Mnt 19
19
Pawulosi a Efesa
1Loko Apolo ahali Korinto, Pawulosi atremakanyi matiko ya tinhava, atlhasa Efesa. Akumiki kone a vadondrisiwa vakuhlawanyana, 2kutani avavutisa aku: Xana n'wayamukelile a Moya wa Kuxwenga loko n'wipfumelile? Vaku ku yene: Ahingiswiyingela leswaku kuni Moya wa Kuxwenga! 3Pawulosi avavutisa na kone aku: Ke i babatiso drini n'wibabatisiwiki ku drone? Vayangula vaku: I babatiso dra Yohana. 4Kolahu Pawulosi aku ku vone: A babatiso dra Yohana afa drili dra kutisola, na abyela vhanu leswaku avapfumele ku lweyi ataka ntrhaku kwake, anga Yesu. 5Ntrhaku ka kuyingela leswo, vahanga babatisiwa avitweni dra Hosi Yesu. 6Kutani loko Pawulosi ava ntlhanteka mavoko, a Moya wa Kuxwenga wuxikela henhla kwavu, vahanga khanela hi tindrimi timbeni ni kuprofeta. 7A vavanuna lavo hinkwavu afa vali khume na vabiri.
8Pawulosi ke afa aya asinagogeni, adondrisa hi xixixi ha tihweti tiraru, a khanela, akholwisa vhanu hi timhaka ta Mfumu wa Xikwembu Nkulukumba. 9Kambe leswi van'we ku vone afaka vatinonon'hwisa, vangapfumeli, na vahlaya kubiha hi ndlela ya Hosi amahlweni ka xitrhungu, Pawulosi atravukani navu, ahlawula a vadondrisiwa, adondrisa masiku hinkwawu a xikolweni xa Tiranu. 10Aswiyentxisa xiswoswo ha malembe mabiri, lakakuva hinkwavu avayaki va Aziya vayingela a ritu dra Hosi: Va-Yuda ni va-Girika. 11Na swone, Xikwembu Nkulukumba afa ayentxa mahlolana makulu hi mavoko ya Pawulosi, 12lakakuva vabeka ni le henhla ka timbabyi a makapulana ni minturu yake, kutani a mavabyi yavu masuka, na yone mimoya leyi minfani mihuma ku vone. 13Kolahu van'we va va-Yuda, afaka vafamba-famba, na vali vahlongoli va mimoya leyi mimfani, vadringisa kuvitanela a vito dra Hosi Yesu ahenhla ka va mimoya leyi mimfani, na vaku: Han'wileleta hi vito dra Yesu, lweyi Pawulosi amutivisaka, humani! 14Lava afaka vayentxa leswo, afa vali vana van'we va ntlhanu na vabiri va muprista lwenkulu Skeva. 15Kambe a moya lowu mfani wuvayangula wuku: Yesu, namutiva, na yene Pawulosi namutiva. Kutani n'wine-ke, n'wi va mani xana? 16Kolahu a mhunu lweyi a moya lowu mfani afaka wuli ku yene, avawela henhla, avahlula hi ntamu lowukulu, akhoma vabiri avaxanisa hi ntamu, lakakuva vahuma andlwini leyo, na vangayambalanga ntxhumu, vatrutruma na vatali hi timbanga. 17A mhaka leyo yitibyiwa hi hinkwavu, va-Yuda ni va-Girika lava vayakiki Efesa, vakhomiwa hi kutxhava; kutani a vito dra Hosi Yesu afa drikulisiwa. 18Vanyingi lava vapfumeliki ku Hosi vata, vatatatihlaya livaleni, vatitrhandra a mintiro yavu. 19Ni vanyingi lava vatiriki swa vungoma, vabuyisa mabuku yavu matatahisiwa amahlweni ka hinkwavu. Loko kuhlayiwa nxavu wa wone, vakuma wudringana ntlhanu wa makume ya makume ya madzana ya madenari (50.000). 20Hi swoswo, a ritu dra Hosi driyandra dritiyisiwa hi ntamu.
Dzolonga a Efesa
21Ku ti loko timhaka leto tiyentxekile Pawulosi atihambela a kungu dra kuya a Yerusalema na atremakanya hi Makedoniya na Akaya; afa aku: Ntrhaku ka kuya Yerusalema, nifanekela nakone a kuyavona a Roma. 22Loko arumeli a Makedoniya vabiri va vapfuni vakwe: Timotewu na Erasto, yene ahlwelili nkama wa kulehanyana a Aziya.
23Hi minkama yoleyo, kuhumelela dzolonga drikulu hinkonta ya Ndlela ya Hosi. 24Hikusa mun'we, a vito drakwe anga Demetriyo, mufuli wa silivhela, afaka ahamba hi silivhela a mimbangu ya kubeka kone a swivumbiwa atempeleni dra Artemisi, afa akumela bindru drikulu a vafuli va silivhela. 25Avahlengeleta kun'we ni vatiri kulobye, aku: Vavanuna, n'waswitiva leswaku akufuya kweru kupfa antirweni wolowu, 26na kone, n'waswivona, ni kuswiyingela leswaku ahi le Efesa ntsena, kambe hi Aziya hinkwaku, Pawulosi yelweyo akholwisa vhanu vanyingi, avandruluta hi kuhlaya leswaku, a swikwembu leswi swiyentxiwaka hi mavoko ya vhanu ahi swikwembu. 27Ke ahi ntsena ntiro weru lowu wunga khombyeni dra kudreliwa, kambe na drone a tempele dra xikwembu xeru Artemisi dritahlayiwa leswaku ahi dra ntxhumu; a vukulu bya lweyi atxhaviwaka hi tiko hinkwadru dra Aziya ni misava hinkwayu, byitadjula kuhelela mfuri.
28Loko vayingeli maritu lawa vatala hi kuhlundruka vabandlukana vaku: I nkulu Artemisi wa va-Efesa! 29A muti hinkwawu wuvani nkitrinkitri; mfuri vatrutrumela ndlwini ya mintlangu, na vakhomi Gayo na Aristariko va-Makedoniya, vayendrikulobye va Pawulosi. 30Pawulosi afa adjula kuyatikombisa amahlweni ka nhlengeletanu, a vadondrisiwa vangamupfumeleli. 31Na tone tindruna tin'we ta le Aziya leti afaka tili vanghanu va Pawulosi, timurumela ku yene, a maritu ya kumutratriya akuva angatinyikeli andlwini ya mintlangu. 32Hikolahu-ke kusungula a mpfilu-mpfilu, van'we vabandlukana hi ndlela yin'we, avan'wana hi ndlela yimbeni. Vanyingi ku vone afa vangaswitivi ni leswi vahlengeletaneliki swone! 33Van'we afa vasusumetela Alexandre, na va-Yuda vamuyisa amahlweni ka nhlengeletanu, kambe yene akwehleta hi voko, akombela kuhlaya ntxhumu ku xitrhungu. 34Kambe vone vatiki va vona leswaku i mu-Yuda, vabandlukana hi xipimu xa minkama mibiri (02h00), vaku: I nkulu Artemisi wa va-Efesa! 35Lweyi wa mutrali wa muti amiyeta a xitrhungu, aku: Vavanuna va-le-Efesa, xana hi wini a mhunu lweyi wa kuka angativi leswaku a muti wa Efesa hi wone mubekisi wa tempele dra Artemisi lweyi anga nkulu, ni xifaniso lexi xiwiki hi le tilweni, xana? 36Leswi a timhaka leti tingakanetiwiki, rulani, n'wingayentxi ntxhumu hi magugu. 37Hikusa a vhanu lava, n'wivatisi na vanga nyamisanga tempele nambi kusandra a xikwembu xeru. 38Ke, loko Demetriyo ni switiri leswi swinga na yene valinimhaka ya kutengisa mhunu, ma kone masiku ya ku khanela, ni vafuminyana va kone, avarambelani vone vuswavu. 39Loko n'witengisana hi tin'wana timhaka, titatremiwa nhlengeletanwini hi nawu. 40Hikusa hingatxhuka hirambeliwa hinkonta ya pongwe dra namuhla, leswi kungeke na mhaka leyi hingahlayaka yone hinkonta ya nhlengeletanu leyi. 41Loko ahlayi leswo, ahangalasa nhlengeletanu.
നിലവിൽ തിരഞ്ഞെടുത്തിരിക്കുന്നു:
Mnt 19: NTX2007
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
Xironga New Testament with Psalms © Bible Society in Mozambique, 2007.
