Romaĉantyidyes 13

Jemoñeꞌ seꞌvacsejaꞌ jacchety ayoꞌ in

1Jemoñeꞌ räj miꞌin chicacsi muꞌin jacchety ayoꞌ in, ĉaĉaij na muꞌdye Jenꞌ meꞌ yụꞌtacsi jacchety ayoꞌ in, muꞌ nash soꞌmacsi yụꞌtacdyedyes muꞌin. 2Mọꞌdyes tyi chuc vaꞌqueĉunacsecbi ayos ferdyeꞌ muꞌin, chimeꞌjeptedye raꞌ Jenꞌsiꞌ yụꞌtacdyeꞌ in, meꞌ jụijyaꞌ in, vaꞌtacdyeꞌ raꞌ soꞌmac in. 3Tyi chuc rụij bäꞌyity in jam muꞌin junꞌ quijnacsi ayoꞌ in, muꞌin na ac̣hiꞌ bäꞌyity in, muꞌin chat tupuj quijnacsi ayoꞌ in. Jemoñeꞌ rụij bäꞌyi miꞌin, paj qui jam quijnacsi ayoꞌ miꞌin, meꞌ jụijyaꞌ miꞌin, ayoꞌ raꞌ timaꞌquinac in. 4Jenꞌdye yụꞌtacsi muꞌin ayoꞌ jacchety in paj qui muꞌin ñutsjityinac in. Ac̣hiꞌ na bäꞌyi jụijyaꞌ miꞌin, meꞌ chat tupuj quijnacsi miꞌin, ĉaĉaij na muꞌin jam fibidyes soꞌmac ferdyeꞌ in paj qui vaꞌtacdyeꞌ soꞌmacsi muꞌin meꞌtyity in. Muꞌin ayoꞌ in yụꞌtactyiꞌ Jenꞌtyiꞌ muꞌ paj qui muꞌin soꞌmacsi vaꞌtacdyeꞌ in muꞌin ac̣hiꞌ bäꞌyity in. 5Mọꞌdyes jemoñeꞌ chicac in, jam mọmꞌ quijñebitinte Jenꞌsiꞌ vaꞌtacdyeꞌ muꞌ, jemoñeꞌ meꞌ seꞌvacsi miꞌin, paj jam jiꞌyoquiti ĉojtyiꞌĉan miꞌin. 6Chimeꞌdye jemoñeꞌ soꞌmacsi miꞌin ayoꞌ in muꞌ querec̣ha cudyityinactyiꞌ in, junꞌ chuc yiꞌ muntyis yụꞌtacdyeꞌ muꞌ, mọꞌdye raꞌ cäc̣häꞌchutiñeꞌ miꞌin, ĉaĉaij na muꞌdye Jenꞌ meꞌ yụꞌtacsi ayoꞌ in paj qui meꞌ soꞌmac in, muꞌyaꞌ tupuj nọ́tacsi muntyiꞌ in. 7Mọꞌdyes miꞌin jemoñeꞌ soꞌmacsi ayoꞌ in räj junꞌ chuc yiꞌ muntyis yụꞌtacdyeꞌ muꞌin. Irijyejamꞌ ayoꞌcheꞌ, ñutsjetacsejamꞌ räj muꞌin chimeꞌ in.

Junꞌ chuc raꞌ bäꞌjaꞌ muntyiꞌtum tsun

8Jam raꞌ tạꞌbetacsi jedyeꞌ miꞌin paj qui jam dévetucsi miꞌin, mọmꞌ déveyejamꞌ miꞌin mọꞌ mạꞌjitidyes, jemoñeꞌ mạꞌjeyacsi bäꞌyi miꞌin. Tyi chuc mạꞌjeyacsity bäꞌyi jụijyaꞌ, muꞌ tas chiquepte yụꞌtacdyeꞌ Jenꞌsiꞌ muꞌ. 9Yụꞌtacdyeꞌ yiꞌ: Jam raꞌ voꞌvoij miꞌin, jam raꞌ ijatinte muntyiꞌ miꞌin, jam raꞌ shuꞌaij miꞌin, jam raꞌ yoctyis mạꞌjeyacsebi jedyeꞌ miꞌin, meꞌ nash yiꞌ Jenꞌsiꞌ yụꞌtacdyeꞌ muꞌ#13:9 Exodo 20:13-17. Mọꞌyaꞌ chimeꞌ yocsiꞌ yụꞌtacdyeꞌ, anic mọꞌ mọjoꞌchas, yiꞌ: "Mạꞌjeyacsejamꞌ fer chätidyeꞌ miꞌin, yojdyemꞌ ĉụiꞌ mạꞌjiti u miꞌin", yiꞌ. Räj yocsiꞌ yụꞌtacdyeꞌ in sitiꞌ in ọijĉan yirissisĉan yụꞌtacdyeꞌ Jenꞌsiꞌ muꞌ. 10Mạꞌjeja jụijyaꞌ yirity muntyiꞌ, mijam raꞌ junꞌ jedyeꞌjeja tsun. Ọij jorojĉanyiꞌ mạꞌjeyacsejaty jụijyaꞌ tsun räj chiquejaꞌ mọꞌ yụꞌtacdyeꞌ in.

11Jemoñeꞌ meꞌ bäꞌyi miꞌin ĉaĉaij na chịj miꞌin aty ayij mọꞌ tupudyeꞌ, tupuj tsạꞌi ĉojtyiꞌĉan miꞌin, aty c̣hẹiꞌyaꞌ tyitiꞌ atsvun mọꞌ c̣honꞌdyedyes tsun, jam jeñej jiquej, yoquiꞌdyemꞌ anicjejayaꞌ Jenꞌ jiquej u, q̂uinꞌ mọjoꞌchaꞌ c̣hẹiꞌyaꞌ buꞌyiꞌ mọꞌ. 12Mọꞌ tsedyedyeꞌ aty c̣hẹiꞌyaiꞌ nạijjoiꞌ, mọꞌdyes jam raꞌ tojmadyeꞌ cäc̣häꞌchujaꞌ tsun, damꞌdye jämꞌ, jämꞌ yuꞌtiĉaꞌ mạij buꞌyisyaꞌ, jeñej yirity väc̣häꞌtyity jämiꞌti räj jiꞌpenꞌtidyestum muꞌ, meꞌ buꞌjaꞌdye raꞌ tsun chimeꞌ, paj qui chutiĉaꞌ Sọyostum dyijyedyeꞌ. 13Mọꞌdyes rụij bäꞌjamꞌ, yojdyemꞌ muꞌin u in mạijĉantyiꞌ in, paj meꞌ buꞌjaꞌ. Aty raꞌ jam aꞌc̣hisĉan bäꞌjaꞌ tsun, mijam raꞌ shuꞌquedyeꞌĉan, mijam raꞌ voꞌvoyedyeꞌĉan bäꞌjaꞌ. Chimeꞌ jam raꞌ fáquitiĉaꞌ yoctyiꞌtum in, mijam raꞌ chutiĉaꞌ p̂eyacdyeꞌyaꞌ. 14Jịjcamac Jesucristo Ayoꞌ tsun, meꞌchuvac ñutsjitidyes soꞌminacsiꞌ muꞌ. Aty jam raꞌ aꞌc̣his aꞌsiꞌ quivij dyijtubajtiñeꞌ miꞌin, aty jam raꞌ mọꞌ meꞌchubajtiñeꞌ miꞌin quivij.

നിലവിൽ തിരഞ്ഞെടുത്തിരിക്കുന്നു:

Romaĉantyidyes 13: CAS

ഹൈലൈറ്റ് ചെയ്യുക

പങ്ക് വെക്കു

താരതമ്യം

പകർത്തുക

നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക

Jen'si' P̂eyacdye'

Tsimane നെക്കുറിച്ച് കൂടുതലറിയുക