မၢတ်ႈထႄႇ 8

ၸဝ်ႈယေႇသူႉႁဵတ်းႁႂ်ႈၵူၼ်းတုတ်ႈမူတ်းသႂ်

(တူၺ်း၊ မႃႇ 1:40-45။ လူႉ 5:12-16)

1မိူဝ်ႈဢၼ်မၼ်းၸဝ်ႈ လုၵ်ႉသေၵႃႈၼိူဝ်လွႆမႃးၼၼ်ႉၸိုင်၊ ၵူၼ်းဢၼ်ၸူႉဢၼ်တုမ်ၼမ်ၼႃႇ ၸွမ်းပႃႈလင်မၼ်းၸဝ်ႈဢေႃႈ၊- 2မိူဝ်ႈၼၼ်ႉ ၵူၼ်းဢၼ်ပဵၼ်တုတ်ႈၵေႃႉၼိုင်ႈ မႃးၵႃႈတီႈမၼ်းၸဝ်ႈလႄႈ ၶုပ်ႉမူပ်ႇယူႇသေလႄႈ လဝ်ႊလၢတ်ႈလႄႈဝႃႈ၊ ပေႃးၸဝ်ႈႁဝ်းမီးဢလူဝ်ႇၸိုင် ႁႂ်ႈၵဝ်ၶႃႈမူတ်းသႂ်လႆႈယူႇၶႃႈဢေႃႈ၊ ဝႃႈၼင်ႇၼႆဢေႃႈ။- 3မၼ်းၸဝ်ႈၵေႃႈ ယိုၼ်ႈမိုဝ်းမၼ်းၸဝ်ႈတိူဝ်ႉၵေႃႉၼၼ်ႉသေလႄႈ လၢတ်ႈဝႃႈ၊ ၵဝ်မီးဢလူဝ်ႇယူႇဢေႃႈ။ ႁႂ်ႈမူတ်းသႂ်တႃႉ၊ ဝႃႈၼင်ႇၼႆလႄႈ တုတ်ႈမၼ်းၼၼ်ႉႁွတ်ႈတၢင်းဢၼ်မူတ်းသႂ်ၵမ်းလဵဝ်ဢေႃႈ။- 4ယေႇသူႉၵေႃႈလၢတ်ႈလႄႈဝႃႈ၊ မႂ်းႁဵတ်းသတီႉတႃႉ။ လွင်ႈၼႆႉၸိုင် ယႃႇပေလၢတ်ႈတီႈၽူႈလႂ်။ၵူၺ်းၵႃႈ ၵႂႃႇၼႄပျႃးတူဝ်မႂ်း ၵႃႈတီႈယိတ်ႈပရေႃးႁဵၵ်ႈပုၼ်ႉတႃႉ။ ၼင်ႇႁိုဝ်တၵ်းပဵၼ်သၢၵ်ႈသေႇ တီႈပိူၼ်ႈတၢင်ႇၵေႃႉၸိုင်၊ သၢၵ်ႈၵၢပ်ႈတၢင်းပုၵ်ႈၸေႃႇဢၼ် မူဝ်းသေႇၸီႇယၢင်ႇသင်ႇလၢတ်ႈဝႆႉၼၼ်ႉတႃႉ၊ ဝႃႈၼင်ႇၼႆဢေႃႈ။

ၸဝ်ႈယေႇသူႉႁႂ်ႈတၢင်းပဵၼ်ၶႃႈၶုၼ်ရူဝ်းမႃႉႁၢႆ

(တူၺ်း၊ လူႉ 7:1-10)

5လိုၼ်းၼၼ်ႉၸင်ႇ၊ မိူဝ်ႈဢၼ်မၼ်းၸဝ်ႈၵႂႃႇၶဝ်ႈၵႃႈၼႂ်း ဝဵင်းၵပိူဝ်ႇၼေႇဢုမ်ႇၼၼ်ႉၸိုင်၊ တပ်ႉမူးၵေႃႉၼိုင်ႈ မႃးၵႃႈတီႈမၼ်းၸဝ်ႈသေလႄႈ၊- 6လဝ်ႊလၢတ်ႈလႄႈဝႃႈ၊ ၸဝ်ႈႁဝ်း၊ ၵူၼ်းဢွၼ်ႇၵဝ်ၶႃႈ ဢၼ်တိၼ်တၢႆမိုဝ်းတၢႆၵေႃႉၼိုင်ႈ ၼွၼ်းယူႇၵႃႈၼႂ်းႁိူၼ်းလႄႈ လႆႈၶၢမ်ႇတၢင်းဢၼ်ၸဵပ်းၼႃႇလူင်လၢင်တီႈၶႃႈဢေႃႈ၊ ဝႃႈၼင်ႇၼႆဢေႃႈ။- 7မၼ်းၸဝ်ႈၵေႃႈ လၢတ်ႈလႄႈဝႃႈ၊ ၵဝ်တၵ်းမႃးပၼ်ၵတ်းယဵၼ်ၶျၢမ်းသႃႇဢေႃႈ၊ ဝႃႈၼင်ႇၼႆဢေႃႈ။- 8တပ်ႉမူးၵေႃႈၶိုၼ်းလဝ်ႊလၢတ်ႈလႄႈဝႃႈ၊ ၵဝ်ၶႃႈဢမ်ႇထိူၵ်ႈၶၢမ်ႇတၢင်းဢၼ်ၸဝ်ႈႁဝ်း တၵ်းမႃးၶဝ်ႈၵႃႈတႂ်ႈႁူမ်ႈႁိူၼ်းၵဝ်ၶႃႈတီႈၶႃႈ။ ပေႃးၸဝ်ႈႁဝ်းမီးဢမိင်ႉၵမ်းၼိုင်ႈၵူၺ်းၸိုင်၊ ၵူၼ်းဢွၼ်ႇၵဝ်ၶႃႈၼၼ်ႉ တၵ်းလႆႈၵတ်းယဵၼ်ၶျၢမ်းသႃႇတီႈၶႃႈဢေႃႈ။- 9ၵဝ်ၶႃႈၼႆႉ၊ ပိၵ်ႉသမ်ႉပဵၼ်ၶႃႈတႂ်ႈၶုၼ်သေၵေႃႈ ဢုပ်ႉပိူင်ႇၵူၼ်းသိုၵ်းတင်းလၢႆလႄႈ ပေႃးလၢတ်ႈတီႈၵေႃႉၼိုင်ႈလႄႈဝႃႈ၊ ၵႂႃႇတႃႉ၊ ဝႃႈၼင်ႇၼႆၸိုင်၊ ၵႂႃႇတီႈၶႃႈဢေႃႈ။ ပေႃးလၢတ်ႈတီႈၵေႃႉၼိုင်ႈလႄႈဝႃႈ၊ မႃးတႃႉ၊ ဝႃႈၼင်ႇၼႆၸိုင်၊ မႃးတီႈၶႃႈဢေႃႈ။ တီႈၶႃႈၵဝ်ၶႃႈၵေႃႈ ပေႃးလၢတ်ႈလႄႈဝႃႈ၊ ႁဵတ်းဢၼ်ၼႆႉတႃႉ၊ ဝႃႈၼင်ႇၼႆၸိုင်၊ ႁဵတ်းတီႈၶႃႈဢေႃႈ၊ ဝႃႈၼင်ႇၼႆဢေႃႈ။- 10ယေႇသူႉၼၼ်ႉ မိူဝ်ႈဢၼ်ငိၼ်းၵႂၢမ်းၼၼ်ႉၸိုင်၊ ဢၢမ်းၼႃႇလူင်လၢင်လႄႈ လၢတ်ႈတီႈၶဝ်ၸိူဝ်းဢၼ် ၸွမ်းပႃႈလင်မၼ်းၸဝ်ႈတင်းလၢႆၼၼ်ႉလႄႈဝႃႈ၊ ၵဝ်ဝႃႈတီႈၸိုဝ်ႈတီႈၸႂ်ႈၸမ်ႉ၊ တၢင်းယုမ်ႇမၢတ်ႈထၢၼ်ႇၼႆႉၸိုင်၊ ၵႃႈၼႂ်းၸိူဝ်ႉၶိူဝ်းဢီႉသရေႇလႃႉၼႆႉ ၵဝ်ဢမ်ႇပႆႇတွၼ်ႉထူပ်းသေပွၵ်ႈ။- 11ၵဝ်သမ်ႉဝႃႈထႅင်ႈၸမ်ႉ၊ ၵူၼ်းၼမ်ၼႃႇ တၵ်းလုၵ်ႉသေၵႃႈတီႈတၢင်းဢွၵ်ႇ၊ တၢင်းတူၵ်းမႃးလႄႈ ဢိင်ယူႇလူၺ်ႈၵၼ်တင်းဢႃႇပြႃႇႁၢမ်ႇ၊ ဢီႉၸၢၵ်ႈ၊ ယႃႇၵုပ်ႈၶဝ်ၼၼ်ႉ ၵႃႈၼႂ်းမိူင်းၵၢင်ႁၢဝ်ၸဝ်ႈပုၼ်ႉဢေႃႈ။- 12ၵူၼ်းမိူင်းၵၢင်ႁၢဝ်တင်းလၢႆၵေႃႈ တၵ်းလႆႈၶၢမ်ႇတၢင်းဢၼ် ႁေႃႈဢွၵ်ႇပႅတ်ႈၵႃႈတီႈၼွၵ်ႈၵႃႈၼႂ်းလပ်းသိင်ႇ၊ တီႈဢၼ်လႆႈႁႆႈလႆႈႁွင်ႉ၊ တီႈဢၼ်လႆႈၵတ်းၶဵဝ်ႈၵတ်းၽၼ်းၼၼ်ႉဢေႃႈ၊ ဝႃႈၼင်ႇၼႆယဝ်ႉၸင်ႇ၊- 13မၼ်းၸဝ်ႈလၢတ်ႈတီႈတပ်ႉမူးၼၼ်ႉလႄႈဝႃႈ၊ မႂ်းၵႂႃႇတႃႉ။ ၵႃႈၼင်ႇဢၼ်မႂ်းယုမ်ႇမၢတ်ႈၼႆႉ ႁႂ်ႈပဵၼ်တီႈမႂ်းတႃႉ၊ ဝႃႈၼင်ႇၼႆဢေႃႈ။ ၵူၼ်းဢွၼ်ႇမၼ်းၼၼ်ႉ ၶႅၼ်းမႃးၵမ်းလဵဝ်ဢေႃႈ။

ၸဝ်ႈယေႇသူႉႁႂ်ႈတၢင်းပဵၼ်ၼမ်ၼႃႇႁၢႆ

(တူၺ်း၊ မႃႇ 1:29-34။ လူႉ 4:38-41)

14လိုၼ်းၼၼ်ႉၸင်ႇ၊ ယေႇသူႉၵႂႃႇၶဝ်ႈၵႃႈၼႂ်းႁိူၼ်းပေႇတရူႉလႄႈ ထူပ်းႁၼ်ဢွၵ်ႇၼၢႆးပေႇတရူႉၼၢဝ်လႄႈ ၼွၼ်းယူႇဢေႃႈ။- 15မၼ်းၸဝ်ႈတိူဝ်ႉမိုဝ်းမႄႈယိင်းၼၼ်ႉသေယဝ်ႉ၊ ၼၢဝ်မၼ်းၼၼ်ႉ ႁၢႆလႄႈ မၼ်းလုၵ်ႉႁဵတ်းဝၢတ်ႈၶႅၵ်ႇဢေႃႈ။- 16မိူဝ်ႈဢၼ်ႁွတ်ႈထိုင်ၵၢင်ၶမ်ႈၸိုင် ၶဝ်ဢဝ်ၵူၼ်းဢၼ်ၽီႁၢႆႉၶဝ်ႈၼၼ်ႉ မႃးၵႃႈတီႈမၼ်းၸဝ်ႈၼမ်ၼႃႇလႄႈ မၼ်းၸဝ်ႈဢဝ်တင်းၵႂၢမ်းၵမ်းၼိုင်ႈၵူၺ်း ႁေႃႈၽီႁၢႆႉၸိူဝ်းၼၼ်ႉဢွၵ်ႇပႅတ်ႈဢေႃႈ။ ၵူၼ်းၶႆႈၵူၼ်းပဵၼ်ၵႃႈမီးၸိူဝ်းၼၼ်ႉၵေႃႈ မၼ်းၸဝ်ႈႁႂ်ႈၶႅၼ်းမႃးဢေႃႈ၊- 17လွင်ႈတၢင်းၸိူဝ်းၼႆႉၸမ်ႉ၊ ၼင်ႇႁိုဝ်ၵႂၢမ်းဢၼ်ပရေႃးၽႅတ်ႈ ဢီႉသႃႇယႃႉ ႁေႃးလၢတ်ႈဝႆႉလႄႈဝႃႈ၊ မၼ်းၼၼ်ႉ ႁၢပ်ႇပႃးဢဝ်တၢင်းၶႆႈတၢင်းပဵၼ် ဝူၺ်ႇတၼႃႇႁဝ်းၶႃႈၵႂႃႇဢေႃႈ၊ ဝႃႈၼင်ႇၼႆၼၼ်ႉ တၵ်းပျေႉၸုမ်ႇၸိုင်၊ ၸင်ႇပဵၼ်ဢေႃႈ။

လွင်ႈၵူၼ်းဢၼ်ထိူၵ်ႈၸွမ်းလင်ၸဝ်ႈ

(တူၺ်း၊ လူႉ 9:57-62)

18မိူဝ်ႈဢၼ်မၼ်းၸဝ်ႈ ႁၼ်ၵူၼ်းၼမ်ၼႃႇ လွမ်ႉႁွပ်ႈမၼ်းၸဝ်ႈယူႇၼၼ်ႉၸိုင်၊ မၼ်းၸဝ်ႈမီးဢမိင်ႉ ႁႂ်ႈလႆႈၶၢမ်ႈၵႂႃႇၵႃႈတီႈၽင်ႇၼမ်ႉၽၢႆႇပုၼ်ႉဢေႃႈ။- 19မိူဝ်ႈၼၼ်ႉ ၵူၼ်းထုတ်ႇၵျၢမ်းၵေႃႉၼိုင်ႈ မႃးလႄႈလဝ်ႊလၢတ်ႈတီႈမၼ်းၸဝ်ႈလႄႈဝႃႈ၊ သြႃႇၸဝ်ႈ၊ ၵဝ်ၶႃႈတၵ်းၸွမ်းၸဝ်ႈႁဝ်းၵႂႃႇ ၵႃႈတီႈၵႃႈဢၼ်ၸဝ်ႈႁဝ်းၵႂႃႇၵူႈတီႈၵူႈလႅၼ်ၼၼ်ႉၶႃႈဢေႃႈ၊ ဝႃႈၼင်ႇၼႆဢေႃႈ။- 20ယေႇသူႉၵေႃႈ လၢတ်ႈတီႈမၼ်းလႄႈဝႃႈ၊ မႃလိၼ်တင်းလၢႆ ယင်းမီးႁူးလိၼ်ဢေႃႈ။ ၼူၵ်ႉဢၼ်မိၼ်ၵႃႈၼိူဝ်ၵၢင်ႁၢဝ်တင်းလၢႆ ယင်းမီးႁင်းဢေႃႈ။ လုၵ်ႈၵူၼ်းၸမ်ႉ၊ တီႈဢၼ်တၵ်းဝၢင်းႁူဝ်ၵေႃႈဢမ်ႇမီး၊ ဝႃႈၼင်ႇၼႆဢေႃႈ။- 21တပႄးၸဝ်ႈတၢင်ႇၵေႃႉၵေႃႈ လဝ်ႊလၢတ်ႈလႄႈဝႃႈ၊ ၸဝ်ႈႁဝ်း၊ ၶႅၼ်းတေႃႈပၼ်ဢၶႂၢင်ႉႁႂ်ႈၵဝ်ၶႃႈ လႆႈၵႂႃႇလႄႈသၢင်းၵျူဝ်ႇပေႃႈၵဝ်ၶႃႈဢွၼ်တၢင်းလူးၵွၼ်ႇသေၵမ်းၶႃႈ၊ ဝႃႈၼင်ႇၼႆဢေႃႈ။- 22ယေႇသူႉၵေႃႈ လၢတ်ႈလႄႈဝႃႈ၊ ၸွမ်းပႃႈလင်ၵဝ်တႃႉ။ ႁႂ်ႈၵူၼ်းတၢႆတင်းလၢႆ သၢင်းၵျူဝ်ႇၵူၼ်းတၢႆၶဝ်တႃႉ၊ ဝႃႈၼင်ႇၼႆဢေႃႈ။

ၸဝ်ႈယေႇသူႉႁႂ်ႈလႅင်းၼမ်ႉထၢတ်ႇယဵၼ်

(တူၺ်း၊ မႃႇ 4:35-41။ လူႉ 8:22-25)

23မိူဝ်ႈၼၼ်ႉ မၼ်းၸဝ်ႈၶဝ်ႈၵႃႈၼႂ်းႁိူဝ်းလႄႈ တပႄးၸဝ်ႈတင်းလၢႆၵေႃႈ ၸွမ်းဢေႃႈ။- 24ၵႃႈၼႂ်းၼွင်ၼၼ်ႉ၊ လႅင်းၼမ်ႉပိူပ်ႈၼမ်ႉ လုၵ်ႉၶိုၼ်ႈယႂ်ႇၼႃႇလူင်လၢင် ထၼ်ႈပေႃးမုင်းႁူမ်ႇႁိူဝ်းဝႆႉဢေႃႈ။ မၼ်းၸဝ်ႈၸမ်ႉ၊ ၵိင်းၼွၼ်းယူႇဢေႃႈ။- 25ၶဝ်ၼၼ်ႉ သုတ်ႉၸပ်းသုတ်ႉၸူးသေလႄႈ ပူၵ်းမၼ်းၸဝ်ႈယဝ်ႉၸင်ႇ လဝ်ႊလၢတ်ႈလႄႈဝႃႈ၊ ၸဝ်ႈႁဝ်း၊ ႁဝ်းၶႃႈတၵ်းႁွတ်ႈထိုင်တၢင်းလူႉတၢင်းလႅဝ်ၶႃႈယဝ်ႉ။ ၸဝ်ႈႁဝ်းၶႅၼ်းတေႃႈၶျွတ်ႈဢဝ်သေၵမ်းၶႃႈ၊ ဝႃႈၼင်ႇၼႆဢေႃႈ၊- 26မၼ်းၸဝ်ႈၵေႃႈလၢတ်ႈလႄႈဝႃႈ၊ သူၸိူဝ်းဢၼ်ယုမ်ႇမၢတ်ႈၵေႇတင်းလၢႆၼႆႉဢိူၺ်း၊ ႁဵတ်းသင်လႄႈသူၵူဝ်ၼင်ႇႁိုဝ်၊ ဝႃႈၼင်ႇၼႆယဝ်ႉၸင်ႇ၊ လုၵ်ႉလႄႈသင်ႇသွၼ်လူမ်းတင်းပၢင်ႇလၢႆႇသေယဝ်ႉ၊ ပၢင်ႇၸိုၼ်ႈၼိမ်လီမႃးၼႃႇလူင်လၢင်ဢေႃႈ။- 27ၵူၼ်းတင်းလၢႆၸိူဝ်းၼၼ်ႉၵေႃႈ ဢၢမ်းလႄႈဝႃႈ၊ ၵေႃႉၼႆႉပဵၼ်ၵူၼ်းၸိူဝ်ႉၼင်ႇႁိုဝ်။ လူမ်းတင်းပၢင်ႇလၢႆႇ ထွမ်ႇဢဝ်ၵႂၢမ်းမၼ်းလူင်ပႄႇ၊ ဝႃႈၼင်ႇၼႆဢေႃႈ။

ၸဝ်ႈယေႇသူႉႁေႃႈၽီႁၢႆႉဢွၵ်ႇသေၵူၼ်းသွင်ၵေႃႉ

(တူၺ်း၊ မႃႇ 5:1-20။ လူႉ 8:26-39)

28မိူဝ်ႈဢၼ်မၼ်းၸဝ်ႈႁွတ်ႈထိုင် မိူင်းၵႃႇတရႃႉၵႃႈတီႈၽင်ႇၼမ်ႉ ၽၢႆႇပုၼ်ႉၼၼ်ႉၸိုင်၊ ၵူၼ်းဢၼ်ၽီႁၢႆႉၶဝ်ႈဢၼ်ႁဵတ်းမိူၵ်ႈႁဵတ်းလိူင်းၼႃႇ တေႃႇထိုင်ႁွတ်ႈထၼ်ႈပေႃး ၽူႈလႂ်ဢမ်ႇၵႂႃႇတၢင်းၼၼ်ႉလႆႈၼၼ်ႉ သွင်ၵေႃႉဢွၵ်ႇသေၵႃႈၼႂ်းသၢင်းၶႅင်းမႃးႁပ်ႉႁူဝ်တၢင်းမၼ်းၸဝ်ႈလႄႈ ႁွင်ႉသႅၼ်ႇလႄႈဝႃႈ၊- 29ယေႇသူႉလုၵ်ႈၽြႃးပဵၼ်ၸဝ်ႈတီႈၶႃႈ၊ ၸဝ်ႈႁဝ်းၸၢပ်ႈသႅင်ႇၵၼ်တင်းႁဝ်းၶႃႈၸိူဝ်ႉၼင်ႇႁိုဝ်တီႈၶႃႈ၊ ၸူဝ်ႈဢၼ်ၶိင်ႇမၼ်းယင်းဢမ်ႇပႆႇႁွတ်ႈပႆႇထိုင်ၼၼ်ႉ၊ ၸဝ်ႈႁဝ်းမႃးႁႂ်ႈလႆႈၼိၵ်ႈၸၢၵ်ႈငႅၼ်းသႄးႁဝ်းၶႃႈတီႈၶႃႈႁိုဝ်၊ ဝႃႈၼင်ႇၼႆဢေႃႈ။- 30ၵႃႈတီႈဢၼ်ၵႆၵၼ်တင်းၶဝ်ၼၼ်ႉ မီးၽုင်မူၼမ်ၼႃႇၵိၼ်ယူႇဢေႃႈ။- 31ၽီႁၢႆႉၸိူဝ်းၼၼ်ႉၵေႃႈ တွင်းပၢၼ်ႇလႄႈဝႃႈ၊ ပေႃးၸဝ်ႈႁဝ်းႁေႃႈႁဝ်းၶႃႈဢွၵ်ႇပႅတ်ႈၸိုင် ပၼ်ဢၶႂၢင်ႉႁႂ်ႈႁဝ်းၶႃႈလႆႈၶဝ်ႈၵႃႈၼႂ်းၽုင်မူပုၼ်ႉသေၵမ်းတီႈၶႃႈ၊ မိူဝ်ႈဢၼ်ဝႃႈၼင်ႇၼႆၸိုင်၊- 32မၼ်းၸဝ်ႈၵေႃႈလၢတ်ႈလႄႈဝႃႈ၊ ၵႂႃႇတႃႉ၊ ဝႃႈၼင်ႇၼႆဢေႃႈ။ ၽီႁၢႆႉၸိူဝ်းၼၼ်ႉ ဢွၵ်ႇၵႂႃႇလႄႈၶဝ်ႈၵႃႈၼႂ်းၽုင်မူသေယဝ်ႉ၊ ၽုင်မူၵႃႈမီးတင်းသဵင်ႈတင်းလူင်ၼၼ်ႉ ၶုၼ်ႇလႅၼ်ႈလူင်းၽင်ႇၸၼ်းၸူးၵႃႈၼႂ်းၼွင်လႄႈ တၢႆၵႃႈၼႂ်းၼမ်ႉၼၼ်ႉဢေႃႈ။- 33ၵူၼ်းလဵင်ႉမူတင်းလၢႆၵေႃႈ လႅၼ်ႈၵႂႃႇလႄႈ ၶဝ်ႈၵႃႈၼႂ်းဝဵင်းယဝ်ႉၸင်ႇ၊ မွၵ်ႇလၢတ်ႈလွင်ႈတၢင်းၵူႈၸိူဝ်ႉၵူႈပိူင် ဢိၵ်ႇတင်းလွင်ႈတၢင်းဢၼ်ပဵၼ်မႃးတီႈၵူၼ်းဢၼ်ၽီႁၢႆႉၶဝ်ႈၸိူဝ်းၼၼ်ႉဢေႃႈ။- 34တင်းဝဵင်းၼၼ်ႉ ဢွၵ်ႇမႃးႁႂ်ႈလႆႈထူပ်းလႆႈႁၼ် ယေႇသူႉဢေႃႈ။ မိူဝ်ႈဢၼ်ၶဝ်ထူပ်းႁၼ်မၼ်းၸဝ်ႈယဝ်ႉ၊ ၶဝ်တွင်းပၢၼ်ႇလဝ်ႊလၢတ်ႈ ႁႂ်ႈမၼ်းၸဝ်ႈဢွၵ်ႇၵႃႈၼႂ်းမိူင်းၶဝ်ၼၼ်ႉၵႂႃႇသေဢေႃႈ။

നിലവിൽ തിരഞ്ഞെടുത്തിരിക്കുന്നു:

မၢတ်ႈထႄႇ 8: CBMS

ഹൈലൈറ്റ് ചെയ്യുക

പങ്ക് വെക്കു

പകർത്തുക

നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക

သမ်ႇမႃႇၵျၢမ်းလိၵ်ႈ ထႃႇဝရႃႉၽြႂး നെക്കുറിച്ച് കൂടുതലറിയുക