Kutyoka 29
29
Malajisyo gakwajimika che Haluni achiŵanagwe
(Ŵalawi 8:1-36)
1“Gelega ni gachinchitenda pakwajimika che Haluni ni achiŵanagwe kuti andumichile kwa masengo ga umbopesi. Chinjigale ng'ombe jamwana tonde ni tonde siŵili sya ngondolo syangapungwana. 2Sooni njigale mikate jangataga amila ni maandazi ni mikate jakunyilila, yose yo nkolosye kwa utandi wa ngano wesyajiche yambone wangataga amila. 3Mmiche yose yo mu chitundu chimo ni kundyochesya kwanakamo pamo ni ng'ombe jamwana tonde ni tonde sya ngondolo sila.”
4“Nipele mwapeleche che Haluni ni achiŵanagwe pannango wa Lisakasa Lyakusimanilana ni Akunnungu ni kwakunda kwa meesi. 5Nipele chinjigale yakuwala ni kwawasya che Haluni, mwinjilo ni nkogo ni likoti lyamwana, kasaku kakuwala pantima, ni kuntaŵa mpumbulu weluchikwe yambone. 6Mwawasye chilyemba muntwe wakwe ni kuŵika chibati chelembekwe ‘Atyosyekwe kwa AMBUJE’ pachanya chilemba cho. 7Pakumala kutenda yeleyo njigale mauta ni kunjitilila che Haluni pantwe wakwe kuti muntyosye kwa AMBUJE.”
8“Nipele mwaichisye ŵanache wakwe ni kwawasya nkogo. 9Mwataŵe mipumbulu ni kwawasya ipeu yao. Yeleyo ni ichinchatyosya kwa AMBUJE che Haluni ni achiŵanagwe kuti aŵeje ŵambopesi ŵanyawo ni iŵelesi yao moŵa gose.”
10“Nkajigale ng'ombe tonde ni kwikanawo mbujo mwa Lisakasa Lyakusimanilana ni Akunnungu, che Haluni ni achiŵanagwe chasajiche makono gao pa ntwe wa ng'ombe jo. 11Nipele njisinje ng'ombe jo paujo pa AMBUJE pannango wa Lisakasa lya Kusimanilana. 12Njigale miasi ja ng'ombe jo ni nkajipache mu misengo ja chilisa kwa chala chenu, ni miasi jajikusigalila nkajitile kuusi kwa chilisa. 13Nipele njigale mauta gose ga munkati mwa chinyama gagakuunichila matumbo ni chipaande pa pasi cha matoga ni mbyo pamo ni mauta gakwe ngatinisye pachilisa. 14Nambo nyama ja chinyama cho pamo ni lipende lyakwe ni matumbo gakwe chinjoche paasa chigono. Jelejo chijiŵe mbopesi ja kutyosya sambi.”
15“Njigale tonde jimo ja ngondolo, che Haluni ni achiŵanagwe tasajiche makono gao pa ntwe wa ngondolo jo. 16Njisinje ngondolo jo ni kujichinga miasi jakwe nipele nkajimisile mu mbande syose sya chilisa cho. 17Nipele nkajikatanye ngondolo jo ipandeipande ni kuijosya iŵalo yamunkati pamo ni makongolo gakwe, chimmiche pamo ni ntwe ni ipande ine. 18Nkajijoche ngondolo jo pa chilisa. Jeleji jili mbopesi ja kutinisya kwaligongo lya AMBUJE. Mbopesi jakununjila yambone jajikuunonyelesya une AMBUJE.”
19“Njijigale ngondolo jine tonde jila, che Haluni ni achiŵanagwe asajiche makono gawo pa ntwe wa ngondolo jo. 20Nkajisikite ngondolo ni kujijigala miasi jakwe ni kwapakasya che Haluni ni achiŵanagwe mu songa sya mawiwi gawo ga kundyo ni mu ikongo ya mmakono ga kundyo ni ikongo ya kundyo ya mmakongolo. Miasi jajisigalile nkajijitile mu mbande syose sya chilisa. 21Njigale miasi jine jajili pa chilisa pamo ni mauta ga kupakala nkammisile che Haluni pamo ni yakuwala yakwe. Pelepo che Haluni ni achiŵanagwe pamo ni yakuwala yao chachiŵa atyosyekwe kwa une.”
22“Njigale mauta ga ngondolo tonde, nchila wakwe, ni mauta gagaunichile matumbo ni chipande cha paasi cha matoga pamo ni mbyo ni mauta gakwe, ni chiiga cha kundyo. Jele ngondolo jo jiŵe kwaligongo lya kwatyosya kwa une che Haluni ni achiŵanagwe. 23Mu chitundu cha mikate jangataga amila chachili mbujo mwangu AMBUJE, chinjigale chimbonde ni liandasi ni nkate wakunyilila. 24Yose mmiche mmakono mwa che Haluni ni achiŵanagwe, ni mwasalile kuti anyakulile mwinani ni kuijelasya paujo pangu une AMBUJE. 25Nipele njigale yose yo kutyochela mmakono mwao ni kuijocha pa chilisa pamo ni mbopesi ja kutinisya jiŵe jakununjila ni kuunonyelesya une AMBUJE, mbopesi jajikuyochekwa kwa AMBUJE pa mooto.”
26“Nipele nchijigala chidali cha ngondolo tonde jwa kwatyosya che Haluni kwa AMBUJE nyakulile mwinani ni kuchijelasya paujo pangu kuti jiŵe mbopesi jakujelasya, nombe chidali cho chichiŵe chenu.”
27“Mmiche pajika aila iŵalo ya ngondolo tonde yaityochekwe kwa kuntyosya kukwangu che Haluni ni achiŵanagwe. Achila chidali chachijelasikwe mwinani pamo ni chiiga chichatyochekwe paujo pangu. 28Moŵa gose Ŵaisilaeli patachipeleka sadaka ja ukamulangano ni une, iŵalo yo chiŵe yakwe che Haluni ni achiŵanagwe. Lilajisyo lyo ngaligalauka.”
29“Patachiwa che Haluni, yakuwala yao yeswela chiŵe ya uŵelesi wao ni ŵanyawo chawale pa lyuŵa lyakwajitila mauta ni kwasajichila makono. 30Nchanda ju che Haluni jutachiŵa jwambopesi pamalo pa atatigwe, ni kwika kutumichila mu Lisakasa Lyakusimanilana ni Akunnungu Peuto Papaswela, chachiwala yakuwala yo kwa moŵa saba.”
31“Chinjigale ajila nyama ja ngondolo tonde jesinje kwa ligongo lya kwatyosya kukwangu che Haluni ni achiŵanagwe, nkajiteleche papasagulikwe mu lutenje lwa Lisakasa Lyakusimanilana ni Akunnungu. 32Nipele chimwape che Haluni ni achiŵanagwe ajila nyama ni mikate jajisigalile mu chitundu, nombewo tachilya pa nnango wa Lisakasa Lyakusimanilana. 33Tachilya aila indu yaitumiche kwatyosya kukwangu ni mbopesi ja kuŵenda kulecheleswa sambi. Nambo ngapagwa mundu jwine jwakuŵajilwa kulya indu yo pakuŵa ili yeswela. 34Iŵaga nyama jo pane mikate jo jisigalile mpaka kundaŵi ijochekwe. Akapagwa mundu jutalye pakuŵa ili yeswela.”
35“Yeleyo ni inchikaatendele che Haluni ni achiŵanagwe. Chintende yose inannajisye kwa moŵa saba pakwatyosya kukwangu. 36Kila lyuŵa chintyosye ng'ombe tonde jiŵe mbopesi kwa ligongo lya kutyosya sambi. Ni kwakutenda yeleyo chinchiswejesye chilisa. Tinjitile mauta kuti nchityosye kwa AMBUJE chilisa cho. 37Ntyosye mbopesi ja kuchiswejesya chilisa moŵa saba kuti jiŵe jeswela. Pakumala yeleyo chilisa cho chichiŵe cheswela nnope ni chindu chili chose chachichikwaye chilisa cho chichiŵe cheswela.”
Mbopesi sya kila lyuŵa
(Kuŵalanga 28:1-8)
38“Kila lyuŵa pachinchiika kukundyochesya mbopesi chintyosye ngondolo siŵili syasili ni chaka chimo. 39Ngondolo jimo chinjityosye kundaŵi ni jine ligulo. 40Ngondolo jandanda chintyosye pamo ni utandi wesyajiche chenene kangomba jimo wewanganye ni liita jimo ja mauta gambone ga mseituni. Sooni nnyichenajo liita jimo ja divai nti sadaka ja yakung'wa. 41Ngondolo jine jo njityosye ligulo pamo ni sadaka ja utandi ni yakung'wa mpela intesile kundaŵi, kuti jiŵe mbopesi jajikununjila yambone jajityochekwe kwa AMBUJE kwa mooto. 42Yelei itendekwe moŵa gose kwa iŵelesi yose, chimundyochesye mbopesi jakocha pa nnango wa Lisakasa lya Kusimanilana paujo pa AMBUJE. Pelepo chinjisimana ni ŵanyamwe ni kukunguluka ni ŵanyamwe. 43Kweleko ni kuchinjisimana ni Ŵaisilaeli ni ukulu wangu chiupatende pamalo po paŵe papaswela. 44Chinjiliswejesya Lisakasa Lyakusimanilana ni Akunnungu ni chilisa, ni chinjatyosya che Haluni ni achiŵanagwe kuti andumichile kwa masengo ga umbopesi. 45Chinjitama pasikati jao Ŵaisilaeli ni time Akunnungu ŵao. 46Pelepo ni pataimanyilile kuti une ndili AMBUJE Akunnungu jwao, junakopwesye ku chilambo cha Misili kuti ndame nawo. Une ndili AMBUJE Akunnungu jwao.”
നിലവിൽ തിരഞ്ഞെടുത്തിരിക്കുന്നു:
Kutyoka 29: YBV
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
Yao New Testament © The Word for the World Southern Africa and Pioneer Bible Translators, 2018.
