Fwilipu 2
2
Kulilimbwilisha na wunene wa Kilishitu
1Kukulupila kwenu muli Kilishitu ku kumi shumankanisha, kami shishemo shendi shami fumishanga wunginga. Muli na kulumikila kwa Moyo wa Kuyela, muli na shikeketima na nceshe na baminenu. 2Nikumilomba ngayi yinzalishenu ku wahilila kwami hakwikala na bihanganiko bimo na shishemo shimo na moyo umo na mutima umo. 3Hinga mutenda shuma na lihungu na kuliyemeza, ngoboni mu kulilimbwilisha, muntu nimwendi ahanganike ngayi bamina ba kumupitakana. 4Muntu nimwendi hinga ahanganika ku byuma byendi tuhu, ngoboni ahanganike kami ku byuma bya baminendi. 5Yitabilenu ngayi ngana eze zikale mumwenu, zekalile kami muli Kilishitu Yeshu.
6Niye hinge wekalile mu mutuntu wa Nyambi,
ngoboni kaliha wahanganikile ngayi ezekele hamo na Nyambi.
7Ngoboni walitendele mukakushotala,
washimbile mutuntu wa mukamulimo,
wahemuwile mu shifwekesha sha wuntu.
8Hinga wawaniwile mu shifwekesha sha muntu,
walilimbwilishile, wengile mukakwombatala kutwala ku kufwa,
kuya kufwa kwa ha shishempakano.
9Nohobene Nyambi unamukatulu shikuma,
na kumupana lizina lili hayilu ya mazina nimwawo.
10 #
Isha 45:23. Ngayi ha lizina lya Yeshu,
byalengiwa nimwabyo bili muyilu,
na byuma bili hano hanci,
na byuma bili mu nceto ya hanci,
bishungumane hanci mu kulemesha.
11Kami nimwabyo bitabile ngayi
Yeshu Kilishitu niye Mwene,
ku wuwahe wa Nyambi Tate.
Kubyazima ngonehe mimuni mu kaye
12Nohobene, bakakuhakiwa bami, ngonehe munombatalanga bikati nimwabyo oho nekalile nenu, kaliha ku lupala lwami, ngoboni shinene oho nabuluko, tendenu milimo ya kupuluka kwenu na bowa na kukanka. 13Ndaba Nyambi niye ou ukutenda mukatikenu wubili wabyo wakushinga na kutenda shamutima wendi shashiwahe.
14Tendenu byuma nimwabyo kwakubula ntongawushi na nkani, 15#Nday 32:5. ngayi mukenge bakubula nyanco, bakwoloka na kwinga bana ba Nyambi bakubula mulandu mukati ka mukoka wakutengama, mukati kawo mu kumunika ngonehe nyenye mu kaye, 16ha kubatongweza lizu lya wumi ngayi niwahilile ha Mutena Wakwiza kami kwa Kilishitu, ngayi kaliha netuka tuhu ntalu, hinga kaliha na kalamana tuhu ntalu. 17Kukulupila kwenu na milimo yenu kuli Mwene, yinafweke ngo nkombela yinatupuliwi kuli Nyambi. Na mukeza wami uketikiwila hamo na nkombela, nikatangala na ku wahilila hamo nenu. 18Ndaba ya shuma eshe tangalalenu na ku wahilila hamo na nami.
Timoteo na Epafulonditashi
19Ngoboni nikukulupila ngayi ndi Mwene Yeshu ukwitabila, nikatuma Timoteo kukwenu wanguwangu, ngayi ami kami nishumankanishiwe oho nikayuvwa kupinduka kwenu. 20Ndaba nifwaye muntu waku fwanina kutuma ngonehe niye, ou ukufulankana byenu shiwahe. 21Ndaba nimwabo bakushinga byabo, kaliha byuma bya Yeshu Kilishitu. 22Ngoboni mu kulimuka ngayi nyinkalo ya Timoteo yayiwahe, kami mu kulimuka ngayi watendele milimo hamo na nami wa ku shimikila ncango zaziwahe, ngonehe mwana na tatiyendi. 23Pe nikulumbeza ngayi nimutume kukwenu wanguwangu, oho nikamona ngayi shikekala nahiti kukwami. 24Ngoboni nikukulupila ngayi Mwene ndi uketabila nami kami nikeza sha wuluno.
25Nahanganiki ngayi shuma sha kufwanina kutuma kukwenu kawushinda wami Epafulonditashi. Mwamutumine ngayi anyavwe kami unatende mulimo na kulwa ngunga ya Bakakilishitu hamo na nami. 26Ndaba niye ukushinga shikuma kumimona, uli na shikeku, ndaba mwayuvwile ngayi uli na kukola. 27Mwa shikuma wakolele na kushinga kufwa, ngoboni Nyambi wamuyuvwilile nceshe, kaliha niye tuhu ngoboni na nami kami kutina nikala mu wunginga. 28Nikushinga kumutuma kami Epafulonditashi kukwenu. Oho mukamumona, mukawahilila, kami ngayi wunginga uncepele.
29Nohobene mumutambule muli Mwene na ku wahilila nimwako na kulemeeka bantu banoho. 30Ndaba ya mulimo wa Kilishitu, wekalile hahepi na kushinga kufwa, walihupwizile wumi wendi, ngayi amanishe osho mwakwangile kutenda.
Libuka Lya Kuyela © Bible Society of Zambia, 2020.