Mukakushimikila 8
8
1Kati yani walifweka na wangana? Kami yani walimuka omu shatontolokela shuma? Ngana za muntu zikubyazimisha lupala lwendi, wukali wamananga ha lupala lwendi.
Ombatalenu Mwene
2Lama ndayano za mwene, ndaba ya shikulupisho shobe sha kuzila wakulupishile kuli Nyambi. 3Hinga unyankupa kufuma ku lupala lwa mwene, hinga ukakatila ku byuma byabibi, ndaba niye, ukutenda shikumuwahilisha ku mutima. 4Ndaba lizu lya mwene lyenga lya ngovu, kami yani ukutwesha kwamba kukwendi ngayi, “Kati ukutenda bishini?” 5Ou wombatalanga ndayano kukawana wukalu wufwako, kami muntu wangana ukalimuka shikati na nzila mwa kutendela. 6Ndaba byuma nimwabyo byekala na shikati shabyo, hinge ndi makando a muntu analemenene shikuma hahendi. 7Ndaba kulimuka ebye bikekalako kumbili wufwako, haya yani ukamutongweza ebye bikamoneka? 8Kowa muntu uli na ngovu ha moyo wendi, kami kowa uli na ngovu ha mutena wa lufu lwendi, kowa nzila ya kupanza eye nzita, pe bantu bakawubi kutwesha kulilamwina nibo bamwine bafwako. 9Namonene ebye nimwabyo, oho nahanganikilenga ha byuma bikutendiwa hano hanci, hali bantu bali na ngovu habamina za kubatenda shibi.
Wakuluwa na Wakulunga
10Niho namonene bakuluwa hibafundiwa mu binzimbi, bayingininenga kami hibatutika mu mwanya wa kuyela. Bantu ba mu munzi muya mwatendiwilenga byuma ebye nimwabyo babayemezelenga. Eshi kami shinengi shashikalu kushiyuwishisha. 11Ndaba bakakutenda byabibi bayatiwangaha wangu na ku shushuliwa, mitima ya bantu yakakatilanga kutenda byabibi. 12Mukawubi uku bipisha bikati bya mwanda, ngoboni hayoya matena amengi. Nikulimuka ngayi, “Baya ba kuyuvwila Nyambi bowa nibo bakekala shiwahe, ndaba bakayuvwila bowa. 13Ngoboni wakuluwa kukekala shiwahe wufwako, kowa hinge kuyoya matena amengi ngonehe mumvulu, ndaba kuyuvwila Nyambi bowa wufwako.” 14Ebye bya wuleya! Ebye bikutendiwa hano hanci binengi byabikalu kubiyuvwishisha, bakwoloka bawananga kashushwilo kaya bafwanina kuwana bakuluwa, kami bakuluwa bawananga ncuungu iya bakulunga bafwanina kuwana. Nambile nehi ngayi ebye kami binengi byabikalu kubiyuvwishisha.
15Pe netabilile ngayi muntu uku fwanina kulikuwa ndaba kowa shashiwahe shikuma ku muntu hano hanci ndele kulikuwa niyemwine kunwa na kulya, ndaba ebye nibyo binamukundama ku milimo yendi matena akuyoya kwendi nimwawo awa anamupana Nyambi kwikala hano hanci.
16Oho nahanganikilenga mu mutima wami ngayi nilimuke bya ngana na ku mona ebye bikutendiwa hano hanci, hinge nawanine ngayi shikuletesha kubula ku mona tulo wushiku na mwaana. 17Niho namonene milimo ya Nyambi nimwayo yiya yinatendiwi hano hanci, milimo eye a kubula kutwesha ku yuvwishisha muntu, kunebye nimwabyo hinge muntu ukutengela nahiti kubishinga, kukabiwana wufwako, hinge wangana ukwezeka kubilimuka, kukatwesha kubiyuvwishisha bafwako.
Libuka Lya Kuyela © Bible Society of Zambia, 2020.