I Kor 4
4
Ntiro wa vapostola
1Xiswoswo, a vhanu hinkwavu avavoni swanga vatireli va Kriste, ni valaveleli va swihundla swa Xikwembu Nkulukumba. 2Ntlhanta kubiri, leswi swidjulekaka ku valaveleli, hileswaku mun'wana-ni-mun'wana ava lweyi adumbekaka. 3Na swone, ku mine i ntxhumu wutrongo ngopfu a kuyavanyisiwa ha n'wine, kumbe a kuyavanyisiwa hi huvu ya ximhunu; mfuri nambi mine ha vuswanga anitiyavanyisi! 4Hikusa anititivi na nini nandru, kambe nambi swili tanu, anitihlayi na nili lweyi alulamiki hikusa a Hosi hi yone yiniyavanyisaka. 5Hileswo-ke, n'wingayavanyiseni ntxhumu na nkama wungasinatlhasa, kukota kutlhasa Hosi; anga Yene atakavaninga leswi swifihlekiki, swa munyama, atakavonekisa ni makungu lawa manga timbilwini ta vhanu; laho-ke mun'wana-ni-mun'wana atayamukela a kukhensiwa hi Xikwembu Nkulukumba.
6A mintxhumu leyi, vamakweru, nimifanisi ha mine na Apolo hinkonta yenu, akuva n'widondra ku hine akuva n'wingatluli leswi switraliwiki ni kuva amakari kwenu kungavini lweyi atikulisaka a henhla ka mun'wana.
7Hikusa hi mani lweyi akuhambanisaka ni van'wana, xana? Nakone una yini leswi unganyikiwangakiki? Mfuri leswi wekeyamukela ntsena, hayini-ke utitwalisa, swanga hi loko leswi unga naswu unganyikiwanga?
8N'wine swoswi n'wixurile, n'wi swipfundri, na n'wingana hine, n'wifumile; mawaku loko ingi ha kunene n'wingafuma, akuva na hine hitafuma kun'we na n'wine! 9Hikuva nipimisa leswaku Xikwembu Nkulukumba ahibeki, hine vapostola, swanga va vugamu; hikombisiwa swanga hiyavanyiseliwi lifu, hikuva hindruluki xihlamaliso amisaveni, amahlweni ka tintrumi ni ka vhanu. 10Hinkonta ya Kriste hine hi swihunguki; kambe n'wine n'wi tintivi ku Kriste; hine hi va gome, kambe n'wine n'wi va ntamu; n'wine n'wi va kutxhaviseka, kambe hine hayeyisiwa. 11Kutlhasa nkama lowu, hini ndlala ni tora, hiyambala a switlatla, hayamasiwa timpama, ahina vutrhamu bya kutiya, 12na kone hakarateka na hitira hi mavoko yeru. Loko hirukiwa, hihlayela vunene; loko hixanisiwa, hatiyisela; 13loko hilumbetiwa, hiyangula hi maritu ya hombe; kutlhasa ni swoswi, hindruluki swanga nsila ya misava leyi, ni leswi switxukumetiwaka hi hinkwavu.
14Anin'witraleli leswi kuva nin'wikhomisa tingana, kambe akuva nin'wikhwavela swanga vana vanga lava varandrekaka ngopfu. 15Hikusa nambi n'wingavani dzana dra madzana ya vadondrisi ku Kriste, kambe an'wina vatatana vanyingi, hikuva hi mine nin'wibelekiki ku Yesu Kriste, hikola ka Ivangeli. 16Hileswo-ke nan'witratriya leswaku n'wiva vayetisi vanga. 17Hikola ka leswo nin'wirumeli Timotewu, anga n'wananga wa kurandreka ni kudumbeka a Hosini, akuva atan'widrimuxa a tindlela tanga ku Kriste, kukotisa leswi nidondrisaka matlhelo hinkwawu akerekeni drin'wana-ni-drin'wana.
18Kambe, hikuva mine ningati ku n'wine, van'we vatikukumuxile; 19Kambe loko a Hosi yiswirandra, ndreni ka nkamanyana nitan'wiyendrela; laho-ke nitativa, kungali ritu dra lava vatikukumuxaka, kambe a ntamu wavu; 20hikuva a Mfumu wa Xikwembu Nkulukumba awutiyisiwi hi ritu, kambe hi ntamu. 21Xana n'wirandra yini? Leswaku nita ku n'wine ni nhonga, kumbe ni lirandru ni moya wa vumbilu xana?
നിലവിൽ തിരഞ്ഞെടുത്തിരിക്കുന്നു:
I Kor 4: NTX2007
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
Xironga New Testament with Psalms © Bible Society in Mozambique, 2007.