Ndandililo 45
45
Che Yusufu akulimanyukusya
1Pelepo che Yusufu ŵalepele kulisiŵila paujo pa ŵandu uŵalongene nao, ŵanyanyisye achitiji “Ŵandu wose ajaule paasa.” Nipele che Yusufu ŵalimanyukwisye kwa achakulu ŵakwe pangapagwa ŵandu ŵane. 2Nambo ŵalisile mwakupikanika mwakuti ŵandu ŵa ku Misili ŵampilikene, ni ŵandu ŵa mu nyuumba ja Falao ŵalipilikene nombe. 3Che Yusufu ŵaasalile achakulu wakwe, “Une ndili che Yusufu, atati ŵangu ali jwanjumi?” Nambo achakulu ŵakwe ŵagambile jasaa paujo pao ni kulepela kwajanga pakuŵa ŵakamwilwe ni lipamba. 4Nipele che Yusufu ŵaasalile achakulu ŵakwe, “Choonde mumandichile.” Paŵaŵandichile ŵaasalile, “Uneji ndili mpwenu che Yusufu umwasumisye ku Misili. 5Nambo sambano nkajogopa atamuno kuŵechetana mwachinsyene kwa kuusumisya. Usyene, Akunnungu ambeleche akuno nannongolele kuti ngombole kuukulupusya umi wenu. 6Achino chili chaka chaaŵili cha sala pachilambo pa ni kwana sala yaka yiine nsano yaikwika, ichiiŵe pangali yakupanda namose kugungula. 7Akunnungu ambeleche akuno nannongolele kuti naugose umi wenu nsigalile ŵajumi pa chilambo chi ni kummombola kwa chiŵombosyo chekulungwa. 8Kwayele ngaŵa ŵanyamwe umumbeleche une akuno, nambo Akunnungu ambeleche akuno. Andesile kuŵa atati kwa Falao, ni jwakwimilila jwankulu jwa nyuumba jao, ni jwakutawala chilambo choose cha Misili.
9“Nipele, njanguye, njaulanje kwa atati nkaasalile, che Yusufu nchanda jwenu akuti, ‘Akunnungu andesile me jwankulu jwa chilambo chose cha Misili. Nipele nkakaŵa kwika akuno kundi une. 10Chintame ku chilambo cha ku Gosheni mwakuŵandikana ni une, mmwe ni ŵanache ŵenu ni isukulu yenu pamo ni ilango yenu ni ipanje yose inkwete. 11Pachinchiŵa ku Gosheni, chinangose mmwe, ni achalongo ŵenu pamo ni ilango yenu kuti nkawa ni sala pakuŵa isigalile yaka nsano ya sala jannope.’ ”
12Nipele che Yusufu ŵatite, “Sambano ŵanyamwe mwachinsyene nnyiweni kwa meeso genu, namose mpwanga che Benjamini aiweni kwa meeso gakwe kuti ndili une che Yusufu jungukunguluka ni ŵanyamwe. 13Nkaasalile atati ŵangu nkati ulamusi undinao akuno ku Misili, ni yose innyiŵeni. Nipele njanguye nkaiche nao akuno.”
14Nipele che Yusufu ŵakumbatile che Benjamini apwao, ni kutanda kulila. Nombe nawo che Benjamini ŵalisile ali akumbatilene. 15Ŵaakumbatile achalongo ŵakwe wose akuno achililaga. Pakumala yeleyo, achalongo ŵakwe ŵatandite kukunguluka nawo.
Falao akunnalika che Yakubu
16Ngani jila pajapikaniche ku nyuumba ja Falao kuti achapwakwe che Yusufu aikangene, Falao ni ŵakutumichila ŵakwe ŵasangalele. 17Kwayele, Falao ŵaasalile che Yusufu, “Nkaasalile achapwenu, apachile misigo pa inyama yao, ni kuuja ku Kanaani, 18akaajigale atati ŵao ni achalongo ŵao ni kwaikanao apano. Uneji chinaape liuto lyambone lyakutama pa Misili, kuchatame ni kulya chilichose chachichipatikane ni kusangalala. 19Sooni mwaasalile, ajigale mutuka syakwekwelemya ni inyama kutyochela ku Misili kuti akaajigalanje ŵanache ŵao pamo ni achiŵankwawo ni atati ŵenu. 20Mwasalile akaganisisya nkati ipanje yao, pakuŵa liuto lyambone kupunda gose ga pa Misili chiliŵe lyao.”
21Ŵanache ŵa che Yakubu ŵatesile mpela yatite pakulajiswa. Che Yusufu ŵapele mutuka ni yakulya ya mwitala, malinga ni iŵalajisye Falao. 22Kila jumo jwao ŵampele mwinjilo wine, nambo che Benjamini ŵapele ipande mia tatu ya madini ga feza ni minjilo jine nsano. 23Sooni ŵaapelechele atatigwe aji mituuka ji kwaligongo lya ulendo wakwe: Mbunda likumi syasijigele indu yambone ya Misili, ni mikolo ja mbunda kumi sisyajigele yakulya, mikate ni indu ine. 24Nipele, che Yusufu ŵalangene ni achapwakwe, ni alinkutyoka ŵaasalile, “Nkakangana mwitala.”
25Pelepo ŵatyosile ku Misili ni kwaula kumusi kwa atati ŵao yaani che Yakubu, ku chilambo cha Kanaani. 26Ŵaasalile atati ŵao, “Che Yusufu ali jwanjumi! Ali jwankulu jwa chilambo chose cha Misili!” Che Yakubu ŵagambile jasaa, nganakombola kugakulupilila maloŵe gao. 27Nambo paŵaatanjile yanayose iŵalajisye che Yusufu, ni paŵasiweni mutuka siŵapeleche che Yusufu kukwajigala, ntima u che Yakubu wakwete machili sooni. 28Ŵatite, “Sambano ntima wangu utulele, mwanangu che Yusufu ali jwanjumi. Chinyaule ngaalole nganime kuwa.”
നിലവിൽ തിരഞ്ഞെടുത്തിരിക്കുന്നു:
Ndandililo 45: YBV
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
Yao New Testament © The Word for the World Southern Africa and Pioneer Bible Translators, 2018.
