Fwilipu 3
3
Kwoloka kwa kupwisha
1Ha kumanishilila, bawushinda wami, wahililenu muli Mwene. Kaliha shashikalu kukwami oho nikumitikitila kami byambo bimo, ngoboni shashiwahe kukwami ndi nikutenda noho. 2Bengukenu ku batuwa, obo bakakutenda wubi, obo bakwamba shikuma ha bya kuketula lutu. 3Ndaba etu bakamukanda wa kupwisha, etu tukulemesha Nyambi mu Moyo na ku wahilila muli Kilishitu Yeshu. Etu tukubula kuyaka bihanganiko ku bya wuntu, 4hinge ndi ngayi ami nafwanina kuyakako bihanganiko. Ndaba ndi kuli muntu wamina ukuhanganika ngayi ukulimuka byabingi ha byuma bya kukulupila mu wuntu, ami nili na byabingi. 5#Mil 23:6; 26:5; Lom 11:1. Nayile ku mukanda oho nili na matena mutanu na ahatu kufuma ha kuhemuwa, nili Kaishalela waku mushobo wa Mbenjamani, nili Kahebelu ou wahemuwa ku Bahebelu. Kuya na ndayano za Bayunda, nengile Kafwalishi, 6#Mil 8:3; 22:4; 26:9-11. kami nekalile na shizundami sha kuyandisha litengo. Nohobene, kuya na bya kwombatala ndayano, ami nengile wakwoloka kaliha nekalile na nyanco. 7Ngoboni ebye byuma namonene ngayi bya nkama kukwami, hano binengi byowa ndaba ya Kilishitu. 8Mwa shikuma, byuma nimwabyo byengakale byowa ndaba ya kalimukisho kakanene shikuma aka nalimukunako Kilishitu Yeshu Mwene yami. Nohobene, ndaba ya Yeshu, ninashiyi byuma nimwabyo, ninabimono ngayi binengi byowa, ngayi nihete Kilishitu 9pe mwanga niwaniwe mumwendi, kaliha ngayi nikekala na kwoloka kwami kuya kukufuma na ndayano, ngoboni mukwoloka kuya kukufuma mu kukulupila muli Kilishitu, kwoloka kuya kukufuma kuli Nyambi kuya kunemana ha kukulupila. 10Nikushinga ngayi nilimuke Kilishitu na ngovu za ku shanguka kwendi na kulumikila makando endi na kumufweka mu kufwa kwendi, 11nohobene mwanga na nami nilumbeze kukashanguliwa ku bafu.
Kululumana ku shikonkwani
12Kaliha ngayi natweshakale, hinge ngayi nalembukakale, ngoboni nikuzundamina ngayi mwanga niwane ebye anangwanini Kilishitu Yeshu. 13Bawushinda, kaliha nikuhanganika ngayi nawanakale, ngoboni shuma nikutenda eshe, nikuvulama byuma bili munyima, nikukolobela byuma bili kumbili. 14Nikululumana ku shikonkwani ngayi niwane ncuungu ya lukuwa lwa muyilu lwa Nyambi muli Kilishitu Yeshu.
15Nohobene nimwetu tunakulu mu moyo, twikale na bihanganiko bya nehe. Kami ndi mu byuma byamina mu kubula kuhanganika noho, Nyambi ukamiholwela bihanganiko ngayi muyuvwishishe. 16Ngoboni tunafwanini kuyoya ngonehe kunebye tunatambulu.
17 #
1Koli 4:16; 11:1. Bawushinda, yingenu bakakuhembwiliza ami, kami yuvwililenu baya ba kukonka zinzila zaziwahe ziya twamimoneshele. 18Ngonehe namitongwezele bikati byabingi nahano kami nili na kumitongweza na mihozi ngayi, niko bali babengi baya banafutuku kwinga bakankole ba shishempakano sha Kilishitu ndaba ya nyoyelo yabo. 19Mamaninino abo kulobeshiwa, Nyambi yabo wenga livumo, ba ku wahilila na byuma biya banafwanini kuyuvwila lisheni. Bakulifulankana ha byuma bya hano hanci. 20Ndaba etu tuli bakamunzi wa muyilu, pe tukutatilila na lunzewe Mulamwini ou Mwene Yeshu Kilishitu uya ukeza kufuma muyilu. 21Niye ukafutula lutu lwetu lwowa, ngayi lukafweke ngonehe lutu lwendi lwa lu wahe, ukatenda ebye na ngovu zendi ziya zikamutwesha ngayi akayake byuma nimwabyo mu nceto yendi niye mwine.
Libuka Lya Kuyela © Bible Society of Zambia, 2020.