Romaĉantyidyes 4

Junꞌ buty rụij yụꞌtac Abraham

1Chimeꞌ raꞌ dyijtubajsha muꞌ Abraham, vóshiꞌvun tsun jiquej. ¿Junꞌ buty rụij jayuꞌtaque muꞌ Jenꞌ jiquej? 2Jenꞌ jam rụij jayuꞌti muꞌ Abraham jiquej ĉụiꞌsiꞌyaꞌ jämꞌyedyeꞌ muꞌ, junꞌ chuc jämꞌ bäꞌyi muꞌ jiquej. Meꞌ jụijyaꞌ muꞌ, a vuty tupuj ĉụiꞌsiꞌyaꞌ jämꞌyedyeꞌ vaꞌbunyi u Jenꞌsiꞌyaꞌ vej muꞌ. Jam qui namꞌ junꞌ muꞌ meꞌ vaꞌbunnaqui Jenꞌsiꞌyaꞌ vej muꞌ. 3Mọꞌdye p̂eyeꞌ mọꞌ sánacdyeꞌ yiꞌ: "Abraham anicjete Jenꞌ meꞌdyes qui muꞌ Jenꞌ rụij jayuꞌti anicyedyeꞌyaꞌ muꞌ."#4:3 Génesis 15:6 4Jeshaꞌ, muntyiꞌ tsun carijtaĉaꞌ yocve jụijyaꞌ, yaꞌitac tsun, mọꞌ jam ñịbeꞌyedyeꞌ shupquiꞌ. 5Jenꞌtum jam meꞌ mọꞌ. Tyi chuc anicjete muꞌ Jenꞌ, muꞌ rụij yụꞌtac, ĉaĉaij na muꞌdye rụij yụꞌtacsity muꞌin juchajtumtyiꞌ in, meꞌ tsanꞌ itŝiꞌ jämꞌyedyeꞌ muꞌin, anicyedyeꞌyaꞌ qui namꞌ muꞌ rụij yụꞌtacsi ĉụiꞌsiꞌyaꞌ vej muꞌ. 6Meꞌdye muꞌ chimeꞌ Davidvun jiquej p̂eyacsebi maꞌjodyeꞌ muꞌin rụij yụꞌtactyiꞌ Jenꞌyaꞌ in, meꞌ tsanꞌ itŝiꞌ jämꞌyedyeꞌ muꞌin. 7Yiꞌ sánacdyeꞌ Davidsiꞌ:

Där maꞌjoij muꞌin vayactactyiꞌ juchaj in,

Jenꞌ aty jam dyijtucsebi aꞌc̣his dyijyedyeꞌ muꞌin.

8Där maꞌjoij muꞌin aty jam dyijtucsebity juchaj muꞌ Jenꞌ.

9Ọij maꞌjodyeꞌ jiꞌjäques muꞌ David ¿muꞌindyes buty mọmoꞌ seiꞌtactyiꞌ aꞌ in? Jam junꞌ. Muꞌinmundyes chimeꞌ in muꞌin jam seiꞌtactyiꞌ aꞌ in. A nash p̂eyeꞌ yụ ọij sánacdyeꞌ yiꞌ junꞌ chuc muꞌ Jenꞌ rụij jayuꞌti muꞌ Abraham anicyedyeꞌyaꞌ muꞌ. 10¿Junꞌdyeyaꞌ buty rụij jayuꞌtaque? ¿Areꞌ aty seiꞌtacyaꞌ aꞌ muꞌ, areꞌ jambiꞌdyemꞌ seiꞌtac? Tashcheꞌdye rụij yụꞌtac muꞌ jambiꞌdyemꞌ seiꞌtac aꞌ muꞌ. 11Jäquiꞌve qui q̂uinꞌdyemꞌ seiꞌtac aꞌ muꞌ, mọꞌ jeñej buꞌyiꞌ cac̣htacdyeꞌ shupquiꞌ muꞌ, mọꞌ jịꞌĉocdyes aty rụij yụꞌtac Jenꞌyaꞌ anicyedyeꞌyaꞌ muꞌ. Mọꞌdyes muꞌ Abraham jeñej buꞌyi ạvatucsity jenꞌ muꞌin anicjetety Jenꞌ in, muꞌin rụij yụꞌtactyiꞌ Jenꞌyaꞌ in, meꞌ tsanꞌ jam seiꞌtactyiꞌ aꞌ in, meꞌ buꞌyi muꞌ shupqui Abraham. 12Muꞌdye jenꞌ buꞌyi chimeꞌ muꞌin seiꞌtactyiꞌ aꞌ in, muꞌin jam seiꞌtacdyeꞌcheꞌ ĉútity in, mọꞌ mọmoꞌ jịjcatyeptety in Abrahamsiꞌ anicyedyeꞌ muꞌ, junꞌ chuc muꞌ anicjete Jenꞌ jambiꞌdyemꞌ seiꞌtac aꞌ muꞌ jiquej.

Cạ̈tsiꞌ Jenꞌsiꞌ p̂eyacdyeꞌ muꞌ anicyedyeꞌyaꞌ tsun

13Jenꞌ jasoꞌmiti p̂eyacdyeꞌ Abraham jiquej, jajiti: "Yụ raꞌ soꞌmeye ọij jac mídyes, judyeyaꞌ vóshidyes raꞌ chimeꞌ mi", jajiti Jenꞌ. Jenꞌ jam meꞌ ñịbeꞌjajiti Abraham ĉaĉaij na chiqueꞌ mọꞌ yụꞌtacdyeꞌ, meꞌdye anicyedyeꞌyaꞌ muꞌ, muꞌ Jenꞌ rụij jayuꞌti judyeyaꞌ ñịbeꞌjajiti. 14Jeshaꞌ, muꞌ Jenꞌ ñịbeꞌjeyacsiyaꞌ muꞌin mọmoꞌ chiqueꞌtyiꞌ yụꞌtacdyeꞌ in, a vuty fibiꞌ shupquiꞌ p̂eyacdyeꞌ o Jenꞌsiꞌ muꞌ, mọꞌ yiꞌsiꞌ junꞌ chuc muꞌ Jenꞌ ñịbeꞌjeyacsi muꞌin mọmoꞌ anicjetety in, a vuty fibiꞌ shupquiꞌ o chimeꞌ anicyedyeꞌ muꞌin. 15Yụꞌtacdyeꞌ Jenꞌsiꞌ muꞌ, mọꞌ jiꞌmeꞌsinꞌ tsanꞌ tsun paj qui tsäquiꞌsisĉandyety tsun ĉaĉaij na mọꞌ jam tupuj chiquejaꞌ tsun. Itŝiꞌ yụꞌtacdyeꞌ jụijyaꞌ, a vuty jam juchatujaꞌ yụꞌtacdyeꞌ u.

16Mọꞌdyes muꞌ Jenꞌ dyijyi paj qui anicyedyeꞌyaꞌ muꞌ raꞌ ñịbeꞌjeyacsi Abrahamtyiꞌ vóshiꞌ muꞌ, anicyedyeꞌyaꞌ raꞌ muꞌ jịꞌcätseꞌ p̂eyacdyeꞌ muꞌ räjdyes muꞌin in. Jam raꞌ muꞌindyes mọmoꞌ in chiqueꞌtyiꞌ yụꞌtacdyeꞌ ñịbeꞌjeyac in, Jenꞌ raꞌ fibiꞌyaꞌ ñịbeꞌjeyacsi räj muꞌin anicjetety in, yódyemꞌ muꞌ tashcheꞌ Abraham anicjete jiquej u. Meꞌdyes qui muꞌ Abraham jenꞌ buꞌyi shupqui tsun. 17Meꞌ cạ̈tsiꞌ mọꞌ sánacdyeꞌ yiꞌ: "Yụ raꞌ yụꞌtyeye mi paj qui anic daiꞌ shupqui in vóshiꞌ mi, paiꞌ buꞌyi raꞌ in, mi raꞌ jenꞌ buꞌyi shupqui muꞌindyes",#4:17 Génesis 17:5 jajiti Jenꞌ jiquej. Muꞌdye Jenꞌ anicjetety Abraham, muꞌ jịꞌcätseꞌ ọij p̂eyacdyeꞌ. Muꞌ nash jịꞌtsaꞌacsebantyiꞌ muꞌin säñity in, judyeyaꞌ p̂eyacdyeꞌyaꞌ muꞌ tupuj jämꞌtyeꞌ mọꞌ jambiꞌ jämꞌtacsiꞌ jedyeꞌ.

18Muꞌ Jenꞌ jajiti Abraham jiquej: "Meꞌtum raꞌ vóshiꞌ mi", yiꞌ sánacdyeꞌ. Meꞌ tsanꞌ jiyi carij mọꞌ jịꞌcätsac p̂eyacdyeꞌ, Abraham qui namꞌ jam farajjeꞌ mọꞌ anicyedyeꞌ Jenꞌcheꞌ, yejĉoij mọmoꞌ biseꞌ junꞌ quiꞌ chuc cạ̈tsiꞌ mọꞌ. Anicdye meꞌ, dayi vóshiꞌ muꞌ, yịjyi muntyiꞌ in, paiꞌ buꞌyi bäꞌyi in. 19Aty ishoꞌĉan muꞌ, araj yiriꞌ cien yómodyeꞌ tyiti muꞌ, aty itŝiꞌ aꞌsiꞌ ferdyeꞌ muꞌ ĉúti, aty c̣hẹiꞌyaꞌ säñi ĉúti. Chijoꞌmeiꞌdye mọꞌ Sara mọꞌ säräꞌ buꞌyis, mọꞌdyes anic carij ĉúti paj qui muꞌ ạvaꞌyi. Meꞌ tsanꞌ meꞌ jam qui namꞌ mọꞌ dyijtuiꞌ muꞌ, yejĉoij muꞌ anicjepte p̂eyacdyeꞌ Jenꞌsiꞌ muꞌ. 20Muꞌ jam junꞌ farajjepte p̂eyacdyeꞌ Jenꞌsiꞌ muꞌ, yejĉoij anicjepte, fer buꞌyi qui ĉojtyiꞌĉan timaꞌquete Jenꞌ. 21Mijam yocve dyijyi muꞌ, chị́yete Jenꞌ muꞌ nash ferdyeꞌtumtyiꞌ paj qui jịꞌcätseꞌ p̂eyacdyeꞌ muꞌ, mọꞌ jasoꞌmitis jiquej, mọꞌdyes qui fercheꞌ anicjete Jenꞌ. 22Mọꞌdyes qui muꞌ Jenꞌ rụij jayuꞌti anicyedyeꞌyaꞌ muꞌ.

23Ọij sánacdyeꞌ yiꞌ: "Jenꞌ rụij jayuꞌti anicyedyeꞌyaꞌ muꞌ." Ọij sánacdyeꞌ jam Abraham mọmoꞌ jiꞌjäcte, 24tsunmun chimeꞌ jiꞌjäcsinꞌ, ĉaĉaij na muꞌ rụij yuꞌsinꞌ anicjejayaꞌ muꞌ Jenꞌ, muꞌ vañinjebajtety muꞌ Jesús, Ayoꞌ tsun. 25Jenꞌ jutete paj qui muꞌ ijac tsunsidyes juchaj, judyeyaꞌ muꞌ vañinjebajte paj qui rụij yụꞌtac tsun Jenꞌsiꞌyaꞌ vej muꞌ.

നിലവിൽ തിരഞ്ഞെടുത്തിരിക്കുന്നു:

Romaĉantyidyes 4: CAS

ഹൈലൈറ്റ് ചെയ്യുക

പങ്ക് വെക്കു

താരതമ്യം

പകർത്തുക

നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക

Jen'si' P̂eyacdye'

Tsimane നെക്കുറിച്ച് കൂടുതലറിയുക