Mukakushimikila 7
7
Bihanganiko bya nyoyelo ya wuntu
1 #
Zinc 22:1. Lizina lyaliwahe likupitakana mazi a ndando yayinene shikuma na mutena wa lufu lwa muntu ukupitakana mutena wakuhemuwa. 2Shashiwahe kuya ku litala kuya kuli malila, kupitakana kuya kuli mayambwayambwa, ndaba baya nimwabo ba kuyoya banafwanini kulyanukisha nibo bamwine ngayi, lufu lunatatilili muntu nimwendi. 3Kuliyuvwa wunginga kwakuwahe kupitakana mahepo, ndaba lupala lwa kubomba unengi wupaki wa byuma unalilongeshe mu nyoyelo yobe, lwaletanga mutima wakushangama, 4Mutima wa muntu wangana wahanganikanga ku litala lya malila, ngoboni mutima wa wakuyeba wahanganikanga bya myelembo.
5Shashiwahe ku muntu kuyuvwilila wangana oho akukwambila, kupitakana kuyuvwilila ku lwimbo lwa bibulangana. 6Mahepo a shileya anafweke ngonehe yatibekanga mihongela yili ha mundilo, mu nceto ya nyungu. Kami kowa bya kutendiwa. 7Ndi muntu wangana ukulyatilila baminendi, pe ukufutuka ngo wakuyeba kami lizika kanwa, liku bipisha bihanganiko byendi. 8Mamaninino a shuma enga amawahe kupitakana mabalikilo asho, kami wakutula mutima wamuwahe kupitakana wakuliyemeza mu mutima. 9Hinga winga wakupilama shawangu, ndaba babileya bapilamanga shawangu. 10Hinga wamba ngayi, “Ndaba ngani matena akunyima anengi amawahe kupitakana a bikati bino?” Ndaba kaliha zinengi ngana kwipula bya noho.
11Ngana zenga zaziwahe ngonehe lya waha likona, zenga za kuyavwa ku bantu nimwabo hano ha hanci. 12Ngana za lamanga muntu ngonehe mali alamanga muntu. Ngoboni kuyavwa kwa kalimukisho oku, ngana za lamanga mwine wazo.
13Hanganika ha mulimo wa Nyambi, yani ukutwesha kwolola shiya akonteka Nyambi? 14Ha bikati byabiwahe mu kuyoya kwobe unafwanini ku wahilila, ngoboni ha bikati bya malwa, hanganika ngayi Nyambi niye waletele bikati nimwabyo bya malwa na bya ku wahilila ngayi mwanga muntu abule kulimuka biya bili ku matena wendi a kumbili.
15Mu bikati bya wumi wami namono shuma sha shikalu ku yuvwishisha. Muntu wamuwahe ukutwesha kufwa ha shikati sha kubula ku fwanina kupitakana uya mukakutenda byabibi. 16Haya hinga winga wamuwahe shikuma, kami hinga winga wangana shikuma. Ndaba ngani ukulilobeshela obemwine? 17Hinga winga wakuluwa shikuma, kami hinga winga wakuyeba shikuma. Shumangani ukufwila oho shikati shobe shilolo shikume? 18Shinengi shashiwahe kukakatila kukubela, kami hinga ufumisha liboko lyobe ha shuma eshe, ndaba muntu uya ukuyuvwila Nyambi bowa ukatangama mu nimwabyo.
19Ngana zapananga ngovu ku muntu wakukeya, kupitakana ebye ba kutwesha kutenda batulela likumi mu lukena. 20Mwa shikuma hano hanci howa muntu wakwoloka ukutwesha kutenda byakwoloka shikati nimwasho wakubula kutenda wubi.
21Hinga uyuvwilila ebye bakwamba bantu nimwabo, ndelewa ukutwesha kuyuvwa mukamulimo wobe ha ku kutwiza. 22Hiwulimuka mu mutima wobe ngayi bikati byabingi wakutanga baminobe.
23Naliyavwishile ngana ha kwezeka ebye nimwabyo. Nahanginikile kwinga wangana, ngoboni ngana zekalile kwakutali na nami. 24Muntu ukutwesha nahiti ku yuvwishisha ngana? Ngana zekala kwakutali shikuma, kami zenga za kunonka, yani ukutwesha kuziwana? 25Nekalile na bihanganiko bya ku yuvwishisha na ku shingishisha ngana, ngoboni nawana ngayi kwinga wakuluwa kunengi kuyeba, kami kwikala wakuyeba kwenga kubula ngana.
26Nawanine ngayi wuhungu wawunene shikuma kupitakana lufu, mbuyama wakufweka ngo shilaha, shishemo shendi akukumonesha shika kukwata ngo linkambwila, maboko wendi akakukwata ngonehi kanyanzi. Muntu nimwendi ukuwahilisha Nyambi, ukatwesha kubenguka ku mbuyama wanehe. Ngoboni bakawubi bakwatiwanga ku uya mbuyama. 27Mukakushimikila ukwamba ngayi, “Ebye nibyo nawanine oho nashingashishilenga shimo na shimo ngayi niwane bya kukumbula. 28Eshe mutima wami washingishishilenga shikuma ngayi niwane mwamina mwakukumbwila, ngoboni kuwana nifwako bya kukumbula. Mu likunge lya balume likulukazi, ninawanamo mulume umo wakwoloka, ngoboni mu likunge lya bambuyama likulukazi nabulile kuwanamo mbuyama umo wakwoloka. 29Ninawanako tuhu ebye ngayi, Nyambi walengele muntu kwinga wakwoloka, ngoboni bantu banalishingili zinzila zabo zazibi.”
Libuka Lya Kuyela © Bible Society of Zambia, 2020.