Ezekyèl 45
45
1Gô be kera ṉwè ntye gô jigô ne egaṉô, aṉwè be tômba, ga ntyagô gôre Yeôva, mbèy yi ntye; elaviṉi zi be dwaṉ’elaviṉi z’agôm̃i m’intozèny s’intôngô ambaṉi, n’intozèny s’intôngô ôtaṉè; n’evendiṉi zi be dwaṉ’igôm̃i ny’intozèny; yi be dwaṉ’ôrunda gw’igômbiṉô yôdu ya yô vingôvingô. 2Avila gô mbèy yiṉo e be dwaṉe mbôra y’ôrunda gw’idava nkam̃a s’intông’ôtaṉè, ni nkam̃a s’intông’ôtaṉè gw’ipenda, inkôṽa sôdu ntôra mô, n’agôm̃i m’ikude atanè g’ômpuzu wa yô vingôvingô. 3N’avila gw’egèṉizô ziṉo, inè, elaviṉi z’agôm̃i m’intozèny ambaṉi n’intozèny ôtaṉè, n’evendiṉi igôm̃i ny’intozèny, gô yô ô be kèṉize mbôra gô dwaṉe nagô y’ôrunda, ôrund’ômpôlô mè. 4Mbèy mèyoṉo ne ntye y’ôrunda: Yi be dwaṉa gôr’imiṉisè, imiṉisè si janja gô nagô y’ôrunda, si susa pyèrè gô janja gôre Yeôva; vovo yi be dwaṉe mbôra gw’inagô saô, ni mbôra y’ôrunda gô nagô y’ôrunda. 5Agôm̃i m’intozèny s’intôngô ambaṉi n’intozèny s’intôngô ôtaṉè gw’idava, n’igôm̃i ny’intozèny s’intôngô gw’ipenda si be dwaṉa gôre Leviti, iyanjisi yi nagô, n’agôm̃i m’inontye ambaṉi. 6Aṉwè be dôṽy’iniva si nkala ômpuzu intozèny s’intông’ôtaṉè, na gw’idava agôm̃i m’intozèny s’intôngw’ambaṉi n’intozèny ôtaṉè, ôzamba vo ôzamba evangiṉi emô gô mbèy y’ôrunda; yi be dwaṉa gô nagô yôdu y’Israèl. 7Aṉwè be tiga gôr’ôvangiṉi mbèy g’ôzamb’ôm̃ori na g’ôzamb’ôm̃ori kè wi mbèy y’ôrunda, na w’iniva si nkala, swaswo ni mbèy y’ôrunda ni swaswo n’iniva si nkala, gô nkôṽa yi kènda ni nkômbe, agènda gô nkôṽa yi punda na yô, na gô nkôṽa yi tongwa ni nkômbe, agènda gô nkôṽa yi tongwa na yô, gw’elaviṉi zi keka gô mbèy mori avila gw’imbèy, avila g’ôgômbiṉô wi nkôṽa yi kènda ni nkômbe kwanga g’ôgômbiṉô wi nkôṽa yi tongwa ni nkômbe. 8Mbèy mèyoṉo yi be dwaṉe ntye yè, inivi sè gôr’Israèl; n’ivangiṉi yam̃ y’arô bangaty’iṉongo nyam̃ nyèṉè; ndô yi be tige ntye gôre nagô y’Israèl, ga nt’ar’imbuṽe saô.
9Yeṉo kambe Rerè, Yeôva, inè: Atweṉi kwèkwè, ivangiṉi y’Israèl! rômbaṉi mbaô ni yom̃a yi re kwèrô pa, alend’ijèkèlya n’ôgôre; rômbaṉ’isam̃u yaṉi imbe avila gôr’iṉongo nyam̃, bulye Rerè, Yeôva. 10Lwaṉaṉi n’idôdô yi r’ipita fo, n’efa zi r’ipita fo, ni bat yi r’ipita fo. 11Egèṉizô z’efa na zi bat zi be dwaṉ’egèṉizô emô; bat yi be keka ni mbèy y’igôm̃i y’egèṉizô z’ômèr, n’efa kè zi be keka ni mbèy y’igôm̃i y’egèṉizô z’ômèr; egèṉizô ya yô zi be dwaṉa ga nt’are ômèr. 12Sikèl yi be dwaṉ’agôm̃i m’igera ambaṉi. Mina yi be dwaṉa gôre ṉwè agôm̃i m’isikèl ambaṉi, agôm̃i m’isikèl ambaṉi ni sikèl ôtaṉè, igôm̃i ny’isikèl ni sikèl ôtaṉè. 13Yiṉo ne mpagaga yi be bongô ṉwè: mbèy y’ôrôṽa y’efa avila gô ômèr wi frômènte, ni mbèy y’ôrôṽa y’efa avila gô ômèr w’orze. 14Aṉwè be nwaṉa gw’agali na gô bat y’agali, mbèy y’igôm̃i yi bat avila gô kor, yi re mpangiṉi mô n’ômèr w’igôm̃i ny’ibat, konde igôm̃i ny’ibat sô ne ômèr. 15Idombè, avila g’ôlemba wi nkam̃a mbaṉi, gw’iny’ibya s’Israèl, nyi be pô gô ntyagô yi mpagaga, gô ntyagô yi pezô, na gô ntyagô yi p’akeṽa, gô pang’ôraṽô w’ibe gôre waô, bulye Rerè, Yeôva. 16Aṉaga waôdu wi ntye wi be pa gô ntyagô yiṉo gôr’ôvangiṉi gw’Israèl. 17Ôvangiṉi wi be dwaṉa n’eṽilô zi p’intyagô si pezô, n’intyagô si mpagaga, n’intyagô s’ijonga, gw’ifèti, na gw’agwèli am̃oṉa, na gw’intyugu s’ijowa, na gw’ifèti sôdu si re dôṽyô pa gô nagô y’Israèl; ayè e be jire ntyagô yi taṽ’ibe, ni ntyagô yi mpagaga, ni ntyagô yi pezô, ni ntyagô yi p’akeṽa, gô pang’ôraṽô w’ibe gôre nagô y’Israèl.
18Yeṉo kambe Rerè, Yeôva, inè: G’ôgwèli ôlônga, gô ntyugu nônga y’ôgwèli, ô be bong’iwanjo nyi nyare nyi r’ibôke fo, ko wè jombunye nagô y’ôrunda. 19Miṉisè yi be bonge ntyiṉa yi ntyagô yi taṽ’ibe, awela yô gw’am̃èngo m’ômpômbala wi nagô, na gw’intulungu nay si mbôra yi jirô intyagô, na gw’am̃èngo m’iguge nyi ñanja ya gare. 20Ô be denda yeṉo kè gô ntyugu y’ôrwageṉô y’ôgwèli, g’ômwanja w’ôm’edu wi fwem̃a njelaga ntyo wi r’ôkeli fo; yeṉo aṉwè be jombunye nagô. 21G’ôgwèli ôlonga, gô ntyugu y’igôm̃i ni nay y’ôgwèli, aṉwè be dwaṉa ni ntyagô yi Paki. Fèti yi be dinga ntyugu ôrwageṉô; yi be nyô impèmba si re levèn fo. 22Gô ntyugu mèyoṉo ôvangiṉi e be jire nyare gô ntyagô yi taṽ’ibe, g’ômwanja w’ôkuṽi wèmè, na g’ômwanja w’aṉaga waôdu wi ntye. 23Ni ntyugu ôrwageṉô si fèti e be jire ntyagô yi pezô gôre Yeôva ntyugw’edu nyare ôrwageṉô n’adombè aṉôm̃e ôrwageṉô mi r’ibôke fo, intyugu mèsoṉo ôrwageṉô, ni ntyugw’edu mbôṉi nôm̃e gô ntyagô yi taṽ’ibe. 24N’ayè e be kunde mpagaga y’efa mori gô nyary’edu, n’efa mori gw’idombè iṉôm̃y’edu, ni in mori y’agali gô efa mori. 25G’ôgwèli w’ôrwageṉô, gô ntyugu y’igôm̃i n’ôtaṉè y’ôgwèli, gô fèti, e be dend’egolaṉi zi ntyugu ôrwageṉô, ga nt’ar’intyagô si taṽ’ibe, ga nt’ar’intyagô si pezô, ga nt’ar’intyagô si mpagaga n’agali.
നിലവിൽ തിരഞ്ഞെടുത്തിരിക്കുന്നു:
Ezekyèl 45: MYE
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
Published by the British and Foreign Bible Society in 1927.