2 aKorinto 11
11
Weeteteya wa Pawulo mwaha wa ororomeleya wa aKorinto
1Koororomela weera nyuwo mmukivilele vakhaani, hata miyo mukoonaka ntoko naanepa. Vekhaikhai munookivilela! 2Nthiti kookhalenlaakani, ti nthiti ninrweela wa Muluku. Miyo kohootthomerihani nyuwo wa mulopwana mmoharu ori Kristu, kitthunaka owooniherani wa Yoowo ntoko ootthomeriwa ootteelaxa. 3Yeeyo miyo kinoovaaka ti ela: ntoko enowa yaamulokontthaaya Eva ni mirukusaya soonanara, nkintthuna weera soowuupuwelasanyu sihapuxiwe mwa nthitinanyu wa Kristu na ekhaikhai ni nootteela. 4Vano, akhala mukina onoolaleerani Yeesu mukina, ahikhanle Yoowo nnimulaleiyaahu, hoye hoye mwaakhelela munepa mukina, ohikhanle Yoowo mwaakhenlaanyu, naari masu ooreeraxa makina, ehikhanle mwaakhulenlaanyu, nyuwo munoovilela yeeyo wookhweyaxa. 5Wa soothesene, nkinroromela okhala mwaamukhaani a arummwa yaala oottittimiheyaxa. 6Apaale miyo nkinuuluma masu nnenesene, wa soothesene nkihiyono oohilipa moosuwelani. Mwa yeeyo, noowooniherani yeeyo mwa itthu sootheene. 7Weeraka yookhala etthu kitthenkaaka, miyo kiiyevihaka weera koottukhuleni, koolaleerakani ya mahala masu ooreeraxa wa Muluku? 8Kohiiyera ikerexa sikina, kaakhelaka mwa seiyo ekhavihero weera koorumeeleni. 9Kaaraaka variyariwanyu kihaawelaka etthu, khaawo kaamulemenlaaka, niwoko axunna yaawiiyaaya ekhumaka oMasedoniya yaakivaha yeeyo kaahaawelaaka. Kaapaka yeeyo weera kihoolemeleni nyuwo, ni nkipwaherere moota ola. 10Hiihotho, ntoko ekhaikhai ya Kristu eraaya mwa miyo, khaawo a elapo ya wAkhaya anaawere okiiyera ovuwa wu. 11Niwoko heeni? Niwoko miyo nkinoosivelani? Muluku oosuwela weera kinnoosivelani! 12Vano, nkipwaherere opaka yeeyo kimpakaaka, weera kiwiiyere ehuhu yaale anghaawela wiitthaniwa woolikana hiyo mwa itthu aniivuwiheraaya. 13Atthweene yaawo ari arummwa oowootha, anamiteko oolokottha, yiixeeraka ntoko arummwa a Kristu. 14Ni kheehiyono yootikhiniha, niwoko Satana muneenaawe oniixeera ntoko ndyelo a waara. 15Tivawo, kheehiyono etthu yootikhiniheya arumeiyaawe yiixeeraka weera ari arumeiyi a ekhaikhai. Ommaleloniwaya onuukhale yeeyo mitekosaya simphwanelaaya.
Pawulo oniivuwiha moohaawanimwawe
16Kineera emaara yanaaveeli: ahikhale mutthu onuupuwela weera miyo kiri naanepa. Mene muupuwelaka hiiho, mukaakhelele ntoko muneeraanyu mmwaakhelele naanepa, weera miyo kiivuwihetho vakhaani. 17Wiivuwiha wu kineeraka kihime, nkirwa kihima ya mpatta wa Apwiya, mene ntoko naanepa. 18Woonaka weera ancipale aniivuwiha moota wa omutthu, miyotho nkiivuwihe. 19Nyuwo mureene atthu oosuwelaxa, munaavilela ni ohakalala anaanepa! 20Mwa yeeyo, nyuwo munaavilela mpaka yaawo anoopakani ipottha, hoye hoye yaawo anoopuherani, naari yaawo angwiiyerani, naari yaawo aniixoona wa nyuwo, hoye hoye anoomanani owiitho. 21Wuuliwawaka muru kinaakhulela weera naari ookhulumuwaxa wa yeeyo! Mwa yeeyo akina ootheene antthunaaya wiivuwihera, miyo kinootthunatho. Kinuuluma ntoko naanepa! 22Awo ari aHeberi? Miyotho! Ari aYixrayeli? Miyotho! Ari anamwane a Abrahaamu? Miyotho! 23Yakhala arumeiyi a Kristu (miyo kinuulumaxa ntoko naanepa!), miyo kohaapwahaxa! Miyo kootepa ovaraxa muteko, koowalelaxiwa mukaliposo imaara sincipale, kootepaxa owaxuliwa ni ekwamba, ni imaara sincipale kaari ngwoopihani wa okhwa. 24Imaara ithanu koowaxuliwa ni aYuda, kimaniwaka ikwaha imaara miloko miraru niithanniixexe ni ekwamba. 25Koowaxuliwa ni ekopo imaara tthaaru, koovonyiwa maluku emaara emoha, imaara tthaaru nikula miyo kaawenlaaka naattatta mphareiyani, kaavira othana omoha ni ohiyu omoha mphareiyani moowiixa. 26Kaapwaherera keettaka mipatta sincipale, kihaawaka soowoopiha sa mmoolokoni, sa anamwiiya, sa mulokwaaka, sa amalapo, musidadeni, munikareni, mphareiyani ni sa axunna oolokottha. 27Kannavara miteko soovihaxa, imaara sincipale woohikona, kannavoliwa etala ni ntthona, imaara sincipale nkaakhalanne sooca, kannavilela oriira ni pwitipwiti. 28Ohiya toko iyo, khula nihuku kinnateexa olemela wooweeteteela ikerexa soothesene. 29Taani omvoreiwa, miyotho kihivoreiwaka? Taani onttheka, miyotho kihihaawaka? 30Waatthuneyaka wiivuwiha, okhaleke niwoko na itthu sinoonihera ohilipawaka. 31Muluku ni Atiithi a Apwiya Yeesu ori ooreelihiwa mahuku ootheene, onsuwela weera nkinootha. 32oDamasku, guvernadori aathanliwe ni mwene Areta aahaarumiha weera atthu ewehawehe esidade weera kivariwe. 33Kaakuruxeliwatho munttaangani vaxanelani ya exiri, ni kaahoopowa mmatatanimwaya.
നിലവിൽ തിരഞ്ഞെടുത്തിരിക്കുന്നു:
2 aKorinto 11: VMK2021
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
Makhua Shirima Bible © Christelike Lektuurmaatskappy NPC, 2021.