Kutyoka 23
23
Chigolochelo kwa wose
1“Nkaŵecheta ya unami. Nkakamulangana ni mundu jwachigongomalo kwa kuŵecheta umboni wa unami. 2Nkaukuya mpingo wa ŵandu nkupanganya yangalumbana. Nkakamulangana ni ŵandu kusala umboni wa unami pa nkungulu wa kulamula kuti ngalausye ulamusi. 3Nkakola lusagu pankunlamula jwakulaga.”
4“Mwajisimanaga ng'ombe pane mbunda ja jwammagongo jwenu jili nkusochela, njijigale ni nkusachilwa kujiusya kwa asyene. 5Mwajionaga mbunda ja jwammagongo jwenu jili jigwile ni chitutule chakwe, nkajiŵambala ni kwaula, nambo munkamuchisye mundu jo kujijimusya mbunda jakwe.”
6“Nkagalausya ulamusi wa mundu jwakulaga pa magambo gao. 7Nliŵambasye ni magambo gaunami, namose kummulaga mundu jwangali chileŵo pane jwali jwakukulupilichika, pakuŵa ngasinammalanjila jwali ni chileŵo kuti jwangali chileŵo. 8Nkapochela hongo, pakuŵa jelejo jikwataga chiputa ŵakulamula, ni kwatendekasya akalamula nti yakuti pakusaka Akunnungu.”
9“Nkankotochela jwanlendo, mwanya achinsyene nkumanyilila yakuti pakulipikana jwanlendo pakuŵa mwaliji achalendo ku Misili.”
Chaka cha saba ni Lyuŵa lya saba
10“Mpandeje mbeju kwa yaka sita mmigunda mwenu ni kugowola magowolo. 11Nambo pa chaka cha saba muuleche ngunda pangalima namose kupanda, kuti ŵakulaga ŵaali pasikati jenu akole yakulya ni ichaisigasye inyama ya mwikonde ilyanje. Chintende yeleyo mu migunda jenu ja misabibu ni miseituni.”
12“Mpanganye masengo kwa moŵa sita, nambo pa lyuŵa lya saba mpumulile, kuti ng'ombe syenu ni mbunda syenu sipumulile, ni achikapolo ŵenu ni achalendo ŵakutama pasikati jenu nombe nawo ajangale.”
13“Nkamulichisye yose inansalile. Nkajipopelela minungu jine, namose meena go gakapikanika mu kang'wa jenu.”
Indimba yekulungwa itatu
(Kutyoka 34:18-26; Chikumbuchisyo cha Malajisyo 16:1-17)
14“Chintende chindimba kwa kunjimbichisya une katatu pa chaka. 15Chintende chindimba cha mikate jangataga amila, kwa moŵa saba chinchilya mikate jangatagwa amila mpela indite pakunnajisya. Ntendeje yeleyi pa katema kakaŵichikwe pa mwesi wa Abibu, pakuŵa wele uli mwesi umwakopweche ku Misili. Mundu jwalijose akaika paujo pangu ali makono pe.”
16“Sooni chintende chindimba cha magungulo, jele milimbu ja masengo genu ga mmingunda.”
“Sooni chintende chindimba cha kukumbikanya magungulo chachikuŵilanjikwa chindimba cha masakasa, kumbesi kwa kulima katema ka kukumbikanya magungulo genu ni isogosi yenu. 17Achalume ŵenu wose chachiika paujo pangu une, AMBUJE Akunnungu katatu pachaka.”
18“Nkambelechela une miasi ja mbopesi jangu pamo ni mikate jajitajikwe amila, namose mauta ga mbopesi jangu gakasigala mpaka kundaŵi.”
19“Chinyichenayo milimbu kutyochela mungunda wenu, ku Nyuumba ja AMBUJE Akunnungu ŵenu.
“Ngasinteleka ngondolo pane kambusi kwa maŵele ga nangolo jwakwe.
Ilanga ni malajisyo
20“Une nguntuma katumetume jwangu jwa kwinani annongolele mu ulendo kuti angose ni kunyichisya mu chilambo chinammichile chile. 21Mumpilikanile ni kunjichitisya chichansalile, nkakana kunjitichisya, jwelejo ngasanlechelela ungajitichisya wenu pakuŵa naatumile kwa liina lyangu. 22Nambo mwajitichisyaga liloŵe lyakwe kusyene ni kuipanganya yose ingusala, une chimenyane ni ŵammagongo ŵenu, ni kwakanila aŵala ŵakunkanila. 23Katumetume jwangu jwa kwinani chanlongolele mbujo ni kunnyichisya mu chilambo cha Ŵaamoli ni Ŵahiti ni Ŵapelisi ni Ŵakanaani ni Ŵahifi ni Ŵayebusi. None tinjajonanga wose wo. 24Nkajikotamila minungu jao namose kujitumichila, atamuno kusyasya yakuipanganya. Nkajijonanje kusyene minungu jo ni chanamila syao nkasanye ipande ipande. 25Chimuntumichile AMBUJE, Akunnungu ŵenu, none chinjichipa upile chakulya ni meesi genu none chinaityosye ilwele pasikati jenu. 26Ngapagwa jwankongwe jutajase chitumbo pane jwangakuŵeleka mu chilambo chenu. None chinjintenda ntame yaka yejinji.
27“Chimbeleche yakogoya mbujo mwenu ni kwalyungasya ŵandu wose ŵakunlimbana nao, none chinjaatenda ŵammagongo ŵenu agalauche ni kummutuka. 28Nti matendeu yakuti kwikanawo lipamba, tiichenawo lipamba lyekulungwa kwa ŵammagongo ŵenu. Tinjaŵinga Ŵahivi ni Ŵakanaani, ni Ŵahiti, atyochanje mbujo mwenu. 29Ngasinaŵinga mbujo mwenu kwa chaka chimo, kuti chilambo chikasigalila pangali ŵandu ni inyama ya mwitinji ikapunda kutupa ni kunsausya. 30Nambo chinjaŵinga kanondikanondi mpaka pachintupe ni kuchijigala chilambo chose. 31Chinjimmichila mipika ja chilambo chenu, chijitandile ku bahali ja Shamu mpaka ku bahali ja Meditelania, ni kutyochela kwipululu mpaka ku lusulo lwa Efulati. Tinjimpa machili ga kwapunda ŵandu ŵa ilambo cho, ni ŵanyamwe chimwaŵinje atyoche. 32Nkaŵichilana lilangano nawo namose ni minungu jao. 33Nkaalechela kutama mu chilambo chenu, akaika kuntendekasya mundendele sambi, pakuŵa naga chinjipopelele minungu jao, usyene chele chichiŵe chitanji kukwenu.”
നിലവിൽ തിരഞ്ഞെടുത്തിരിക്കുന്നു:
Kutyoka 23: YBV
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
Yao New Testament © The Word for the World Southern Africa and Pioneer Bible Translators, 2018.
