2 Mamwenye 16
16
Che Ahasi akutendekwa mwenye jwa ku Yuda
(2 Indu ya katema 28:1-27)
1Pa chaka cha kumi na saba cha utawala wa che Peka mwana jwa che Lemalia mwenye jwa ku Isilaeli, che Ahasi mwana jwa che Yotamu mwenye jwa ku Yuda ŵatandite kutawala. 2Che Ahasia ŵatandite kutawala ali ni yaka ishilini ni ŵatawele ku Yuda kwa yaka kumi na sita achitamaga ku Yelusalemu. Nganatenda yambone paujo pa Ambuje Akunnungu mpela che Daudi ambujegwe iŵaitesile, 3pamalo pakwe ŵakuiye iŵaitesile mamwenye ŵane ŵa ku Isilaeli, mpaka ŵantyosisye mwanagwe pa mooto aŵe mbopesi jakutinisya, chindu changalumbana chiŵachitesile ŵandu ŵa ilambo iyatopolekwe ni Ambuje Akunnungu paujo pa Ŵaisilaeli paŵaliji nkwinjila pachilambo cho. 4Che Ahasi ŵatyosisye mbopesi ja kutinisya ni kututumisya ubani pamalo pati ŵapopelaga pachanya pa ikwesya ni kuusi kwa kila chitela chachiŵisi.
5Nipele che Lesini mwenye jwa ku Alamu ni che Peka mwana ju che Lemalia mwenye jwa ku Isilaeli, ŵaiche kuti aputane ngondo ni ŵandu ŵa ku Yelusalemu. Ŵansyungwile che Ahasi, nambo nganakombola kumpunda. 6Katema ko che Lesini mwenye jwa ku Shamu ŵauuchisye musi wa ku Elati kwa Ŵaalamu ni kwatopola ŵandu ŵa ku Yuda. Nipele ŵandu ŵa ku Edomu ŵasamile ku Elati ni kutama kweleko mpaka lelo jino. 7Nipele che Ahasi ŵaatumile ŵandu kwa mwenye che Tigilati Pileseli mwenye jwa ku Ashulu ali ni utenga waukuti, “Une ndili jwakutumichila jwenu jwangukulupilichika. Njise kumungulupusye kutyoka kwa mamwenye ŵa ku Alamu ni ŵa ku Isilaeli ŵaakugungumuchila une.” 8Che Ahasi ŵajigele ipande ya madini ga feza ni sahabu jijaliji mu Nyuumba ja Ambuje Akunnungu pamo ni mbiko jijaliji mu nyuumba ja mwenye ni kwapelechela nti ntuka mwenye jwa ku Ashulu. 9Che Tigilashi Pileseli ŵajitichisye chiŵendo chi che Ahasi, ŵaugungumuchile musi wa ku Damesiki ni kuujigala kuutenda wakwe. Ŵasamichisye achisyene musi wo ku Kili ni kummulaga mwenye che Lesini.
10Nipele Mwenye che Ahasi ŵapite ku Damesiki kukusimana ni mwenye che Tigilati Peleseli jwa ku Ashulu. Kweleko ŵachiweni chilisa chakupelechele mbopesi kwa minungu, nipele ŵachilembile chilisa cho ni yaikuti kusachilwa kuchikolosya, nipele ŵampelechele jwambopesi che Ulia. 11Nipele jwambopesi che Ulia ŵatawile chilisa cho malinga ni mcholo uŵauichisye mwenye che Ahasi akanaŵe mwenye che Ahasia kuuja kumusi. 12Mwenye che Ahasi paŵausile kutyochela ku Damasiko, ŵachiweni chilisa cho, nipele ŵachiŵandichile ni kutyosya mbopesi pachanya pakwe. 13Ŵatyosisye mbopesi jakwe ja kutinisya, ni ja magowolo ni ja yakung'wa, ŵamisile miasi ja mbopesi ja chitendewele pachanya pa chilisa cho. 14Mwenye che Ahasi ŵachityosisye achila chilisa chakalakala cha shaba pele paujo pa Nyuumba Akunnungu, chichajimi pasikati ja nnango wakwinjilila pa nyuumba ja Akunnungu ni chilisa cha sambano, nombejo ŵachiŵisile chakumpoto kwa chilisa cha sambano. 15Nipele ŵalamwile jwambopesi che Ulia achitiji, “Ntumie achi chilisa chekulungwa cha sambano chi kwa kutinichisya mbopesi syasikutyosyekwa kundaŵi ni mbopesi sya magowolo syasikutyosyekwa ligulo ni mbopesi sya kutinisya ni mbopesi sya magowolo ga mwenye ni mbopesi syakutinisya sya ŵandu wose, pamo ni mbopesi ja yakungwa ja ŵandu. Mmisemise miasi ja inyama yose yaityochekwe mbopesi jakutinisya pa chilisa cho. Nambo chilisa chakalakala cha shaba tindumie une kwa kuusya chindu kwa Akunnungu.” 16Nombe jwambopesi che Ulia ŵatesile mpela yatite kulajisya mwenye che Ahasi.
17Mwenye che Ahasi ŵasityosisye mbao syakusalalisya sisyaliji mumbali ni kutyosya masinia pa ikamulilo yaikusamichika. Ŵaumatukwile nkambo wa shaba waukuŵilanjikwa bahali uwaliji pachanya pa ng'ombe sya mikambaku kumi na mbili sya shaba ŵaŵaujigele ni kuuŵika pa chitamichilo cha maganga. 18Mwenye che Ahasi ŵatyosisye lipasia lilyatumikaga pa Lyuŵa lya Kupumulila, lilyaŵichikwe mu Nyuumba ja Akunnungu, ni kuugala litala liŵapitaga mamwenye paakwijilila mu Nyuumba ja Akunnungu kwaligongo lya mwenye jwa ku Ashulu.
19Indu ine iyatendekwe pa katema ka utawala wa che Ahasi ni indu iŵaitesile, yose ilembekwe mu chitabu cha chikumbuchisyo cha mamwenye ŵa ku Yuda. 20Che Ahasi ŵawile ni kusikwa mu malembe ga chimwenye ku musi u che Daudi, nombe che Hesekia mwanagwe ŵatawele pamalo pakwe.
നിലവിൽ തിരഞ്ഞെടുത്തിരിക്കുന്നു:
2 Mamwenye 16: YBV
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
Yao New Testament © The Word for the World Southern Africa and Pioneer Bible Translators, 2018.