ဢႃႇမူတ်ႉ 1
1
1ၵႂၢမ်းပျႃႇတိၵ်ႈၸဝ်ႈ ဢၼ်ဢႃႇမူတ်ႉဢၼ်ၶဝ်ႈပႃး ၵႃႈၼႂ်းမုၵ်ႉၸိူဝ်းၵူၼ်း ဢၼ်လဵင်ႉထိင်းသူဝ်း ၵႃႈတီႈဝၢၼ်ႈတေႇၵေႃႇၼၼ်ႉ လႆႈၶၢမ်ႇဢဝ် ပုၼ်ႈမိူင်းဢီႉသရေႇလႃႉ ၼႂ်းၸူဝ်ႈပၢၼ် ၶုၼ်ဢူဝ်းၸီႉယႃႉ ၶုၼ်ႁေႃၶမ်းယူႉတႃႉ ဢိၵ်ႇတင်း ၼႂ်းၸူဝ်ႈပၢၼ်ၶုၼ်ယေႇရူဝ်းပုမ်ႇ လုၵ်ႈၸၢႆးယေႃးသႃႉ ၶုၼ်ႁေႃၶမ်း ဢီႉသရေႇလႃႉ ဢွၼ်တၢင်း ပီႊဢၼ်ဢိင်ႇသၼ်ႇၼၼ်ႉ သွင်ပီႊၼၼ်ႉၸမ်ႉ။- 2ထႃႇဝရႃႉၽြႃး ယူႇၵႃႈၼိူဝ်လွႆ ၸီႉဢုၼ်ႇႁွင်ႉသႅၼ်ႇလႄႈ ယူႇၵႃႈၼႂ်းဝဵင်းယေႇရူႉသလႅမ်ႇ ၵိဝ်သဵင်ဢေႃႈ။ တီႈဢၼ် ၵူၼ်းလဵင်ႉထိင်းသူဝ်းယူႇ ၸိူဝ်းၼၼ်ႉ တမ်ႇၼွႆႉမွင်ၸႂ်ၵႂႃႇလႄႈ ပၢႆၸိၵ်းလွႆၵရမေႇလႃႉၼၼ်ႉ ႁဵဝ်ႇၸွပ်ႈၵႂႃႇဢေႃႈ။
တၢင်းဢၼ်ၸီႇယၢင်ႇတီႈၵူၼ်းမိူင်းၸမ်ၵၼ်တင်းမိူင်းဢီႉသရေႇလႃႉ
မိူင်းသူႉရီႉ
3ထႃႇဝရႃႉၽြႃး မီးဢမိင်ႉၸမ်ႉ၊ ၵွပ်ႈပိူဝ်ႈဢပႅတ်ႈဝဵင်းထမ်ႇမသႅတ်ႉ သၢမ်ပႃး ဢမ်ႇၵႃး၊ ၵွပ်ႈပိူဝ်ႈဢပႅတ်ႈ သီႇပႃးလႄႈ ၵဝ်ယင်းဢမ်ႇပၼ်တၢမ်ႇလႄႈ ဢမ်ႇယူႇ။ လွင်ႈမၼ်းၸမ်ႉ ၶဝ်ဢဝ်ၸၢၵ်ႈလဵၵ်း ဢၼ်ၶိုတ်ႈၼူတ်ႈၶဝ်ႈပိူၵ်ႇ ၸိူဝ်းၼၼ်ႉ ၶိုတ်ႈၼူတ်ႈမိူင်းၵီႉလတ်ႉၼၼ်ႉ ယဝ်ႉယဝ်ႉ။- 4ၵဝ်တၵ်းပွႆႇၸႂ်ႉၽႆး သႂ်ႇၵႃႈၼိူဝ်မဵဝ်းၶုၼ်ႁႃႇၸေႇလႃႉလႄႈ ႁႂ်ႈမႆႈႁေႃၶမ်းၶုၼ် ပိၼ်ႇႁႃႇတတ်ႉတင်းလၢႆဢေႃႈ။- 5ၵဝ်တၵ်းႁၵ်းႁဵၵ်း ၵိူၼ်ႇၽၵ်းတူဝဵင်းထမ်ႇမသႅတ်ႉ ပႅတ်ႈလႄႈ ၵဝ်တၵ်းပႄႇၽဵဝ်ႈ ၵေႃႉဢၼ်ႁဵတ်းၶုၼ်မၼ်း ပႅတ်ႈသေၵႃႈတီႈပၢင်ႇႁူၺ်ႈဢႃႇဝိၼ်ႇၼၼ်ႉ ဢိၵ်ႇတင်း ၶုၼ်ဢၼ်ယိပ်းၵၼ်းႁွၵ်ႇ ရႃႇၸႃႉမၼ်းပႅတ်ႈသေၵႃႈတီႈဝဵင်းပႅတ်ႉဢေႇတိၼ်ႇၼၼ်ႉဢေႃႈ။ ၵူၼ်းမိူင်းသူႉရီႉတင်းလၢႆ တၵ်းလႆႈဢွၼ်ၵၼ် ၶၢမ်ႇတၢင်းဢၼ် သိမ်းဢဝ်ၵႂႃႇၸူး ၵႃႈတီႈဝဵင်းၵီႉရႃႉဢေႃႈ၊ ဝႃႈၼင်ႇၼႆလႄႈ ထႃႇဝရႃႉၽြႃးမီးဢမိင်ႉဢေႃႈ။
မိူင်းၽီႉလိတ်ႉတီႉ
6ထႃႇဝရႃႉၽြႃးသမ်ႉ မီးဢမိင်ႉၸမ်ႉ၊ ၵွပ်ႈပိူဝ်ႈဢပႅတ်ႈဝဵင်းၵႃႇၸႃႉ သၢမ်ပႃး ဢမ်ႇၵႃး၊ ၵွပ်ႈပိူဝ်ႈဢပႅတ်ႈ သီႇပႃးလႄႈ ၵဝ်ယင်းဢမ်ႇပၼ်တၢမ်ႇလႄႈ ဢမ်ႇယူႇ။ လွင်ႈမၼ်းၸမ်ႉ ၶဝ်သိမ်းဢဝ်ၶဝ်ၸိူဝ်းဢၼ် လႆႈၶၢမ်ႇတၢင်းဢၼ်ၶျုၵ်ႈဝႆႉၼၼ်ႉ ၵႂႃႇႁႂ်ႈလႆႈဢၢပ်ႈပၼ်တီႈၶုၼ်ဢေႇတုမ်ႇၼၼ်ႉ တင်းသဵင်ႈတင်းမူတ်း ယဝ်ႉယဝ်ႉ။- 7ၵဝ်တၵ်းပွႆႇၸႂ်ႉၽႆးသႂ်ႇၵႃႈၼိူဝ်လမ်းဝဵင်းၵႃႇၸႃႉလႄႈ ႁႂ်ႈမႆႈႁေႃၶမ်းမၼ်းတင်းလၢႆဢေႃႈ။- 8ၵဝ်တၵ်းပႄႇၽဵဝ်ႈ ၵေႃႉဢၼ်ႁဵတ်းၶုၼ်မၼ်း ပႅတ်ႈသေၵႃႈတီႈဝဵင်း ဢႃႇၸုတ်ႉၼၼ်ႉ ဢိၵ်ႇတင်း ၶုၼ်ဢၼ်ယိပ်းၵၼ်းႁွၵ်ႇရႃႇၸႃႉမၼ်း ပႅတ်ႈသေၵႃႈတီႈဝဵင်းဢႃႇသၵေႇလုၼ်ႇၼၼ်ႉဢေႃႈ။ ၵဝ်တၵ်းဢဝ်မိုဝ်းၵဝ် ဝၢႆႇၶိုၼ်းၸူးၵႃႈတီႈဝဵင်းဢေႇၵြုၼ်ႇလႄႈ ၵူၼ်းၽီႉလိတ်ႉတီႉ ဢၼ်ၵိုတ်းဢၼ်ၵျၢၼ်ႇၸိူဝ်းၼၼ်ႉ တၵ်းလႆႈလူႉလႅဝ်ဢေႃႈ၊ ဝႃႈၼင်ႇၼႆလႄႈ ထႃႇဝရႃႉၽြႃး မီးဢမိင်ႉဢေႃႈ။- 9ထႃႇဝရႃႉၽြႃးသမ်ႉ မီးဢမိင်ႉၸမ်ႉ၊ ၵွပ်ႈပိူဝ်ႈဢပႅတ်ႈ ဝဵင်းတူႉရူႉ သၢမ်ပႃး ဢမ်ႇၵႃး၊ ၵွပ်ႈပိူဝ်ႈဢပႅတ်ႈ သီႇပႃးလႄႈ ၵဝ်ယင်းဢမ်ႇပၼ်တၢမ်ႇလႄႈ ဢမ်ႇယူႇ။ လွင်ႈမၼ်းၸမ်ႉ ၶဝ်ယင်းဢမ်ႇပႂ်ႉ မိၵ်ႉသႃႇႁႃယႃႉ ဢၼ်ပီႈၼွင်ႉၵၼ်ႁဵတ်းၼၼ်ႉလႄႈ ဢဝ်ၶဝ်ၸိူဝ်းဢၼ် လႆႈၶၢမ်ႇတၢင်းဢၼ်ၶျုၵ်ႈဝႆႉၼၼ်ႉ ၵႂႃႇဢၢပ်ႈပၼ် တီႈၶုၼ်ဢေႇတုမ်ႇၼၼ်ႉ တင်းသဵင်ႈတင်းမူတ်း ယဝ်ႉယဝ်ႉ။- 10ၵဝ်တၵ်းပွႆႇၸႂ်ႉ ၽႆးသႂ်ႇ ၵႃႈၼိူဝ်လမ်းဝဵင်းတူႉရူႉလႄႈ ႁႂ်ႈမႆႈႁေႃၶမ်းမၼ်း တင်းလၢႆဢေႃႈ၊ ဝႃႈၼင်ႇၼႆဢေႃႈ။
မိူင်းဢေႇတုမ်ႇ
11ထႃႇဝရႃႉၽြႃးသမ်ႉ မီးဢမိင်ႉၸမ်ႉ၊ ၵွပ်ႈပိူဝ်ႈဢပႅတ်ႈ မိူင်းဢေႇတုမ်ႇသၢမ်ပႃး ဢမ်ႇၵႃး၊ ၵွပ်ႈပိူဝ်ႈဢပႅတ်ႈ သီႇပႃးလႄႈ ၵဝ်ယင်းဢမ်ႇပၼ်တၢမ်ႇလႄႈ ဢမ်ႇယူႇ။ လွင်ႈမၼ်းၸမ်ႉ မၼ်းၶျုၵ်ႈဝႆႉၸႂ်ဢၼ်ဢဵတ်းလူသေလႄႈ ဢဝ်လၢပ်ႇဢဝ်လႅဝ်း လိုပ်ႈၸွမ်းလမ်းၸွမ်းပီႈမၼ်းၼွင်ႉမၼ်းလႄႈ တေႃးသႃႉတၢင်းၸႂ်မႆႈမၼ်း တိုတ်ႉၶၢတ်ႇပႅတ်ႈယူႇတႃႇသေႇလႄႈ မၼ်းဝႆႉတၢင်းၽိတ်းမၼ်း ယူႇသေႇသေႇၼၼ်ႉ ယဝ်ႉယဝ်ႉ။- 12ၵဝ်တၵ်းပွႆႇၸႂ်ႉၽႆးသႂ်ႇ ၵႃႈၼိူဝ်ဝဵင်းတေႇမၢၼ်ႇလႄႈ ႁႂ်ႈမႆႈႁေႃၶမ်းဝဵင်းပေႃႇၸရႃႉတင်းလၢႆဢေႃႈ၊ ဝႃႈၼင်ႇၼႆဢေႃႈ။
မိူင်းဢမ်ႇမုၼ်ႇ
13ထႃႇဝရႃႉၽြႃးသမ်ႉမီးဢမိင်ႉၸမ်ႉ၊ ၵွပ်ႈပိူဝ်ႈဢပႅတ်ႈၵူၼ်းမဵဝ်းဢမ်ႇမုၼ်ႇတင်းလၢႆ သၢမ်ပႃးဢမ်ႇၵႃး၊ ၵွပ်ႈပိူဝ်ႈဢပႅတ်ႈသီႇပႃးလႄႈ ၵဝ်ယင်းဢမ်ႇပၼ်တၢမ်ႇလႄႈဢမ်ႇယူႇ။ လွင်ႈမၼ်းၸမ်ႉ ၶဝ်ၽႃႇတွင်ႉမႄႈယိင်းမိူင်းၵီႉလတ်ႉ ဢၼ်ပႃးပတိၵ်ႉသၼ်ႇထေႇၸိူဝ်းၼၼ်ႉ ႁႂ်ႈၶွပ်ႇၼမ်ႉလႅၼ်လိၼ်ၶဝ် လႆႈၵႂၢင်ႈမႃးယဝ်ႉယဝ်ႉ။- 14ၵဝ်တၵ်း ဢဝ်ၽႆးၸပ်းသႂ်ႇၵႃႈတီႈလမ်းဝဵင်းရပ်ႉပႃႇလႄႈ ႁႂ်ႈမႆႈႁေႃၶမ်းမၼ်းတင်းလၢႆဢေႃႈ။ တၵ်းမီးတၢင်းဢၼ်သႅၼ်ႇႁွင်ႉ ၼႂ်းမိုဝ်ႉဝၼ်းဢၼ်တိုၵ်းသိုၵ်း ဢိၵ်ႇတင်းတၢင်းဢၼ်ပိဝ်သဵၼ်ၵႂႃႇ ၼႂ်းဝၼ်းဢၼ်ၽူၼ်လူင်လူမ်းလူင် ႁွတ်ႈမႃးၼၼ်ႉဢေႃႈ။- 15ၶုၼ်ႁေႃၶမ်းၶဝ် ဢိၵ်ႇလူၺ်ႈၵၼ်တင်းမူးမၢတ်ႈၽွင်းမိူင်းမၼ်းၸိူဝ်းၼၼ်ႉ တၵ်းလႆႈၶၢမ်ႇတၢင်းဢၼ်သိမ်းဢဝ်ၵႂႃႇဢေႃႈ၊ ဝႃႈၼင်ႇၼႆလႄႈ ထႃႇဝရႃႉၽြႃးမီးဢမိင်ႉဢေႃႈ။
നിലവിൽ തിരഞ്ഞെടുത്തിരിക്കുന്നു:
ဢႃႇမူတ်ႉ 1: CBMS
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
Copyright © 2021 by OMF International, Shan Baptist Churches Fellowship