Amosi 9
9
1My’ayeṉi Rerè nkum̃aṉaga gô mbôra yi jirô intyagô. N’awulyi yè inè: Wôle wônjô yi nagô y’Anyambyè ko iṉôm̃e sugyazugya, ko moguṉe mô môdu gô wônjo yaô! mi be jôṉe mbèy y’adèka n’ôkwara w’iwora. E zel’ôma avila gôre waô e be jolye fanga gô sungiṉ’ôkuṽi wè, e zel’ôma avila gôre waô e be pera. 2Ja w’asôlya gw’ilômbô, ôgo wam̃ wi be tômba waô; ja w’apanda g’ôrôṽa, mi be sônya waô gô ntye. 3Ja w’asombuṉa gw’esôsôlô zi Karmèl, mi be buta waô gôgô, agôta waô ngwasi; ja w’ajumbuṉô avila gw’antyo mam̃ gô mbentye, mi be sômby’ôm̃amba gô ta waô gôgô. 4Ja w’akôtô ikôte gw’azô m’ilôvalôvi yaô, mi be sômby’ôkwara w’iwora gô jôṉa waô gôgô; mi be dôṽy’antyo mam̃ gôre waô gô dende mbe ndô arange mbya.
5Rerè, Yeôva y’imbèli, e bwate ntye, ko yô sugyazugya, n’alwaṉi wa yô waôdu wi re n’iwoga; yôdu yi panda ga nte pand’aṉingô m’ôrèmbo, ko yô tô bèdya ga ôrèmbo w’Egipt. 6Are nôga p’ilwaṉô nyè g’ôrôṽa, alôṽy’igomi nyè gô ntye; e fwey’aṉingô mi mbeṉe, ayira mô g’ôzô wi ntye: Yeôva ne ini nyè.
7Aṉw’azele gôre myè ga awaṉa w’Etyop, awaṉa w’Israèl? bulye Yeôva. Mi pa koguny’Israèl avila gô ntye y’Egipt, ga Filiste avila gô Kaftor na mongi Sirya avila gô Kir? 8Vôna, antyo ma Rerè, Yeôva, mi re gw’ipangiṉ’ibe. Mi be jiliza sô avila gw’ôzô wi ntye; ndô mi ze jilize nagô yi Yakob vya, bulye Yeôva. 9Konde vôna, mi be p’izômbyô yam̃, mi be sugyazugye nagô y’Israèl gw’aṉongo môdu, ga nte sugyazugyô eganjuṉa, ko z’avôsunya vangaṉe intyw’im̃ori gô ntye. 10Aṉag’aṽe waôdu w’iṉongo nyam̃ wi be juwa n’ôkwara w’iwora, waô wi bulya inè: Mbe yi ze susa pyèrè, ge yô data zwè.
11Gw’egômbe mèzoṉo mi be nongunye nagô yi David yi re pôswa pa, mi be kumanye yom̃a yi re sazô pa ya yô, mi be tô nôga yô ga nt’avegagi yô gw’alônga, 12ko waô nive mbèy yi re tigaṉa pa y’Edom n’aṉongo môdu mi re fweyô pa n’ini nyam̃, bulye Yeôva, yi be dend’isam̃u yiṉo. 13Vôna, intyugu si bya, bulye Yeôva, si be kôt’ôma wi tumbiṉe ntye agôt’ôma wi teṉa, n’ayè yi jar’ilônda y’ivè ayè yi nyèny’ilônda, si r’ôbuka wi be twa gw’inômba ko wô pôva gô sanômba yôdu. 14Mi be tô bag’ikôte y’iṉongo nyam̃ ny’Israèl; wi be tô nôg’inkala si re jilizô pa ko waô dwaṉa gô sô; wi be bèṉ’intyaga s’igoli, ayong’ivè nya yô, wi be bèṉ’intyaga any’ilônda ya sô. 15Mi be bèṉa waô gô ntye yaô, wi ze tô tôduṉô nyèṉè avila gô ntye yi re myè pa pa waô, bulye Yeôva, Anyambyè yo.
നിലവിൽ തിരഞ്ഞെടുത്തിരിക്കുന്നു:
Amosi 9: MYE
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
Published by the British and Foreign Bible Society in 1927.