မၢတ်ႈထႄႇ 7

လွင်ႈတၢင်းဢၼ်တၢင်ႇဢပႅတ်ႈပိူၼ်ႈ

(တူၺ်း၊ လူႉ 6:37-38၊41-42)

1ၼင်ႇႁိုဝ်သူတၵ်းၵၢင်းလွတ်ႈတင်း တၢင်းဢၼ်ၸီႇယၢင်ႇၸိုင်၊ ယႃႇပေၸီႇယၢင်ႇပိူၼ်ႈ။- 2သူၸီႇယၢင်ႇပိူၼ်ႈၸွမ်းၼင်ႇတြႃးဢၼ်လႂ်သေဢမ်ႇဝႃႈ၊ တၵ်းလႆႈၶၢမ်ႇတၢင်းဢၼ် ၸီႇယၢင်ႇၸွမ်းၼင်ႇတြႃးၼၼ်ႉဢေႃႈ။ သူပၼ်တီႈပိူၼ်ႈဢၼ်တူင်ဢၼ်တႅၵ်ႈၵႃႈႁိုဝ်သေဢမ်ႇဝႃႈ၊ တၵ်းလႆႈၶၢမ်ႇၵႃႈၼင်ႇဢၼ်တူင်ဢၼ်တႅၵ်ႈၼၼ်ႉဢေႃႈ။- 3မႂ်းယင်းဢမ်ႇၶုၵ်းၸႂ်လႆႈၶႆႈၸႂ်ထူပ်းသဵၼ်ႈဢၼ်မီးယူႇၵႃႈၼႂ်းမၢၵ်ႇတႃမႂ်းလႄႈ၊ ႁဵတ်းသင်လႄႈ တူၺ်းမုၼ်ႈဢၼ်မီးယူႇၵႃႈၼႂ်းမၢၵ်ႇတႃပီႈၼွင်ႉမႂ်းၼၼ်ႉၼင်ႇႁိုဝ်။- 4သဵၼ်ႈယင်းမီးယူႇၵႃႈၼႂ်းမၢၵ်ႇတႃမႂ်းလႄႈ၊ ႁဵတ်းသင်လႄႈလၢတ်ႈတီႈ ပီႈၼွင်ႉမႂ်းလႄႈဝႃႈ၊ ႁႂ်ႈၵဝ်လႆႈဢဝ်မုၼ်ႈ ဢၼ်မီးယူႇၵႃႈၼႂ်းမၢၵ်ႇတႃမႂ်းၼၼ်ႉဢွၵ်ႇသေၵမ်း၊ ဝႃႈၼင်ႇၼႆၼင်ႇႁိုဝ်။- 5ၵူၼ်းဢၼ်ၸၢင်ႈထိမ်ႇၸၢင်ႈမႅပ်းၼႆႉဢိူၺ်း၊ ဢဝ်သဵၼ်ႈဢၼ်မီးယူႇၵႃႈၼႂ်းမၢၵ်ႇတႃမႂ်း ဢွၵ်ႇပႅတ်ႈသေဢွၼ်တၢင်းတႃႉ။ လိုၼ်းၼၼ်ႉၸင်ႇ၊ ၼင်ႇႁိုဝ်တၵ်းလႆႈဢဝ်မုၼ်ႈ ဢၼ်မီးယူႇၵႃႈၼႂ်းမၢၵ်ႇတႃပီႈၼွင်ႉမႂ်းၼၼ်ႉဢွၵ်ႇၸိုင်၊ ၸင်ႇတၵ်းႁၼ်လီလီဢေႃႈ။

6ယႃႇပေဢဝ်ၶိူင်ႈပိူင်ဢၼ်မူတ်းၸၢင်ႇပၼ်တီႈမႃ။ ယႃႇပေဢဝ်ပူးလႄးရတၼႃႇ ၶျႃးဝႆႉၵႃႈတီႈၽၢႆႇၼႃႈမူ။ ပေႃးႁဵတ်းၸိူဝ်ႉၼင်ႇၼၼ်ၸိုင်၊ ၶဝ်တၵ်းယဵပ်ႇၶၢမ်ႈၶိူင်ႈပိူင်ၸိူဝ်းၼၼ်ႉလႄႈ ဝၢႆႇၶိုၼ်းၶူပ်းငၢၼ်ႈသိၵ်ႇၶၢတ်ႇသူဢေႃႈ။

သင်ႇသွၼ်လွင်ႈတၢင်းဢၼ်လဝ်ႊယွၼ်း

(တူၺ်း၊ လူႉ 11:9-13)

7ယွၼ်းတႃႉ။ ပေႃးယွၼ်းၸိုင် တၵ်းလႆႈဢေႃႈ။ ႁႃတႃႉ။ ပေႃးႁႃၸိုင် တၵ်းထူပ်းဢေႃႈ။ တွႆႇၽၵ်းတူတႃႉ။ ပေႃးတွႆႇၸိုင် တၵ်းၽုၺ်ႇဢေႃႈ။- 8ၵူၼ်းလႂ်သေဢမ်ႇဝႃႈ ၵေႃႉဢၼ်ယွၼ်းၸမ်ႉ၊ လႆႈဢေႃႈ။ ၵေႃႉဢၼ်ႁႃၵေႃႈ ထူပ်းဢေႃႈ။ တီႈၵေႃႉဢၼ်တွႆႇၽၵ်းတူၼၼ်ႉၵေႃႈ ၽုၺ်ႇပၼ်ဢေႃႈ။- 9ပေႃးလုၵ်ႈလၢင်းယွၼ်းၶဝ်ႈမုၼ်းၸိုင် ၵေႃႉဢၼ်တၵ်းဢဝ်မၢၵ်ႇႁိၼ်ပၼ်၊- 10ပေႃးယွၼ်းပႃၸိုင် ၵေႃႉဢၼ်တၵ်းဢဝ်ငူးပၼ်ၼၼ်ႉ၊ ၵႃႈၼႂ်းသူမီးသေၵေႃႉသေၵူၼ်းႁိုဝ်။- 11ပိၵ်ႉသမ်ႉသူပဵၼ်ဢၼ်ႁၢႆႉမိူၵ်ႈယူႇသေၵေႃႈ၊ ပေႃးသူၸၢင်ႈပၼ်ၶိူင်ႈပိူင် ဢၼ်လီဢၼ်ငၢမ်း တီႈလုၵ်ႈလၢင်းသူယူႇၸိုင်၊ ပေႃႈသူဢၼ်မီးယူႇၵႃႈၼိူဝ်မိူင်းၵၢင်ႁၢဝ်ပုၼ်ႉ ယဵင်ႈၶႅၼ်းတၵ်းပၼ် ၶိူင်ႈပိူင်ဢၼ်လီဢၼ်ငၢမ်း တီႈၶဝ်ၸိူဝ်းဢၼ်သူးတွင်းယွၼ်းၼၼ်ႉဢမ်ႇၸႂ်ႈႁိုဝ်။

လွင်ႈၽၵ်းတူဢၼ်ၵႅပ်ႈ

(တူၺ်း၊ လူႉ 13:24)

12ၼင်ႇၵႃႈဢၼ်သူ ၶႂ်ႈႁႂ်ႈပိူၼ်ႈႁဵတ်းတီႈသူၼၼ်ႉ ႁဵတ်းတီႈပိူၼ်ႈတႃႉ။ ပိင်းၺၢပ်ႈၼႆႉၸမ်ႉ၊ ပဵၼ်ဢၼ်ဢုပ်ႉပိူင်ႇၵျၢမ်းပိင်းၺၢပ်ႈတီႉတင်းၵျၢမ်း ဢၼႃႇၵၢတ်ႈတီႉဢေႃႈ။

13ၶဝ်ႈၽၵ်းတူဢၼ်ၵႅပ်ႈတႃႉ။ ၽၵ်းတူဢိၵ်ႇတင်း တၢင်းဢၼ်ႁွတ်ႈထိုင် တၢင်းလူႉတၢင်းလႅဝ်ၼၼ်ႉၸမ်ႉ၊ ပဵၼ်ဢၼ်ၵႂၢင်ႈၼႃႇလူင်လၢင်လႄႈ ၶဝ်ၸိူဝ်းဢၼ်ၶဝ်ႈၼၼ်ႉ ၼမ်ၼႃႇဢေႃႈ။- 14ၽၵ်းတူဢိၵ်ႇတင်း သဵၼ်ႈတၢင်းဢၼ်ႁွတ်ႈထိုင် တၢင်းဢၼ်ဢသၢၵ်ႈလိပ်းၼၼ်ႉၸမ်ႉ၊ ပဵၼ်ဢၼ်ၵႅပ်ႈၼႃႇလူင်လၢင်လႄႈ ၶဝ်ၸိူဝ်းဢၼ်ထူပ်းၼၼ်ႉၵေႇၼႃႇဢေႃႈ။

လွင်ႈတူၼ်ႈတင်းမၢၵ်ႇမၼ်း

(တူၺ်း၊ လူႉ 6:43-44)

15မိၵ်ႉသႃႇပရေႃးၽႅတ်ႈတင်းလၢႆ ဢၼ်ၵႃႈၼႂ်းမၼ်းပဵၼ်မႃၼႆး ဢၼ်လိူင်းၵျၢမ်းၼႃႇလႄႈ ဢဝ်တင်းၼင်သူဝ်းသုမ်ႇမႆယူႇသေလႄႈ မႃးၵႃႈတီႈသူၼၼ်ႉၸိုင်၊ ႁဵတ်းသတီႉသေလႄႈဝႄႈပႅတ်ႈတႃႉ။- 16တူၺ်းမၢၵ်ႇၶဝ်ၼၼ်ႉလႄႈ တၵ်းႁူႉသၽေႃးၶဝ်ဢေႃႈ။ ၸၢင်ႈဝိတ်းဢဝ်မၢၵ်ႇၸပိတ်ႈၵႃႈတီႈတူၼ်ႈၼၢမ်ႁိုဝ်။ ၸၢင်ႈဝိတ်းဢဝ်မၢၵ်ႇလိူဝ်ႇသၢင်းၽေႃးၵႃႈတီႈတူၼ်ႈၼၢမ်လိၼ်ႁိုဝ်။- 17တူၼ်ႈဢၼ်လီၼၼ်ႉ ၸၢင်ႈမၢၵ်ႇမၢၵ်ႇဢၼ်လီဢေႃႈ။ တူၼ်ႈဢၼ်ဢမ်ႇလီၼၼ်ႉ ၸၢင်ႈမၢၵ်ႇမၢၵ်ႇဢၼ်ဢမ်ႇလီဢေႃႈ။- 18တူၼ်ႈဢၼ်လီၼၼ်ႉ ဢမ်ႇၸၢင်ႈမၢၵ်ႇမၢၵ်ႇဢၼ်ဢမ်ႇလီလႆႈ။ တူၼ်ႈဢၼ်ဢမ်ႇလီၼၼ်ႉ ဢမ်ႇၸၢင်ႈမၢၵ်ႇမၢၵ်ႇဢၼ်လီလႆႈ။- 19တူၼ်ႈဢၼ်မၢၵ်ႇမၢၵ်ႇဢၼ်ဢမ်ႇလီၵႃႈမီးၸိူဝ်းၼၼ်ႉၸိုင် ၸၢင်ႈၽၼ်းလူမ်ႉသေလႄႈ ၶျႃးသႂ်ႇၵႃႈၼႂ်းၽႆးဢေႃႈ။- 20ပေႃးပဵၼ်ၸိူဝ်ႉၼင်ႇၼႆၸိုင်၊ တူၺ်းမၢၵ်ႇၶဝ်ၼၼ်ႉလႄႈ တၵ်းႁူႉသၽေႃးၶဝ်ဢေႃႈ။

ၵဝ်ဢမ်ႇတွၼ်ႉႁူႉၸၵ်းသူ

(တူၺ်း၊ လူႉ 13:25-27)

21ၶဝ်ၸိူဝ်းဢၼ် လဝ်ႊလၢတ်ႈၵႃႈတီႈၵဝ်လႄႈဝႃႈ၊ ၸဝ်ႈႁဝ်း၊ ၸဝ်ႈႁဝ်း၊ ဝႃႈၼင်ႇၼႆၼၼ်ႉ တၵ်းလႆႈၶဝ်ႈၼႂ်းမိူင်းၵၢင်ႁၢဝ်ၸဝ်ႈၵူႈၵေႃႉဢမ်ႇၸႂ်ႈ။ ၵေႃႉဢၼ်ႁဵတ်းၸွမ်းၼင်ႇဢလူဝ်ႇပေႃႈၵဝ်ဢၼ် မီးယူႇၵႃႈၼိူဝ်မိူင်းၵၢင်ႁၢဝ်ၼၼ်ႉၵူၺ်း တၵ်းလႆႈၶဝ်ႈဢေႃႈ။- 22ဝၼ်းၼၼ်ႉၸမ်ႉ၊ ၵူၼ်းၼမ်ၼႃႇ တၵ်းလဝ်ႊလၢတ်ႈလႄႈဝႃႈ၊ ၸဝ်ႈႁဝ်း၊ ၸဝ်ႈႁဝ်း၊ ႁဝ်းၶႃႈၼႆႉ ဢိင်ၼႃႇမႃႉၸိုဝ်ႈသဵင်ၸဝ်ႈႁဝ်းသေလႄႈသင်ႇသွၼ်သုင်းမႃႉပၼ်ယဝ်ႉဢမ်ႇၸႂ်ႈတီႈၶႃႈႁိုဝ်။ ႁဝ်းၶႃႈၼႆႉ ဢိင်ၼႃႇမႃႉၸိုဝ်ႈသဵင် ၸဝ်ႈႁဝ်းသေလႄႈ ႁေႃႈၽီႁၢႆႉတင်းလၢႆဢွၵ်ႇပႅတ်ႈယဝ်ႉဢမ်ႇၸႂ်ႈတီႈၶႃႈႁိုဝ်။ ႁဝ်းၶႃႈၼႆႉ ဢိင်ၼႃႇမႃႉၸိုဝ်ႈသဵင်ၸဝ်ႈႁဝ်းသေလႄႈ ၼႄပျႃးတၼ်းၶူဝ်းၼမ်ၼႃႇယဝ်ႉဢမ်ႇၸႂ်ႈတီႈၶႃႈႁိုဝ်။ ဝႃႈၼင်ႇၼႆဢေႃႈ။- 23ၵဝ်သမ်ႉတၵ်းလၢတ်ႈတီႈၶဝ်ၸိူဝ်းၼၼ်ႉလႅင်းလႅင်းလႄႈဝႃႈ၊ ၵဝ်ဢမ်ႇႁူႉၸၵ်းသူ။ သူၸိူဝ်းဢၼ်ႁဵတ်းဢမ်ႇတြႃးတင်းလၢႆၼႆႉဢိူၺ်း၊ ဝႄႈသေၵႃႈတီႈၵဝ်လႄႈၵႂႃႇတႃႉ၊ ဝႃႈၼင်ႇၼႆဢေႃႈ။

လွင်ႈၵူၼ်းသွင်ၵေႃႉဢၼ်ႁဵတ်းႁိူၼ်း

(တူၺ်း၊ လူႉ 6:47-49)

24ၽူႈလႂ်သေဢမ်ႇဝႃႈ၊ ၵေႃႉဢၼ်ငိၼ်းၵႂၢမ်းဢၼ်ၵဝ်ႁေႃးလၢတ်ႈလႄႈ ထွမ်ႇဢဝ်ၼၼ်ႉ၊ လွင်ႈဢၼ်ၵေႃႉၼၼ်ႉ မိူၼ်ၸိူဝ်ႉၼင်ႇၵူၼ်းပိင်ႇၺႃႇသီႉ ဢၼ်မႄးႁဵတ်းႁိူၼ်းၵႃႈၼိူဝ်မၢၵ်ႇႁိၼ်ၼၼ်ႉၸိုင်၊ ၵဝ်တၵ်းၼႄပုင်ႇပမႃႇမၼ်းဢေႃႈ။- 25မိူဝ်ႈဢၼ်ၽူၼ်တူၵ်းလႄႈၼမ်ႉၼွင်း ဢိၵ်ႇတင်းလူမ်းမႃးထူဝ်းႁိူၼ်းၼၼ်ႉၸိုင်၊ ပိူဝ်ႈဢၼ်တႄႇဝႆႉၵႃႈၼိူဝ်မၢၵ်ႇႁိၼ်လႄႈ ဢမ်ႇလူမ်ႉဢမ်ႇပင်း။- 26ၽူႈလႂ်သေဢမ်ႇဝႃႈ၊ ၵေႃႉဢၼ်ငိၼ်းၵႂၢမ်းဢၼ်ၵဝ်ႁေႃးလၢတ်ႈလႄႈ ဢမ်ႇထွမ်ႇဢဝ်ၼၼ်ႉ လွင်ႈဢၼ်ၵေႃႉၼၼ်ႉ မိူၼ်ၸိူဝ်ႉၼင်ႇၵူၼ်းမိူၵ်ႈ ဢၼ်မႄးႁဵတ်းႁိူၼ်းၵႃႈၼိူဝ်သၢႆးၼၼ်ႉၸိုင်၊ ၵဝ်တၵ်းၼႄပုင်ႇပမႃႇမၼ်းဢေႃႈ။- 27မိူဝ်ႈဢၼ်ၽူၼ်တူၵ်းလႄႈၼမ်ႉၼွင်း ဢိၵ်ႇတင်းလူမ်းမႃးထူဝ်းႁိူၼ်းၼၼ်ႉၸိုင် လူမ်ႉပင်းဢေႃႈ။ တၢင်းဢၼ်လူမ်ႉဢၼ်ပင်းမၼ်းယႂ်ႇၼႃႇဝႃႈၼႆ၊ မၼ်းၸဝ်ႈႁေႃးလၢတ်ႈ၊ ဝႃႈၼင်ႇၼႆဢေႃႈ။

ဢႃႇၼႃႇတၼ်းၶူဝ်းၸဝ်ႈယေႇသူႉ

28မိူဝ်ႈဢၼ် ယေႇသူႉႁေႃးလၢတ်ႈတေႇသၼႃႇၸဝ်ႈ သုတ်းထၢတ်ႇၼၼ်ႉၸိုင်၊ ပရဵၵ်ႈသၢတ်ႈတင်းသဵင်ႈတင်းလူင်ဢၢမ်းလွင်ႈတၢင်းဢၼ် မၼ်းၸဝ်ႈသင်ႇသွၼ်သုင်းမႃႉပၼ်ၼၼ်ႉ ၼႃႇလူင်လၢင်ဢေႃႈ။- 29လွင်ႈမၼ်းၸမ်ႉ မၼ်းၸဝ်ႈသင်ႇသွၼ်ပၼ် မိူၼ်ၸိူဝ်ႉၼင်ႇၵူၼ်းထုတ်ႇၵျၢမ်းဢမ်ႇၸႂ်ႈ၊ မိူၼ်ၸိူဝ်ႉၼင်ႇၵေႃႉဢၼ်ဢုပ်ႉပိူင်ႇၼၼ်ႉဢေႃႈ။

നിലവിൽ തിരഞ്ഞെടുത്തിരിക്കുന്നു:

မၢတ်ႈထႄႇ 7: CBMS

ഹൈലൈറ്റ് ചെയ്യുക

പങ്ക് വെക്കു

പകർത്തുക

നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക

သမ်ႇမႃႇၵျၢမ်းလိၵ်ႈ ထႃႇဝရႃႉၽြႂး നെക്കുറിച്ച് കൂടുതലറിയുക