunuyu wakulekeka nu Felike apa mu migoyi: 15uyu makasisi makulungu nu wakulu‐wakulu wa waYehudi wakalasiti ndumi syake, apa nikayili pa Yerusalem, kuluwa lipawulo pa yombe. 16Kwa wombe nikahigiti kukita nukuya nkuwu wa waRoma kupeleka mundu ayi yoha waka, akona nukuwonangana kiwungi kwa kiwungi, wakulungamikika na awa wakundungamakila, ni kutama nu lukumbi kuwalanga ya ifi wandungamakila nafyo. 17Mumu apa wakachiti pamonga kuni, nasyeliti lepa, koma lukela lwake nikatemi pasi pa kitihu kya kupawula, ni nikatawukili atoleke mundu uyu. 18Pa yombe wakulungamakila, apa wakayimiti, nakupisa lepa nyimu ya fiwifu ifi nafiholiti; 19leka wakayii ni makoto gangi‐gangi kwake ya dini yawe, ni ya nunuyu Yesu, wakufwa nuyombe, uyu Paolo akayii mu kujowesa kukita ayii nu wumi. 20Leka nenga, pakukangachila pa mapindikano aga, nikakotiti alonda kwali kubita mwanja ku Yerusalem, nu kuku kupawulika ya ifi. 21Leka Paolo apa akakemili kukita agoheke nausi Augusto mwene apawule mhalo wake, nikatawukili agoheke mpaka yanimpeleke kwa Kaisar. 22Leka Agrippa akanjowili Festo, Nganilonditi namwene kunjufwanila mundu uyu. Akajowiti, Kilau yaunjufwanile.
23Mumu lukela lwake, apa Agrippa akachiti, ni Bernike, pamonga ni kapambiko kakulungu, ni kuyingila pa nyumba yakuyufwanila, pamonga na ma‐kapitao wa ma‐elfu, na wakulungu wa likaya, nu Festo akatawukili kukita Paolo atoleke. 24Nu Festo akajowiti, Mutwa Agrippa, na woha wagosi muyii nu tenga apa, mundolalela mundu uyu pa mhalo wake lipuga lyoha lya waYehudi wakaniyumalakili, pa Yerusalem na apa kawili, kukwesa kukita ngalinganili lepa kulama magono gangi. 25Leka nenga nikakolili lepa kukita akiteye kandu kakulinganila kufwa: leka apa mwene akakemalili Augusto, nikapawili kumpeleka. 26Ga uyu niyii lepe ni kandu ka chakaka kulemba kwa Bambo. Ni ndawa iyi nikantoliti yombe pa miho pinu, ni muni‐muni pa miho pako, Mutwa Agrippa, nausi wona timaliti kukotakesa, nitame nako kandu kakulemba. 27Pakuya niwona kukita nukuya kya luhala kumpeleka wakukungika, ni kulasa lepa nyimu yiyii pa yombe.
നിലവിൽ തിരഞ്ഞെടുത്തിരിക്കുന്നു:
Makitiko Ga Maapostolo 25: MGS1937
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
First published by the British and Foreign Bible Society in 1937.
