फिलिप्पी 1
1
अभिवादन
1मसीह येशुउ दास पौलुस अने तीमुथियुसो वोलरोत आखे पवित्र माहाआ नावामेहे जे मसीह येशुमेहे फिलिप्पी मेहे रोतेहे अध्यक्ष अने सेवको आरी. 2आमाआ बाह्हू परमेश्वर अने आमा प्रभू येशु ख्रिस्तामेहे तुमामे कृपा, शांती जोडती रोय.
धन्यवाद अने कलीसिया कोअता प्रार्थना
3आय जाहा तुमामे ओर कोअत्लू तेहलाम-तेहलाम परमेश्वरोओ धन्यवाद आपित रोतो, 4माआ हर एक प्रार्थनाम आय आनंदावाही तुमा कोअता प्रार्थना कोअत्लू. 5काहाके पेल्ला दिवसापोरोत ओमेजा सुवार्ता प्रचारा मेहे तुमु माआ सहभागीता रोल्या होय. 6माहु याआ गोठीपो पुरो भोरुसो होय का ज्या परमेश्वराने तुमामे एहलो जे उत्तम का माहा सुरवात कोअयी होय ते तिया दिहेजा राखीत मेकिलो, जाहा येशु ख्रिस्त आवे ते पुरो कोअही. 7तुमु आखाज माकोअता एहेलू विचार ठीक होय काहाके तुमु आखे माआ मोनामे होय अने फक्त तियाआ वेले नाहा का आय जेलूम ओतू पोन तेहलाज मेहे बी ज्या वेळेस आय सुवार्ता राखिलो कोईत रोतो, तुमु आखे यामे विशेष अधिकारी रुपोमे माआ कृपा वाईहि सहभागी उवे होय. 8परमेश्वर माआ साक्षीदार होय का आय तुमा कोअता लालसा कोअत्लु. 9आय ओच प्रार्थना कोईत रोतो का तुमाआ प्रेमोओ नजरोम अने ज्ञानाने तुमु वोडता जावा, 10ऐ गुण मिलवीत हाजू-खाराब यामेहे अंतर कोईत कायम जे हाजो होय ते लेधलो ह्याप्रमाणे तुमु पवित्र बोनणारू, जांहा येशु ख्रिस्त आविलो होय, 11येशु ख्रिस्ताआ धर्म मेलविनारू तेहलाम तुमु उत्तम काम कोअनारू ज्याआपोरोत देवोहो गौरव मिल्यो होय ऐ तियाआ महिमा उवे.
केय्दी रूपमेहे सेवा
12ऐ पाही, आय तुमामे कोहू इच्छितो का माआरी जे किबी उवे होय तीयावाही सुवार्तेला बोड़ती उवे. 13परिणामी संसाराआ आखे सुरक्षा दल तेहलूज दिहरे आखे मांहे यांहा मालूमे उवे का माहु ख्रिस्ताआ अनुयायी एहला कारनोवाही कैदी बोनाडल्ये होय, 14अने प्रभू मेहे जो पाही, तीयामरोत अधिकतर माआ कैद मेहे होय कोईत धीरावाही परमेश्वरो सुवार्ता निर्भयतावाही कोयु ओते. 15ऐ खोरो का तीयामरोत किबी हेवाकोइत वैर्भावाने सुवार्ता कोयु होय परंतु थोडे मांहे सद्भावनेने ख्रिस्ताआ सुवार्ता कोयु रोतेहे. 16ऐ मांहे प्रेमोवाही एहलो कोअता काहाके तियाहा मालूमे होय का परमेश्वराने सुवार्ता वसाडिलोकाजे माहु इंही मेकल्ये होय. 17पोन थोडे मांहे सत्यांआ नाहा पोन स्वार्थी स्वभावो वाही ख्रिस्ताआ प्रचार कोईत रोतेहे काहाके ते विचार कोअता का ह्याआरी ते जेलूम तेमा कोअता मेहनत निर्माण कोहू सेकेहे. 18पोन ह्याआरी किबी फरक उवनारा नाहा महत्वाओ ऐ होय का होमला सच्चाई होस अथवा दिहरा ठोगो होस तो हाजू संदेश होय किंवा वाईट होय तो ख्रिस्ताआ होय अने तीयावाही माहु आनंद मिलीलो रोही. 19काहाके माहु मालूमे होय का तुमाआ प्रार्थने त्यापोरत अने तीयावाही जो येशु ख्रिस्ताआ आत्मावांहि जोडयो ओते परिणामी तीयावाही माहु उद्धार मिले.
जीवतो रोअलोओ मसीह होय
20माआ हीदू इच्छा अने आशा ए होय अने माहु यामे विश्वास होय का कोडनीबि गोठीपो नाराज उवे नाहा परंतु पुरो निर्भयतावाही माआ डीलपो रोत ख्रिस्ताआ गौरव कायम उवनारा रोअला आवे तेहलूज आवनाराआ दिहोम पोन उवनारा रोअला आवे यामे आय जीवो किंवा मोओ. 21काहाके माआ जिवनाआ अर्थ ख्रिस्तात जीविलो अने मोईलो ओ लाभ होय. 22जर माआ याआ डीलोवाही जिवंत रोही ताहा याआ अर्थ ओ उवे कोआ आय आपाआ कामोवांही आनंद कोआ पोन माहु होमजाडीत नाहा का आय याकोअता निवाडले. 23याआ बारामेह आय पेचात होय ईहिरोत हुटोत जात ख्रिस्ता आरी रोणारे माहु उत्कंठा होय काहाके देहामेहे रोहोलोकाजे ओ जाहाकोज हाजो होय 24पोन याआ डीलोम रोहिलो तुमा कोअता जाखा आवश्यक होय. 25अने काहाके ओ आय निच्छित ओलखील्तू का अध्यात्मिक उन्नति अने विश्वासा निर्माणे उवलो आनंदावाही तुमाआरी रोत होय 26याकोअता का तुमापोओ फासी आवता परिणामी स्वरूप माहु मसीह येशुमेहे स्थिर माआरी गर्व कोइला कोअता अने जाखा आधार आवे.
प्रयास अने मसीह कोअता दुःख उठावलोओ
27पोन हर एक प्रकारे एहलो को का तुमाआ वागणुक ख्रिस्त सुवार्ताच्या त्यावाईहि अनुकूल रोअलो ज्याआपोरोत जेबी आय ताआरी आविलो तुमामे पाल्हू किंवा जेबी आय तुमाहाहि रोते सेटेरोत तुमा बारामे ओच होमला का तुमु होमला आत्मा मेहे दृढताने स्थिर ओवुहू अने सुवर्ताआ मदतीवाही निर्माणे उवलो विश्वासा एक ओतगोयु संघर्ष कोईत होय, 28तेहलूज फासी ओबी होमला इच्छितो का तुमु आपाआ विरोध वाला बिक नाहा तुमाआ ओ विश्वास नाशाआ प्रमाण होय अने ओच प्रमाण होय का तुमाआ उद्धारो अने परमेश्वारापो रोत ऐहलोच कोयु जालो. 29काहाके ख्रिस्तापोरोत तुमामे न फक्त विश्वास कोइला कोअता पोन त्याकोअता सहन कोइला कोअता विशेष अधिकार आप्यू होय 30तुमामे मालूमे होय का तुमु तियाहा संघर्ष कोअलाआ एकजूट होय तीयाम आय संघर्ष कोईत होय जेहलो का तुमु होमलित ओमेजा आय मग्न होय.
നിലവിൽ തിരഞ്ഞെടുത്തിരിക്കുന്നു:
फिलिप्पी 1: NOINT
ഹൈലൈറ്റ് ചെയ്യുക
പകർത്തുക
താരതമ്യം
പങ്ക് വെക്കു
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
Noiri (नोयरी) Bible by The Love Fellowship is licensed under Creative Commons Attribution-ShareAlike 4.0 License.