aGalata 1
1
Isalaama sookisera
1Ya Pawulo, murummwa ahirumihiwe ni alopwana, naari mutthu mmoha, mene aani, ni Yeesu Kristu ni Muluku Atithi, amvenyererihale Yeesu mookhwaani. 2Ni ya axunna ootheene ari ni miyo. Wa ikerexa sa elapo ya oGalata: 3Wa nyuwo mahala ni murettele onrweela wa Muluku Atithihu ni Apwiya Yeesu Kristu, 4yinnyerenre okumaaya wa sootthekasahu weera enoopole hiyo wa ehuhu ela yoonanara. Yaapaka yeeyo niwoko na otthuna wa Muluku Atithihu. 5Wa Yoowo okhale ovuwa woohimala. Ame*.
Khaawowo masu ooreeraxa makina
6Kiniitikhina weera nyuwo munimuhiya woowaakuveya Yoole aawiitthanneni ni mahala a Kristu weera mutthare masu makina. 7Vekhaikhai masu ale khaahiyono masu ooreeraxa. Kinoona ntoko aakhala atthu akina anookacamihani etthunaka opiritula masu ooreeraxa a Kristu. 8Hata hiyo, hata ndyelo a wiirimu alaleiya masu oovirikana wa masu ooreeraxa hiyo nnoolaleeraahuni, akhale oolamphwa! 9Ntoko hiyo neenraahu, miyo kinoophitela: akhala mukina onooleelani masu makina oovirikana mwaakhenlaanyu, akhale oolamphwa! 10Apaale miyo kinaasaasa waakhuleliwa wa atthu, naari wa Muluku? Hoye hoye miyo kineerera waasiveliha atthu? Kaasaasa waasiveliha atthu, nkaakhala murumeiyi a Kristu.
Pawulo oniitthaniwa ni Muluku
11Axunnaka, kintthuna weera nyuwo musuwele weera masu ooreeraxa miyo kooleenlaakani, khaahiyono a omutthu. 12Miyo nkaakhenle masu ooreeraxa wa mutthu mukina, naari nkihusihiwe ni atthu. Wa soothesene, kaakhenle yaawo wa Yeesu Kristu moothupululani. 13Nyuwo mohiiwa sa mweettelowaaka, miyo kaaraaka mudiinini ya aYuda, ni moota kaattharattharaxaaka ekerexa ya Muluku kaasaasaka ophwata yeeyo. 14Kaaraaka mudiinini ya aYuda, kaapwaha nthiti na aYuda akina ancipale yaari akhwaaka. Vekhaikhai, nthitinaka wa ikhovelelo sa makholowaaka naari ntokotoko. 15Waamusivenlaaya Muluku okimwalanyinghe okhuma mweerutthuni ya amayaka ni okiitthanne ni mahalaawe, weera 16akoonihere Mwanawe mwa miyo weera kaalaleere Yeesu amalapo, miyo nkaavekenle olaka wa mutthu. 17Nkaarongwetho oYerusaleemu weera kawoone yaawo yaari arummwa kihinaaye miyo. Vano miyo kaapwaha kirowaka wArabiya, kihokolowaka emaara ekina wa oDamasku. 18Simalakaru iyaakha tthaaru, kaarowa oYerusaleemu weera kamusuwele Pedru muneenaawe. Miyo kaari ni yoowo mahuku muloko ni mathanu. 19Nkaawoonalewo arummwa akina, ahikhanle Yakobe, munnaya Apwiya. 20Seiyo miyo kinoolepelaakani khasihiyono soowootha vamaithoni wa Muluku. 21Vahoolowaya kaarowa wa ilapo sa oSiriya ni oSilisiya. 22Ikerexa sa Kristu sa oYudeiya khasaakisuwenle miyo muneenaaka. 23Atthweene yaawo yiiwa paahi yeeriwaka: “Yoole aanittharatthara khalayeene, vaanaano onlaleiya nroromelo aatthunaawe ophwata.” 24Tivawo yaamvuwiha Muluku niwoko na miyo.
നിലവിൽ തിരഞ്ഞെടുത്തിരിക്കുന്നു:
aGalata 1: VMK2021
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
Makhua Shirima Bible © Christelike Lektuurmaatskappy NPC, 2021.