Ezekyèl 46
46
1Yeṉo kambe Rerè, Yeôva, inè: Iguge nyi ñanja ya gare, gô nkôṽa yi tongwa ni nkômbe, nyi be nunjô gô ntyugu ôrôṽa s’ijanja; ndô nyi be nunguṉô gô ntyugu y’ijowa, na gô ntyugu y’ôgwèli ômwoṉa. 2Ôvangiṉi e be jingiṉa ni mpoṉo y’evungu z’iguge nya gw’igala, e be kum̃aṉa gw’im̃èngo ny’iguge; n’imiṉisè si be jire ntyagô yè yi pezô n’intyagô sè si p’akeṽa; n’ayè e be saviṉa g’ômpômbala w’iguge, gambèṉè ayè tô kogwa, ndô iguge ny’ayolye nunjô kaô nkôlô. 3N’aṉaga wi ntye wi be saviṉe Yeôva g’ômpômbala w’iguge mè, gw’intyugu s’ijowa na gw’agwèli am̃oṉa. 4Ntyagô yi pezô yi r’ôvangiṉi ko jira gôre Yeôva, gô ntyugu y’ijowa, yi be dwaṉ’awaṉa w’adombè ôrôṽa mi r’ibôke fo, n’idomb’iṉôm̃e nyi r’ibôke fo; 5ni mpagaga yi be dwaṉ’efa mori gw’idomb’iṉôm̃e, ni ga nt’are‐yè ni ngulu gô pa g’awaṉa w’adombè, ni in mori y’agali gw’efa mori. 6Gô ntyugu y’ôgwèli ômwoṉa e be jir’iwanjo nyi nyare yi r’ibôke fo, awaṉa w’adombè ôrôṽa n’idomb’iṉôm̃e mi be dwaṉ’ibôke fo. 7N’ayè e be kekiz’inya si ntyagô, efa mori gô nyare, n’efa mori gw’idomb’iṉôm̃e, ni ga nt’are yè ni ngulu gô pa g’awaṉa w’adombè, ni in mori y’agali gw’efa mori. 8Gô be jingiṉ’ôvangiṉi, e be jingiṉa ni mpoṉo y’evungu z’iguge, n’ayè e be kogwa kè ni mpoṉo mèmô. 9Ndô gô be by’aṉaga wi ntye g’ôzô wi Yeôva, gw’ifèti si re dôṽyô pa, ayè yi jingiṉa ni mpoṉo y’iguge nyi Nor gô saviṉa, e be kogwa ni mpoṉo y’iguge nyi Sud; n’ayè yi jingiṉa ni mpoṉo y’iguge nyi Sud, e be kogwa ni mpoṉo y’iguge nyi Nor; ayè awinye ni mpoṉo y’iguge y’ajingiṉa na yè, ndô e be kogwa ni mpoṉo yi re swaswo na yè. 10Ôṽangini, gô be jingiṉa waô, ayè kè e be jingiṉa gô garegare yaô; na gô be kogwa waô, e be kogwa na waô ta. 11Gw’ifèti na gw’idataṉi saô, mpagaga yi be dwaṉa efa mori gô nyare, n’efa mori gw’idomb’iṉôm̃e, ni ga nt’are yè ni ngulu gô pa g’awaṉa w’adombè, ni in mori y’agali gw’efa. 12Gô be jir’ôvangiṉi ntyagô yi pezô yi ntondiṉi, ntyo ntyagô y’akeṽa yi ntondiṉi gôre Yeôva, gambèṉè iguge nyi pôna gô nkôṽa yi tongwa ni nkômbe nyi be nunguṉô gôre yè, n’ayè e be jire ntyagô yè yi pezô, ni ntyagô yè y’akeṽa, ga nt’are yè ko denda gô ntyugu y’ijowa; avila vavo e be kogwa, n’ayè kogwa pa ôm̃ori e be nunj’iguge. 13N’awè ô be jir’ômwidombè w’ômpum̃’ôm̃ori wi r’ibôke fo gô ntyagô yi pezô gôre Yeôva ntyugw’edu; ô be jira wô ibangy’edu. 14Ô be kunda gô mpagaga ibangy’edu, mbèy y’ôrôṽa y’efa, ni mbèy yi ntyarô yi in y’agali, gô binda mô ni farinya mbya. Yô ne mpagaga gôre Yeôva, ôzômbyô wa koṉako, gô dwaṉ’egômbe zôdu. 15Ibangy’edu wi be jir’idombè ntyagô, ni ntyagô yi mpagaga n’agali, vo ntyagô yi pezô y’egômbe zôdu.
16Yeṉo kambe Rerè, Yeôva, inè: J’ôvangiṉi ape mpagaga gôr’ôm’edu gôr’awaṉi wè aṉôm̃e, mpagaga yi bongô gw’ijigô sè, gambèṉè mpagaga mè yi be dwaṉa gôr’awaṉi wè aṉôm̃e: yô ne inivi saô v’ijiga. 17Ndô j’ay’apa avila gw’ijigô sè mpagaga gôr’ôm̃ori w’inyôngô sè, gambèṉè mpagaga mè yi be dwaṉ’iyè kwanga g’ômpum̃a w’ôdyèngadyènga, gambèṉè yi be fwinya gôr’ôvangiṉi; ndô g’ômwanja w’ijigô sè, yi be dwaṉa gôr’awaṉi wè aṉôm̃e dadyè. 18Ôvangiṉi awong’ezom̃’edu avila gw’ijigô s’aṉaga, ge kwèriṉa waô igumbi nyaô; ayè e be p’ijiga gôr’awaṉi wè avila gw’igumbi nyèmè, ko aṉagi wam̃ w’avazangaṉô ôm’edu avila gw’igumbi nyè.
19Vovo aṽagyè myè, vo njingiṉô y’avegagi g’ôzamba w’iguge, gw’inontye s’ôrunda gôr’imiṉisè, s’avônagi gô nkôṽa yi Nor. Na vôna, avegagi vovo mbôra gô nkôṽa yi ntyay, gô nkôṽa yi kènda ni nkômbe. 20N’awulinyè myè inè: Yiṉo ne mbôra yi be namb’imiṉisè izôṉe y’intyagô s’ôgara n’intyagô si taṽ’ibe, mbôra yi be pika waô inya s’intyagô, ko w’agogunya sô gô ñanja ya gw’igala, na gô mèpiz’aṉaga. 21Vovo agogunyè myè gô ñanja ya gw’igala, n’avangyè myè gô pyagaṉa gô ntulungu nay si ñanja. Na vôna, gô ntulungw’edu yi ñanja avegagi vovo ôgwiriṉa. 22Gw’intulungu nay si ñanja avegagi vovo igwiriṉa y’avegag’igom̃a, idava agôm̃i m’ikude anay, n’ômpuzu agôm̃i m’ikude ararô; yiṉo nay avegag’egèṉizô emô gw’intulungu. 23Ôgômba w’avegagi pingwavingwa pa gô yô, vingôvingô yô nay, n’anu m’avangyô gô ntiṉa y’ôgômba vingôvingô. 24Vovo awulinyè myè, inè: Siṉo ne inagô si nambiṉa si be namb’imiṉisè si nagô izôṉe y’intyagô si be jirô iṉongo.
നിലവിൽ തിരഞ്ഞെടുത്തിരിക്കുന്നു:
Ezekyèl 46: MYE
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
Published by the British and Foreign Bible Society in 1927.