2 Shamwele 22
22
Lwimbo lwa Ndavita lwa kukoma
(Nyimbo 18)
1Oho Nyambi ya Ngula apulwishile Ndavita kuli Shaulu na bamalamo bendi nimwabo.
2Ndavita wembilile luno lwimbo ngayi, “Nyambi ya Ngula niye limanya lyami
na shipata shami sha ku shuma na mulamwini wami,
3Nyambi yami niye limanya lyami,
mumwendi nimo ni kuholama.
Niye likebo lyami,
uku ndamwina na ku nyinkalika shiwahe.
Niye muka kunkoweza ngonehe shipata, niye ukundama,
na ku ndamwina ku mushunga.
Nengi muka kunkoweza,
na kumpulwisha ku mushunga.”
4Nikwihana kuli Nyambi ya Ngula,
ou nafwanini ku yemeziwa.
Pe ukumpulwisha ku bamalamo bami.
5“Mankanyi a lufu nimwao anzingulukile,
mankanyi akunongesha amfwikile.
6Malamo a lufu anzingulukile,
pe kantamba ka lufu,
ka nkwatile.”
7Mu makalikiza wami,
nehanine Nyambi ya Ngula,
nehanine Nyambi yami ngayi anyavwe.
Mu litala lyendi wayuvwile lizu lyami,
wayuvwilile kuku bilika kwami,
kwakushinga ku yavwiwa.
8Niho hanci hakankile pe hanyenkanine,
mimbi ya mayilu ya kankile na ku nyenkana,
ndaba Nyambi wapilamine.
9Wishe watutumine kufuma mu mizulu yendi,
mulangi wa ku nongesha,
wafumine mu kanwa kendi,
mashanga akubanga afumine kukwendi.
10Watabwile mbimbayilu,
na kuyipita hakati pe wezile hanci,
hamo na likumbi lya ku shipa,
lyekalile mu nceto ya mawulu wendi.
11Wekalile ha makelumbi na ku lelenteka,
watukile ha mbando za mpepo.
12Walifwikile niyemwine na mincimpwe,
makumbi akushipa a mvula, amuzingulukile.
13Ku mbyazeka na ku mwesha ngonehe mundilo byekalile kumbili yendi,
byapitile mukati ka makumbi akushipa.
14Nyambi ya Ngula watendokele muyilu ngonehe mushika.
Lizu lya Wakukangana lya yuvwanikile.
15Wapuhile mivwi yendi,
pe wapanzanishile bamalamo bendi,
wa batandile na ku mwesha kwendi.
16Niho nceto ya liwate ya shalile ha too,
pe mimbi ya hanci ya fwikulukile.
Oho Nyambi ya Ngula akalihilile bamalamo bendi,
pe wa ba hashokelele na wukali.
17Nyambi ya Ngula wa nkolobelele hanci kufuma mu yilu,
pe wa nkokele ku mfumisha mu mampunga.
18Wa ndamwinine ku bamalamo bami bangovu,
na ku kwabo nimwabo baya banzimbile,
ndaba bengile bangovu ku mpitakana.
19Oho nekalile mu makalikiza, bandwishile,
ngoboni Nyambi ya Ngula wankingile.
20Wantwamininine ku mwanya waku mwena,
wampulwishile ndaba wangwahililile.
21Nyambi ya Ngula ukumpana ncuungu,
ndaba ya kulunga kwami,
uku mfuywela ndaba kaliha nekalile na mulandu.
22Ninombatala zinzila za Nyambi ya Ngula,
shilolo nifume kuli Nyambi yami na kukonka byabibi.
23Ninalama mazu wendi nimwawo,
shilolo nilimbulule ndayano zendi.
24Na shamba kukwendi,
ndaba nalilamanga amimwine,
kubula kutenda byabibi.
25Nyambi ya Ngula ukumpana ncuungu
ndaba nengi wa kulunga,
Halimuka ngayi nili wa kubula mulandu.
26Obe Nyambi ya Ngula uli wa kwoloka,
ku baya bakwinga bakwoloka kukwobe,
pe na kwinga wa mu wahe,
ku baya bakwinga babawahe.
27Walimonekeshanga kuyela ku baya ba kuliyelesha nibo bamwine,
ngoboni uli wamukalu ku baya bakuluwa.
28Wa pulwishanga baya ba ku li shepesha,
ngoboni uku shepesha baya bakuliyemeza.
29Obe Nyambi ya Ngula,
Obe uli lambi yami,
Obe Nyambi yami, ukumunika mu mincimpwe yami.
30Ukumpana nyala za ku lwisha bamalamo bami,
na ngovu za Nyambi ni ku twesha ku kiluka twimbi twabo.
31Ou Nyambi, ntendelo yendi eshe ya waha na mazu wendi eshe a lubuluka.
Unafweke ngonehe likebo, ku nimwabo baya bakushinga kuholama kukwendi.
32Nyambi ya Ngula ninkayendi niye Nyambi,
Nyambi ninkayendi niye limanya lyetu.
33Nyambi umo pele, niye shipata shami sha ngovu,
pe u na botopeshe nzila yami.
34 #
Hamba 3:19. Wa lyatishanga mawulu wami shiwahe,
ngonehe mawulu a shineke,
wa ntwesheshanga kwenda shiwahe ha mapili.
35Niye wa ndongeshanga bya ku lwa nzita,
ngayi nitweshe ku nana shipando sha mukunzi,
sha ku shuma shikuma sha lubemba.
36Obe Nyambi ya Ngula, ukunkoweza na ku mpulwisha,
kuyavwa kwobe ku na nkatulu shikuma.
37Obe u na ndama mu kubula ku kwatiwa,
pe mawulu wami hinga atanga ku henutuka.
38Natandile bamalamo bami na kubakwata,
pe kaliha na shintulukile hantu noho na balobeshele.
39Nabahubile hanci,
pe kaliha batweshele ku pindukamo,
ba ku wila ku mawulu wami hinga bakomiwa.
40Wampanine nyala za ku lwa nzita,
na ku koma ha bamalamo bami.
41Ukutanda bamalamo bami kufuma kukwami,
na ku lobesha baya ba ku nzimba.
42Bakalokele ku shinga ku yavwiwa,
ngoboni muntu wa kubapulwisha kowa,
bakwihana kuli Nyambi ya Ngula,
ngoboni kuba kumbula wufwako.
43Ni ku ba cancola, pe ba ku futuka nehe lukungu lu ku pepuka na mpepo
ni kubalyatangila nehe ntiti ya mu nzila.
44Wampulwishile ku bantu bami aba ba mfutukililemo,
na kuhangulula ku lela kwami kwa ha matunga,
bantu nabulile kulimuka haya bengakale bakamilimo bami.
45Mapukwenda balambile kukwami,
oho banyuvwile, banyombatalile.
46Mapukwenda batampwile,
pe bafumine ku bipata byabo hibakanka.
47Nyambi ya Ngula wayoya!
Liyemeziwe Limanya lyami!
Shimikilenu wunene wa ngovu za Nyambi,
Ou limanya lya kupulukila kwami.
48Nyambi niye wampanine kukoma bamalamo bami,
muka ku bombesha matunga mu nceto yami,
49na ku mpulwisha ku bamalamo bami.
Wankatwile ha bamalamo bami,
na ku ndamwina ku bantu ba mishunga.
50 #
Lom 15:9. Nohobene, Obe Nyambi ya Ngula, haya ni kuku yemeza hakati ka matunga
ni kwimbila nyimbo za kuku yemeza.
51Nyambi mu ka ku pana ku koma kwakunene,
kuli mwene yendi,
mu ka ku monesha shishemo shendi sha mwaya myaka,
kuli owe ana wabishi,
kuli Ndavita na bazukulyendi mwaya myaka.
Libuka Lya Kuyela © Bible Society of Zambia, 2020.