2 Shamwele 23
23
Mazu a Ndavita amamaninino
1Awa niwo mazu a Ndavita amamaninino. Ndavita mwana Njeshe, muntu ou Nyambi aneneheshele, owe awabishile Nyambi wa Yakobo kwinga mwene, owe wengile mukakuhonga nyimbo zaziwahe za Ishalela. Pe wambile ngayi,
2“Moyo wa Nyambi ya Ngula ukwamba mumwami,
Lizu lyendi lili ha lulimi lwami.
3Nyambi wa Ishalela unamba,
Limanya lya Ishalela wambile kukwami ngayi,
oho Mwene a kulela na kulunga,
kulela oku hatina Nyambi,
4ukubatatumukila na mincalala,
ngo mutena ha kututika kwawo kwakubula makumbi,
ngo mutena uya wameneshanga
mwila oho mvula unaketuku.
5Pe shiya nisho Nyambi afuywelele lupashi lwami,
ndaba unalimama na nami Kulimama kwa mwaya myaka,
kuliyuvwashana kuya kukabula kumana,
shikulupisho shiya shikubula kufutuliwa.
Pe mwa shikuma Nyambi ukanyavwa na kumpana ebye ni ku shinga.
6Ngoboni bakawubi banafweke ngonehe
mihengela iya yinayumbiwi.
Kowa muntu ukutwesha kuyikwata na maboko anahiya,
7ndele kuliyavwisha shondo hinge mulinga.
Bantu bakayihokeshela nimwayo bene hayo.”#23:7 Nimwayo bene hayo: Ku mamanino a beshi 7 niho anamanini mazu a Ndavita, kufuma ha 23:8 kutwala mu litapululo 24:25 nyambilo ya bantu bashenge.
Bakanzita ba Ndavita ba mpupo
(1 Byambo 11:10-41)
8Awa niwo mazina a bakanzita ba Ndavita ba mpupo, wakutatika wengile Yosheba Mbashebeti waku Takimoni, owe wengile mukakutwaminina waku naba “Bahatu.” Walwishilenga na mulinga wendi balume 800 pe wabazihile nimwabo mu nzita yimo.
9Wakulundamina hakati ka baya bantu bahatu wengile Eliza mwana Ndondo, wa ku livumo lya Ahohi. Mutena umo niye na Ndavita balwishile Bafwilishitina aba bakungulukile mu kulwa. Pe Baishalela batinine, 10ngoboni niye walishumishile na ngovu zendi na kulwisha Bafwilishitina hantu noho liboko lyendi lyengile shingole, pe kaliha watweshele ku puha mukwale wendi. Nyambi ya Ngula wapanine kukoma kwakunene ku Baishalela ha mutena uyo. Oho nzita yamanine Baishalela babokele okwe kwekalile Eliyazala na kushimba lipuku ku bafu.
11Wawuhatu ku mpupo ku naba bahatu wengile Shama mwana Ange waku Hala. Bafwilishitina bakungulukilile ku Lehi okwe kwekalile mfuba ya manyanta. Baishalela batinine ku Bafwilishitina, 12ngoboni Shama walikwatishile na kwimana mu mfuba, wayilamwinine pe wazihile Bafwilishitina. Nyambi ya Ngula wamupanine kukoma kwakunene shikuma.
13Kwakwipi naku mabalikilo a shikati sha kuteza, bahatu baha “Makumi ahatu” bayile ku linzolongoma lya Andulama, oku ekalilenga Ndavita. Muhoko wa bakanzita ba Bafwilishitina batulilile mu Mukulo wa Lefwayima. 14Ha shikati shiyo Ndavita wekalile mu shipata, pe Bakanzita ba Bafwilishitina bekalile mu Mbetelehema. 15Ndavita walishozele ku munzi, pe wambile ngayi, “Tawee! Shinga taha na muntu wakundetelako mema akunwa aku lishima lya hahepi na lipangati lya ku Mbetelehema.” 16Bakanzita bahatu ba mpupo bengile nkanzi kuliyoha na kupita mu munkungwa wa Bafwilishitina, kuya na ku tekula mema ku lishima kwakwipi na lipangati lya Mbetelehema na kuwaleta kuli Ndavita. Ngoboni kaliha wa wanwine. Wa wayitilile hanci kwinga ngonehe nkombela kuli Nyambi ya Ngula. 17Wambile ngayi, “Obe Nyambi ya Ngula, kutwesha kuwanwa nifwako. Nisho shikwinga ngo nikunwa mukeza wa naba bantu banayaka wumi wabo mu malamo.” Nohobene wakanine kuwanwa.
Eshe shengile shimo ha biheka bya bakanzita ba mpupo.
18Ambishayi mukonzo wa Yowambu wengile mukakutwaminina wa baya Bakanzita ba mpupo Makumi Ahatu. Mandiyendi wengile Zeluya. Walwile na bantu 300 na mulinga wendi na ku baziha. Pe wekalile na mpupo ngonehe aba bamina “Bahatu.” 19Ambishayi wayile mpupo shikuma ha Bakanzita Makumi Ahatu, pe wengile mukakubatwaminina, ngoboni kaliha wengile wampupo ngonehe baya Bantu Bahatu.
20Mbenaya mwana Yehoyanda waku Kambizelu wengile kanzita wampupo. Watendele byuma bya kukanca byabingi, kufungilako ha kuziha bakanzita babanene babili ba Bamowambi. Kami wakunkulukilile mu liteke na kuziha shimbwi ha mutena awile makelengo. 21Niho kami azihile mulume wawutambi wa Kaengepita, owe wakamatilile mulinga mu liboko lyendi. Mbenaya wamulwishile na muwana, wahukwile mulinga mu liboko lya Kaengepita, pe wamuzihishileko. 22Obyo nibyo byuma bya kukanca atendele Mbenaya mwana Yehoyanda, umo wa bamina “Makumi Ahatu.” 23Wekalile na mpupo shikuma hakati ka Bakanzita Makumi Ahatu, ngoboni kaliha ngonehe baya Bahatu. Ndavita wamuyakile ku bakulwane bakakumulama.
24Bamina ku bantu “Makumi Ahatu” bengile ba Ashaheli mukonzo wa Yowambu na Elihanani mwana Ndondo waku Mbetelehema, 25na Shama na Elika ba ku Halondi, 26na Helezi waku Paliti na Yila mwana Yikesha waku Tekoya, 27na Ambiyeza waku Anatoti na Membunayi waku Husha 28na Zalumoni waku Ahohi na Mahalayi waku Netofwa, 29na Helendi mwana Mbaana waku Netofwa na Itayi mwana Limbayi waku Ngimbiya mu litunga lya Mbenjamani, 30na Mbenaya waku Pilotoni na Hindayi waku mikulo ya kwakwipi na Ngashi, 31na Ambiyaboni waku Alamba na Azimabeti waku Mbahulima, 32na Eliyahimba waku Shalimboni na bana ba Yasheni babalume na Yonatana 33mwana Shama waku Hala na Ahiyama mwana Shalala waku Hala, 34na Elifweleti mwana Ahashibayi wa mulume waku Maaka na Eliyami mwana Ahitofwele wa mulume waku Ngilo, 35na Hezilo waku Kamela na Palayi waku Alibi, 36na Ingalu mwana Natani waku Zomba na Mbani waku Ngandi, 37na Zeleki wa Kaamoni na Nahalayi waku Mbeloti, washimbilenga bilwisho bya Yowambu mwana Zeluya, 38na Yila na Ngalembi waku Yatile 39na Uliya wa Kahita.
Bekalile makumi ahatu na mutanu na babili bakanzita ba mpupo nimwabo.
Libuka Lya Kuyela © Bible Society of Zambia, 2020.