Roma 14
14
A nɨ Keʼ Ŋwɔn nɨ Ŋwɔn a Sáʼə ghe
1A nɨ nkwárə́ ɨbɛn ba abeməntəm aza a se tɨŋə. A nɨ nkeʼ ndɨʼkə bɨŋ zɨ mbɨ́ʼ anu za a kwaʼtɨnɨ ngə́ zɨə tsi nɨ ngɨə kə ɨ keʼ kɨ ngɨə. 2Abeməntəm a ɨbɛn bə tse a nyɛʼtə awa ngə́ á bo dzɨ ɨbə́ŋ mɨdzɨ ɨtsum, lá ŋwɔn wa abeməntəm azhi a se tən a kfúrə́ tsɛʼ ndza ə. 3A ŋwɔn wa a dzɨ́nɨ́ ɨbə́ŋ mɨdzɨ ɨtsum a keʼ nyáŋə́ ɨbɛn ba bɨ se ɨbə́ŋ mɨdzɨ ɨtsum a ndzɨə ghe, á ŋwɔn wa a se ɨbə́ŋ mɨdzɨ ɨtsum a ndzɨə a keʼ sáʼə a ŋwɔn wa a dzɨ́nɨ́ ɨbə́ŋ mɨdzɨ ɨtsum; mbɨ́ʼ ngə́ Ŋwi a kwarɨ awa bɨtsum ə. 4O nɨ ɨwa a sáʼ ŋwɔn afaʼ ŋwɔn adaŋ le? A nɨ tsɛʼ Tafaʼ ɨyi wa a mɨ soŋ ngə́ a ghɨ anu zə shiʼnɨ kə zə tɨbɔŋ ə. Wɛrə mɨ ghɨ anu zə shiʼnɨ mbɨ́ʼ ngə́ Maʼmbyí a chi ghɨ a wɛrə á ghɨ anu zə shiʼnɨ ə.
5Ɨbɛn bə tsɛrə kwaʼtɨ ngə́ njwi zɨ tse ɨ tsa a tsə mɔʼɔ ghe, mbáʼ ɨbɛn bə mɔʼɔ kwaʼtɨnɨ ngə́ njwi ɨtsum kuʼnɨ ə. A ŋwɔn tsum a zhi ɨ shiʼnɨ a mu atú zɨ ngə́ anu za zɨə kwaʼtɨnə lá a kuʼnɨ ə. 6Zɨ wa a lɛnɨ njwi zɨ tsɛrə ngə́ ɨ tsa a tsə mɔʼɔ, a lěn a zɛrə lá a nkɔ́ʼsɨ́ Maʼmbyí atɨ́ ə. Zɨ wa a dzɨ́nɨ́ ɨbə́ŋ mɨdzɨ ɨtsum, a dzɨ́ə tsɛrə lá a nkɔ́ʼsɨ́ Maʼmbyí atɨ́ mbɨ́ʼ ngə́ wɛrə a ghǎ a mɨya a mbó Ŋwi mbɨ́ʼ mɨdzɨ ma; ŋwɔn wa a se ɨbə́ŋ mɨdzɨ ɨtsum a ndzɨ́ə, a ghɨə mə lan lá a nkɔ́ʼsɨ́ Maʼmbyí atɨ́ nkə́ ngǎ a mɨya a mbó Ŋwi ə. 7Ka ŋwɔn nɨ bɨgɨnə wu tse a nchyɛ̌ ayi lá tsɛʼ mbɨ́ʼ atuəmbəm azhi ɛ, ŋwɔn nɨ bɨgɨnə wu tse a keʼ nkə́ nkfǒ tsɛʼ mbɨ́ʼ atuəmbəm azhi ɛ. 8Be a be ngə́ bɨgɨnə tsi atú ntən, bɨgɨnə chyɛ̌ lá a nkɔ́ʼsɨ́ Maʼmbyí atɨ́ ə, be a be ngə́ bɨgɨnə kfo, bɨgɨnə kfo lá a nkɔ́ʼsɨ́ Maʼmbyí atɨ́ ə; ma lan, kə bɨgɨnə tsi atú ntən kə bɨgɨnə kfo muŋ bɨgɨnə bɨtsum tsi lá a mbó Maʼmbyí ɛ. 9Mbɨ́ʼ ngə́ Kristo a kfó, mbə nzhwemnɨ a mbó nɨvwo, ntsi ntən lá taŋ ɨ be Maʼmbyí a mbó ba bɨ kfokɨnə abɔʼnɨ ɨbɛn ba bɨ tsinɨ ntɨŋ ə. 10O sáʼə a mɨma ɨgho lá ngə́ ke le? Kə o nyáŋə́ a mɨma ɨgho lá ngə́ ke le? Mbɨ́ʼ ngə́ bɨgɨnə bɨtsum ghɨ tɛm a ngɔʼ abyɛn Ŋwi á wɛrə a sáʼ awɨgɨnə ghe. 11Mbɨ́ʼ ngə́ aŋwaʼnɨ a Ŋwi a soŋ ngə́,
“Maʼmbyí a soŋ ngə́ tso mbáʼ ma tsinɨ ntən lá,
ŋwɔn tsum a mɨ kwem mɨkwiʼtɨ ɨmyi a tɨshe a ɨshi me
ɨ kɨ ŋaʼtɨ ntsu ɨyi ɨ soŋ ngə́ ma nɨ Ŋwi ə.”
12Ma lan, ŋwɔn tsum a ghɨ twiʼtɨ ɨ fɨʼtɨ ɨnu ɨtsum tsa zɨə ghɨ́nɨ́ a mbó Ŋwi ə.
Koʼ Tintɨ a Mɨma ɨgho á Ghɨ Ɨbvu ə
13Ma lan, ŋwɔn nɨ bɨgɨnə á keʼ a wu mɔʼɔ bə sáʼə. Bɨgɨnə baŋnɨ ntsɔʼ a mu mɨntəm ɨmɨgɨnə be ngə́ bɨgɨnə mɨ keʼ anu zə tse ghɨ á mɨma ɨwɨgɨnə a kɔmnkɨ ɨwu kə ngɨ ɨbvu ə. 14Nchyɛ a mbúm bɨgɨ Maʼmbyí Yeso, ɨ lanɨ ngɨ ngə́ á ma zhi ngə́ ka abə́ŋ a mɨdzɨ zə tsɛrə a tsi ayi ɨwu za a se fɛm a ɨshi ɨmɨgɨ Ŋwi ə. Lá be ŋwɔn tse a nɨŋ ntəm ɨyi ngə́ abə́ŋ a mɨdzɨ zə tsɛrə a se fɛm a mu mbɔm, lá be ngə́ ma ma mɨdzɨ se fɛm a mu mbɔm a mbó zɨ a ndzɨ́ə ghe. 15Be a be ngə́ o ghɨ mɨma a zuʼ ndzaŋə mbɨ́ʼ azúm za o dzɨ́nə́, lá be ngə́ ka o kɔŋ agho ayi ɛ. Koʼ nyɛʼtɨ á mɨdzɨ ma o dzɨ́nə́ tsənkɨ a ŋwɔn wa Kristo a kfónɨ́ mbɨ́ʼ atú azhi ɛ! 16Koʼ nyɛʼtɨ anu za o zhinɨ ngə́ a nɨ zə shiʼnɨ a bem ɨkum tɨbɔŋ ə. 17Mbɨ́ʼ ngə́ nɨfɔ nɨ Ŋwi se be lá anu mbɨ́ʼ mɨdzɨ kə mɨluʼ ə. Nɨ be lá anu mbɨ́ʼ nchinə, mbɔnɨ abɔʼnɨ nɨdorɨ na Azhwi zə Fɛmnɨ a ghánə́ ghe. 18Ɨbɛn ba bɨ faʼnə a mbó Kristo a nye ndóm məwen, ɨnu mətsiŋ ghɨə ɨnye Ŋwi bɔŋənə, ɨbɛn kə́ mbémtə́ awa ghe.
19Ma lan, bɨgɨnə mɨ zagɨ ghɛn nɨ mbyi a ngɨ ɨnu tsa tsɨ yenə nɨ mbɔnɨ abɔʼnɨ tsa tsɨ kwátɨ́nə́ a shintɨ ŋwɔn nɨ ŋwɔn ə. 20Mbɨ́ʼ mɨdzɨ koʼ tsənkɨ anu za Ŋwi a ghɨnə. O chi dzɨ ɨbə́ŋ mɨdzɨ ɨtsum, lá ka a bɔŋ ayi a ndzɨ́ azúm za a mɨ ghɨ á ŋwɔn wu mɔʼɔ a ghɨ ɨbvu ə. 21Anu za a kuʼnɨnɨ a ngɨə a nɨ ngə́ tsi tɨ kfurɨ ɨnyam, tɨ no mɨluʼ, kə tɨ ghɨ anu zə tsɛrə za a mɨ ghɨ á mɨma ɨgho a ghɔgə. 22Len abeməntəm za o tsinɨ nɨ zɛrə mbɨ́ʼ anu zɛnə tsɛʼ a tɨtərɨ bɨŋ Ŋwi ə. Nɨdorɨ tsi a mbó ɨbɛn ba ka mɨntəm ɨma sáʼə ayi awa mbáʼ be bo ghɨ anu za bo kwaʼtɨnɨ ngə́ a kuʼnɨ ə! 23Lá ŋwɔn wa a məŋnɨnɨ azúm za a dzɨ́nə́ Ŋwi a mɨ soŋ ngə́ a vwo ɨsáʼ, mbáʼ be a dzɨ a zɛrə, mbɨ́ʼ ngə́ ka a ghɨ ayi lá anu za a nɨŋnɨ ntəm ɨyi ɨwu ə. Anu za o ghɨnɨ tɨkə a lo a mu abeməntəm azo, a nɨ ngɨ ɨbvu ə.
നിലവിൽ തിരഞ്ഞെടുത്തിരിക്കുന്നു:
Roma 14: MNT
ഹൈലൈറ്റ് ചെയ്യുക
പകർത്തുക
താരതമ്യം
പങ്ക് വെക്കു
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
© 2023, CABTAL
