2 Mamwenye 17
17
Che Hoshea akutendekwa mwenye jwa ku Isilaeli
1Pa chaka cha kumi na mbili cha utawala wa che Ahasi mwenye jwa ku Yuda, che Hoshea mwana jwa che Ela ŵatandite kutawala ku Isilaeli. Ŵatawele ku Isilaeli kwa yaka tisa achitamaga ku Samalia. 2Ŵatesile ugongomalo paujo pa Ambuje Akunnungu, nambo ngawa mpela mamwenye ŵane ŵa ku Isilaeli. 3Mwenye che Shalimanesa jwa ku Ashulu ŵaiche ni kungungumuchila mwenye che Hoshea ni kumpunda pa ngondo, nombe mwenye che Hoshea ŵaŵele kapolo jwakwe ni kwalipa nsongo. 4Nambo mwenye jwa ku Ashulu ŵaimanyilile kuti mwenye che Hoshea ŵaliji nkwalambusya, pakuŵa ŵaliji atumile ŵantenga ku che So mwenye jwa ku Misili, nombejo pele ŵalesile kulipa nsongo kwa mwenye jwa ku Ashulu mpela iŵatendaga kila chaka. Kwayele che Shalimanesa ŵankamwile ni kummika mu nyuumba ja kutaŵilwa.
Musi wa samalia ukugungumuchilwa
5Nipele mwenye jwa ku Ashulu ni ŵangondo ŵao ŵachigungumuchile chilambo chose cha Islaeli ni ŵaasyungwile musi wa ku Samalia kwa yaka itatu achisakaga kuti aujigale kwa machili. 6Pa chaka cha tisa cha utawala u che Hoshea, mwenye jwa ku Ashulu ŵaujigele musi wa Samalia ni kwajigala ŵandu ŵa Isilaeli mpaka ku Ashulu. Ŵaisilaeli ŵane ŵaŵisile mu musi wa Hala, ni ŵane ku musi wa Gosani wauli mungulugulu lusulo lwa Haboli ni ŵane mu misi jiwatamaga Ŵamedia.
7Yele yose yatendekwe ligongo ŵandu ŵa ku Isilaeli ŵantendele sambi Ambuje Akunnungu, Akunnungu jwao, juŵaatyosisye mmakono ga mwenye jwa ku Misili. Ŵapopelelaga minungu jine, 8ni kukuya chisyoŵelelo cha ŵandu ŵa ilambo ine ŵaŵatopwele Ambuje Akunnungu kuti Ŵaisilaeli ajinjile, ni sooni ŵakuiye chisyoŵelelo chati mamwenye ŵa ku Isilaeli ŵachitandisye. 9Ŵandu ŵa ku Isilaeli ŵatesile kwa kulisisa indu yangalumbana paujo pa Ambuje Akunnungu ŵao. Ŵataŵile malo sya kupopelela pamatumbi mpela iŵatesile ŵandu ŵa ilambo ine kutandilila pa misi jamwana mpaka mu misi jekulungwa jajili ni mapupa. 10Ŵatawile imila ya maganga ni inyago ya nnungu jwa nkongwe Ashela pachanya pa kila chitumbi ni kuusi kwa kila chitela chachili ni chiulili, 11ŵatutumisye ubani pa ilisa yose ya minungu ja unami malinga ni chisyoŵelelo cha ŵandu ŵa ilambo iyatopolekwe ni Ambuje Akunnungu. Ŵantumbilisye Ambuje Akunnungu kwa ipanganyo yangalumbana iŵaitendaga, 12ŵaipopelele inyago yati Ambuje Akunnungu jiŵakanyisye achitiji, “Ngasintenda yeleyo.”
13Ambuje Akunnungu ŵaatumile ŵakulondola ni ŵakulola kwajamuka Ŵaisilaeli ni ŵandu ŵa ku Yuda achitiji, “Nnechanje ipanganyo yenu ya chigongomalo njitichisye makanyo gangu ni malajisyo gangu ni ngakuye malamusi gose ganapele achambuje ŵenu kwa litala lya ŵakutumichila ŵangu ŵakulondola.” 14Nambo ŵanyawo nganajitichisya, ŵalimbisye mitima mpela achambuje ŵao ŵati nganiŵakulupilila Ambuje Akunnungu ŵao. 15Ŵakanile kugajitichisya makanyo gakwe ni nganakamula lilangano liŵaliŵisile ni achambuje ŵao ni kugajalusya majamuko gaŵapele. Ŵaipopelele inyago yangalimate mpaka achinsyene wo ŵaliji ŵangalimate sooni. Ŵasyasisye chisyoŵelelo cha ŵandu ŵa ilambo ine ŵaŵasyungwile nachiwamuno Ambuje Akunnungu wasalile “Nkatenda nti yakutenda ŵanyawo.” 16Ŵagakasile malajisyo gose ga Ambuje Akunnungu, Akunnungu ŵao. Ŵakolosisye inyago ya ng'ombe siŵili syamwana kwa kusyana, iyoyo ŵajimiche chimila cha nnungu Ashela, ŵaipopelele indu yose ya mwinani ni kwatumichila nnungu Baali. 17Ŵatyosisye ŵanache ŵao ŵa chilume ni ŵa chikongwe kuŵa mbopesi jakutinisya. Ŵatendaga chisango. Ŵaamwiwe kutenda ugongomalo paujo pa Ambuje Akunnungu ni ŵantumbilisye kwannope. 18Nipele Ambuje Akunnungu ŵaatumbilile kwannope ŵandu ŵa ku Isilaeli ni kwatopola atyoche paujo pakwe ngananneka namose mundu ikaŵe lukosyo lwa Yuda jikape.
19Nambo namose ŵandu ŵa ku Yuda nganajitichisya makanyo ga Ambuje Akunnungu, Akunnungu ŵao, nambo ŵakuiye chisyoŵelelo siŵaiche nasyo ŵandu ŵa ku Isilaeli. 20Kwayele Ambuje Akunnungu ŵalesile kusipa ulinda ngosyo syose sya Isilaeli ni Yuda, ŵaajamwiche ni kujileka misi jao jijigalikwe ni ŵakugungumuchi, nipele ŵaatopwele atyoche pa chilambo cha ku Isilaeli. 21Ambuje Akunnungu paŵamasile kwaŵinga Ŵaisilaeli atyoche mu lukosyo lwa che Daudi, ŵantesile che Yeloboamu mwana jwa che Nebati kuŵa mwenye ŵao. Nombe che Yeloboamu ŵaatesile ŵandu ŵa ku Isilaeli aleche kwakuya Ambuje Akunnungu ni atende sambi jekulungwa nnope. 22Ŵaisilaeli ŵatesile sambi siŵasitesile che Yeloboamu mwanache jwa che Nebati, ni nganaleka kusipanganya, 23mpaka Ambuje Akunnungu paŵatopwele atyoche paujo pakwe, mpela iŵatite kusala kwa litala lya ŵakutumichila ŵakwe ŵakulondola wose. Kwayele ŵandu ŵa ku Isilaeli ŵajigalikwe kutyochela mu chilambo chao achinsyene mpaka ku Ashulu kwakutama mpaka sambano.
Ŵaashulu akwinjila ku Isilaeli
24Nipele mwenye jwa ku Ashulu ŵajigele ŵandu kutyochela ku Babeloni ni ku Kuta ni ku Ava ni ku Hamati ni ku Sefalifaimu ni kwaŵika pa misi ja Samalia malo ga ŵatamaga Ŵaisilaeli ŵaŵajigalikwe migole. Kwayele ŵajijigele misi jose jijaliji Ŵaislaeli. 25Nipele yatyochele kuti paŵatandite kutama mwelemo, nganiŵapopelela Ambuje Akunnungu, kwayele Ambuje Akunnungu ŵaatumile masimba pasikati jao, nombego gauleje ŵane mwa ŵelewo. 26Ŵandu ŵansalile mwenye jwa ku Ashulu kuti, “Ŵandu umwasamisye ni kwaŵika ku misi ja ku Samalia ngakuchimanyilila achila chaakuchisaka Akunnungu jwa chilambo cho. Kwayele Akunnungu jwa chilambo cho agatumile masimba pasikati jao, gagakwaulaga ŵandu, ligongo ŵandu ngakuchimamanya chaakuchisaka.” 27Nipele mwenye jwa ku Ashulu ŵalamwile, “Mummusye jwambopesi jumo mwa aŵala ŵajigalikwe migole, ajaule kutama kweleko kuti ŵajiganye ŵandu indu yanti Akunnungu jwa chilambo cho akuisaka.” 28Kwayele jumo jwa ŵambopesi ŵaŵajigalikwe ku Samalia ŵapite ni kutama ku Beseli, ni kweleko ŵajiganyisye ŵandu yakuti kwapopelela Ambuje Akunnungu.
29Namose yeleyo kila mpingo wa achaleno wo ŵajendelechele kulikolochesya minungu jao ni kujiŵika pa misi jimpepe jijaliji ja Ŵaisilalei, ni ŵajiŵisile mmalo ga penani pa matumbi, mwemula muŵaapopelelaga Ŵaisilaeli kuundanda. 30Ŵandu ŵakutyochela ku Babeloni ŵakolosisye nnungu jwao jwaakuŵilanjikwa Sukoti Benoti ni ŵandu kutyochela ku Kuta ŵakolosisye nnungu jwao jwakuŵilanjikwa Neligali, ni aŵala kutyochela ku Hamati ŵakolosisye nnungu jwao jwakuŵilanjikwa Ashima. 31Ŵandu kutyochela ku Ava ŵakolosisye minungu jao jajikuŵilanjikwa Nibihasi ni Talitaki, ni aŵala ŵaŵatyochele ku Sefalivaimu ŵatyosisye ŵanache ŵao aŵe mbopesi ja kutinisya kwa minungu jao jajikuŵilanjikwa Adilameleki ni Anameleki ni Sefalivaimu. 32Iyoyo peyo ŵandu ŵa ŵampopelele Ambuje Akunnungu, Ŵasagwile pasikati jao ŵandu ŵa uŵeleuŵele ni kwatenda ŵambopesi ŵakutumichila pa liuto lwa penani ni kutyosya mbopesi pamalo pao. 33Ŵampopelele Ambuje Akunnungu, ni sooni ŵajipopelele minungu jao malinga ni masyoŵelelo ga mu ilambo iŵaatyochele.
34Mpaka lelojino akutenda mpela iŵatendaga kalakala. Ngakwapopelela Ambuje Akunnungu ni ngakukuya mashalaiti ni malajisyo makanyo pane malamulo gati Ambuje Akunnungu gaŵalamwile uŵelesi ŵa che Yakobo, uŵapele lina lyakwe Isilaeli. 35Katama Ambuje Akunnungu paŵatesile lilangano ni Ŵaisilaeli ŵalamwile achitiji, “Nkajipopelela minungu jine, atamuno nkajikotamila atamuno nkajitumichila, ni nkajityochesya mbopesi syakutinisya. 36Nambo mumbopelele une Ambuje Akunnungu junantyosisye ku Misili kwa ukombole ni machili gamajinji. Chimungotamile une ni kundyochesya mbopesi syakutinisya. 37Katema kose chinjitichisye makanyo ni malajisyo ni malamulo gati nalembile kwa ligongo lyenu. Nkajipopelela minungu jine, 38atamuno nkaliŵalila lilangano linatesile ni ŵanyamwe, nkajipopelela minungu jine, 39nambo chimumbopelele une Ambuje Akunnungu, Akunnungu ŵenu, noneji chinankulupusye kutyoka kwa achamagongo ŵenu.” 40Nambo ŵandu wo nganapikana nambo ŵajendelechele kutenda mpela iŵatendaga kalakala.
41Nipele achalendo ŵa chilambo cho ŵaapopelelaga Ambuje Akunnungu, nambo ŵaitumichile inyago yao ya kusyana. Mpaka lelo jino iŵelesi yao akwendelechela kutenda iyoyo mpela iŵatendaga achambuje wawo.
നിലവിൽ തിരഞ്ഞെടുത്തിരിക്കുന്നു:
2 Mamwenye 17: YBV
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
Yao New Testament © The Word for the World Southern Africa and Pioneer Bible Translators, 2018.