Abidyas 1
1
1Ipoga s’Abidyas.
Yeṉo kambe Rerè, Yeôva, g’ômwanja w’Edom inè: Azw’are jogo pe ntyangô avila gôre Yeôva, n’igende ny’arôm̃yô gôr’aṉongo inè: Gum̃aṉaṉi, azwè ga gèndeṉi gôr’Edom gô nwa na yè! — 2Vôna, mi be kongizo gôr’aṉongo, ko wè pèdyô pôlômè. 3Ekale z’ôrèm̃i wo zi re wè fwem̃iza pa, awè yi dwaṉa gw’impulungu y’adô, awè yi dwaṉa gw’imbôr’indôndwi, na yi bulya g’ôrèm̃i womè inè: Mande be punga myè kwanga gô ntye? 4Vangaṉe awè tô kenj’ikundu nyo gw’igôṉô vyagaṉô na nyi ngwanyoṉi, vangaṉe awè tô dôṽya nyô gw’igègèṉi, mi be sônyo avila gôgô, bulye Yeôva. 5J’ifwe, n’igwèrisi, y’abya gôre wè ôgwèra, mbundakaṉi nde yi re gôre wè! ndô wi jufa vyagaṉô ni nt’are waô ko jôra? ja mongi wi datiz’ilônda y’igoli w’abya gôre wè, wi pa tig’ilônd’imyèwo gô kum̃inyô? 6Èñ, ga nt’ar’Esau jarô pa! ga nt’ar’igumbi nyè jeṉô pa! 7Vandi yo yôdu yi re wè suga pa kwanga g’ôkawô wi ntye, indegô so si re wè temiza pa n’ômbyagwaṉa, si re pangiṉo pa, waô w’anyeṉag’inyi so wi re wè puriṉa p’imôndô, na ô pa kôtiz’igamba! 8Aranga gô ntyugu mèyoṉo, bulye Yeôva, inè, mi be jiliz’aṉaga w’imya avila gw’Edom, n’ikôtiza avila gô nômba y’Esau? 9Ṽèmbi yo, awè Teman, yi be tya, konde waôdu avila gô nômba y’Esau wi be jôṉô njôṉôgô.
10G’ômwanja wi mbaô yo gôre mwô’ngi yo Yakob, ô be pugô ni ntyoṉi, ko wè jilizô gô koṉako. 11Gô ntyugu y’agum̃aṉi wè g’ôzô wè, gô ntyugu y’arwaṉ’agènda ikôte mbèli yè, gw’ayingiṉ’agènda gw’impômbali yè, avung’ezôga gô Yerusalèm, awè kè w’avegag’egolaṉi g’ôm̃ori gôre waô. 12Ndô avôna gô ntyugu ya mwô’ngi yo, gô ntyugu yi njuke yè, ayeṉ’igeṽa g’ômwanja w’awaṉa wi Yuda gô ntyugu y’ijilizi saô, aṉunguṉ’ôgwaṉa zange gô ntyugu y’ijela! 13Ayingiṉa gw’impômbala y’iṉongo nyam̃ gô ntyugu y’ijilizi sè, avône njuke yè gô ntyugu y’ijilizi sè, ge taly’ôgo gw’igumbi nyè gô ntyugu y’ijilizi sè! 14Agum̃aṉa gw’am̃èrakaṉô m’impoṉo gô jiliza mongi yè wi pera, ge wè piṉa mongi yè wi re tôla pa gô ntyugu y’ijela! 15Konde ntyugu yi Yeôva y’atweṉi pyèrè, gôr’aṉongo môdu; e be dendiṉo ga nt’are wè denda pa, ijanji so si be tô pôswa gw’ewônjô zo. 16Konde ga nt’are ṉwè jonga pa gô nômbi yam̃ y’ôrunda, yeṉo aṉongo môdu mi be jonga egômbe zôdu; mi be jonga, ko mô mèṉa. Na mi be dwaṉ’egolaṉi ga mi pa dwaṉa ni mori.
17Ndô isungiṉa si be dwaṉa gô nômba yi Siyôn, yi be dwaṉ’ôrunda, ni nagô yi Yakob yi be tô niv’ôrumbi wè. 18Nagô yi Yakob yi be dwaṉ’ôgôṉi, ni nagô yi Yôsèf ibam̃iṉa s’ôgôṉi; ndô nagô y’Esau yi be dwaṉ’ekum̃u, wi be peza yô ayiliza yô; e ze tigaṉ’ezom̃a avila gô nagô y’Esau, konde Yeôva are kamba pa. 19Ndô waô gô nkôṽa yi Sud wi be nive nômba y’Esau, na waô w’ôdèdè ntye yi Filiste; wi be nive ntye y’Efrayim ni ntye yi Samarya; ni Benyamin e be nive Galaad. 20N’ikôte yi mbèli yiṉo y’awaṉa w’Israèl wi be nive ntye yi re janjô pa ne mongi Kanaan kwanga gô Sarèpta, n’ikôte yi Yerusalèm yi rè gô Sefarad yi be niv’inkala si nkôṽa yi Sud. 21Izungiṉi yi be panda gô nômba yi Siyôn, gô jèkèlye nômba y’Esau; n’ipangiṉa si be dwaṉa si Yeôva.
നിലവിൽ തിരഞ്ഞെടുത്തിരിക്കുന്നു:
Abidyas 1: MYE
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
Published by the British and Foreign Bible Society in 1927.