Kutyoka 22
22
Malajisyo gankati malipilo
1“Mundu ajiŵaga ng'ombe pane ngondolo ni kujisinga pane kujisumisya ŵelewo alipe ng'ombe nsano pa ng'ombe jimo ni ngondolo ncheche pa ngondolo jimo. 2Jwawiyi akamulwaga ali nkugumula nyuumba ni kuputikwa kwika mwakuwa, jwammuleje mundu jo ngaakola ligambo lya kuulaga. 3Nambo iŵaga jwawiyi jo chaulajikwe lyuŵa lili likopweche chaŵe ni ligambo lya kuulaga. Jwaŵiyi jo alipe, nambo iŵaga nganakola chindu munsumisye mundu jo kuti alipile wiyi wakwe.”
4“Iŵaga chichisimanikwe chinyama chachijiŵikwe chili chejumi mu nyuumba ja jwawiyi, nipele jwawiyi jo chalipe kaŵili jiŵe ng'ombe pane mbunda pane ngondolo.”
5“Mundu achingaga ilango yakwe mwitinji pane mu ngunda wa misabibu ni kuileka ilyeje mu ngunda wa mundu jwine, chalipe magungulo gakusichila kutyochela mu ngunda wakwe nsyene pane kutyochela mu ngunda wakwe wa misabibu.”
6“Iŵaga mundu achomile ukwekwe mu ngunda wakwe ni mooto ujenele mpaka ku chisukutu ni koombochela mu ngunda wa mundu jwine ni kutinisya ilingo ya magowolo pane magungulo ga mmigunda, pane kutinisya ngunda wose, mundu jwakolesisye mooto wo chalipe hasala jo.”
7“Mundu ampaga jwine mbiya pane chipanje cha ndalama jajikulungwa kuti ansalachisye, yajiŵikwaga mu nyuumba jakwe jwakusalasya jo, jwajiŵile akamulwaga chalipe kaŵili. 8Nambo iŵaga jwawiyi jo nganakamulwe, nsyene nyuumba jo taiche paujo pa ŵakulamula kuti asale naga nganajigala chipanje cha njakwe.”
9“Kwaŵaga ni ukangani nkati chindu chilichose, iŵeje ng'ombe pane mbunda pane ngondolo pane yakuwala pane chachilichose chachisoŵile chati jwalijose akuti chili changu, wose ŵanaŵaŵili mwaichisye paujo pa ŵakulamula. Ajula juchasimanikwe ni ligambo chachinlipa njakwe kaŵili.”
10“Naga mundu ampele mundu jwine mbunda pane ng'ombe pane ngondolo pane chinyama chine chachilichose kuti agose, ni chinyama chiwile pane kuulala pane chijigalikwe pangawoneka ni mundu jwalijose, 11jele ngani ja ŵandu ŵaŵili wo chijilamulikwe kwa kulumbila paujo pa AMBUJE, kuti mundu jo nganajigala chilango cha njakwe. Nsyene chinyama cho chakunde yeleyo ni ngapagwa cha kulipa. 12Nambo iŵaga chilango cho chijiŵikwe chili nkwendelechela kugosekwa ni ajula juŵapegwile agose, mundu jo chanlipe nsyene chilango. 13Naga chinyama cho chipalamulikwe ni chinyama cha mwitinji, mundu jo aichenajo nyama jajisigele kuti uŵe umboni, nombejo ngaalipa kwa ligongo lya chilango chachipalamulikwe.”
14“Iŵaga mundu ajaasime chilango ni chilango cho chaulalaga pane kuwa katema nsyene chilango nganapagwa, ajula juŵajasime chilango cho akusachilwa alipe. 15Nambo aulalaga pane kuwa nsyene chilango ali papopo, ajula jwajasime ngaŵalipa. Iŵaga chilango cho ŵachikodisye, mbiya jiŵalangene kukodisya ni jichijiŵe malipilo.”
Yakuti kutama yambone ni ŵandu
16“Jwannume annyengaga mwalimwali pe jwangatomelwa ni kugona nawo, jwannume jo chalipe mahali ni kulombela mwali jo. 17Atatigwe mwali jo akanaga kunlombekasya mwali jwao kwa jwannume jo, jwannume jo chalipe mahali jajikuŵajilwa kwa mwalimwali pe.”
18“Nkanlechelela jwankongwe nsaŵi akole umi.”
19“Jwakugona ni chinyama akusachilwa aulajikwe.”
20“Mundu jwalijose jwakupeleka mbopesi kwa minungu pamalo pa AMBUJE akusachilwa aulajikwe.”
21“Nkantendela jwannendo changalumbana atamuno kummonela, pakuŵa ni ŵanyamwe mwaliji achalendo ku chilambo cha Misili. 22Nkanlagasya jwankongwe jwawililwe ni ŵankwawo namuno ŵamalekwa. 23Mwatendaga yeleyo ni ŵanyawo ŵandililaga une, kusyene chinaapikane chililo chao, 24une chisasamuche ni chinammulaje ni lipanga, achiŵankwenu chachiŵa ŵaŵililwe ni achiŵankwawo ni ŵanache ŵenu taŵe ŵamalekwa.”
25“Naga nkunkongosya jumo jwa ŵandu ŵangu waali ŵakulaga, nkatenda mpela ŵandu ŵakukongosya mbiya, nkalolela mapwati. 26Mwajigalaga chakuliunichila cha njenu mpela chikole, nkusachilwa mwauchisye likanaŵe kutiŵila lyuŵa, 27pakuŵa nguo jao jili jijojo nombejo ni jitaliunichila. Nkuganisya taliunichile ni chichi? Patachindilila chinampikane, pakuŵa Une ndili jwachanasa.”
28“Nkaatukana Akunnungu pane kunlwesya chilongola jwa ŵandu ŵenu.”
29“Nkaleka kumba sadaka kutyochela mmagowolo genu ni divai jenu.”
“Chimuumbe ŵanache ŵenu ŵakwitiwo ŵachilume. 30Chinchitenda iyoyo kwa ipago yandanda ya ng'ombe ni ngondolo syenu. Chinchaleka atame ni achinangolo ŵao kwa moŵa saba ni lyuŵa lya nane timumbelechele Une.”
31“Ŵanyamwe chimme ŵandu ŵangu ŵaŵichikwe pa jika. Nipele nkalya nyama ja chinyama chichipalamulikwe ni chinyama cha mwitinji. Nyama jo mwape achimbwa.”
നിലവിൽ തിരഞ്ഞെടുത്തിരിക്കുന്നു:
Kutyoka 22: YBV
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
Yao New Testament © The Word for the World Southern Africa and Pioneer Bible Translators, 2018.
