Romaĉantyidyes 12
12
Jemoñeꞌ soꞌmeja Jenꞌ ĉụiꞌsiꞌ aꞌ tsun
1Mọꞌdyes vojity, där ñịbeꞌ ĉúsinꞌ muꞌ Jenꞌ, mọꞌdyes yụ fercheꞌ jéyac paj qui ĉụiꞌsiꞌ aꞌ miꞌin soꞌmetinte muꞌ Jenꞌ, mọꞌ jeñej buꞌyiꞌ jiꞌcoꞌshayacdyeꞌ Jenꞌdyes. Meꞌ Jenꞌdyes mọmoꞌ bäꞌjamꞌ, mọꞌ raꞌ maꞌjotyibunac muꞌ Jenꞌ, jemoñeꞌ meꞌ carijtaqui räjĉan Jenꞌdyes miꞌin, mọꞌ jeñej buꞌyiꞌ rụijsis timaꞌcacdyeꞌ Jenꞌsiꞌ muꞌ. 2Meꞌquiꞌdye raꞌ cäc̣häꞌchutiñeꞌ jacches dyijyedyeꞌ miꞌin, mọꞌ qui raꞌ mụiꞌsis dyijyedyeꞌ Jenꞌsiꞌ muꞌ cäc̣häꞌchubitinte, paj qui rụij bäꞌyi miꞌin. Meꞌ raꞌ chat tupuj chị́yebitinte Jenꞌsiꞌ dyijyedyeꞌ muꞌ, mọꞌ jämꞌsimꞌ, mọꞌ maꞌjotyes Jenꞌ.
3Muꞌ nash ñịbeꞌjin yụ judyeyaꞌ yuꞌtyin yụ paj qui voroꞌtacsi yụ, mọꞌdyes qui yụ jéyac miꞌin, jam raꞌ vaꞌbunyedyeꞌtum dyijtuti ĉụiꞌ miꞌin, rụij dyijtutiĉamꞌ ĉụiꞌ miꞌin, junꞌ chuc muꞌ Jenꞌ soꞌminac anicyedyeꞌ miꞌin, meꞌ raꞌ carijtaqui muꞌdyes miꞌin. 4Aꞌ muntyis tsun daiꞌ mọꞌyaꞌ meꞌchuiꞌ jedyeꞌ. Meꞌ tsanꞌ yoc yoc carijtaquiꞌ aꞌsiꞌ jedyeꞌ tsun, yiris qui namꞌ shupquiꞌ aꞌ tsun. 5Meꞌdye tsun chimeꞌ anicjejaty Cristo, meꞌ tsanꞌ daiꞌ muꞌyaꞌ tsun, yirity qui namꞌ shupquejaꞌ jeñej Cristos aꞌ muꞌ.
6Meꞌ muꞌ Jenꞌ ñịbeꞌjitidyesyaꞌ muꞌ soꞌmisinꞌ räj tsun. Junꞌ junꞌ chuc soꞌmac Jenꞌyaꞌ tsun, meꞌ meꞌdye raꞌ carijtaĉaꞌ Jenꞌdyes tsun. Pạrej muꞌyaꞌ yụꞌtactyiꞌ Jenꞌyaꞌ tsun paj qui jịꞌchiqueyacsejaꞌ tsun Jenꞌsiꞌ p̂eyacdyeꞌ muꞌ soꞌmisinꞌsiꞌ tsun, meꞌ jụijyaꞌ jemoñeꞌ meꞌ buꞌjaꞌdye carijtaĉaꞌ, junꞌ quiꞌ chuc anicyejaꞌ tsun. 7Pạrej muꞌyaꞌ yụꞌtac Jenꞌyaꞌ tsun paj qui nọ́tyetacsejaꞌ anicjetety Jenꞌ in, meꞌ jụijyaꞌ yụꞌtac tsun, jemoñeꞌ meꞌ buꞌjaꞌdye carijtaĉaꞌ Jenꞌdyes. Pạrej muꞌyaꞌ soꞌmac tsun paj qui jịꞌchiyacsejaꞌ Jenꞌsiꞌ p̂eyacdyeꞌ muꞌ, meꞌ jụijyaꞌ soꞌmac tsun, jemoñeꞌ meꞌ buꞌjaꞌdye carijtaĉaꞌ, jam raꞌ muyetyejcajaꞌ. 8Pạrej muꞌyaꞌ yụꞌtac tsun paj qui jiꞌmaꞌyacsejaꞌ Jenꞌdyes, meꞌ jụijyaꞌ yụꞌtac tsun, jemoñeꞌ meꞌ buꞌjaꞌdye carijtaĉaꞌ. Pạrej muꞌyaꞌ yụꞌtac tsun paj qui ñịbeꞌjeyacsejaꞌ yoctyiꞌ in, meꞌ jụijyaꞌ yụꞌtac tsun, jemoñeꞌ meꞌ buꞌjaꞌdye ñịbeꞌjeyacsejaꞌ, jam raꞌ quijadyeꞌtum soꞌmacsejaꞌ. Pạrej muꞌyaꞌ tsun ayoꞌbuꞌjaꞌ shupquejaꞌ muꞌindyes anicjetetydyes Jenꞌ in, meꞌ jụijyaꞌ yụꞌtac tsun, jemoñeꞌ rụij buꞌjaꞌ ayoꞌbuꞌjaꞌ. Pạrej muꞌyaꞌ tsun ñịbeꞌ ĉọcsejaꞌ muꞌin ñịbeꞌ cạvety in, meꞌ jụijyaꞌ yụꞌtac tsun, jemoñeꞌ maꞌjodyeꞌtum nọ́tyetacsejaꞌ in, jemoñeꞌ meꞌ meꞌ carijtaĉaꞌ junꞌ junꞌ chuc soꞌmisinꞌ carijtacdyeꞌ muꞌ Jenꞌ.
Junꞌ chuc raꞌ bäꞌjaꞌ Jenꞌdyes
9Mạꞌjeyacsejamꞌ anicsisyaꞌ mạꞌjitidyes, jam raꞌ chụꞌ mọmoꞌ yiꞌ miꞌin. Fạ́quetiñeꞌ raꞌ räj aꞌc̣his jedyeꞌ in jam rụijsis, jịjcavac jämꞌsiꞌ jedyeꞌ. 10Vaj meij raꞌ mạꞌjitidyeij miꞌin ĉaĉaij na vaj vojity miꞌin, räjĉan raꞌ jämꞌjitidyeij bäꞌyi miꞌin, mujuꞌchaꞌ raꞌ dyijtucsi vojity miꞌin, uyaꞌyaꞌ raꞌ dyijtuti ĉụiꞌ miꞌin.
11Fer raꞌ úñi Jenꞌdyes miꞌin räj ĉojtyiꞌtum miꞌin, jam raꞌ dofocjeyaqui úñedyeꞌ Jenꞌdyes miꞌin.
12Miꞌin aty räj bistiñeꞌ Jenꞌdyes, maꞌjodyeꞌtum bäꞌjamꞌ. Tyumꞌchutidyeꞌtum jiꞌcajñevac mọꞌ jedyeꞌ chuc ñịbedyes jịꞌĉojtiñeꞌyaꞌ miꞌin, mijam raꞌ damꞌ farajjetiñeꞌ cọdacdyeꞌ Jenꞌcheꞌ miꞌin.
13Nọ́tyetacsejamꞌ muꞌin vojity jayejjotaquity jedyeꞌ in, chimeꞌdye jiꞌdyäcacsejamꞌ acaꞌĉan miꞌin muꞌin yocve jijtuijtyiꞌ in.
14Cọdyemac muꞌ Jenꞌ muꞌindyes in jịꞌñibeꞌcanactyiꞌ in paj qui muꞌ chimeꞌ nọ́tacsi, mijam raꞌ jéyacsi: "Paj därsiꞌ ñịbedyes jịꞌĉojtiñeꞌ miꞌin", jam raꞌ jéyacsi miꞌin.#12:14 Mateos 5:44
15-16Vaj meij raꞌ mạꞌjitidyeij miꞌin, vaj cäts raꞌ cạvacsi räj muntyiꞌ miꞌin. Maꞌjodyeꞌtum raꞌ penꞌdyetucsi miꞌin muꞌin maꞌjoijtyiꞌ in, muꞌin na tárity in táredyeꞌtum raꞌ penꞌdyetucsi miꞌin. Jam raꞌ vaꞌbunyi miꞌin, mijam raꞌ mujuꞌchaꞌ ĉụiꞌ yuꞌti miꞌin, damꞌdye jämꞌ uyaꞌyaꞌ yuꞌti ĉụiꞌ miꞌin, jam raꞌ fibiꞌyi miꞌin mijam raꞌ yi miꞌin: "Tsun anic dyijyedyeꞌtumtyiꞌ muntyiꞌ", jam raꞌ meꞌ dyijyi miꞌin.
17Muꞌin jịꞌñibeꞌcanactyiꞌ jụijyaꞌ in, jam raꞌ chimeꞌjeyacsidye miꞌin, junꞌjinac chuc muꞌin in. Anic raꞌ rụij bäꞌyi miꞌin muntyisyaꞌ vej muꞌin. 18Ferdyeꞌ yụꞌtacac paj qui jämꞌjiti bäꞌyi miꞌin yoctyiꞌtum muntyiꞌ in, meꞌ tsanꞌ muꞌin jam mạꞌjeꞌ jämꞌjinac in, miꞌin qui na ramꞌ jam jedyeꞌjeyacsi. 19Chätidyeꞌ, jam raꞌ chimeꞌjeyacsidye miꞌin muꞌin jịꞌñibeꞌcanactyiꞌ in, Jenꞌdye raꞌ meꞌjeyacsi jịꞌchiyacsi. Yiꞌ sánacdyeꞌ: "Yụ́dye raꞌ vaꞌtacdyeꞌ soꞌmacsi muꞌin meꞌtyity in jịꞌñibeꞌcacsity in, yụ́dye raꞌ meꞌjeyacsi jịꞌchiyacsi", yi Ayoꞌ tsun. 20Miꞌin raꞌ jam meꞌjeyacsi muꞌin fáquinactyiꞌ in, dáqui jụijyaꞌ in, jiꞌsäcsacsejamꞌ, chimeꞌ jajri jụijyaꞌ in jiꞌtyecsejamꞌ. Meꞌ jụijyaꞌ miꞌin anic raꞌ jịꞌtsicayacsi miꞌin junꞌ chuc muꞌin meꞌjinac jiquej in, meꞌ yiꞌ sánacdyeꞌ. 21Jam raꞌ peñi miꞌin aꞌc̣hisyaꞌ dyijyedyeꞌ, damꞌdye jämꞌ rụijsisyamꞌ dyijyedyeꞌ jiꞌpenacsebijamꞌ aꞌc̣his dyijyedyeꞌ muꞌin.
നിലവിൽ തിരഞ്ഞെടുത്തിരിക്കുന്നു:
Romaĉantyidyes 12: CAS
ഹൈലൈറ്റ് ചെയ്യുക
പങ്ക് വെക്കു
താരതമ്യം
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
Copyright 2017 Nuevo Testamento en Chimane
Jen'si' P̂eyacdye'
