Ishaya 24
24
Nyambi ukashushula hanci
1Mwa shikuma, Nyambi ya Ngula ukalobesha hano hanci, pe hakafutuka lipembe.
Ukavulanganya kaye na kupanzanisha bantu ba hanci.
2Bantu bakawana kashushwilo kakulifweka,
ngonehe shikatendiwa ku bakankombela naku bantu,
ngonehe ku bandungo naku bahekulu,
ngonehe ku bakakulanda naku bakakulandisha,
ngonehe ku bancepwe naku bakakuheta,
ngonehe ku bakakukolota naku bakakukolotesha.
3Ndaba Nyambi ya Ngula unamba, kaye kakalobeshiwa,
kami kakenga kanyuminine.
4Hanci hakenga hanyuminine, kaye kakaloba,
kami kakayuminina.
Batulela ba mpupo ba hanci bakaloba.
5Bantu bekala hanci banabipishiho
ndaba shilolo bakonke mulao wa Nyambi,
banahandulu mazu wendi,
kami banakana kulimama kwa mwaya myaka oku balimamine nendi.
6Nohobene, Nyambi unakutu hanci
na bantu bekalamo ba kushushuliwa ndaba ya kuluwa kwabo.
Bali hanci, ba kuhokeshiwa, kukashala tuhu babashe.
7Mikolobozi ya shinyanca yikulebuka,
na waine yikamana,
pe baka ku wahilila nimwabo banahombo.
8Nkwela ya kumbeta tuncingili na tumbuli yinamana,
na miyoyo ya baka ku wahilila, yinamana.
Mushumina wa kambuli unamwene.
9Hikowa ukunwa waine na kwimbila nyimbo.
Waine yafutukakale yayilulu ku bakakuyinwa.
10Lukena lunashandoko na matala nimwawo anapatiwi.
11Bantu bali na kutatoka ndaba ya kubula waine.
Ku wahilila kunamana, kutangala hano hanci kunamana.
12Lukena lunafutuku mapembe,
mapangati alwo anapabozoko.
13Eshe nisho shikamoneka hano hanci, mukati ka matunga.
Shikenga ngo mutondo wa olive unapulumuniwi mikabo,
hinge ngonehe kwamonekanga ku mikolobozi ya shinyanca
ndi kunabuyiwi mikabo nimwayo.
14Obo bakapulukaho, bakembila na ku wahilila.
Obo bali ku mponci, bakayemeza wunene wa Nyambi ya Ngula.
15Bali ku mushamuko, bakayemeza Nyambi ya Ngula, Nyambi wa Ishalela.
16Kuzimbalila nimwazo za hanci,
kukayuvwanika nyimbo za kuyemeza na kulemeeka wakulunga.
Ngoboni nikwamba ngayi,
“Nakwanzulukakale,
na kwanzulukakale. Makando ami tawee.
Bakapele bali na kumbeba, bali na kutwalililaho kumbeba.”
17Malwa na mankwina na tuntamba, binatatilili bantu ba hano hanci.
18Ou nimwendi ukutina ndaba ya malwa
ukuwila mu linkwina,
pe ou nimwendi ukufuma mu linkwina,
ukukwatiwa mu kantamba.
Ndaba mampananga a mema muyilu,
ana shinkululiwi na mimbi ya hanci, yili na kukanka.
19Hanci hanatabuku,
hanci hanalitapa,
kami hali na kukanka.
20Hanci hali na kuzikima ngo mukakukolwa.
Hali na kunyenkana, ngonehe kanyenkananga kafufu ndi kuli mpepo.
Kaye kanalemenene na wubi, kakuwa,
pe kami kukapinduka kafwako.
21Ha mutena uyo, Nyambi ya Ngula ukashushula makunge a muyilu,
na bamyene ba hano hanci.
22Ukaba kungwila hamo ngo bakayili bali mu liteke.
Ukabashinkila mu tolongo, kwakapita matena amengi, bakashushuliwa.
23Ngonda ukashipa na mutena kukabyazima wufwako,
ndaba Nyambi wa Makunge, ukalela ha lipili lya Ziyoni mu Yelushalema,
ukaholola wuwahe wendi ku bakulwane.
Libuka Lya Kuyela © Bible Society of Zambia, 2020.