မၢတ်ႈထႄႇ 13

ၵႂၢမ်းဢူႉပမႃႇလွင်ႈဝၢၼ်ႇၸိူဝ်ႉဝၢၼ်ႇၽၼ်း

1ဝၼ်းၼၼ်ႉ ယေႇသူႉဢွၵ်ႇသေၵႃႈၼႂ်းႁိူၼ်းၵႂႃႇလႄႈ ၼင်ႈယူႇၵႃႈတီႈႁိမ်းၼမ်ႉၼွင်ဢေႃႈ။- 2မိူဝ်ႈၼၼ်ႉ ၶဝ်ၸိူဝ်းဢၼ်ၸူႉဢၼ်တုမ်ၼမ်ၼႃႇ ၸူႉၵၼ်တုမ်ၵၼ်တီႈမၼ်းၸဝ်ႈ ထၼ်ႈပေႃးႁႂ်ႈမၼ်းၸဝ်ႈၶဝ်ႈၼင်ႈယူႇၵႃႈၼႂ်းႁိူဝ်းဢေႃႈ။ ပရဵၵ်ႈသၢတ်ႈတင်းသဵင်ႈတင်းလူင် ၸုၵ်းယူႇၵႃႈၼိူဝ်ၽင်ႇၼမ်ႉဢေႃႈ။- 3မိူဝ်ႈၼၼ်ႉ မၼ်းၸဝ်ႈလၢတ်ႈၵႂၢမ်းဢူႉပမႃႇၼမ်ၼႃႇ တီႈၶဝ်ၼၼ်ႉလႄႈဝႃႈ၊ တူၺ်းလူး၊ ၵေႃႉဢၼ်ဝၢၼ်ႇၸိူဝ်ႉဝၢၼ်ႇၽၼ်းၼၼ်ႉ ဢွၵ်ႇၵႂႃႇႁႂ်ႈလႆႈဝၢၼ်ႇၸိူဝ်ႉဝၢၼ်ႇၽၼ်းဢေႃႈ။

ၵႂၢမ်းဢူႉပမႃႇလွင်ႈၵူၼ်းဝၢၼ်ႇၸိူဝ်ႉၽၼ်း

(တူၺ်း၊ မႃႇ 4:1-9။ လူႉ 8:4-8)

4ၼႂ်းတၢင်းဢၼ်မၼ်းဝၢၼ်ႇၸိူဝ်ႉဝၢၼ်ႇၽၼ်းယူႇၼၼ်ႉ၊ မဵတ်ႉၵမ်ႈၽွင်ႈတူၵ်းၵႃႈတီႈႁိမ်းတၢင်းလႄႈ ၼူၵ်ႉတင်းလၢႆမႃးၵဵပ်းၵိၼ်သေဢေႃႈ။- 5မဵတ်ႉၵမ်ႈၽွင်ႈတူၵ်းၵႃႈၼႂ်းတီႈဢၼ် မၢၵ်ႇႁိၼ်ၼမ်ၼႃႇ လိၼ်ၵေႇၼၼ်ႉလႄႈ၊ ၵွပ်ႈပိူဝ်ႈဢၼ်ဢမ်ႇမီးလိၼ်ဢၼ်လိုၵ်ႉၼၼ်ႉ ပိၵ်ႉသမ်ႉဢွၵ်ႇတူၼ်ႈၵမ်းလဵဝ်သေၵေႃႈ၊- 6မိူဝ်ႈဢၼ်ၵၢင်ဝၼ်းဢွၵ်ႇမႃးၸိုင် မႆႈၼႃႇလူင်လၢင်လႄႈ ၵွပ်ႈပိူဝ်ႈဢၼ်ႁၢၵ်ႈမၼ်းဢမ်ႇပေႃးမီးၼၼ်ႉ ႁဵဝ်ႇႁႅင်ႈၵႂႃႇသေဢေႃႈ။- 7မဵတ်ႉၵမ်ႈၽွင်ႈတူၵ်းၵႃႈၼႂ်းတူၼ်ႈၼၢမ်လႄႈ တူၼ်ႈၼၢမ်ၸိူဝ်းၼၼ်ႉ ယႂ်ႇမႃးႁူမ်ႈမုင်းငႅၼ်းသႄးယူႇဢေႃႈ။- 8မဵတ်ႉၵမ်ႈၽွင်ႈတူၵ်းၵႃႈၼႂ်းတီႈဢၼ်လိၼ်လီလႄႈ မၢၵ်ႇမၢၵ်ႇမၼ်းမႃးၵမ်ႈၽွင်ႈပၢၵ်ႇပုၼ်ႈ၊ ၵမ်ႈၽွင်ႈႁူၵ်းသိပ်းပုၼ်ႈ၊ ၵမ်ႈၽွင်ႈသၢမ်သိပ်းပုၼ်ႈဢေႃႈ။- 9ၵေႃႉဢၼ်မီးႁူဢၼ်လီငိၼ်းၼၼ်ႉၸမ်ႉ၊ ႁႂ်ႈငိၼ်းသေၵမ်းလူၺ်ႈ၊ ဝႃႈၼင်ႇၼႆဢေႃႈ။

ငဝ်ႈႁၢၵ်ႈၵႂၢမ်းဢူႉပမႃႇၼႆႉ

(တူၺ်း၊ မႃႇ 4:10-12။ လူႉ 8:9-10)

10တပႄးၸဝ်ႈတင်းလၢႆ သုတ်ႉၸပ်းသုတ်ႉၸူးတီႈမၼ်းၸဝ်ႈသေလႄႈ လဝ်ႊထၢမ်လႄႈဝႃႈ၊ ႁဵတ်းသင်လႄႈၸဝ်ႈႁဝ်း ဢဝ်ၵႂၢမ်းဢူႉပမႃႇႁေႃးလၢတ်ႈတီႈၵူၼ်းၸိူဝ်းၼႆႉၸိူဝ်ႉၼင်ႇႁိုဝ်ၶႃႈ၊ မိူဝ်ႈဢၼ်ဝႃႈၼင်ႇၼႆၸိုင်၊- 11မၼ်းၸဝ်ႈၵေႃႈၶိုၼ်းလၢတ်ႈလႄႈဝႃႈ၊ သူမီးဢၶႂၢင်ႉဢၼ်လႆႈႁူႉလွင်ႈတၢင်းဢၼ်လိုၵ်ႉဢၼ်လမ်ႇ မိူင်းၵၢင်ႁၢဝ်ၸဝ်ႈဢေႃႈ။ ၶဝ်ၼၼ်ႉၸမ်ႉ ဢမ်ႇမီးဢၶႂၢင်ႉ။- 12ၽူႈလႂ်သေဢမ်ႇဝႃႈ ၵေႃႉဢၼ်ၸၢင်ႈမီးၼၼ်ႉ၊ တီႈၵေႃႉၼၼ်ႉ၊ ၼင်ႇႁိုဝ်မၼ်းတၵ်းပျေႉၸုမ်ႇလိူင်ႇၸႂ်ၸိုင် တၵ်းပၼ်ထႅင်ႈလူးၵွၼ်ႇဢေႃႈ။ ၽူႈလႂ်သေဢမ်ႇဝႃႈ ၵေႃႉဢၼ်ဢမ်ႇၸၢင်ႈမီးၵႃႈသင်ၼၼ်ႉ၊ ၵႃႈတီႈၵေႃႉၼၼ်ႉ၊ တၵ်းၼုၵ်ႈဢဝ်ၵႃႈဢၼ်မၼ်းမီးတင်းသဵင်ႈတင်းလူင်ၼၼ်ႉလူးၵွၼ်ႇဢေႃႈ။- 13ၵွပ်ႈႁွႆးၼႆႉ၊ ပိူဝ်ႈဢၼ်ၶဝ်ႁၼ်ယူႇသေၵေႃႈဢမ်ႇႁၼ်၊ ငိၼ်းယူႇသေၵေႃႈဢမ်ႇငိၼ်း၊ ဢမ်ႇႁူႉဢမ်ႇၸႅင်ႈလႄႈ၊ ၵဝ်ဢဝ်တင်းၵႂၢမ်းဢူႉပမႃႇ ႁေႃးလၢတ်ႈတီႈၶဝ်ဢေႃႈ။- 14ၵႂၢမ်းဢၼႃႇၵၢတ်ႈတီႉဢၼ်ပရေႃးၽႅတ်ႈဢီႉသႃႇယႃႉ ႁေႃးလၢတ်ႈဝႆႉၼၼ်ႉၸမ်ႉ၊ သူငိၼ်းယူႇသေၵေႃႈ တၵ်းငိၼ်းတၢင်းဢမ်ႇႁူႉဢမ်ႇၸႅင်ႈဢေႃႈ။ ႁၼ်ယူႇသေၵေႃႈ တၵ်းႁၼ်တၢင်းဢမ်ႇမၢတ်ႈဢမ်ႇတွင်းဝႆႉဢေႃႈ။- 15လွင်ႈမၼ်းၸမ်ႉ ၵွပ်ႈပိူဝ်ႈဢၼ်ၵူဝ်တႃၶဝ်တၵ်းႁၼ်၊ ႁူၶဝ်တၵ်းငိၼ်း၊ ႁူဝ်ၸႂ်ၶဝ်တၵ်းႁူႉၸႅင်ႈ၊ တၢင်းၵျၢမ်ႇတၢင်းပွင်ၶဝ်တၵ်းၶၢႆႉပုတ်ႈ၊ ၵဝ်တၵ်းႁႂ်ႈတၢင်းၶႆႈတၢင်းပဵၼ်ၶဝ်ႁၢႆၼၼ်ႉလႄႈ၊ ၵူၼ်းမဵဝ်းၼႆႉ ႁူဝ်ၸႂ်ၶဝ်ၼၵ်းၼႃယူႇ၊ ႁူၶဝ်ဢမ်ႇငိၼ်းယူႇ၊ မၢၵ်ႇတႃၶဝ်လပ်းယူႇဢေႃႈ ဝႃႈၼႆ၊ ၵႂၢမ်းၼၼ်ႉပျေႉၸုမ်ႇၼႂ်း ၵူၼ်းၸိူဝ်းၼႆႉယဝ်ႉဢေႃႈ။- 16မၢၵ်ႇတႃသူၼၼ်ႉ ပိူဝ်ႈဢၼ်ႁၼ်လႄႈ ႁူသူၼၼ်ႉၵေႃႈ ပိူဝ်ႈဢၼ်ငိၼ်းလႄႈ မီးမင်ႇၵလႃႇဢေႃႈ။- 17ၵဝ်ဝႃႈတီႈၸိုဝ်ႈတီႈၸႂ်ႈၸမ်ႉ၊ လွင်ႈတၢင်းဢၼ်သူလႆႈႁၼ်ၸိူဝ်းၼႆႉၸိုင်၊ ပိၵ်ႉသမ်ႉ ပရေႃးၽႅတ်ႈ ဢိၵ်ႇတင်းၵူၼ်းဢၼ်သိုဝ်ႈတေႃႇတင်းလၢႆ မီးဢလူဝ်ႇၶႂ်ႈႁၼ်သေၵေႃႈ ဢမ်ႇလႆႈႁၼ်။ လွင်ႈတၢင်းဢၼ်သူလႆႈငိၼ်းၸိူဝ်းၼႆႉၸိုင်၊ပိၵ်ႉသမ်ႉၶဝ်မီးဢလူဝ်ႇၶႂ်ႈငိၼ်းသေၵေႃႈ ဢမ်ႇလႆႈငိၼ်း။

ဢထိၵ်ႈပႄႇလွင်ႈၵူၼ်းဝၢၼ်ႇၸိူဝ်ႉၽၼ်း

(တူၺ်း၊ မႃႇ 4:13-20။ လူႉ 8:11-15)

18ထွမ်ႇလွင်ႈၵႂၢမ်းဢူႉပမႃႇၵူၼ်းဢၼ်ဝၢၼ်ႇၸိူဝ်ႉဝၢၼ်ႇၽၼ်းၼၼ်ႉတႃႉ။- 19ၽူႈလႂ်သေဢမ်ႇဝႃႈ၊ မိူဝ်ႈဢၼ်ငိၼ်းၵႂၢမ်းတြႃးမိူင်းၸဝ်ႈလႄႈ ဢမ်ႇလူင်ႉဢမ်ႇလႅင်းၼၼ်ႉၸိုင် ၵေႃႉဢၼ်ႁၢႆႉၼၼ်ႉမႃးလႄႈ ႁိမ်ႁူင်ႇထူၺ်ႈထွၼ်ဢဝ်မဵတ်ႉဢၼ်ဝၢၼ်ႇၵႃႈၼႂ်းႁူဝ်ၸႂ်မၼ်းၼၼ်ႉ ဢွၵ်ႇပႅတ်ႈဢေႃႈ။ ဢၼ်ၼႆႉၸမ်ႉ၊ ပဵၼ်လွင်ႈဢၼ်ဝၢၼ်ႇၸိူဝ်ႉဝၢၼ်ႇၽၼ်း ၵႃႈတီႈႁိမ်းတၢင်းဢေႃႈ။- 20လွင်ႈဢၼ်ဝၢၼ်ႇၸိူဝ်ႉဝၢၼ်ႇၽၼ်းၵႃႈၼႂ်းတီႈဢၼ်မၢၵ်ႇႁိၼ်ၼမ်ၼႃႇၼၼ်ႉၸမ်ႉ၊ ပဵၼ်ၵေႃႉဢၼ်လႆႈငိၼ်းၵႂၢမ်းတြႃးယဝ်ႉလႄႈ ပိၵ်ႉသမ်ႉမီးတင်းၸႂ်ဢၼ်သိူဝ်းၸူမ်းၼႃႇႁပ်ႉတုင်းဢဝ်ၵမ်းလဵဝ်သေၵေႃႈ၊- 21ဢမ်ႇမီးႁၢၵ်ႈမၼ်းၵႃႈၼႂ်းႁူဝ်ၸႂ်မၼ်းလႄႈ တႄႇယူႇၵမ်းဢွၼ်ႇၼိုင်ႈၵူၺ်းသေယဝ်ႉ၊ မိူဝ်ႈဢၼ်လႆႈၶၢမ်ႇတၢင်းဢၼ် ၼိၵ်ႈၸၢၵ်ႈငႅၼ်းသႄးၵွပ်ႈပိူဝ်ႈၵႂၢမ်းတြႃးၼၼ်ႉၸိုင် ၸႂ်လူႉၵမ်းလဵဝ်၊ ၶႂ်ႈဝႃႈၼင်ႇၼႆဢေႃႈ။- 22လွင်ႈဢၼ်ဝၢၼ်ႇၸိူဝ်ႉဝၢၼ်ႇၽၼ်း ၼႂ်းတူၼ်ႈၼၢမ်ၸိူဝ်းၼၼ်ႉၸမ်ႉ၊ ပဵၼ်ၵေႃႉဢၼ်လႆႈငိၼ်းၵႂၢမ်းတြႃးယဝ်ႉလႄႈ တၢင်းဢၼ်မႆႈၸႂ်ၶီၸႂ်လူၺ်ႈလွင်ႈလေႃးၵီႇ၊ တၢင်းဢၼ်ဢုၵ်ႉၸႃႇၸေးၸိမ်ႇ ပႅတ်ႉလႅၼ်တင်းလၢႆၼၼ်ႉ ႁူမ်ႇမုင်းငႅၼ်းသႄးၵႂၢမ်းတြႃးယူႇလႄႈ ဢမ်ႇမၢၵ်ႇမၢၵ်ႇမၼ်းလႆႈ၊ ၶႂ်ႈဝႃႈၼင်ႇၼႆဢေႃႈ။- 23လွင်ႈဢၼ်ဝၢၼ်ႇၸိူဝ်ႉဝၢၼ်ႇၽၼ်း ၵႃႈၼႂ်းတီႈဢၼ်လိၼ်လီၼၼ်ႉၸမ်ႉ၊ ပဵၼ်ၵေႃႉဢၼ်လႆႈငိၼ်းၵႂၢမ်းတြႃးယဝ်ႉလႄႈ လူင်ႉလႅင်းသေယဝ်ႉ၊ မၢၵ်ႇမႃးမၢၵ်ႇမၼ်းၵမ်ႈၽွင်ႈ ပၢၵ်ႇပုၼ်ႈ၊ ၵမ်ႈၽွင်ႈႁူၵ်းသိပ်းပုၼ်ႈ၊ ၵမ်ႈၽွင်ႈသၢမ်သိပ်းပုၼ်ႈၼၼ်ႉ၊ ၶႂ်ႈဝႃႈၼင်ႇၼႆဝႃႈၼႆ၊ မၼ်းၸဝ်ႈႁေႃးလၢတ်ႈဢေႃႈ။

ၵႂၢမ်းဢူႉပမႃႇလွင်ႈမဵတ်ႉၽၼ်းဝင်

24မၼ်းၸဝ်ႈႁေႃးလၢတ်ႈၵႂၢမ်းဢူႉပမႃႇ တၢင်ႇၸိူဝ်ႉတၢင်ႇဢၼ်လႄႈဝႃႈၸမ်ႉ၊ မိူင်းၵၢင်ႁၢဝ်ၸဝ်ႈမိူၼ်ၸိူဝ်ႉၼင်ႇၵေႃႉဢၼ် ဝၢၼ်ႇမဵတ်ႉဢၼ်လီၵႃႈၼႂ်းၼႃးဢေႃႈ။- 25ၼႂ်းမိူဝ်ႈဢၼ်ၵူၼ်းမၼ်းတင်းလၢႆယင်းတိုၵ်ႉၼွၼ်းလပ်းယူႇၼၼ်ႉၸိုင် ရၢၼ်ႇသူႇမၼ်းမႃးလႄႈ ဝၢၼ်ႇမဵတ်ႉၶဝ်ႈၽီ ၵႃႈၼႂ်းၶဝ်ႈၵျုင်ႇမၼ်းလႄႈဢွၵ်ႇၵႂႃႇသေဢေႃႈ။- 26မိူဝ်ႈဢၼ်ဢွၵ်ႇတူၼ်ႈလႄႈပဵၼ်ႁူင်းမႃးၸိုင်၊ တူၼ်ႈၶဝ်ႈၽီၼၼ်ႉၵေႃႈပေႃႇမႃးဢေႃႈ။- 27ၶႃႈၸဝ်ႈႁိူၼ်းတင်းလၢႆၵႂႃႇတီႈမၼ်းသေလႄႈ လဝ်ႊလၢတ်ႈလႄႈဝႃႈ၊ ၸဝ်ႈႁဝ်းဝၢၼ်ႇမဵတ်ႉဢၼ်လီ ၵႃႈၼႂ်းၼႃးဢမ်ႇၸႂ်ႈၶႃႈႁိုဝ်။ တူၼ်ႈၶဝ်ႈၽီၼၼ်ႉ ပဵၼ်မႃးၵႃႈလႂ်ၶႃႈ၊- 28မိူဝ်ႈဢၼ်ဝႃႈၼင်ႇၼႆၸိုင် မၼ်းၵေႃႈလၢတ်ႈလႄႈဝႃႈ၊ လွင်ႈဢၼ်ၼႆႉၸမ်ႉ၊ ပဵၼ်လွင်ႈဢၼ်ရၢၼ်ႇသူႇႁဵတ်းဢေႃႈ၊ ဝႃႈၼင်ႇၼႆဢေႃႈ။ ၶႃႈၸိူဝ်းၼၼ်ႉၵေႃႈလဝ်ႊလၢတ်ႈလႄႈဝႃႈ၊ ၸဝ်ႈႁဝ်းမီးဢလူဝ်ႇၶႂ်ႈႁႂ်ႈႁဝ်းၶႃႈၵႂႃႇလႄႈ လိူၵ်ႈထူၺ်ႈတူၼ်ႈၶဝ်ႈၽီၼၼ်ႉ ပႅတ်ႈၶႃႈႁိုဝ်။ မိူဝ်ႈဢၼ်ဝႃႈၼင်ႇၼႆၸိုင်၊- 29မၼ်းၵေႃႈလၢတ်ႈလႄႈဝႃႈ၊ ဢမ်ႇၸႂ်ႈၵူၺ်ႉ။ ပေႃးသူလိူၵ်ႈထူၺ်ႈတူၼ်ႈၶဝ်ႈၽီၼၼ်ႉပႅတ်ႈၸိုင် ၵူဝ်သူတၵ်းထူၺ်ႈမႅၼ်ႈ တူၼ်ႈၶဝ်ႈၵျုင်ႇဢေႃႈ။- 30ႁႂ်ႈတူၼ်ႈသွင်ၸိူဝ်ႉသွင်ပိူင်ၼၼ်ႉ ယႂ်ႇမႃးလူၺ်ႈၵၼ်တေႃႇထိုင်ႁွတ်ႈၶိင်ႇဢၼ်တၵ်းပၢတ်ႇၶဝ်ႈပုၼ်ႉတႃႉ။ ၼႂ်းၶိင်ႇဢၼ်တၵ်းပၢတ်ႇၶဝ်ႈၼၼ်ႉ၊ ၵဝ်တၵ်းလၢတ်ႈတီႈၶဝ်ၸိူဝ်းဢၼ်ပၢတ်ႇၼၼ်ႉလႄႈဝႃႈ၊ သူလိူၵ်ႈထူၺ်ႈတူၼ်ႈၶဝ်ႈၽီတင်းလၢႆၼၼ်ႉဢွၼ်တၢင်းလႄႈ မတ်ႉဝႆႉႁႂ်ႈလႆႈတုတ်ႇၽႆးပႅတ်ႈတႃႉ။ ၶဝ်ႈၵျုင်ႇၸမ်ႉ၊ ဢဝ်သိမ်းဝႆႉၵႃႈၼႂ်းယွင်ၼႂ်းယေးတႃႉ၊ ဝႃႈၼင်ႇၼႆဢေႃႈ၊ ဝႃႈၼႆ၊ မၼ်းၸဝ်ႈႁေႃးလၢတ်ႈဢေႃႈ။

ၵႂၢမ်းဢူႉပမႃႇၽၼ်းၽၵ်းၵၢတ်ႇ

(တူၺ်း၊ မႃႇ 4:30-32။ လူႉ 13:18-19)

31မၼ်းၸဝ်ႈလၢတ်ႈၵႂၢမ်းဢူႉပမႃႇတၢင်ႇၸိူဝ်ႉတၢင်ႇဢၼ်လႄႈဝႃႈၸမ်ႉ၊ မိူင်းၵၢင်ႁၢဝ်ၸဝ်ႈမိူၼ်ၸိူဝ်ႉၼင်ႇ ၽၼ်းၽၵ်းၵၢတ်ႇမဵတ်ႉၼိုင်ႈ ဢၼ်ၵူၼ်းၵေႃႉၼိုင်ႈ ဢဝ်ၽုၵ်ႇသႂ်ႇၵႃႈၼႂ်းသူၼ်ၼၼ်ႉဢေႃႈ။- 32ၽၼ်းၽၵ်းၵၢတ်ႇၼၼ်ႉ ပိၵ်ႉသမ်ႉလဵၵ်ႉၼႃႇသေမဵတ်ႉတင်းလၢႆသေၵေႃႈ မိူဝ်ႈဢၼ်ယႂ်ႇမႃးၸိုင် ယႂ်ႇသေတူၼ်ႈယိူဝ်ႈတူၼ်ႈယႃႈတင်းလၢႆလႄႈ ၸၢင်ႈပဵၼ်တူၼ်ႈဢၼ်ၼူၵ်ႉၵၢင်ႁၢဝ်တင်းလၢႆမႃးလိုဝ်ႈမႃးသဝ်းယူႇ ၵႃႈတီႈၵိင်ႇမၼ်းၶႃႊမၼ်းဢေႃႈ၊ ဝႃႈၼင်ႇၼႆဢေႃႈ။

ၵႂၢမ်းဢူႉပမႃႇလွင်ႈၸိူဝ်ႉပႅင်ႈ

(တူၺ်း၊ လူႉ 13:20-21)

33မၼ်းၸဝ်ႈလၢတ်ႈၵႂၢမ်းဢူႉပမႃႇတၢင်ႇၸိူဝ်ႉ တၢင်ႇဢၼ်လႄႈဝႃႈၸမ်ႉ၊ မိူင်းၵၢင်ႁၢဝ်ၸဝ်ႈမိူၼ်ၸိူဝ်ႉၼင်ႇၸိူဝ်ႉပႅင်ႈ ဢၼ်မႄႈယိင်းၵေႃႉၼိုင်ႈ ဢဝ်သႂ်ႇၵႃႈၼႂ်းၽွင်ၶဝ်ႈမုၼ်းသၢမ်တၢင် တေႃႇထိုင်ႁွတ်ႈထၼ်ႈပေႃးၸိူဝ်ႉပႅင်ႈၼၼ်ႉ ႁႂ်ႈတင်းသဵင်ႈတင်းလူင်ပွင်းၶိုၼ်ႈၼၼ်ႉယဝ်ႉ၊ ဝႃႈၼင်ႇၼႆဢေႃႈ။

34 ယေႇသူႉဢဝ်တင်းၵႂၢမ်းဢူႉပမႃႇႁေႃးလၢတ်ႈလွင်ႈတၢင်းၵႃႈမီးတင်းသဵင်ႈတင်းလူင်ၸိူဝ်းၼႆႉ တီႈပရဵၵ်ႈသၢတ်ႈတင်းလၢႆဢေႃႈ။ မၼ်းၸဝ်ႈဢမ်ႇႁေႃးဢမ်ႇလၢတ်ႈၵႂၢမ်း ဢၼ်ၵၢင်းလွတ်ႈတင်းဢူႉပမႃႇၼၼ်ႉတီႈၶဝ်။- 35ဢၼ်ၵႂၢမ်းပရေႃးၽႅတ်ႈလၢတ်ႈဝႆႉလႄႈဝႃႈၼၼ်ႉၸမ်ႉ၊ ၵဝ်တၵ်းပိုတ်ႇပၢၵ်ႇလႄႈမွၵ်ႇလၢတ်ႈၵႂၢမ်းဢူႉပမႃႇဢေႃႈ။ ၵဝ်တၵ်းၽုၺ်ႇၼႄလွင်ႈတၢင်းဢၼ်သိူင်ႇဝႆႉလပ်ႉဝႆႉ ၸႃႉၸဵမ်မိူဝ်ႈၵမ်ႇၽႃႇ ၸႃႉတႄႇၼၼ်ႉဢေႃႈဝႃႈၼႆ၊ ၵႂၢမ်းဢၼ်ဝႃႈၸိူဝ်ႉၼင်ႇၼႆၼၼ်ႉ ပျေႉၸုမ်ႇယဝ်ႉဢေႃႈ။

ဢထိၵ်ႈပႄႇၵႂၢမ်းဢူႉပမႃႇလွင်ႈမဵတ်ႉၽၼ်းဝင်

36လိုၼ်းၼၼ်ႉ မၼ်းၸဝ်ႈပွႆႇၵူၼ်းဢၼ်ၸူႉဢၼ်တုမ်ၸိူဝ်းၼၼ်ႉသေလႄႈ ၶဝ်ႈၵႃႈၼႂ်းႁိူၼ်းယဝ်ႉၸင်ႇ၊ တပႄးၸဝ်ႈတင်းလၢႆသုတ်ႉၸပ်းသုတ်ႉၸူးတီႈမၼ်းၸဝ်ႈသေလႄႈ လဝ်ႊလၢတ်ႈလႄႈဝႃႈ၊ ၽုၺ်ႇဢွၵ်ႇၼႄပျႃးဢထိၵ်ႈပႄႇၵႂၢမ်းဢူႉပမႃႇမဵတ်ႉၶဝ်ႈၽီ ဢၼ်ဝၢၼ်ႇၵႃႈၼႂ်းၼႃးၼၼ်ႉတီႈႁဝ်းၶႃႈသေၵမ်းၶႃႈ၊ မိူဝ်ႈဢၼ်ဝႃႈၼင်ႇၼႆၸိုင်၊- 37မၼ်းၸဝ်ႈၵေႃႈၶိုၼ်းလၢတ်ႈလႄႈဝႃႈ၊ ၵေႃႉဢၼ်ဝၢၼ်ႇၸိူဝ်ႉဝၢၼ်ႇၽၼ်းဢၼ်လီၼၼ်ႉ ပဵၼ်လုၵ်ႈၵူၼ်းဢေႃႈ။- 38ၼႃးၸမ်ႉ ပဵၼ်လေႃးၵႃႉၼႆႉဢေႃႈ။ မဵတ်ႉဢၼ်လီၸမ်ႉ ပဵၼ်လုၵ်ႈမိူင်းၸဝ်ႈတင်းလၢႆဢေႃႈ။ မဵတ်ႉၶဝ်ႈၽီၸမ်ႉ ပဵၼ်လုၵ်ႈၵေႃႉဢၼ်ႁၢႆႉတင်းလၢႆဢေႃႈ။- 39ရၢၼ်ႇသူႇဢၼ်ဝၢၼ်ႇမဵတ်ႉၶဝ်ႈၽီၸမ်ႉ ပဵၼ်မႃႇၼၢတ်ႈဢေႃႈ။ ၶိင်ႇဢၼ်ပၢတ်ႇၶဝ်ႈၸမ်ႉ ပဵၼ်ၶိင်ႇဢၼ်ၸၢတ်ႈၼႆႉ တၵ်းသုတ်းတၵ်းသဵင်ႈဢေႃႈ။ ၶဝ်ၸိူဝ်းဢၼ်ပၢတ်ႇၶဝ်ႈၸမ်ႉ ပဵၼ်တမၢၼ်ႇၵၢင်ႁၢဝ်တင်းလၢႆဢေႃႈ။- 40ၸိူဝ်ႉၼင်ႇဢၼ်လိူၵ်ႈထူၺ်ႈဢဝ်တူၼ်ႈၶဝ်ႈၽီသေလႄႈ တုတ်ႇၽႆးၼၼ်ႉ တၵ်းပဵၼ်ၵႃႈၼႂ်းတီႈသုတ်းၸၢတ်ႈၼႆႉၼၼ်ႉဢေႃႈ။- 41လုၵ်ႈၵူၼ်းတၵ်းပွႆႇၸႂ်ႉတမၢၼ်ႇၵၢင်ႁၢဝ်တူဝ်ၸဝ်ႈၵဝ်ႇတင်းလၢႆမႃးသေယဝ်ႉ၊ ၶဝ်ၼၼ်ႉတၵ်းလိူၵ်ႈထူၺ်ႈဢဝ်လွင်ႈတၢင်းဢၼ် ႁႂ်ႈၽိတ်းပိူင်ႈဢိၵ်ႇတင်းၵူၼ်းဢၼ်ႁဵတ်းဢမ်ႇတြႃးၵႃႈမီးတင်းသဵင်ႈတင်းလူင် ၵႃႈၼႂ်းမိူင်းၸဝ်ႈလႄႈ၊- 42ၶျႃးတူၵ်းသႂ်ႇၵႃႈၼႂ်းမုၵ်ႉၽႆး၊ တီႈဢၼ်လႆႈႁႆႈလႆႈႁွင်ႉ၊ တီႈဢၼ်လႆႈၵတ်းၶဵဝ်ႈၵတ်းၽၼ်းၼၼ်ႉဢေႃႈ။- 43မိူဝ်ႈၼၼ်ႉ ၵူၼ်းဢၼ်သိုဝ်ႈတေႃႇတင်းလၢႆ တၵ်းႁိူဝ်ႈလႅင်းၸိူဝ်ႉၼင်ႇၵၢင်ဝၼ်းၼၼ်ႉ ၵႃႈၼႂ်းမိူင်းပေႃႈၸဝ်ႈၶဝ်ပုၼ်ႉဢေႃႈ။ ၵေႃႉဢၼ်မီးႁူဢၼ်လီငိၼ်းၼၼ်ႉၸမ်ႉ၊ ႁႂ်ႈငိၼ်းသေၵမ်းလူၺ်ႈ။

ၵႂၢမ်းဢူႉပမႃႇလွင်ႈၽၼ်ႇတႃႇဢၼ်သိူင်ႇဝႆႉ

44ၼႄးၼိုင်ႈၸမ်ႉ၊ မိူင်းၵၢင်ႁၢဝ်ၸဝ်ႈ မိူၼ်ၸိူဝ်ႉၼင်ႇၽၼ်ႇတႃႇဢၼ်သိူင်ႇဝႆႉလပ်ႉဝႆႉ ၵႃႈၼႂ်းတူင်ႈၼႃးၼၼ်ႉဢေႃႈ။ ၵေႃႉဢၼ်ထူပ်းႁၼ်ၽၼ်ႇတႃႇၼၼ်ႉ သမ်ႉၶိုၼ်းႁူမ်ႇဝႆႉသေလႄႈ မီးတင်းၸႂ်ဢၼ်သိူဝ်းၸူမ်းၼႃႇၵႂႃႇယဝ်ႉၸင်ႇ၊ ၶၢႆပႅတ်ႈၵႃႈဢၼ်မၼ်းမီးၼၼ်ႉသေလႄႈ သိုဝ်ႉဢဝ်တူင်ႈၼႃးၼၼ်ႉဢေႃႈ။

ၵႂၢမ်းဢူႉပမႃႇလွင်ႈသႅင်ပူးလႄး

45ၼႄးၼိုင်ႈၸမ်ႉ၊ မိူင်းၵၢင်ႁၢဝ်ၸဝ်ႈ မိူၼ်ၸိူဝ်ႉၼင်ႇၵူၼ်းၵႃႉၵေႃႉၼိုင်ႈ ဢၼ်ႁႃဢဝ်ပူးလႄး ဢၼ်မျၢတ်ႈတင်းလၢႆၼၼ်ႉဢေႃႈ။- 46မၼ်းၼၼ်ႉ မိူဝ်ႈဢၼ်ထူပ်းႁၼ်ပူးလႄးဢၼ်ထိူၵ်ႈၵႃႈယႂ်ႇၼႃႇၸိုင်၊ ၵႂႃႇလႄႈၶၢႆပႅတ်ႈၵႃႈဢၼ်မၼ်းမီးၼၼ်ႉသေလႄႈ သိုဝ်ႉဢဝ်ပူးလႄးၼၼ်ႉဢေႃႈ။

ၵႂၢမ်းဢူႉပမႃႇလွင်ႈဝၢၼ်ႇၶႄ

47ၼႄးၼိုင်ႈၸမ်ႉ၊ မိူင်းၵၢင်ႁၢဝ်ၸဝ်ႈမိူၼ်ၸိူဝ်ႉၼင်ႇၶႄ ဢၼ်ဝၢၼ်ႇတူၵ်းၵႃႈၼႂ်းပၢင်ႇလၢႆႇလႄႈ ႁူမ်ႇမႅၼ်ႈၵူႈၸိူဝ်ႉၵူႈပိူင်ၼၼ်ႉဢေႃႈ။- 48မိူဝ်ႈဢၼ်တဵမ်ဝႆႉယဝ်ႉၼၼ်ႉ ၶဝ်တိုတ်ႉၸၼ်ဢဝ်တၢင်ႇၵႃႈၼိူဝ်ၵုင်းလႄႈၼင်ႈသေယဝ်ႉ လိူၵ်ႈၵဵပ်းဢဝ်ဢၼ်လီတင်းလၢႆ သႂ်ႇဝႆႉၵႃႈၼႂ်းပဵတ်ႈၼႂ်းမူင်လႄႈ ဢဝ်ဢၼ်ဢမ်ႇလီတင်းလၢႆ ထိမ်ႈဢွၵ်ႇပႅတ်ႈၵႃႈၼွၵ်ႈသေဢေႃႈ။- 49မိူၼ်ၸိူဝ်ႉၼင်ႇၼၼ်၊ ၼႂ်းတီႈသုတ်းၸၢတ်ႈၼႆႉၼၼ်ႉ တမၢၼ်ႇၵၢင်ႁၢဝ်တင်းလၢႆလူင်းမႃးသေယဝ်ႉ တၵ်းလိူၵ်ႈၵဵပ်းၽႄဢဝ်ၵူၼ်းဢၼ်ႁၢႆႉတင်းလၢႆ ဢွၵ်ႇသေၵႃႈၼႂ်းၵူၼ်းဢၼ်သိုဝ်ႈတေႃႇတင်းလၢႆလႄႈ၊- 50ၶျႃးတူၵ်းသႂ်ႇၵႃႈၼႂ်းမုၵ်ႉၽႆး၊ တီႈဢၼ်လႆႈႁႆႈလႆႈႁွင်ႉ၊ တီႈဢၼ်လႆႈၵတ်းၶဵဝ်ႈၵတ်းၽၼ်းၼၼ်ႉဢေႃႈ။

လွင်ႈၽၼ်ႇတႃႇဢၼ်ၵဝ်ႇတင်းဢၼ်မႂ်ႇ

51လွင်ႈတၢင်းၵႃႈမီးတင်းသဵင်ႈတင်းလူင်ၸိူဝ်းၼႆႉၸိုင်၊ သူႁူႉႁိုဝ်ဝႃႈၼႆ၊ မိူဝ်ႈဢၼ်မၼ်းၸဝ်ႈထၢမ်ၶဝ်ၸိုင် ၶဝ်လဝ်ႊလၢတ်ႈလႄႈဝႃႈ၊ ၸႂ်ႈၶႃႈယဝ်ႉၸဝ်ႈ၊ ဝႃႈၼင်ႇၼႆဢေႃႈ။- 52မၼ်းၸဝ်ႈၵေႃႈလၢတ်ႈလႄႈဝႃႈ၊ ပိူဝ်ႈၼႆလႄႈ ၵူၼ်းထုတ်ႇၵျၢမ်းတင်းလၢႆ ဢၼ်သွၼ်ဢဝ်လွင်ႈမိူင်းၵၢင်ႁၢဝ်ၸဝ်ႈယဝ်ႉၼၼ်ႉ မိူၼ်ၸိူဝ်ႉၼင်ႇၸဝ်ႈႁိူၼ်းဢၼ်ဢဝ်ဢၼ်မႂ်ႇဢၼ်ၵဝ်ႇတင်းလၢႆ ဢွၵ်ႇသေၵႃႈၼႂ်းၽၼ်ႇတႃႇ ဢုၵ်ႉၸႃႇမၼ်းၼၼ်ႉဢေႃႈ၊ ဝႃႈၼင်ႇၼႆဢေႃႈ။

ၵူၼ်းဝဵင်းၼႃႇၸရႅတ်ႈဢမ်ႇႁပ်ႉတွၼ်ႈၸဝ်ႈယေႇသူႉ

(တူၺ်း၊ မႃႇ 6:1-6။ လူႉ 4:16-30)

53မၼ်းၸဝ်ႈႁေႃးလၢတ်ႈၵႂၢမ်းဢူႉပမႃႇၸိူဝ်းၼႆႉယဝ်ႉၸင်ႇ ဢွၵ်ႇၵႂႃႇသေၵႃႈတီႈၼၼ်ႈဢေႃႈ။- 54မၼ်းၸဝ်ႈႁွတ်ႈထိုင်ၵႃႈတီႈဝဵင်းတူဝ်ၸဝ်ႈၵဝ်ႇလႄႈသင်ႇသွၼ်သုင်းမႃႉပၼ် ၵႃႈၼႂ်းၸရွပ်ႈႁေႃးတြႃးထၼ်ႈပေႃးႁႂ်ႈၶဝ်ၼၼ်ႉ ၵႂင်ၸႂ်ယုင်ႈၸႂ်လႄႈဝႃႈ၊ ၵေႃႉၼႆႉလႆႈပိင်ႇၺႃႇၼႆႉ ဢိၵ်ႇတင်းတၼ်းၶူဝ်းတင်းလၢႆၼႆႉ ၵႃႈတီႈလႂ်။- 55မၼ်းၼႆႉ ပဵၼ်လုၵ်ႈၸၢႆး လၢၵ်ႈသမႃးဢမ်ႇၸႂ်ႈႁိုဝ်။ မႄႈမၼ်းၸမ်ႉ၊ လႆႈႁွင်ႉႁဵၵ်ႈၸိုဝ်ႈမႃႇရီႉဢမ်ႇၸႂ်ႈႁိုဝ်။ ၼွင်ႉၸၢႆးမၼ်းတင်းလၢႆၸမ်ႉ၊ ပဵၼ်ယႃႇၵုပ်ႈ ဢိၵ်ႇတင်း ယူဝ်းသႅပ်ႈ တင်းသီႉမုၼ်ႇတင်း ယူႉတႃႉ ဢမ်ႇၸႂ်ႈႁိုဝ်။- 56ၼွင်ႉယိင်းမၼ်းတင်းလၢႆၵေႃႈ ယူႇၸမ်ၵၼ်တင်းႁဝ်းယူႇဢမ်ႇၸႂ်ႈႁိုဝ်။ ပိူဝ်ႈၼႆလႄႈ ၵူၼ်းၵေႃႉၼႆႉ လႆႈလွင်ႈတၢင်းၵႃႈမီးတင်းသဵင်ႈတင်းလူင်ၸိူဝ်းၼႆႉၵႃႈတီႈလႂ်၊ ဝႃႈၼင်ႇၼႆလႄႈ၊- 57ၸႂ်လူႉဢေႃႈ။ ယေႇသူႉၵေႃႈလၢတ်ႈတီႈၶဝ်ၼၼ်ႉလႄႈဝႃႈ၊ ပရေႃးၽႅတ်ႈၸိုင် လိူဝ်သေၵႃႈတီႈဝဵင်းတူဝ်ၸဝ်ႈၵဝ်ႇ ၵႃႈတီႈႁိူၼ်းတူဝ်ၸဝ်ႈၵဝ်ႇၼၼ်ႉ ဢမ်ႇၵၢင်းလွတ်ႈတင်းသရေႇ၊ ဝႃႈၼင်ႇၼႆဢေႃႈ။

58ပိူဝ်ႈဢၼ်ၶဝ်ၼၼ်ႉ ဢမ်ႇယုမ်ႇမၢတ်ႈလႄႈ မၼ်းၸဝ်ႈဢမ်ႇၼႄပျႃးတၼ်းၶူဝ်းၼမ်ၼႃႇ ၵႃႈတီႈၼၼ်ႈ။

നിലവിൽ തിരഞ്ഞെടുത്തിരിക്കുന്നു:

မၢတ်ႈထႄႇ 13: CBMS

ഹൈലൈറ്റ് ചെയ്യുക

പങ്ക് വെക്കു

പകർത്തുക

നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക

သမ်ႇမႃႇၵျၢမ်းလိၵ်ႈ ထႃႇဝရႃႉၽြႂး നെക്കുറിച്ച് കൂടുതലറിയുക