Mnt 20
20
Pawulosi atlhela akumeka a Makedoniya ni le Girika
1Loko a dzolonga drihelile, Pawulosi ahlengeleta a vadondrisiwa; loko avatiyisile, avalelela, asuka aya Makedoniya. 2Loko atremakanyi matiku lawo, ni kutiyisa a vadondrisiwa hi mintratriyo minyingi, akongoma atikweni dra Girika, 3lomu atrhamiki kone tihweti tiraru. Loko ahatilulamisela akuya a Siriya, hi ngalawa, ativa leswaku a va-Yuda vahambi rengu dra kumudlaya. Kolahu ahangadrimuka kutlhelela ntrhaku hi dra Makedoniya. 4Vamuheketa vayatlhasa Aziya, va Sopataro n'wana Pirrosi wa le Bereya, na Aristarko na Sekundu va-le-Tesalonika, na Gayo wa le Derbe, na Timotewu, na vone Tikiko na Torofimo va-le-Aziya. 5Volavo vafamba mahlweni vayahiyimela Trowasi. 6Loko kuhundri a masiku ya makati lawa mangalikina handrelo, hisuka a Filipiya hi ngalawa, hiyatlhasa ku vone, ndreni ka ntlhanu wa masiku, hitrhama kone hi xipimu xa vhiki.
Pawulosi a Trowasi
7Hi siku dra kusungula dra vhiki, na hihlengeletaneli kukhemelela a kati, Pawulosi, leswi afaka adjula kusuka hi siku ledri drilandrelaka, akhanela na vone kukondra kuva makari ka vusiku. 8Afa kuni mimotre minyingi andlwini ya le henhla, lomu afaka hihlengeletani kone; 9Mun'we wa ndrisanyana a vito drakwe anga Ewutiko, afa atrhamisi hi le jineleni, akhomiwa hi vurongo, na Pawulosi ahaya mahlweni hi kuvulavula, hi kuhluliwa hi vurongo, awa hansi hi le ku xitezu xa vuraru, kutani ayatlakuliwa na afile. 10Kambe Pawulosi axika na yene, akarama henhla kwake amuxingara aku: Rulani, hikusa ahali ni vutomi andreni kwake! 11Kuti loko atlheli akhandriya, akhema kati, ada, na kone ahaya mahlweni hi kukhanela na vone hi swakutala, kukondra byixa. Ntrhaku ahangafamba. 12Vone, vamukisa a ndrisanyana, na ahanyile, vatxhavelelana ngopfu ha swone.
Vasuka a Trowasi vaya Mileto
13Kambe hine, hiya mahlweni hi ngalawa, hiwelela a Asosi, lomu afaka hifaneli kuyimela Pawulosi kone, swanga hileswi afaka hileletisiwi xi swone, na kasi yene afa afamba hi ntlhava. 14Loko atlhangana na hine Asosi, himunhingenisa abyatrhwini, hiya a Mitilene. 15Hisuka lano, hifamba hi vusiku hinkwabyu hi ngalawa, loko byixa, hitlhasa lomu kulavisaniki ni le Kiyosi. Hi siku ledri drilandrelaka, hiya a Samosi, hi siku drilandrelaka mfuri, hitlhasa a Mileto. 16Leswi Pawulosi afaka ayanakanya kutlulela Efesa, angayimi, akuva angatidrivateka, hikusa afa akahlulela kuva Yerusalema hi siku dra Pentekosta, loko swikoteka.
Maritu ya Pawulosi ku Kereke dra le Efesa
17Loko atlhasi Mileto, arumela kuvitaniwa a vakulu va Kereke dra le Efesa. 18Loko vatlhasi ku yene, aku ku vone: N'waswitiva na n'wine, akusukela sikwini dra kusungula ledri ningatlhasa ha drone Aziya, leswaku a mayentxela yanga mavi lawa ya kuyini amakari kwenu hi minkama hinkwayu. 19Nitireli Hosi hi kutitrongohata hinkwaku ni minyembeti, amakari ka mindringo leyi ningamikuma hikola ka marengu ya kubiha ka va-Yuda ha mine. 20Ni leswi ningan'wifihlelangakiki ntxhumu wa leswi swifanekeliki ku n'wipfuna, niva ningatriki a kun'widondrisa hinkwaswu alivaleni ni le tindlwini tenu; 21na nitiyisa mahlweni ka va-Yuda ni le ku va-Girika a kundrulukela ku Xikwembu Nkulukumba ni kupfumela ku Hosi yeru Yesu Kriste. 22Kutani-ke, lavisani, swoswi nibohiwi hi Moya a kuya a Yerusalema, na ningaswitivi leswi nitakatlhangana na swone, kone, 23loko swingali leswaku a Moya wa Kuxwenga wutiyisa ku mine, wuku: amutini mun'wana-ni-mun'wana, a mapindra ni tinxanisa swinilaviselile. 24Kambe anitihlayeli ntxhumu hi vutomi byanga, aniyanakanyi leswaku byini lisima ku mine; nitakota kuheta a mpfhuka wanga ni ntiro, lowu niwuyamukeliki ku Hosi Yesu, wa kuva ni hambela vumboni Ivangeli ya timpswalu ta Xikwembu Nkulukumba.
25Swoswi vonani, naswitiva leswaku n'wingahatlheli n'wivona a liso dranga, n'wine hinkwenu ningafamba-famba amakari kwenu na nidrungulela a ta Mfumu wa Xikwembu Nkulukumba. 26Hileswo-ke, nitiyisa namuhla ku n'wine, leswaku anina nandru angatini yenu hinkwenu, 27hikusa anifihlanga ntxhumu, nin'widrunguleli a kungu dra Xikwembu Nkulukumba hinkwadru. 28Tivonelani n'wine, ni ntlhambi hinkwawu lowu Moya wa kuxwenga wun'wibekiki kuva vabixopo, akuva n'wibyisa a Kereke dra Xikwembu Nkulukumba, ledri angatixavela hi ngati yake. 29Naswitiva mine leswaku, antrhaku ka kusuka kwanga, kutanhingena mahava lawa ya kulebya amakari kwenu, lawa mangatikilondrisa a ntlambi. 30Ni leswaku amakari kwenu kutapfuka vavanuna, vatakakhanela swakusomboloka, akuva vatikokela a vadondrisiwa, vavalandra. 31Hileswo-ke, hitekani. N'widrimuka leswaku ha malembe mararu anisamanga nitrika a kun'wimamulela mun'wana-ni-mun'wana, hi minyembeti avusiku ni nhlikanhi.
32Kutani nin'wibeka ku Xikwembu Nkulukumba ni le ritwini dra timpswalu takwe, lweyi akotaka kun'wiyakisa, ni kun'winyika a pfindla kun'we ni hinkwavu lava vahlawulekisiwaka. 33Aninavelanga gole, kumbe silivhela, kumbe swiyambalu swa mhunu. 34N'waswitiva na n'wine leswaku a mavoko lawa (yanga) matireli hinkwaswu leswi afaka niswivilela, mine ni lava afaka vali na mine. 35Nin'wikombisi hi tindlela hinkwatu leswaku kudjuleka hipfunisa xiswoswo, hi kutira, lava vangani gome, na kudrimukiwa a maritu ya Hosi Yesu, hikusa Yene, hi ntshima yake ate: Kukateka ngopfu a kuhanana, kutlula a kuyamukela.
36Antrhaku ka ku hlaya leswo, akhisama, akhongota kun'we na vone hinkwavu. 37Vahangadrila hi ngopfu hinkwavu, vakhwambareta Pawulosi hi lirandru, vamunyunta, 38na vavaviseki ngopfu hi ritu ledri afaka adrihlayile, dra leswaku vangahatlheli vavona a liso drakwe. Kutani vamuheketa angalaweni.
നിലവിൽ തിരഞ്ഞെടുത്തിരിക്കുന്നു:
Mnt 20: NTX2007
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
Xironga New Testament with Psalms © Bible Society in Mozambique, 2007.
