Ndandililo 43
43
Che Benjamini akwaula ku Misili ni achapwakwe
1Mu chilambo cha Kanaani sala jajendelechele kuŵa jekulungwa kwannope. 2Pachamasile chakulya chiŵachisumile ku Misili kula, che Yakubu ŵaasalile achiŵanagwe, “Njaule sooni ku Misili, nkatusumile yakulya kanandi.”
3Nambo che Yuda ŵaasalile atatigwe ŵala kuti, “Mundu jula ŵatujamwiche kwa ching'ang'a achitiji, ‘Ngasinampochela sooni iŵaga ngannyika ni mpwenu jwannandi.’ 4Iŵaga nkukunda kuti mpwetu ajaule pamo ni uwe, tutujaule kunsumila yakulya. 5Nambo iŵaga ngankunda ajaule ni uwe, noweji ngatutuluka kwaula kweleko, pakuŵa mundu jula ŵatusalile, ‘Ngasinampochela sooni iwaga ngannyika ni mpwenu jwannandi.’ ”
6Che Yakubu ŵausisye, “Kwachichi munyinjisye nkusauka kwanti nyi pakunsalila mundu jo kuti nkwete mpwenu jwine?”
7Ŵanyawo ŵanjanjile, “Mundu jo ŵatuuchilichisye kwannope ngani syetu ni sya achalongo achinjetu, ŵatite, ‘Uli atati wenu ali chiwela ŵajumi? Uli nkwete mpwenu jwine?’ Kwayele twanjanjile malinga ni iŵatite kutuusya. Tukaimanyilile chinauli kuti chatusalile, ‘Munnyichenawo mpwenu jwannandi pelepa?’ ”
8Che Yuda ŵaasalile che Yakubu atatigwe, “Mumbe une nchanda ju kuti tukakaŵa kwaula, kuti mmwe atati ni uwe ni ŵanache ŵetu tukawa ni sala. 9Une nansyene chime poni jawo, ŵalakwe mudai une. Iŵaga une ngangummusya kukwenu ni mmwe kwawona kwa meeso genu, chime jwalaumika paujo penu mu umi wangu wose. 10Ngatukakaŵe, sambano tukaliji tuli tujawile ni kuuja kaŵili.”
11Nipele che Yakubu atati ŵao ŵaasalile, “Iŵaga yeleyo ni yaikusachilwa kuŵa, ayaga, ntendeje yeleyo. Patinjaule njigalanje isogosi yambone nnope ya mchilambo muno mmagunia genu, nkampe ntuuka mundu jo. Munjigalile mauta ga ukwesu kanandi ni uchi kanandi ni ubani ni manemane ni kungumanga ni ngangaula. 12Njigalanje mbiya syejinji pakuŵa chinsiusye asila mbiya sisyasimanikwe mmagunia mwenu sila, panepa syaŵichikwe mmagunia mo pangaŵanichisya. 13Munjigale mpwenu ju ntyochanje njaule kwa mundu jo. 14Akunnungu jwaukombole wose antendele chanasa paujo pa mundu jo kuti akannechelele mpwenu jula ni che Benjamini. Kwangu une iŵaga kuli kuwililwa ni achiŵanangu, ayaga, nambi tindende uli!”
15Nipele, ŵandu ŵala ŵajigele mituka jila ni mbiya syasijinji, ŵanjigele sooni che Benjamini. Ni watandite ulendo mwanja ku Misili. Paŵaiche, wajawile ni kwima paujo pa che Yusufu. 16Che Yusufu pawammweni che Benjamini ali pamo nawo, ŵansalile jwakwimilila nyuumba jakwe “Mwajausye ŵandu ŵa ku nyuumba kwangu, nkachisikite chinyama, nkachilinganye chakulya pakuŵa chalye ni une muusi uno.” 17Jwakwimilila jula ŵatesile mpela iŵasalilwe ni che Yusufu, ŵaajawisye ŵandu ŵala ku nyuumba ji che Yusufu.
18Ŵandu ŵala paŵaiweni kuti ŵaajawisye ku nyuumba ji che Yusufu ŵajogwepe, ni ŵaliji nkuganisya kuti, “Atuichisye akuno ligongo lya mbiya siŵasiuchisye mmisaku jetu pa ulendo waandanda ula. Akusaka kutuguluchila ni kutupunda, asijigale mbunda syetu ni kututenda achikapolo ŵakwe.” 19Kwayele ŵansejelele jwakwimilila nyuumba ji che Yusufu jula, ŵakungulwiche nao ali pannango wa nyuumba. 20Ŵatite, “Achimwene, choonde, uweji twaiche pelepa kaandanda kukusuma yakulya. 21Nambo patwaiche pakugona achalendo mwitala mo, twaugwile magunia getu, ni twasimonjile kusimana mbiya sya kila jumo jwetu kukang'wa kwa ligunia lyakwe. Sambano tujigele mbiya syo kuusya. 22Sooni tuiche ni mbiya sine syakuti tusume yakulya. Ngatukummanyilila juŵaŵisile mbiya syo mmagunia mwetu.”
23Jwakwimilila jula ŵaasalile, “Yambone, nkajogopa. Akunnungu jwenu, Akunnungu jwa atati ŵenu ni juŵaŵisile mbiya mmagunia mwenu. Uneji napochele mbiya syenu.” Jwakwimilila jula ŵankopwesye che Simeoni ni kunnyika nawo paŵaliji ŵanyawo.
24Jwakwimilila jula ŵaajinjisye ŵandu ŵala mu nyuumba ji che Yusufu, ŵaapele mesi ga kulikunda mmakongolo ni kusilisya mbunda syao. 25Ni ŵanyawo ŵaŵisile chile mituuka jao kuti ŵaape che Yusufu pataiche, pakuŵa ŵapilikene kuti chalye pamo nawo. 26Che Yusufu paŵaiche pamusi, achalongo achinjakwe wala wampele ajila mituuka jiŵaliji nawo, ni ŵantindiŵalile ni kwajinamila. 27Che Yusufu ŵaakomasisye, nipele ŵausisye kuti, “Ana atati ŵenu ŵamwasalile kuti achekulwipe ŵala, ali uli? Ana ali ŵajumi?”
28Ŵanjanjile, “Jwakutumichila jwenu atati ŵetu ali chiwela ŵajumi ni sooni akwendelechela chenene.” Nipele ŵantindiŵalile ni kwajinamila kwa kwachimbichisya.
29Che Yusufu paŵammweni che Benjamini mpwakwe, mpwakwe jwa lutumbo lumo, ŵausisye, “Ana ajuju ni mpwenu jwambesi jumwasalile ngani syakwe jula. Akunnungu ampe upile mwanangu.” 30Che Yusufu watyosile kwachitema ligongo ŵasakaga kulila pakuŵa muntima mwakwe ŵannajilaga mpwakwe jula, ni ŵajinjile mu chuumba mwakwe ni kulila mwelemo. 31Paŵamasile kulila ŵapukwite misosi ni kukopoka paasa, ŵalilimbisye ntima ni kulajisya aichenacho chakulya. 32Che Yusufu ŵaaŵichile pajikape, ni achalongo achinjakwe ŵala ŵaaŵichile achinsyenepe ni Ŵamisili ŵaŵalyaga pamo nawo ŵaaŵichile achinsyenepe pakuŵa Ŵamisili ngaakulya pamo ni Ŵaebulania, ligongo kwa Ŵamisili yaliji uchimwa kulya ni Ŵaebulania. 33Achalongo ŵakwe che Yusufu ŵala ŵatemi paujo pa che Yusufu malinga ni iŵatite pakupagwa, kutandilila jwakwitiwo mpaka jwa mbesi. Achalongo ŵala paŵalolite iŵatite pakwatamika, ŵasimonjile ni ŵagambaga kulolegana. 34Yakulya iŵalyaga yajigalikwaga kutyochela pa mesa ji che Yusufu ni kwajauchisya, nambo che Benjamini ŵampele kasano kwapunda ŵanawose ŵane. Nipele ŵalile ni kung'wa pamo ni che Yusufu ni kusangalala.
നിലവിൽ തിരഞ്ഞെടുത്തിരിക്കുന്നു:
Ndandililo 43: YBV
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
Yao New Testament © The Word for the World Southern Africa and Pioneer Bible Translators, 2018.
