မၢတ်ႈထႄႇ 4

ၸဝ်ႈယေႇသူႉလႆႈၶၢမ်ႇတၢင်းၸၢမ်းတူၺ်း

(တူၺ်း၊ မႃႇ 1:12-13။ လူႉ 4:1-13)

1မိူဝ်ႈၼၼ်ႉ ဝီႉၺိၺ်ႇၸဝ်ႈ ဢဝ်ယေႇသူႉၵႂႃႇသူင်ႇၵႃႈတီႈၼႂ်းထိူၼ်ႇ ႁႂ်ႈမၼ်းၸဝ်ႈလႆႈၶၢမ်ႇတၢင်းဢၼ် မႃႇၼၢတ်ႈၸၢမ်းတူၺ်းၸူဝ်းဢဝ်လႄႈ၊- 2မၼ်းၸဝ်ႈၼၼ်ႉ ဢမ်ႇၵိၼ်တၢင်းၵိၼ်တၢင်းၶူပ်းလႆႈ သီႇသိပ်းဝၼ်းသီႇသိပ်းၶိုၼ်းတဵမ်တဵမ်ယဝ်ႉၸင်ႇ၊ တွင်ႉမႆႈဢေႃႈ။- 3မိူဝ်ႈၼၼ်ႉ ၵေႃႉဢၼ်ၸၢမ်းတူၺ်း ၸူဝ်းဢဝ်ၼၼ်ႉ သုတ်ႉၸမ်လႄႈလဝ်ႊဝႃႈ၊ ပေႃးၸဝ်ႈႁဝ်းၸႂ်ႈလုၵ်ႈၽြႃးပဵၼ်ၸဝ်ႈၸိုင်၊ မီးဢမိင်ႉႁႂ်ႈမၢၵ်ႇႁိၼ်ၸိူဝ်းၼႆႉ ပဵၼ်ၶဝ်ႈမုၼ်းသေၵမ်း၊ မိူဝ်ႈဢၼ်ဝႃႈၼင်ႇၼႆၸိုင်၊- 4မၼ်းၸဝ်ႈၵေႃႈၶိုၼ်းလၢတ်ႈလႄႈဝႃႈ၊ ဢၼ်မႃးၼႂ်းၵျၢမ်းလိၵ်ႈလႄႈဝႃႈၸမ်ႉ၊ ၵူၼ်းတၵ်းလႆႈဢဝ်ၶဝ်ႈမုၼ်းၵူၺ်း လဵင်ႉၸႂ်ဢမ်ႇၸႂ်ႈ၊ တၵ်းလႆႈဢဝ်တင်းၵႃႈဢၼ်ၽြႃးပဵၼ်ၸဝ်ႈလၢတ်ႈဝႆႉၼၼ်ႉ လဵင်ႉၸႂ်ဢေႃႈ၊ မႃးၼင်ႇၼႆယဝ်ႉ၊ ဝႃႈၼင်ႇၼႆဢေႃႈ။- 5မိူဝ်ႈၼၼ်ႉ မႃႇၼၢတ်ႈသမ်ႉဢဝ်မၼ်းၸဝ်ႈၵႂႃႇသူင်ႇၵႃႈတီႈ ဝဵင်းဢၼ်မူတ်းၸၢင်ႇပုၼ်ႉလႄႈ တၢင်ႇဝႆႉၵႃႈၼိူဝ်ပၢႆၸိၵ်းၸွမ်ပိၵ်ႈမၢၼ်ႇၸဝ်ႈယဝ်ႉၸင်ႇ၊ လဝ်ႊလၢတ်ႈလႄႈဝႃႈ၊- 6ပေႃးၸဝ်ႈႁဝ်းၸႂ်ႈလုၵ်ႈၽြႃးပဵၼ်ၸဝ်ႈၸိုင်၊ ၸဝ်ႈႁဝ်းဢဝ်တူဝ်ၸဝ်ႈၵဝ်ႇ ပွႆႇတူၵ်းၵႃႈတႂ်ႈသေၵမ်း။ ဢၼ်မႃးၼႂ်းၵျၢမ်းလိၵ်ႈလႄႈဝႃႈၸမ်ႉ၊ မၼ်းၸဝ်ႈတၵ်းသင်ႇလၢတ်ႈလွင်ႈမႂ်းဝႆႉ တီႈတမၢၼ်ႇၵၢင်ႁၢဝ်တင်းလၢႆလႄႈ၊ ၼင်ႇႁိုဝ်ၶဝ်တၵ်းဢမ်ႇပၼ်ႁႂ်ႈတိၼ်မႂ်းတိူဝ်ႉမၢၵ်ႇႁိၼ်ၸိုင်၊ ၶဝ်တၵ်းဢဝ်တင်းမိုဝ်းႁႄႉႁပ်ႉ ယွင်ႈဢဝ်မႂ်းဢေႃႈ၊ မႃးၼင်ႇၼႆယဝ်ႉ၊ မိူဝ်ႈဢၼ်ဝႃႈၼင်ႇၼႆၸိုင်၊- 7ယေႇသူႉၵေႃႈ လၢတ်ႈလႄႈဝႃႈ၊ ဢၼ်သမ်ႉမႃးၼႂ်းၵျၢမ်းလိၵ်ႈလႄႈဝႃႈထႅင်ႈၸမ်ႉ၊ မႂ်းဢမ်ႇလႆႈႁဵတ်းတၢင်းဢၼ်ၸၢမ်းတူၺ်း ၽြႃးပဵၼ်ၸဝ်ႈမႂ်း ထႃႇဝရႃႉၽြႃး မႃးၼင်ႇၼႆယဝ်ႉ၊ ဝႃႈၼင်ႇၼႆဢေႃႈ။- 8ၵမ်းၼၼ်ႉ မႃႇၼၢတ်ႈသမ်ႉ ဢဝ်ယေႇသူႉၵႂႃႇ ၵႃႈတီႈၼိူဝ်လွႆဢၼ်သုင်ၼႃႇလႄႈ ၼႄပျႃးမိူင်းတင်းသဵင်ႈတင်းလူင် ၵႃႈမီးၼႂ်းလေႃးၵႃႉၼႆႉ ဢိၵ်ႇတင်းမုၼ်ၸေးၸိမ်ႇမိူင်းၸိူဝ်းၼၼ်ႉတီႈမၼ်းၸဝ်ႈသေလႄႈ လဝ်ႊလၢတ်ႈလႄႈဝႃႈ၊- 9ပေႃးၸဝ်ႈႁဝ်းၶုပ်ႉမူပ်ႇဝႆႈၵဝ်ၸိုင်၊ ၵဝ်တၵ်းပၼ် ၵႃႈဢၼ်ၼႄပျႃးၸိူဝ်းၼႆႉတီႈၸဝ်ႈႁဝ်းဢေႃႈ၊ မိူဝ်ႈဢၼ်ဝႃႈၼင်ႇၼႆၸိုင်၊- 10ယေႇသူႉၵေႃႈ လၢတ်ႈလႄႈဝႃႈ၊ ၸႃႇတၢၼ်ႇဢိူၺ်း၊ သုတ်ႉပႃႈလင်ၵဝ်တႃႉ။ ဢၼ်မႃးၼႂ်းၵျၢမ်းလိၵ်ႈလႄႈဝႃႈၸမ်ႉ၊ မႂ်းတၵ်းလႆႈၵူဝ်းၵႂၢႆႇ ၽြႃးပဵၼ်ၸဝ်ႈမႂ်း ထႃႇဝရႃႉၽြႃးဢေႃႈ။ တၵ်းလႆႈႁဵတ်းဝၢတ်ႈတီႈမၼ်းၸဝ်ႈၼၼ်ႉၵူၺ်း၊ မႃးၼင်ႇၼႆယဝ်ႉ၊ ဝႃႈၼင်ႇၼႆဢေႃႈ။- 11မိူဝ်ႈၼၼ်ႉ မႃႇၼၢတ်ႈၸင်ႇ ဢွၵ်ႇၵႂႃႇသေၵႃႈတီႈမၼ်းၸဝ်ႈလႄႈ တမၢၼ်ႇၵၢင်ႁၢဝ်တင်းလၢႆ မႃးႁဵတ်းလဵင်ႉႁဵတ်းလူမၼ်းၸဝ်ႈဢေႃႈ။

ၸဝ်ႈယေႇသူႉတႄႇၸႃႉၵၢၼ်ငၢၼ်း

(တူၺ်း၊ မႃႇ 1:14-15။ လူႉ 4:14-15)

12 ယေႇသူႉၼၼ်ႉ မိူဝ်ႈဢၼ်ငိၼ်းလွင်ႈဢၼ်ယူဝ်းႁၢၼ်ႇတူၵ်းထွင်ႇၸိုင်၊ ၸင်ႇၵႂႃႇၵႃႈတီႈမိူင်းၵႃႇလီႉလႄးပုၼ်ႉလႄႈ၊- 13ပႅတ်ႈဝႆႉဝဵင်းၼႃႇၸရႅတ်ႈသေယဝ်ႉ၊ ႁွတ်ႈထိုင်ၵႃႈတီႈဝဵင်း ၵပိူဝ်ႇၼေႇဢုမ်ႇဢၼ်မီးၸပ်းႁိမ်းၼွင် ၵႃႈတီႈၶိုင်ႈၵၢင်ဢိူင်ႇၸေႇပူႉလုၼ်ႇ တင်းဢိူင်ႇၼပ်ႉထလီႉၼၼ်ႉလႄႈ ယူႇၵႃႈတီႈဝဵင်းၼၼ်ႉဢေႃႈ။- 14လွင်ႈတၢင်းၸိူဝ်းၼႆႉၸမ်ႉ၊ ၼင်ႇႁိုဝ်ၵႂၢမ်းဢၼ်ပရေႃးၽႅတ်ႈဢီႉသႃႇယႃႉ ႁေႃးလၢတ်ႈဝႆႉၼၼ်ႉ တၵ်းပျေႉၸုမ်ႇၸိုင် ၸင်ႇပဵၼ်ဢေႃႈ။- 15ၵႂၢမ်းၸိူဝ်းၼၼ်ႉဝႃႈၸမ်ႉ၊ ဢိူင်ႇၸေႇပူႉလုၼ်ႇတင်းဢိူင်ႇၼပ်ႉထလီႉ၊ သဵၼ်ႈတၢင်းဢၼ်တႆႇၸွမ်းႁိမ်းၼွင်ၽၢႆႇပုၼ်ႉၼမ်ႉႁွင်ႈယေႃးတၢၼ်ႇမိူင်းၵႃႇလီႉလႄး တီႈဢၼ်ၵူၼ်းတၢင်ႇၸိူဝ်ႉတၢင်ႇၶိူဝ်းယူႇၼၼ်ႉ၊- 16ၵူၼ်းဢၼ်မီးယူႇၼႂ်းလပ်းသိင်ႇတင်းလၢႆ လႆႈႁၼ်ဢၼ်လႅင်း ဢၼ်ယႂ်ႇၼႃႇလူင်လၢင်လႄႈ ဢၼ်လႅင်းပေႃႇမႃးႁိူဝ်ႈလႅင်းၵႃႈတီႈၶဝ်ၸိူဝ်းဢၼ် မီးယူႇၼႂ်းႁူမ်ႈတၢင်းတၢႆၼၼ်ႉယဝ်ႉ၊ ဝႃႈၼင်ႇၼႆဢေႃႈ။- 17ၸႃႉၸဵမ်မိူဝ်ႈၼၼ်ႉ ယေႇသူႉ ၸင်ႇၸႃႉႁေႃးၸႃႉလၢတ်ႈလႄႈဝႃႈ၊ ၶုၵ်းၸႂ်လႆႈမႆႈၸႂ်တႃႉ။ မိူင်းၵၢင်ႁၢဝ်ၸဝ်ႈ ၸမ်တၵ်းတႄႇပဵၼ်ယဝ်ႉ၊ ဝႃႈၼင်ႇၼႆဢေႃႈ။

18ၼႂ်းမိူဝ်ႈဢၼ်ယေႇသူႉ ၸွမ်းႁိမ်းၼွင်ၵႃႇလီႉလႄးၵႂႃႇယူႇၼၼ်ႉၸိုင်၊ မၼ်းၸဝ်ႈထူပ်းႁၼ် ပေႇတရူႉဢၼ်လႆႈႁွင်ႉႁဵၵ်ႈၸိုဝ်ႈသီႉမုၼ်ႇ တင်းၼွင်ႉၸၢႆးမၼ်း ဢၼ်ႇတရေႇၶဝ်ပီႈၼွင်ႉသွင်ၵေႃႉ ဝၢၼ်ႇၶႄတူၵ်းၼႂ်းၼွင်ယူႇဢေႃႈ။- 19ၶဝ်ၸိူဝ်းၼၼ်ႉၸမ်ႉ၊ ပဵၼ်တမ်ႇငႃႈဢေႃႈ။ မၼ်းၸဝ်ႈလၢတ်ႈတီႈၶဝ်လႄႈဝႃႈ၊ ၸွမ်းပႃႈလင်ၵဝ်တႃႉ။ ၵဝ်တၵ်းႁႂ်ႈသူပဵၼ်တမ်ႇငႃႈဢၼ်မဵတ်းၵူၼ်းဢေႃႈ၊- 20မိူဝ်ႈဢၼ်ဝႃႈၼင်ႇၼႆၸိုင်၊ ၶဝ်ၼၼ်ႉ ပႅတ်ႈဝႆႉၶႄၶဝ်ၵမ်းလဵဝ်သေလႄႈ ၸွမ်းပႃႈလင်မၼ်းၸဝ်ႈၵႂႃႇဢေႃႈ။- 21မၼ်းၸဝ်ႈပူၼ်ႉသေတီႈၼၼ်ႈၵႂႃႇယဝ်ႉၸင်ႇ၊ ထူပ်းႁၼ်ပီႈၼွင်ႉသွင်ၵေႃႉတၢင်ႇတီႈဢၼ်ဝႃႈ ယႃႇၵုပ်ႈလုၵ်ႈၸၢႆးၸေႇပေႇတႄး တင်းၼွင်ႉၸၢႆးမၼ်းယူဝ်းႁၢၼ်ႇ မႄးၽုင်ၶႄၶဝ်ယူႇၵႃႈၼိူဝ်ႁိူဝ်း လူၺ်ႈၵၼ်တင်းပေႃႈၶဝ်လႄႈ ႁွင်ႉဢဝ်ၶဝ်ၼၼ်ႉဢေႃႈ။- 22ၶဝ်ၼၼ်ႉၵေႃႈ ပႅတ်ႈဝႆႉပေႃႈၶဝ် တင်းႁိူဝ်းၵမ်းလဵဝ်သေလႄႈ ၸွမ်းပႃႈလင်မၼ်းၸဝ်ႈၵႂႃႇဢေႃႈ။

23 ယေႇသူႉတေႇသႃႉၸႃႇရီႇလႄႇလဵပ်ႈၼႂ်းမိူင်းၵႃႇလီႉလႄးတင်းသဵင်ႈတင်းလူင်လႄႈ သင်ႇသွၼ်သုင်းမႃႉပၼ်ၵႃႈၼႂ်းၸရွပ်ႈႁေႃးတြႃးတင်းလၢႆယူႇ၊ ႁေႃးလၢတ်ႈတြႃးသတၢင်းသိူဝ်းပျေႃႇ ဢၼ်ၸၢပ်ႈသႅင်ႇၵၼ်တင်းမိူင်းၸဝ်ႈယူႇသေလႄႈ ႁႂ်ႈတၢင်းၶႆႈတၢင်းပဵၼ်ၵူႈၸိူဝ်ႉၵူႈပိူင် ၼႂ်းၵူၼ်းၸိူဝ်းၼၼ်ႉႁၢႆယူႇဢေႃႈ။- 24ပိူဝ်ႈဢၼ်သတၢင်းသဵင်ၶၢဝ်ႇမၼ်းၸဝ်ႈ သႃႈႁူင်ၸွတ်ႇၸႅတ်ႇၵႃႈၼႂ်းမိူင်းသူႉရီႉလႄႈ ၶဝ်ဢဝ်ၸႃႉၸဵမ်ၵူၼ်းဢၼ်ဢမ်ႇယူႇလီ၊ ၵူၼ်းဢၼ်မီးတၢင်းၶႆႈတၢင်းပဵၼ်ၵူႈၸိူဝ်ႉၵူႈပိူင်၊ ၵူၼ်းဢၼ်ၽီႁၢႆႉၶဝ်ႈ၊ ၵူၼ်းဢၼ်ပဵၼ်မႃႈမူ၊ ၵူၼ်းဢၼ်တိၼ်တၢႆမိုဝ်းတၢႆ တင်းသဵင်ႈတင်းလူင်ၵႃႈမီးၸိူဝ်းၼၼ်ႉ မႃးတီႈမၼ်းၸဝ်ႈဢေႃႈ။ မၼ်းၸဝ်ႈႁႂ်ႈတၢင်းၶႆႈတၢင်းပဵၼ်ၶဝ်ၸိူဝ်းၼၼ်ႉႁၢႆဢေႃႈ။- 25ၵူၼ်းၸိူဝ်းဢၼ်လုၵ်ႉသေၵႃႈတီႈမိူင်းၵႃႇလီႉလႄး တင်းမိူင်းတေႇၵႃႇပေႃးလီႉ တင်းဝဵင်းယေႇရူႉသလႅမ်ႇ တင်းမိူင်းယူႉတႃႉ ဢိၵ်ႇတင်းၽၢႆႇပုၼ်ႉၼမ်ႉႁွင်ႈယေႃးတၢၼ်ႇ ၼမ်ၼႃႇၸွမ်းပႃႈလင်မၼ်းၸဝ်ႈဢေႃႈ။

നിലവിൽ തിരഞ്ഞെടുത്തിരിക്കുന്നു:

မၢတ်ႈထႄႇ 4: CBMS

ഹൈലൈറ്റ് ചെയ്യുക

പങ്ക് വെക്കു

പകർത്തുക

നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക

သမ်ႇမႃႇၵျၢမ်းလိၵ်ႈ ထႃႇဝရႃႉၽြႂး നെക്കുറിച്ച് കൂടുതലറിയുക