Ishaya 48
48
Nyambi ya Ngula niye mwene wa bya kumbili
1Yuvwililenu eshe enu baka litala lya Yakobo,
enu mukwihaniwa na lizina lya Ishalela,
enu bazukulya Yunda.
Enu mu kulibeza na lizina lya Nyambi ya Ngula,
na kulitabila kuli Nyambi wa Ishalela,
ngoboni kaliha mu kupwisha na kwoloka.
2Ngoboni mu kulitumba enu bamwine ngayi lukena lwa kuyela,
na kukinka mutima hali Nyambi wa Ishalela,
Nyambi wa Makunge nilyo lizina lyendi.
3Byuma ebye biku moneka na byambile mwaka ngayi bikatendiwa,
kanwa kami kabibilikile, pe wuluno binatendiwi.
4Ndaba nikulimuka ngayi muli binkwange,
babakalu mitima.
5Nabilikile byuma ebye kunyima,
oho shilolo bize na kutendiwa nabyambile kukwenu,
kutina mwamba ngayi,
“Tunankishi twetu na bifwekesha byetu nibyo binatendebyo.”
6Byuma ebye nimwabyo namitongwezele byatendiwakale,
mwafwanina kwitabila ngayi namitongwezele bya kupwisha.
Wuluno nili na kumitongweza byuma byabipya bikeza,
byuma bya kuholeka biya mu kubula kulimuka.
7Haya niho nili na kubiholola,
kowa bya kufweka ngo ebye byatendiwile kunyima.
Shinga byatendiwile,
shinga mukwamba ngayi, “Mwabilimukile mwaka.”
8Nalimuka ngayi kaliha mwakulupiliwa,
ndaba bikati nimwabyo mwalimukiwa kwinga bakakufutulukila,
niho mwalubile ku yuvwishisha byuma ebye nimwabyo,
ngayi kowa lizu kukwabyo byenginine mu matu wenu.
9Ndaba ya lizina lyami nikwihalisha wukali wami,
ndaba ya kunyemeza natulumanini mutima hahenu ngayi nibule kumilobesha.
10Monenu namyezekakale,
ngoboni kaliha nehe shiliva,
nakuyeleshe mu ngaanze ya makando.
11Nimwabyo nikutenda,
nikutendabyo ndaba yami.
Nifwako kukabulisha maleema lizina lyami,
hinge kulehelela muntu umo ngayi nilifwanikize nendi ku maleema,
Wuwahe wami nifwako kukawupana wamina.
Shilushi ntwamina wakuhatiwa na Nyambi ya Ngula
12 #
Isha 44:6; Kuh 1:17; 22:13. Obe Yakobo yuvwilila kukwami,
na nobe kami Ishalela uya nehanine,
Ami Niye, Ami wakutatika,
kami Ami wamamaninino.
13Liboko lyami lyatendele mwimbi wa hanci,
na liboko lyami lya shilyo lyatandubwile mayilu,
oho nikwihana kukwabyo,
bikwimana hamo.
14Enu nimwenu kungulukenu pe muyuvwe,
kati banyambi ngani hakati kabo balubulwile byuma ebye?
Nyambi ya Ngula wamuhaka ou wakuhatiwa,
ukatenda shifungo shendi ha Mbambiloni,
kami liboko lyendi likalwisha Bakalendiya.
15Ami nambile na kumwihana,
namuletakale, kami ukatangama mu byuma nimwabyo.
16Haya henyenenu kwakwipi na nami, muyuvwe ebye nikwamba,
kufuma ku kutatika nambile kukwenu shintwantwa,
kufuma ku shikati byatatiki ku moneka niko nekalile.
Hano haya mwene Nyambi,
unantumu na moyo wendi.
Shifungo sha Nyambi ya Ngula ha bantu bendi
17Nyambi ya Ngula, Mukakukuliza wenu,
wa Kuyela wa Ishalela ukwamba ngayi,
Ami Nyambi ya Ngula, Nyambi yenu,
ou ukumilongesha mwakwikalila,
na kumi twaminina mu nzila mwafwanina kwenda.
18Shinga mwayuvwililile ku ndayano zami,
shinga mwekala na kuyoya mu ku mwena ngonehe mushinzi uya wabulanga kuyuma.
Shinga kulunga kwenu kukenga ngonehe
mankanyi a liwate aya akuhumpokela ha lukandwa.
19Bazukulyobe shinga banahanya ngonehe lihekelela,
na bana bobe shinga banafweke ngo limvu lya lihekelela,
lizina lyabo kukaloba lifwako,
hinge kukalobeshiwa ku meho wami.
20 #
Kuh 18:4. Katukenu muye, mufume mu Mbambiloni,
tinenu mu litunga lya wulungo,
bilikenu bino byambo na kuwulumwina tunkelenkele twa ku wahilila,
bikwayanishenu noku kwakumina kaye ngayi,
“Nyambi ya Ngula unakulizi mukamulimo wendi Yakobo.”
21Oho Nyambi ya Ngula apitishile bantu bendi mu libelelengwa,
kaliha bafwile linyontwa,
wabatutwishilile mema amu limanya, pe mema ashabukilemo.
22 #
Isha 57:21. Nyambi ya Ngula ukwamba ngayi,
kowa ku mwena ku bantu bakuluwa.
Libuka Lya Kuyela © Bible Society of Zambia, 2020.