2 Mamwenye 22
22
Che Yosia akutendekwa mwenye jwa ku Yuda
(2 Indu ya katema 34:1,2)
1Che Yosia ŵaliji ninyaka nane pe paŵatandite kutawala kwele ku Yelusalemu ko, ŵatawele yaka selasini na moja. Achikulugwe ŵaliji che Yedida mwali ju che Adaya jwa musi wa ku Bosikati. 2Che Yosia ŵatesile yambone ni yaikwanonyelesya Ambuje Akunnungu. Ŵakuiye ilaila mpela iŵatesile che Daudi juŵanlongolele ni kukamula malajisyo ga Ambuje Akunnungu gose.
Chitabu cha malajisyo chikupatikana
(2 Indu ya katema 34:8-28)
3Pa chaka cha kumi na nane cha utawala wa mwenye che Yosia, ŵantumile che Shafani mwana jwa Asalia, mwana jwa Meshulamu, ku Nyuumba ja Ambuje Akunnungu achitiji, 4“Njaule kwa jwambopesi jwankulu che Hilikia nkaasalile aŵalanje feza syakwikanasyo pa Nyuumba ja Ambuje Akunnungu syati ŵakulindilila pa nnango akusikumbikanya kutyochela kwa ŵandu. 5Mwasalile che Hilikia Feza syo sine ŵaape ŵakwimilila Nyuumba ja Ambuje Akunnungu ni kwalipa ŵandu ŵakugapanganya masengo ga kutaŵa soni nyumba ja Ambuje Akunnungu, 6yaani maselemala, ŵakutaŵa ni ŵakutaŵa nyuumba. Feza sine situmiche kusumila mbao ni maganga gagasepekwe kwaligongo lya kutaŵila Nyuumba ja Akunnungu. 7Ŵandu ŵakwimilila kutaŵa nkaadai kuti atyosye hesabu jajikulosya yatite kutumia mbiya syapatile. Pakuŵa atesile kwa chikulupilichiko.”
8Nipele jwambopesi jwankulu ŵansalile jwakulemba che Shafani, “Nachipatile Chitabu cha Malajisyo mu Nyuumba ja Ambuje Akunnungu.” Pelepo che Hilikia ŵampele che Shafani chitabu, nombejo ŵachisyomile. 9Che Shafani ŵanjaulile mwenye ni kunsalila kuti, “Ŵakutumichila ŵenu atyosisye feza syasipatikene mu Nyuumba ni kwapa ŵakwimilila kukolosya kwa Nyuumba ja Ambuje Akunnungu.” 10Nipele che Shafani ŵansalile mwenye, “Jwambopesi che Hilikia ambele achi chitabu chi.” Jwakulemba che Shafani ŵachisyomile paujo pa mwenye. 11Mwenye paŵapikene maloŵe ga Chitabu cha Malamulo, ŵasupwiche ni ŵapapwile yakuwala yakwe. 12Papopo ŵalamwile jwambopesi che Hilikia, ni che Ahikamu mwana jwa che Mikaya pamo ni Shafani jwakulemba ni che Asaya jwakutumichila jwa mwenye, achitiji, 13“Njaulangane nkauchilichisye kwa Ambuje Akunnungu kwa ligongo lyangu ni kwa ligongo lya ŵandu ŵa ku Yuda wose, nkati maloŵe gagalembekwe mu achi chitabu chachisimanikwe chi. Lusongolo lwa Ambuje Akunnungu ni chikali chao chili pachanya petu, pakuŵa achambuje ŵetu nganapanganya aila yelembekwe mu chitabu chi ni sooni nganapanganya aila yailembembwe kwa uwe tuitende.” 14Kwayele jwambopesi che Hilikia, ni che Ahikamu, ni che Akiboli, ni che Shafani ni che Asaya, wose ŵapite kwa jwakulondola jwankongwe lina lyakwe che Huluda, juŵaliji ŵankwakwe che Shalumu mwana ju che Tikiva chisukulu chi che Halihasi, jwakugosa chuumba cha yakuwala ya panyuumba ja Akunnungu. Kele katema ko che Huluda ŵatamaga ku Yelusalemu pamalo papakuŵilanjikwa nyuumba jaaŵili. 15Nipele che Huluda ŵaasalile, “Yele ni yakuti Ambuje Akunnungu, Akunnungu jwa Isilaeli: ‘Munsalile jwele jwantumile kuti nnyiche kukwangu, 16Ambuje Akunnungu akuti, tinyichisye limbulunga pa Yelusalemu pa ni kwa ŵandu wose ŵakutama mwelemo, mpela yaitite kulembekwa mu chitabu chasyomile mwenye jwa ku Yuda. 17Pakuŵa anesile une ni kujitutumichisya ubani minungu jine ni kundumbilisya kwa inyago yose yekolosye ni makono gao, chisongolo changu chichiŵe pachanya pa Yelusalemu ni ngapagwa mundu jutachitondoye chisongolo changu.’ 18Nambo nkati mwenye jwa ku Yuda jwantumile kukuuchilichisya kwa Ambuje Akunnungu, munsalile kuti, ‘Yeleyi ni yakuti kusala Ambuje Akunnungu, Akunnungu jwa Isilaeli nkati maloŵe gampilikene: 19Pakuŵa ntima wenu waliji wakupikanichisya ni sooni mwalitulwisye paujo pa Ambuje Akunnungu pamwapilikene achila chiisasile nkati pamalo pa ni ŵandu ŵakwe, ni kuti taachilwesekwa ni kulekwa masame, nipele pakuŵa mwapapwile miinjilo jenu ni kulila paujo pangu, une nampikene. 20Kwayele ngaaikanawo limbulunga pamalo pa mpaka patimmwe ni kunsika kwa chitendewele. Meeso genu ngagawona limbulunga lyachinaliichisye pamalo pa.’”
Nipele ŵantenga ŵala ŵapeleche ngani syo ku che Yosia.
നിലവിൽ തിരഞ്ഞെടുത്തിരിക്കുന്നു:
2 Mamwenye 22: YBV
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
Yao New Testament © The Word for the World Southern Africa and Pioneer Bible Translators, 2018.