Romaĉantyidyes 5
5
Jenꞌ rụij yuꞌsinꞌ atsvun
1Q̂uinꞌ aty rụij yuꞌsinꞌ Jenꞌ anicyedyeꞌyaꞌ tsun, mọꞌdyes q̂uinꞌ aty jämꞌjibudyiĉaꞌ Jenꞌyaꞌ tsun, ĉaĉaij na muꞌ Jesucristo Ayoꞌ tsun jämꞌ yuꞌbusinꞌ. 2Muꞌ c̣hẹiꞌyaꞌjisinꞌ Jenꞌyaꞌ anicyedyeꞌyaꞌ tsun, paj qui muꞌsiꞌ ñịbeꞌjitidyes räjĉan tsuncheꞌ buꞌyiꞌ. Q̂uinꞌ aty maꞌjodyeꞌtum bisjaꞌ tsun junꞌ chuc raꞌ Jenꞌyaꞌ tsun, där jämꞌsiꞌ jedyeꞌ soꞌmisinꞌ raꞌ muꞌ. 3Meꞌ tsanꞌ ñịbedyes jịꞌĉojtyejaꞌ q̂uinꞌ tsun, maꞌjojaꞌ qui namꞌ bäꞌjaꞌ tsun, ĉaĉaij na aty chị́jaꞌ tsun mọꞌ ñịbedyes jịꞌĉojtyejaꞌsiꞌ tsun, mọꞌ ñútyisinꞌ paj qui tupuj dyichchutidyeꞌtum bäꞌjaꞌ tsun. 4Meꞌ bäꞌjaꞌ jụijyaꞌ tsun, mọꞌ maꞌjotyibusinꞌ muꞌ Jenꞌ, chị́jaꞌ muꞌ Jenꞌ meꞌ maꞌjotyisinꞌ jụijyaꞌ, mọꞌ yiꞌ paj qui maꞌjodyeꞌtum bisaĉaꞌ tsun. 5Mọꞌ bisacdyeꞌ tsun jam raꞌ fibiꞌ mọꞌ shupquiꞌ, ĉaĉaij na muꞌ Jenꞌ mujuꞌchaꞌ mạꞌjisinꞌ tsun, yoj jisinꞌdyemꞌ Ạꞌedyeꞌ jiquej umꞌ, mọꞌ ñịbeꞌjisinꞌsiꞌ muꞌ Jenꞌ.
6Jeshaꞌ jiquej tsun jam junꞌ ĉụiꞌ tupuj jiꞌc̣hontiĉaꞌ tsun, mọꞌ qui ayij tupudyeꞌ Jenꞌsiꞌ muꞌ, muꞌ Cristo mạꞌjitidyesyaꞌ muꞌ jiꞌijati ac̣hiꞌyitydyes muntyiꞌ tsun. 7¿Tyi bu raꞌ tupuj yirity muntyiꞌ jiꞌijati yoctyidyes muntyiꞌ in? Meꞌ raꞌ tsanꞌ rụijtyitydyes muntyiꞌ jụijyaꞌ, jam raꞌ junꞌ jiꞌijati muꞌdyes paj qui ñutsjetyete. Vatyquej muꞌyaꞌ jụijyaꞌ yirity muntyiꞌ mạꞌjeꞌ jiꞌijati jämꞌtyidyes. 8Jenꞌ qui namꞌ jiꞌcaviyisinꞌ därsiꞌ mạꞌjitidyes muꞌ, meꞌ tsanꞌ jam jämꞌyity tsun, juchajĉandyemꞌ jiquej tsun, Cristo qui jiꞌijati tsundyesiꞌ. 9Jesucristosyaꞌ chäsh muꞌ Jenꞌ rụij yuꞌsinꞌ, jam mọꞌ mọmoꞌ, chimeꞌ muꞌ raꞌ meijjityisinꞌ vaꞌtacdyeꞌ Jenꞌsiꞌ muꞌ, paj qui jam tsuncheꞌ tŝọiꞌ mọꞌ. 10Tsun jiquej fáquitiĉaꞌdyemꞌ bäꞌjaꞌ Jenꞌtum jiquej, meꞌ tsanꞌ meꞌ muꞌ qui namꞌ jämꞌjibusinꞌ muꞌtum Ạvaꞌsiꞌyaꞌ sänꞌdyeꞌ muꞌ. Q̂uinꞌ qui namꞌ aty jämꞌjibujshaꞌ Jenꞌtum, jam mọꞌ mọmoꞌ, chimeꞌ Cristo raꞌ jiꞌc̣honsinꞌ tsun ĉaĉaij na muꞌ aty vañinyeban sänꞌdyeꞌĉantyiꞌ. 11Jam mọꞌ mọmoꞌ, chimeꞌdye q̂uinꞌ aty maꞌjojaꞌ Jenꞌdyes, ĉaĉaij na muꞌ Jesucristo Ayoꞌ tsun muꞌ yuꞌsinꞌ tsun paj qui jämꞌjibujshaꞌ Jenꞌyaꞌ tsun.
Adán judyeyaꞌ muꞌ Cristo
12Tashchety muntyiꞌ jiquej Adán muꞌ jiꞌnaꞌeꞌtyiꞌ juchaj ọ́cheꞌ jaccheꞌ, räj qui muntyiꞌ tsun juchajtum shupquejaꞌ. Mọꞌ qui jiꞌmeꞌsinꞌ yuꞌsinꞌ räj sänꞌdyeꞌĉan muntyiꞌ tsun, jam qui yirity vaꞌ tsun. Mọꞌdyes qui muntyiꞌ in räj juchajtum naꞌi in, räj raꞌ säñi in ĉaĉaij na räj juchajtum atsvun in. 13Itŝiꞌdyemꞌ yụꞌtacdyeꞌ jiquej, aty mọꞌ tạꞌcas mọꞌyaꞌ juchaj, jambiꞌ qui namꞌ juchatupte in Jenꞌsiꞌ yụꞌtacdyeꞌ muꞌ, ĉaĉaij na itŝiꞌdyemꞌ yụꞌtacdyeꞌ Jenꞌsiꞌ muꞌ. 14A na men, naꞌi quiꞌ Moisés jiquej, chat qui q̂uinꞌdyemꞌ mọꞌyaꞌ yụꞌtacdyeꞌ muꞌ. Meꞌ tsanꞌ itŝiꞌdyemꞌ mọꞌ yụꞌtacdyeꞌ jiquej, mọꞌ qui namꞌ sänꞌdyeꞌ aty tạꞌcas mọꞌyaꞌ, mọꞌdyes qui muntyiꞌ räj säñi in, yódyemꞌ Adán jiquej u. Meꞌ tsanꞌ muntyiꞌ in jam vaꞌquecbite in Jenꞌsiꞌ p̂eyacdyeꞌ muꞌ jasoꞌmitis jiquej jam jeñej Adán jiquej, räj vatyquej säñi in. Muꞌ Adán jiquej jeñej buꞌyi muꞌ atsijtyiꞌ muꞌ bisvaꞌtety jiquej in.
15Meꞌ tsanꞌ meꞌ jam qui namꞌ muꞌ Adán cätste muꞌ Jesucristo, muꞌsiꞌdye juchaj muꞌ mijam cätsbite Jenꞌsiꞌ ñịbeꞌjitidyes muꞌ. Adán yirity jiꞌnaꞌety juchaj ọ́cheꞌ jaccheꞌ, mọꞌyaꞌ qui daiꞌ säñi muntyiꞌ in, mọꞌ na Jenꞌsiꞌ ñịbeꞌjitidyes muꞌ mọjoꞌchaꞌ mus shupquiꞌ, muꞌ yụꞌte yirity muntyiꞌ, muꞌ Cristo, muꞌ chiquetety Jenꞌ mọꞌdyes qui muꞌ daiꞌ ñịbeꞌjeyacsi muntyiꞌ in. 16Anicdye meꞌ Jenꞌsiꞌ ñịbeꞌjitidyes muꞌ dadamꞌ mọꞌ mọjoꞌchaꞌ shupquiꞌ muꞌ nọ́tacdyes tsundyesiꞌ. Adán yiriꞌ quiꞌ tsanꞌ juchaij jiquej, räj vatyquej jäquiꞌvety jiꞌmeꞌtacsi muntyiꞌ in vaꞌtacdyety shupqui in. Jenꞌsiꞌ na ñịbeꞌjitidyes jam meꞌ muꞌ, meꞌ tsanꞌ daiꞌ quiꞌ juchaij muntyiꞌ in, Jenꞌ qui na ñịbeꞌjitidyesyaꞌ muꞌ rụij yụꞌtacsi. 17Yiritycheꞌ muntyiꞌ naꞌiꞌ mọꞌ juchaj, chat tiyacchutiꞌ mọꞌ sänꞌdyeꞌ jiquej muntyis tsun, chiyirityyaꞌdye muntyiꞌ muꞌsiꞌyaꞌ qui carijtacdyeꞌ muꞌ, mọꞌ mọjoꞌchaꞌ nọ́tacdyeꞌ shupquiꞌ tsundyes. Tyi chuc jụjjepte in Jenꞌsiꞌ ñịbeꞌjitidyes muꞌ, muꞌ raꞌ fibiꞌyaꞌ rụij yụꞌtac, Jesucristo raꞌ jiꞌc̣honacsi chat qui raꞌ muꞌdye yụꞌtacsi paj qui räjĉan tsạꞌ buꞌyi Jenꞌyaꞌ in, aty raꞌ jam meꞌtacsiꞌ sänꞌdyeꞌ.
18Anicdye meꞌ, mọꞌ yiris juchaj muꞌsiꞌ tashchetysiꞌ muntyiꞌ, mọꞌ jiꞌmeꞌsinꞌ paj qui räj muntyiꞌ tsun vaꞌtacdyety shupquejaꞌ tsun. Meꞌdye muꞌ chimeꞌ Cristo yiris sänꞌdyeꞌ muꞌ räj jiꞌc̣honsinꞌ paj qui jam vaꞌtacdyedyety tsun. 19Anicdye meꞌ, muꞌ yirity muntyiꞌ vaꞌquecbite jiquej Jenꞌsiꞌ p̂eyacdyeꞌ muꞌ, mọꞌ yiꞌ paj qui daiꞌ muntyiꞌ juchajtum shupqui in, chiyiritydye muꞌ Cristo chiquepte Jenꞌsiꞌ p̂eyacdyeꞌ muꞌ, mọꞌdyes qui daiꞌ muntyiꞌ rụij yụꞌtac shupqui in.
20Jenꞌ jäquiꞌve yụꞌtaqui yụꞌtacdyeꞌ muꞌ paj qui dayiꞌve chum muntyis juchaj muꞌin. Aty dayiꞌyaꞌ muntyis juchaj muꞌin, mọꞌ qui Jenꞌsiꞌ ñịbeꞌjitidyes muꞌ mọjoꞌchaꞌ buꞌyiꞌ muntyiꞌcheꞌ in. 21Meꞌ tsanꞌ mọꞌ juchaj ñịbeꞌsinꞌ jiꞌmeꞌsinꞌ sänꞌdyeꞌyaꞌ tsun, mọꞌ qui namꞌ ñịbeꞌjitidyes Jenꞌsiꞌ muꞌ tsuncheꞌ buꞌyiꞌ muꞌ, ĉaĉaij na muꞌ Jesucristo Ayoꞌ tsun, muꞌ rụij yuꞌsinꞌ paj qui Jenꞌyadyety tsun.
നിലവിൽ തിരഞ്ഞെടുത്തിരിക്കുന്നു:
Romaĉantyidyes 5: CAS
ഹൈലൈറ്റ് ചെയ്യുക
പങ്ക് വെക്കു
താരതമ്യം
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
Copyright 2017 Nuevo Testamento en Chimane
Jen'si' P̂eyacdye'
