Kutyoka 30
30
Chilisa chakututumichisya ubani
(Kutyoka 37:25-28)
1“Nchikolosye chilisa chakututumichisya ubani kwa mbao sya nsonobali. 2Chilisa cho uleu wakwe ni chanchijipi mwakwe mulandane ni lisusa lyakwe liŵe sentimita tisini. Misengo ja chilisa cho jakamulene ni chilisa chisyene. 3Nkachiunichile chilisa cho kwa sahabu jakusalala, pachanya pakwe ni mumbali mwakwe mose pamo ni misengo jakwe. Nkakolosye nchenjeka kwa sahabu kusyungula chilisa chose. 4Nkolosye pete siŵili sya sahabu ni kusiŵika kuusi kwa nchenjeka mumbalati siŵili. Pete syo situmiche kujinjisya itela yakunyakulila. 5Nkolosye itela iŵili kwa chitela cha nsonobali ni kuiunichila kwa sahabu. 6Nkachiŵiche chilisa cho paujo pa nguo jalusasa jajili mbujo mwa Lisanduku lya Lilangano lyalili mbujo mwa chiunichilo cha lisanduku, peuto pati chiisimane ni mmwe. 7Kila lyuŵa kundaŵi Che Haluni chatutumisye ubani pa chilisa katema kakuiŵika chile imuli, 8Ni ligulo chatutumisye ubani katema pachachipamba imuli. Mbopesi ja ubani chijityochekwe moŵa gose paujo pangu une AMBUJE kwa iŵelesi yenu yose. 9Nkatutumisya ubani wine wangaukukundikwa pachanya chilisa chi, pane kutyosya mbopesi jakutinisya atamuno mbopesi ja yakulya namose kwitila mbopesi ja yakung'wa. 10Che Haluni chachitenda ujilanyo kamo kwa chaka pachanya misengo ja chilisa cho. Kwilanywa ko kupanganyikwe kwa miasi ja mbopesi ja kutyosya sambi kwa iŵelesi yenu yose yaikwika. Chilisa cho chili cheswela nnope ni jityosyekwe kwa une AMBUJE.”
Nsongo kwaligongo lya Lisakasa Lyakusimanilana ni Akunnungu.
11AMBUJE ŵasalile che Musa, 12“Mwaŵalangaga Ŵaisilaeli, kila mundu tandipe une AMBUJE kuuwombola umi wakwe, kuti kukapagwa ni ilwele yakogoya pasikati jao katema ka kwaŵalanga. 13Kila mundu juchaŵe mu mpingo wa ŵandu uchaŵalanjikwe talipe nti gilamu sita malinga ni chipimo chachiŵichikwe pa Lisakasa Lyakusimanilana. Kila mundu alipe nti sadaka kwa AMBUJE. 14Jwalijose juchaŵalanjikwe, jwali ni yaka ishilini pane kupunda, chambe une AMBUJE chele chipimo cho. 15Jwakusichila akatyosya mwakuchuluya, nombe jwakulaga akatyosya mwakupungusya chipimo chachiŵichikwe katema kakutyosya malipilo ga kuuwombola umi wenu kwa AMBUJE. 16Chimpochele mbiya sya ujilanyo kutyochela kwa Ŵaisilaeli, ni nkasitendele masengo ga Lisakasa Lyakusimanilana. Chiŵe chikumbuchisyo kwa Ŵaisilaeli paujo pa AMBUJE kuti aliwombwele umi wao.”
Ntala wa shaba wa kunaŵila
17AMBUJE ŵansalile che Musa, 18“Nkolosye ntala wa kuŵichila meesi gakunaŵila kwa shaba ni chitamichilo chakwe chiŵe cha shaba. Nkauŵiche pasikati ja Lisakasa Lyakusimanilana ni Akunnungu ni chilisa, nkataje meesi mwelemo. 19Che Haluni ni achiŵanagwe chanaŵe makono ni makongolo gawo kwa meesi go. 20Chatende yeleyo kila pakwinjila mu Lisakasa Lyakusimanilana ni katema kakuchiŵandichila chilisa kuti ambelechele mbopesi sya kutinisya une AMBUJE. Chanaŵe meesi go kuti anaiche kuwa. 21Chanaŵe makono ni makongolo gao kwayele ngaawa. Lilajisyo li, chiliŵe kwaligongo lya che Haluni ni iŵelesi yakwe yose yaikuika.”
Mauta gakwajitilila ŵambopesi
22AMBUJE ŵaasalile che Musa, 23“Njigale yakununjila nnope nti, mauta ga manemane gakwanila lita sita, ni ndalasini kilo sitatu, ni kilo sitatu sya miwa yaikununjila yambone, 24pamo ni ndalasini wa uŵele wine kilo sita. Ipimo yose yo iŵe malinga ni chipimo chachiŵichikwe pa Lisakasa Lyakusimanilana ni Akunnungu. Njigale nombe mauta ga mseituni lita ncheche. 25Nkolosye mauta kwaligongo lya kwajitilila ŵakutyosyekwa kwa AMBUJE. Gewanganye yambone ni kununjila yambone 26Chinjitilile mauta go pa Lisakasa Lyakusimanilana ni Akunnungu Lisanduku lya Lilangano, 27meza ni yoombo yakwe yose; chindu chakuŵichila lumuli ni yoombo yakwe, chilisa cha kututumichisya ubani, 28pamo ni chilisa cha kutinichisya mbopesi ni yoombo yakwe ni ntala wa kunaŵila ni chitamichilo chakwe. 29Mundyochesye une indu yo kuti iŵe yeswejele nnope. Chindu chilichose chakwayaga indu yo, nombecho chichiŵe cheswejele. 30Nipele munjitilile mauta che Haluni ni achiŵanagwe ni kwatyosya kukwangu kuti andumichile nti ŵambopesi. 31Mwasalile Ŵaisilaeli, ‘Gele chigaŵe mauta gangu gamaswela gakwajitilila ŵandu ŵa iŵelesi yenu yose. 32Ngasimunjitilila mundu jwa iyiyipe, atamuno kugalinganya mauta ganegane mpela intite pakugalinganya aga. Gelega gali mauta gamaswejele, ŵanyamwe ngawone kuti gali gamaswejele kukwenu. 33Jwalijose juchalinganye mauta nti aga pane kunjitilila mundu jwangaŵa jwambopesi, jwele mundu jo chaŵichikwe kwakutalichila ni ŵandu ŵakwe.’ ”
Kulinganya ubani
34AMBUJE ŵaasalile che Musa, “Njigale ipimo yailandene ya yakununjila yambone: ukau wa natafi, shekelesi, kelibena ni ubani wakusalala. 35Chinkolosye ubani kwa indu yo, ulinganyikwe ni mundu jwaali ni umanyilisi wakulinganya yakununjila. Ntaje njete kuti ugosekwe ni uŵe weswela. 36Chinsyaje ni kuutenda uŵe utandi wesyajiche yambone kuti utumiche mu Lisakasa Lyakusimanilana ni Akunnungu mu Lisanduku lya Lilangano, peuto pachisimane ni mmwe, ni chiuŵe weswejele nnope kukwenu. 37Nkalinganya ubani wine chisau auno kwa ligongo lyenu mwachinsyene. Chiuŵe weswejele wautyosyekwe kwa une AMBUJE. 38Mundu jwalijose juchalinganye ubani wanti nyi kuti akupikane kununjila kwake, akuŵajilwa kuntyosya pasikati ja ŵandu ŵakwe.”
നിലവിൽ തിരഞ്ഞെടുത്തിരിക്കുന്നു:
Kutyoka 30: YBV
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
Yao New Testament © The Word for the World Southern Africa and Pioneer Bible Translators, 2018.
