Ishaya 25
25
Lwimbo lwa kuyemeza
1Obe Nyambi ya Ngula, obe Nyambi yami.
Nikakuleemeka na kuyemeza lizina lyobe.
Ndaba unatende mu kwoloka bifungo ebye wafungile mwaka.
2Luyo lukena unalufutulu lilala,
lukena lwa shipata unalufutulu lipembe.
Misheke ya bamalamo betu yifwako kukatenduliwa kami.
3Haya bantu ba matunga a ngovu bakakupana maleema,
kami ukatiniwa mu zinkena zili na bantu banguma.
4Obe shipata sha bancepwe,
na matinino a bakuyanda, oho bali mu malwa.
Obe likunka mwa ku yuwama mvula,
na mumvulu wakutinina mwaana.
Ndaba kuhashoka kwa bantu banguma,
ku nafweke ngonehe likandavula likulokela ha limota,
5ngonehe linanga mu litunga lyanyuminine.
Ngoboni obe, Nyambi ya Ngula,
unamweneshe bamalamo betu,
ngonehe likumbi lya bombweshanga ntukumina ya mutena,
haya lwimbo lwa bantu banguma, lunamweneshiwi.
Nyambi ukuwahisha mayambwayambwa
6Ha lipili elye lya Ziyoni, Nyambi wa Makunge, ukawahishilaho mayambwayambwa a matunga nimwawo a mukaye, akenga a byakulya byabingi byabiwahe shikuma na waine. Bikenga byakulya bya mazi bili na minconco na waine binatendiwi shiwahe. 7Hanelye lipili, ukafumisha likumbi lya wunginga liya lyafwikile bantu nimwabo, likumbi liya lya konkanine ku matunga nimwao. 8#1Koli 15:54; Kuh 7:17; 21:4. Ukamanisha lufu, kukekalako kami lufwako. Nyambi wa Makunge, ukakunkumuna mihozi ku meho a bantu nimwabo, kami ukafumisha lisheni ku bantu bendi mukaye nimwamo. Eshe nisho anamba Nyambi ya Ngula.
9Ha mutena uyo bakamba ngayi, “Mwa shikuma, ou niye Nyambi yetu, twa kulupila mumwendi. Haya watulamwinakale, ou niye Nyambi ya Ngula, twa kulupila mumwendi, tuyenu tuwahilile na kutangala mu kupulwisha kwendi.”
Nyambi ukashushula Mowambi
10 #
Isha 15:1—16:14; Yel 48:1-47; Ezek 25:8-11; Amos 2:1-3; Zefw 2:8-11. Liboko lya Nyambi ya Ngula likekala ha lipili lya Ziyoni, ngoboni ba ku Mowambi bakalyatangiliwa ngonehe mwila walyatangiliwanga mu wutoko. 11Bakatandubula maboko ngonehe mukakuyowa ha mema. Ngoboni Nyambi ya Ngula ukashepesha kulilundumika kwabo, hinge ndi ngayi nibo benga bawutungu, ku bya kutenda na maboko. 12Ukanyemuna twimbi twabo twatutali, tukanyemukile hanci, tukashandoka na kufutuka lukungu.
Libuka Lya Kuyela © Bible Society of Zambia, 2020.