2 Mamwenye 21
21
Che Manase akutendekwa mwenye jwa ku Yuda
(2 Indu ya katema 33:1-20)
1Che Manase ŵaliji ni yaka kumi na mbili paŵatandite kutawala, ŵatawele kwele ku Yuda ko yaka hansini na tano achitamaga ku Yelusalemu. Achikulugwe ŵaŵilanjikwe che Hefusiba. 2Che Manase ŵatesile ugongomalo paujo pa Ambuje Akunnungu, ŵakuiye masyoŵelelo ga ŵandu ŵa ilambo ŵaŵaliji atopolekwe ni Ambuje Akunnungu kuti atyoche paojo pao. 3Ŵapakolosisye sooni pamalo pakupopelela kwele ku matumbi papagumulikwe ni che Hesekia atatigwe. Ŵataŵile ilisa ya kumpopelela nnungu Baali ni kukolosya chinyago cha nnungu jwankongwe Ashela, mpela ila iŵatesile che Ahabu mwenye jwa ku Isilaeli. Sooni che Manase ŵaipopelelega ni kuitumichila indu yose ya mwinani. 4Ŵataŵile ilisa pa nyuumba ja Ambuje Akunnungu peuto pati Ambuje Akunnungu ŵatite, “Ku Yelusalemu pe ni kutambopelele une.” 5Mmatenje gaŵili ga Nyuumba ja Ambuje Akunnungu, ŵataŵile ilisa ya kuipopelela indu yose ya kwinani. 6Nombe ŵantyosisye mwanagwe nti mbopesi ja kutinisya pa mooto. Ŵatesile usaŵi ni chisango, ŵajaulaga kwa ŵandu waakukunguluka ni ŵandu ŵawile ni masoka kuti amanyilile chakupanganya. Ŵatesile igongomalo wejinji paujo pa Ambuje Akunnungu yati yantumbilisye. 7Ni chinyago cha nnungu jwankongwe Ashela chiŵakolosisye ŵachiŵisile pa Nyuumba ja Akunnungu jati Ambuje Akunnungu ŵaliji ŵaasalile mwenye che Daudi ni mwenye che Selemani mwanagwe kuti, “Mu aji nyuumba ji, ni mu musi wa ku Yelusalemu unausagwile, mwele ni mutambopelele une moŵa gose pangali mbesi. 8Iŵaga Ŵaisilaeli talilochesye kutenda yose inalamwile ni kugakuya Makanyo gose gati jwakutumichila jwangu che Musa ŵapele, nipele ngasinalechelela atopolwe kutyoka mu chilambo chi chati naapele achambuje ŵao.” 9Nambo ŵandu ŵa ku Isilaeli nganapikana, nombe che Manase ŵaanyenjile atendekanye ugongomalo, nipele ŵatesile ugongomalo wekulungwa nnope kupunda aula uŵatesile ŵandu ŵa ilambo ine ŵati Ambuje Akunnungu ŵaajonasile Ŵaisilaeli akanaŵe kwinjila.
10Nipele mbuje Akunnungu ŵaasalile ŵandu maloŵe gano kwa litala lya ŵakutumichila ŵakwe ŵakulondola, 11“Che Manase mwenye jwa ku Yuda atesile indu ya uchimwa, indu yangalumbana nnope kupunda aila iŵaitesile Ŵaamoli ŵaŵaliji mu chilambo mo akanaŵe jwelejo, ŵaatesile ŵandu ŵa ku Yuda atende sambi kwa kuipopelela inyago yakwe. 12Kwayele une Ambuje Akunnungu jwa ku Isilaeli, nguti, chinyiche nago pa Yelusalemu ni pa Yuda imbulunga yati jwalijose jutapikane chiyaawatanganye. 13Tinaujamuche musi wa Yelusalemu mpela munautendele musi wa Samalia ni mwenye che Ahabu ni uŵelesi wakwe. Tinaatyosye ŵandu mu musi wa Yelusalemu mpela mundu yakuti kosya mbale ni tinaujonanje tikitiki. 14Tinaaleche ŵandu ŵatasigalile tinjataga mmakono mwa ŵammagongo ŵao, tasumulwe ipanje yao ni taŵe mateka kwa ŵammagongo ŵao wose. 15Tinjaatenda yose yo pakuŵa aneŵele ni kundumbilisya, kutandilila achambuje ŵao paŵatyosile ku Misili mpaka lelo jino.”
16Kupunda yeleyo, che Manase ŵatendekasisye ŵandu ŵa ku Yuda atende sambi kwa kuutenda ugongomalo paujo pa Ambuje Akunnungu, ŵauleje ŵandu achajinji ŵanganakola chileŵo, miasi jao jigumbele pa Yelusalemu pose.
17Indu ine iyatendekwe pa utawala wa che Manase ni indu iŵaitesile, pamo ni sambi syatesile, yose ilembekwe mu chitabu cha chikumbuchisyo cha Mamwenye ŵa ku Yuda. 18Che Manase ŵawile ni kusikwa mu ngunda wamwana wa nyuumba jakwe syene mu ngunda wamwana wa che Usa. Nombe che Amoni mwanagwe ŵatawele badala jakwe.
Che Amoni akutendekwa mwenye jwa ku Yuda
(2 Indu ya katema 33:21-25)
19Che Amoni ŵaliji ni yaka ishilini na mbili paŵatandite kutawala. Ŵatawele ku Yuda kwa yaka iŵili achitamaga ku Yelusalemu. Lina lya achikulugwe lyaliji che Meshulemetu mwali ju che Halusi juŵatyosile musi wa ku Yotiba. 20Ŵatesile ugongomalo paujo pa Ambuje Akunnungu, mpela ila che Manase atatigwe iŵatesile. 21Ŵakuiye yose mpela ilaila iŵaitesile atatigwe ni kuitumichila inyago yati atatigwe ŵaitumichilaga ni kuipopelela.
22Ŵannesile Ambuje Akunnungu ŵa achambujegwe, nganaŵajitichisya Ambuje Akunnungu.
23Kanyuma ŵakutumichila ŵa che Amoni ŵatesile malindi ni kummulaga mu nyuumba jakwe ja chimwenye. 24Nambo ŵandu ŵa ku Yuda ŵauleje ŵanawose ŵaŵammuleje che Amoni. Nipele ŵandu ŵa ku Yuda ŵantesile che Yosia mwanagwe kuŵa mwenye pamalo pakwe.
25Indu ine iyatendekwe pa utawala wa che Amoni ni indu iŵaitesile ilembekwe mu Chitabu cha chikumbuchisya cha Mamwenye ŵa ku Yuda. 26Che Amoni ŵasichikwe mmalembe ku Ngunda wamwana wa Usa, ni che Yosia mwanagwe ŵatawele pamalo pakwe.
നിലവിൽ തിരഞ്ഞെടുത്തിരിക്കുന്നു:
2 Mamwenye 21: YBV
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
Yao New Testament © The Word for the World Southern Africa and Pioneer Bible Translators, 2018.