Ndandililo 49
49
Che Yakubu akwapa upile achiŵanagwe
1Che Yakubu ŵaaŵilasile achiŵanagwe ni kwasalila, “Nsongangane pamo nansalile ichiinsimane pa moŵa gagakwika.
2Nsongangane mpilikanile mwanya ŵanache ŵa che Yakubu.
Mumbilikanile une Isilaeli atati ŵenu.
3Ugwe che Lubeni, mwanache jwangu jwakwitiwo, nli machili gangu,
ni nammeleche ndili jwanchanda.
Mwa ŵanache ŵangu wose mmwejo mwapundile kwa luchimbichimbi ni kwa machili.
4Mmwe nli mpela chikumbameesi,
Nambo ngamma sooni mundu jwakuchimbichikwa,
Ligongo nganinjogopa kukwela pachindanda changu,
Mwapasakesye peuto pagona une atati ŵenu.
5Che Simeoni ni che Lawi ali achalongo.
Indu yao yakumenyanila pangondo akuitumia kwa kutendelela indu ya ukaatili.
6Uneji ngaangamulana nawo paakuŵecheta yantemela yao,
Ngaangamulana nawo pansongangano wao,
Ligongo ŵaauleje wandu mwa chikali,
Ni kwa usache wao ŵaakatile mitasi ng'ombe.
7Ngukulwesya kutumbila kwao pakuŵa kuli kwakogoya nnope,
Sooni nguchilwesya chikali chao changali chanasa.
Tinjapwilinganya mu chilambo chose chi che Yakubu
Tinjamwasanya mu chilambo chose cha ku Isilaeli.
8Mwe che Yuda, achalongo achinjenu tachinlapa
Ŵammagongo ŵenu tinchapunda,
Ni achalongo achinjenu tachintindiŵalila.
9Che Yuda ali nti lisimba,
lyalikuuja kutyochela kukusakula
Che Yuda ali nti lisimba likulijongola ni kugona paasi,
Nti lisimba lyankolo, nduni jwakukombola kulijimusya?
10Che Yuda chaŵe mwenye moŵa gose,
Ni iŵelesi wakwe chiutawale moŵa gose.
Tachitenda yeleyo mpaka pataiche nsyene umwenye,
Jwele jwati ŵandu wose ŵa ilambo chachinjitichisya.
11Tachijitaŵilila mbunda jakwe pachitela cha msabibu
Nombe mwanambunda jwakwe pachitela chambone cha msabibu.
Yakuwala yakwe akuchapa mu divai ni miinjilo jakwe mu divai jechejeu.
12Meeso gakwe tigaŵe gakuchejela ligongo lya kung'wa nnope divai,
Ni meeno gakwe gamaswela kugapunda maŵele.
13Che Sabuloni tachiwa mungulugulu bahali,
Yombo ya mubahali taachijimika mwelemo.
Mpika wa chilambo chakwe chiuŵe mumbali mwa Sidoni.
14Che Isakali ali mpela mbunda jamachili
Jwagonile pasikati ja misigo jakwe.
15Ŵapaweni peuto pakupumulila kuti pali pambone
ni kuti sooni chilambo cho chili chambone.
Ŵajineme kutwichila nsigo
Ŵaliji kapolo jwakupanganya masengo gakwakanganichisya.
16Che Dani tachiŵa jwakulamula jwa ŵandu ŵakwe
tachiŵa jumo jwa ngosyo syose sya ku Isilaeli.
17Che Dani tachiŵa mpela lijoka mwitala
lijoka lya sumu mungulugulu litala,
Lyalikuluma indende ya falasi
ni jwakukwela falasi akugwa lugali.
18Alakwe Ambuje Akunnungu ngulindilila chikulupusyo chenu.
19Che Gadi taguluchilwe ni ŵachiswamba
nambo ŵelewo tachakuya chapanyuma ni kwaputa.
20Che Asheli tachilya yakulya yambone
Tachisogosya yakulya yakuŵajilwa kuligwa ni mamwenye.
21Che Nafutali ali mpela ngolombwe jajilechelelwe kwendanjenda
Jajikuŵeleka ŵanache ŵakusalala.
22Che Yusufu ali mpela msabibu waukusogola isogosi
Chitela chachikusogola mungulugulu uliŵa.
Nyambi syakwe sitambasukulile mu likumba.
23Ŵandu ŵakwete mikunje ni mipamba ŵamputile kwa mipamba.
Ŵamponyele mipamba ni kunsausya kakajinji.
24Nambo ukunje wakwe uli chilimbile
Makono gao gatajikwe machili,
kwa ukombole wa jwali ni machili, Akunnungu jwa che Yakubu
Kwa liina lya jwakuchinga, ŵelewo lwala lwa Isilaeli.
25Elo, Akunnungu ŵa atati jwenu ni juchankamuchisye
Akunnungu jwali ni machili ni jutachimpa upile
Jutachimpa upile pakumpa ula kutyochela kwinani
Ni upile kutyochela mmeesi gakwendesya,
Ni upile wakukola ng'ombe syesijinji ni ŵanache.
26Upile kutyochela kwa atati ŵenu uli wa machili
kuupunda upile wa matumbi ga chiikala,
chiuŵe wambone kupunda indu yambone yaikutyochela mmatumbi go.
Upile wosepe uŵe pantwe wa che Yusufu
pachanya pa usyo wa jwelejo juŵalekangene ni achalongo achinjakwe.
27Che Benjamini ali mpela lisogo lyakogoya.
Kundaŵi likuulaga ŵammagongo ŵakwe ni ligulo likwagaŵila ŵane yasumwile.”
28Syelesi sili ngosyo kumi na mbili sya ŵandu ŵa ku Isilaeli, ni yeleyi ni iŵaŵechete che Yakubu atati ŵao kwa ŵanyawo, pa lyuŵa liŵampaga upile. Jwalijose ŵampele upile ŵaukummajila.
Chiwa chi che Yakubu
29Pelepo che Yakubu ŵaasalile achiŵanagwe, “Une mandichile kuwa, nkaasiche kwagonile achatati ŵangu mu mbugu jijili mungunda u che Efuloni jwa lukosyo lwa Ŵahiti, 30Akula ku Makipela kungopochelo lyuŵa kwa musi wa Mamule mu chilambo cha Kanaani. Che Ibulahimu ŵasumile mbugu ni ngunda wo kutyochela ku che Efuloni jwa lukosyo lwa Ŵahiti kuti paŵe pakwe pakusichila. 31Kweleko ni muŵansichile che Ibulahimu ni che Sala ŵankwawo, kukoko ni kuŵansichile che Isaka ni che Lebeka ŵankwawo, sooni kukoko ni kunaasichile che Lea ŵankwangu. 32Ngunda pamo ni mbugu jijili mungunda yasumikwe kutyochela kwa Ŵahiti.” 33Che Yakubu paŵamasile kuŵecheta yeleyo yose ŵagonile sooni pachindanda pala. Pelepo ŵapumwile mbumu ja mbesi ni kwasika.
നിലവിൽ തിരഞ്ഞെടുത്തിരിക്കുന്നു:
Ndandililo 49: YBV
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
Yao New Testament © The Word for the World Southern Africa and Pioneer Bible Translators, 2018.
