Torolalana mazava

Omaly isika dia nahita ny vokatry ny fankatoavan’i Mosesy nanoloana ny iraka nampanaovin’Andriamanitra azy teo amin’ny ranomasina mena. Anio dia hijery tranga iray indray isika, momba an’i Mosesy ihany.

Rehefa nandroso ny dian’ireto zanak’Israely ho any amin’ny tany nampanantenaina, dia feno fimonomonomana izy ireo. Nisy fotoana ireo nitady rano ary nasain’Andriamanitra nokapohin’i Mosesy ny vatolampy dia nisy rano niboiboika avy ao. Fa rehefa nandroso teny anefa dia nitaraina indray ireto zanak’israely fa nila rano… Dia niala teo Arona sy Mosesy ary niankohoka nivavaka ka hoy ny Tompo taminy : “Alao ny tehina, ka vorionao sy Arona rahalahinao ny fiangonana, ary MITENENA amin'ny vatolampy eo imasony, dia hampiboiboika ny ranony izy; ary hampivoaka rano ho an'ny olona avy amin'ny vatolampy ianao, ka dia hampisotroinao ny fiangonana sy ny biby fiompiny.” (Nomery 20:8)

Nazava tsara ny torolalan’Andriamanitra teto. Rehefa niverina teo amin’ny olona anefa i Mosesy, noho ny hatezerana tamin’ny fikomian’izy ireo dia nokapohiny in-droa ny vato (and 11)fa tsy niteny izy araky ny nolazain’Andriamanitra ho ataony. Nisy ny vokatra satria nivoaka ny rano fa tezitra tamin’i Mosesy kosa Andriamanitra noho ny tsy fankatoavany. “Satria tsy nino Ahy ianareo hanamasina Ahy eo imason'ny Zanak'Isiraely, dia tsy hitondra izao fiangonana izao ho any amin'ny tany izay nomeko azy ianareo.” (Nomery 20:12)

Andriamanitra rehefa manome torolalana dia ny hanehoana ny Voninahiny izay. Ary tena namotsitra ny iraka teto i Mosesy satria dia nitazana avy lavitra fotsiny izy fa tsy tafiditra tao amin’ilay tany nampanantenaina. “ Ary hoy Jehovah tamin'i Mosesy: Miakara amin'ity tendrombohitra Abarima ity, ka tazano ny tany izay omeko ny Zanak'Isiraely. Ary rehefa hitanao izany, dia hangonina any amin'ny razanao koa ianao, tahaka izay nanangonana an'i Arona rahalahinao; fa nandà ny teniko ianareo tany an-efitra Zina, tamin'ilay nilan'ny fiangonana ady, ka tsy nanamasina Ahy teo amin'ny rano teo imasony” Nomery 27: 12-14

Mivavaka aho mba tsy ho votsitra amin’ny anjara voatendrinao ianao. Ny Fanahy Masina anie hanampy anao hatrany hihazona ny fankatoavanao na tahaka ny ahoana na tahaka ny ahoana ny sedra mety manoloana anao.

Fiadanana ho aminao!