2 aKorinto 10
10
Pawulo onaakiha mutekwaawe
1Akina aneera weera, miyo kireene ni nyuwo, ‘kinkhala oowiiyeviha,’ mene kireene ottaiwene, ‘kinnoolipiherani.’ Vano, niwoko na murima woomaaleleya ni murima wooreera wa Kristu, miyo, Pawulo, kinoovekelani etthu. 2Kinoodyoonttelelani weera, kireene vamoha ni nyuwo, khawaatthuneya miyo waahiiha akina anuupuwela weera hiyo nimpwaherera ntoko ekhalelo ya omutthu. 3Naamwi nikhalaka ntoko atthu, khaningwana mweekhaleloni ya omutthu. 4Wa ikapwitthi hiyo ningwananaahu, khasihiyono sa omutthu, ohiyanawaya, siri sa ikuru mwa Muluku weera siphwate mmapuroni oolipaxa a amwiittana. 5Nimphwata owana ni masu, ni wiixoona wootheene oniikhumelelihera osuwela wa Muluku. Hiyo nimvara soowuupuwela sootheene weera sithatuwe soomwiiwelela Kristu. 6Hiyo nnikhale oolikaneene ottaruxa mukhalelo wa ohiiwelela wootheene, omwiiwelelawanyu Kristu waakwaniheriwaka. 7Nyuwo mungwehexexa omokoni wa itthu paahi. Akhala mukina oviriyeliwe weera ori a Kristu, ontthuneya weera owo asuweletho mwaneenaawe weera hiyo nri a Kristu, hiiho ntoko yoowo. 8Vano, hata miyo kiivuwihaka vakhaani niwoko na ikuru Apwiya anivanghaaya weera noopuhiheni ohikhanle woophwatani, nkirwa kuulihiwa muru. 9Nkintthuna weera kikhale ntoko kineerera owoopopihani ni ikarattasaka. 10Vano akina aneera: “Ikarattasawe siri soolipa ni soowali, mene ekhalelo ya erutthwaawe kheemvolowa mmurimani mwa atthu, ni maswaawe ari a siiyo.” 11Esuwele nnenesene atthweene yaawo weera yeeyo nilempaahu mwa ikaratta nireene ottaiwene, nnikhaletho mmitekonimwahu nireene vamoha ni nyuwo. 12Khaningwera wiilikanxa, naari wiiphwanaphwaniha ni akina aniilaihera asineenaaya. Awo yiiphimaka ni yiilikanxaka asineenaaya, ampaka yeeyo ehisuwelaka etthu. 13Wa soothesene, hiyo khaniivuwiha woopwaha mwiinano wootthuneya, mene nnikotihe ovuwawahu mmwiinanoni wa muteko Muluku onivaherenraawe, mwa yoowo oniwoophiyereni mpaka nyuwo. 14Khanintupha mwiinaano wa ovuwawahu, ntoko weeraaya okhaleke hiyo nahoophiyenreni mpaka nyuwo, niwoko vekhaikhai nohoophiyerani nyuwo ni masu ooreeraxa. 15Mooteene yoowo, khanintupha mwiinanowaahu niivuwihaka mwa miteko akina apankaaya. Ororomelawahu ti wu: munnuwaka munroromeloni, mitekosahu nsithanuwe variyariwanyu, 16weera nilaleiye masu ooreeraxa wa ilapo siri wiithelawanyu, niwoko khanintthuna wiivuwiha wa muteko ovariwe mweelaponi sa mukina. 17Wa soothesene, “yoowo omvuwa, amvuwihe Muluku,” 18niwoko khanaakhuleliwa yoowo oniilaihera muneenaawe, mene yoowo Apwiya animlangheraaya.
നിലവിൽ തിരഞ്ഞെടുത്തിരിക്കുന്നു:
2 aKorinto 10: VMK2021
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
Makhua Shirima Bible © Christelike Lektuurmaatskappy NPC, 2021.